LENNY-ACADIA -2

           Ka hna kal tur nen zing dar 3 ah ka mu ve ta hram a, ka bul hnai ah a awm miahlo ka mut hnu khan, zing dar8 ah ka tho a, zing karah chaw ka ei ngailo keima ka awm hran hnu hian bawl  hman in ka khawsa thin tlat lova, mahse tlai lam ah erawh ka theihtawp a tui hnai ka ei ve thin. Ka in phih fai sawk sawk a, ka rilru lang hmasa ber chu nizan khan a chhuak ta nih ka ring a, mahse a thawmhnaw engkim ala awm vek, kitchen lam ah ngawi reng in ka phei them them a, a thil siam rim chuan ka pum a dek zar mai, ka riltam zia ka hre chhuak vawng vawng.

       Nizan khan kan in hnial buai ta lang in engmah kha ka puar khawp ka ei lo reng a ni.

“Good morning, Acadia” nui sangin Apron a vuah chu hlip pahin min rawn pan phei a, chet sawn ngaihna pawh ka hrelo, hepa hi a rilru buai nge, ruih a nei zawk, nizan thil thleng kha engmah hrelo ang maia a awm chu mak ka ti tak zet.Ka dar tawn tawn ah rawn chelh in, ka chal ah rawn fawp zauh a, “I hna kal hma  ei hram rawh tlem tal” Table lam ah pheiin chaw ei a siam mawlh mawlh a tawng ve na chang pawh ka hre chuang lo.

          A che vel  chu ngawi rengin ka en a, chaw ei a siam zawh a ka bul a a rawn thut thlak pah chuan “I chawhmeh duh ber prawns ka siam a nia” A phone rawn ri chu a melh zauh a, a khup nghal thak a, ka en zawk a mahse rei ka en lo, min lo melh pah ve zuk a vang chuan chaw chu ka bar nghal a, ka rin ai tak in ka eitha phian, chhun lam ah ka ei leh chak dawn tih ka hriat vangin thleng ka seng pahin Tiffin ka siam nghal zat a, “Va in siam rawh thleng ka lo seng fel ang, I tlai palh ang”

             “Ervin, engtin pawh awm la, ka engah mah a thawk tawhlo, awmna tur I hre thlawt lo nih chuan I duh chen chen I awm dawnnia, mikhual satliah ang in, I huang chin hria ang che” room lam ah ka phei nghal a, a thleng seng thawm chu ka ngaithla ru deuh kar a, ka inthlak lai chuan a rawn lut ve nghal a, “vawiin tlai ah enge ka lo siam ang” ka ngawi reng a chhan pawh ka tum chuang lo. Engmah mah ngai lo anga awm ka tum zawk a mahse a mah zawk hian ka rilru natna leh ka thinrim na engmah mah a ngailo zawk hian minti thinrim leh zawk.

           Nidang zawng aiin ka kal hmat phah a, Ka Pi dawr ah ka lut kawi a, “I mikhual chu Dian-i Aizawl lam bawk em ni?” Ka pite hi chuan min ngaihtuah thin a sin aw, a harsa zawk si hi miin chawhmeh tha deuh lo zuar se minlo lei kep thul, pawisa han pe dawn ila a tang ve tang zel a mahse ka pe lui thin, Inrinni zing ka bazar erawh hi chuan an karkhat tla tur leh sa kg2 hi ka leisak ve ziah thin, Nuai thum dawng ang mai hian zuk lawm thian thin a mawle!

         “Aw Pi, Aizawl lam a ka thian a nia, hna thil vangin a rawn awm ve rih dawn a” min ringlo hmel pawh a pu chuang hleilo a  “hei mikhual neih chu zing chaw te ka ei a, mi bawlsa ka ring a, nuam riau a sin” a nui ve kar kar reuh a “Pi ka kal a nia aw, tlai ah ka rawn peng haw dawnnia”

                    Office ka thleng hma ang reng viau, dar 9:30 tan a nia, a hun chiah chiah a ka thleng thin thla 4 dawn ka thawh ve hnu hian Pathian zar ah ka la tlai ngai hauh lo, mahse ka thleng hma ngai lem hleilo a 9:15 vel ah ka thleng kan thawhpui thenkhat lo thleng tawh te chuan a ngaihna hriat loh hmel deuh hian min melh hlawm a.

 “E khai Kan pi chu, thawh a hai nge, thil tha lam a thleng zawk aw” Pu Raman a tih lawng lawng chuan ka chhang lem lo ka nuih sak ringawt a, court tur an awm neuh neuh vang hian hna awl tak hi ka nei ngailo , ka thil ziah tawh han translate leh nen computer a chhut luh leh nen, Nileng deuh thaw a khawl han khawih hi chuan In ka thleng hi ka dar kham lutuk thin hi ka hna ka hne na ber a ni.

              Ka thian kawm ve ber, Zawmin, lo kal rawh thil ei tawh ang, ka riltam ang reng viau nia tukin chu  chaw ka ei mumal lo lutuk a” ka tiffin ka khai lang va va chu a rawn zuang phei dawrh a” Acadia, nang hi ngati nge, I chhungte an rawn zin chiang mai” ka nui chhuak hak a.

                  “ Nula fel na ngang chu dar 5 ah ka tho a, exercise ka la a ka hawng a, eirawng ka bawl a, chaw ka ei a , chhun pai tur ka la rawn siam zui, kei ang hian tho hma ve ta che” a nui tlawrh tlawrh a” I mumang I la rawn thawh chhuah pui nih dawn hi, a nih chuan ka kalsa dawn che nia” Ka chek tlak tlak a “ I va han mawl tak, ka rawn pai kep che lawm, rawn thu rawh” kan pahnih chuan kan ei dun a, tui a ti ve hle tih fian a hawlh zin dan ah ka hre mai.

                Pu chhuan’an “Acadia, zan in tlai kha I hman ang chu maw ?” enge mawni le, ka ngaihtuah ngial pawh in ka hre chhuak zo thlawtlo,  “Nula senior pawh inla nilo a, in haihawt reuh bawk sia” Zawmi’n a hmui a ti sawi zak chu ka va melh hram a. “Pu Luaia fanu man hlanna ah khan kan zavai a kan va tel ve loh ten, nizan ah group ah pawh kan sawi kha mawle”

      Tul tawhlo zet ah chuan ka phone ka han check hram a, Nizan thilthleng vangin ka phone pawh ka khawih miahlo kha nia, “Awi nizan ka chau tuk, ka mu hma lutuk a, group ah pawh ka lo lut reng reng hleinem bak ah ka theinghilh chiang hle mai, a van zia lo tak e aw “

              “Aw a ho lutuk, kan tlai ta duai pawh ni hleinem kan han in remind leh mai mai nihkha, ti khan kan kal ho nghal dial a niang chu” Pu Chhuan an a rawn tih chuan ka bu nghauh a, mahse Ka thawmhnaw hak hi inneih man hlan na hak chi a ni hlawllo, a dum hlang vek, mitthi ina kal tur ka ang zawk em mai, dar 4 hunserh an tia, Ramzotlang lam a nih vangin dar 2:45 ah chhuah an tia, “ ka zuk inthlak lawk a nge, dum suit a kal chu ka tuar hmel em mai”

              An nui deuh hak hlawm a, kei leh Zawmi chiah nula kan nia a bak chu ka nu  te leh ka pa te ang rual vel te, nupui pasal neihna la rei lo hlawm te an ni fur hlawm a, Nu Senteii’n “Nie , nula awm chhun in nihkha nalh tak khan han kal teh u, in zawng ve nghal dawnnia, mi nupui pasal neih ni hi advantage ah lak ve tur” Kan nui ham ham a.

                      In ka thlen in kawngka a lo kalh a” ka kik vak vak pawn a rawn hawng mai theilo, ka call a, a rawn la pick zat a, “kawngka rawn hawng rawh” pawr thei ang berin ka han ti leh pek a, phak chual hian a rawn hawng a” In va bang hma ve, I nuam sam lo zawk em ni?’ ka chhang chuang lo ka room lam ah ka lut a, khum chu a lo hnawk deuh niaih a, a mu a nih ka ring mai nizan khan a mulo a ni ngei ang, darkar 8 a mut loh a buai ziah thin kha a ni sia.

        Ka kawr thui thar tir Spring green color leh ka kekawr dum ka ha a, pheikhawk sang leh bag kher hi chu ka insum theilo ka lei nasa ngah pawh ka ngah ang reng, office ah pawh a sang  ka bun tam, flats hi ka ngaina lutuk lo nen, ka sam ka thlah a, ka han in makeup leh thuak thuak a “khawnge I kal dawn a” ka chaw ei chhuah tur hrilh ka tum zet na in, engmah sawi loving ngawi rengin ka chhuahsan a, kawngka zawn ka thlena  a thaw deuh hak chu ka ngaipawimawh hran lem lo.

             Office ka thlen chuan anlo in peih tawh a, Motor keimah in ka kawl hran bawk a, ka hna thar hmuh lawm nan a Ka pa min lei, lunglei lam traffic a la zia viau a motor ken chhuah pawh buaina a tam lem lo bak ah inkhawm nan leh len zeuh nan bak ka hmang lemlo bawk a, Zawmin leh Nu pathum ka phur chho a ka rilru ah Ervin a awm deuh vang vang , nidang ang nise ka awmdan tuar theilo in, a thinrim na a ti lang tur a ni sia, mahse cool leh dam tak in ka awm ang ang ngawi reng a min en liam mai chu mak ka ti.

                  Ka lak ah hian engtiang fakau a thil pawi nge a khawih a, tiang em em a in thiamlo a a awm le? Peng kan thlen in an au rual deuh that ah ka ngaihtuahna tang ka harh zawk a ka break nghal tuarh a” Enge mi ka su mi” ka hlauthawng tak zet “Nang hi I phurh ah chuan zen zen loh tur nih hi, I ngaihtuahna I kawm nasa em mai, kan biak mawlh mawlh che pawh I hre theilo nia, dinglam ah khan peng rawh kan ti che mawle”

        Inthiam lo deuh chuan ngaihdam ka han dil a, nutling tawh niin an fate rual deuh thuak ni mahila, mi hi an  thian kawm ve bawrh bawrh a, ka khawhar tur pawh min hnem nasa, ka in ah vawi4 lai chaw kan eikhawm tawh a, nutling hlir kawm tih tak ah , ka chhungte besei ang ka la  phak lo ang tih chu ka inhria mahse ka thawhpui te vang liau liau hian ka puitling ve tawh riau chuan ka hria.

        A hmun kan thlen chuan mi an lo awm tam tawh khawp mai, ka rin ai tak in an sawm tam a, kan inneih sawngbawl hautak zet hi chu ka vei ve thin. Peon harsa ve tak anga ka lo ngaih kha In leh lo an lo nei ropui ang reng khawp mai, fapa 3 leh fanu pakhat neiin an puitling hlawm em em a mahni mai bak ah chhungkaw chawm thei vek khawp a puitling a chhuah tu Pu Luaia hi pa nelawm tak a nih avang a ka ngainat thin piah lam ah ka ngaisang thar sawt.

            Serkawn ah Nu Senteii kan thlah a, in lam ah min nghak tu an awm a ni tih ka hriat na chuan mawng a hawlh ang maiin min tur et et, thinrim in amah hmuh duh lo viau mahila min lo nghak reng dawn tih ka hriatna chuan ka awm a ti nuam thei chuang hauhlo, darkar khat dawn kan thu khaw muang a, a motor nei tur ber in haw rawt tut kha thil mawi a ni chiah bawk silo nen, anni lah nutling awmkhawm tih tak ah an fate chungchang leh pangpar lam mawlh an buaipui a. Zawmi erawh an pa in a rawn hruai vangin han ti ti pui ve chiam ngaihna ka hre lemlo nen, kil khat ah phone ka khawih niap niap a.

      Ervin miscall leh msg a tam ngang mai, ka open duh chuanglo a reply pawh ka tum hek lo. Ervin mai bak ah U Mama miscall leh number hriat loh tanga miscall ka dawng a, U Mama call back ka tum lai tak in Dar 9 dawn thuak ah Nu Parteiin hawn a rawt chu ka thaw huai mai, awmpui nei fir fer an ni hlawm a, an pa te in lam ah an awm nen, in lam an ngaihtuah lo deuh te pawh a ni nge, kei  a nula ber hian ka ngaihtuah ber zawk chu a ni sia.

        Kan inthlah zawh meuh chuan dar 10 a ri dawn thuak a, In ka luh hma in ka veranda ah mipa 3 tei deuh thuau thuau ka hmuh chuan ka rilru ah hlauthawnna rawn awm nghal a, veranda light an on lo bawk nen, tim deuh  da in, step ah ka chhuk ngam chiah lo, Ervin a awm tho tih ka hriatna vang in telm chuan ka thla chu muang ve deuh thon a in ka zuk pawh ngam chiah lo nidang ang chu nise  kan innei tu te ka pun ei awm si a, Phone a torch light ka on a, kan in nei tu te verandah tang ka zuk chhun de de a, Mama rawn hawi chho nen kan in hmu thut chu rang lutuk in ka chhuk nghal nawk nawk a.

       Ka bun sang ve bawk nen, ka duh ang chuan ka kal tha thei der lo thung, tiang em em a Mama thinrim kha ka la hmu ngailo “Acadia, I phone kha ngatan nge I tih? Miscall leh msg zo zai te kha i hmu lo em ni? Zawhna hlir in a khat, ka inthiamlo ve reng, Mipa 3 dang lo awm ve ka hmuh te kha U Mama thian te Lenny tel in an lo nia, min lo zawn anlo tum mek niin, in chhung lam ah Ervin an Police a hmelhriat alo be mek bawk a.

               Ka inthiamlo khawp mai, “ I kal na tur te chu Ervin tal hi hrilh ta che, I hrilh lo a nih pawhin phone in I haw tlai tur I sawi thei lo mi” Mama meuhin min hau chu ka mittui a hnai leh kuar tawh, a thian ten “ Marvin, duh tawk rawh, hei engmah thleng lovin him takin a rawn hawng lawm, bak ah in farnu hi in veng leh lutuk a hun thawl te pawh a mamawh ve nih hi” an lo tih chuan “Duati minti hlauthawng em a ni, sorry” tih pahin ka mittui khap per sak chu a rawn hru hul nghal mawlh mawlh a.

              “Enge in rawn tih dawn hlawm a? Surprise hi ka lawm teh chiamlo tih I hriat kha Mam” a nui deuh sak a, kan thianpa, kan college kal pui thin in nupui a nei dawn a vawiin hi  man hlan ni nia, naktuk ah an innei dawn a chu chu kan rawn tawiawm ve dawn mawle” ka thawh pah chuan “keipawh vawiin ah kan Peon Pu Luaia fanu man hlanna ah lawm kan kal office ho”

                An thianpa pakhat in “ tunge a hmeichhe hming chu? Khawi veng nge a rawn ti ve hlut a” room kawngka din pah chuan “Awi a hming pawh ka hre leh tawhlo, mahse Ramzotlang ah nia” room lam ah ka luhsan nghal a, Ervin, bathroom tang rawn chhuak nen kan in tawng a, ka hmuh sual nge a hmui chu a duk tlatin  ka hria, nidang a a call ka pick loh a a thinrim thin nen tun tum chu dam thluam hian ‘Call i Pick thei silo a, kan mangang lawm” min kal pel nghal vut a.

             “I call chhan ka ba lo, mikhual i nih ang takin I huang chin hre rawh ka tih kha” ka inthlak malh malh a, ka va phei leh chuan chaw ei anlo in siam mawlh mawlh hlawm a, “ehe in la ei na nge” Lenny chuan ‘kan riltam har deuh a’, mahse ka ngaihtuah a keimah min nghak a ni tih ka hrethiam  mai.

                Chaw ei kham ah kan titi malh malh a, Ervin erawh a tawng lem lo, “Duatin engtin nge kan mut dawn” U Maman a rawn tih chuan” kan unau in mu ila, midang ho room chhak ah khian mu se a pawi em” Hruaia, U Mama thianpa chuan  “pawilo e mahse he tah common room ah chhuat ah mu ila a nuam zawk ang a, thlang lam tukverh khu hawng ila” an pawmpui hlawm viau.

        Ka chau bawk a niang, zan hmasa ka mu tha lo nen , kan mu fel deuh chiah chu ka muhil zui nghal mai a, thawm awm deuh hlat ka hriat chuan ka meng nghal kawk a, Ka U ka ko nghal a” Duati mu rawh engmah nilo, ka rawn mu dawn” keipawh chu thawh tum lemlo chuan ka mu zui ve nghal mai a.

               Zing ah nula ber ka tho tlai ber a, eirawng an lo bawl sap sap a, inneih na chawhnu lam ah daih a nih vangin an hmanhmawh lo hlawm ang reng viau, kan Pu leh cashier kal an tum a, midang erawh min sawm tho na in, office khar ngawt theih ni silo, kan kal ta lo hlawm a.

                  Mama’n minlo call a “Duati naktuk lam ah phei kan tum leh tawh sia, zan in chu thiante kan tlawh kual dawn a, kan rawn haw tlai ang I duh leh lo mu mai rawh” ka aw ve mai a, Ervin vang hian haw thuai thuai ka chak thin, mahse ka hmuh hian a mah run luih leh tum khum reng erawh ka bansan thei chuanglo. Ka ngai ngawih ngawih a, ka thlahlel, min duat na te dawn ka chak, mahse dawng turin ka in hawng theilo.

               Beidawng leh rilru na lutuk a min siam kha ka la tuar dam theilo a ni ber in ka hria, in ka thlenin thutphah ah kawi sawi fe hian a lo muhil a, mut mai mai duhlo thin si, chhun mut te pawh a ching ve tawh a nih dawn hi, a hmel ka en hian a dawl dang mai bak ah a cher zia ka hmu a, a sawi ang khan hna thil ah a buai hle a ni ngei ang, mahse chumi vang mai a, rilru tih nem leh ka tum tawh rihlo.

     Room ah ka lut a, ka inthlak fel chuan a lo tho leh tawh a, nui sang hian “I va rawn bang hma ve” ka chhang lem chuang lo fridge ka hawng a, Ice cream ka la chhuak a khaw lum bawk nen, kitchen table ah ka dah a ka ke dinglam thutphah ah ka dah chho a, ka ei nghal mial mial. Min rawn pan phei a  “ei tur I duh em” thingpui hi ka naupanlai tang ka in lemlo a miin a len hrehawm ka tihna chhan pawh duhlo ti ila tlawmngai ah min ngai tlat thin hi a ni.

                     “Ervin en teh” ka han ti dek dek a “Acadia, engtin pawh min ankhum rawh pawi ka ti lo, mahse min biak duh miahlo hi chuan ka tuar theilo tih i hriat kha, khawngaihin, enge maw tal sawi ve rawh, ni3 lai ka awm tawh, vawi khat pawh pangngaiin minla be miahlo nia” ka nui deuh hak a, a zat vang erawh a ni lem lo tih chu amah pawn a hrechiang khawp ang le. “Ervin, enteh heta awm tur hian ka sawm reng reng lo che a, I awm duh a ka awm tir mai che ni, zawhte pakhat ang ah sawn lo in ngai ve tawp rawh”

              Zawhte hi ka ngaina em em a tun ah Persian ka vulh mek “Acadia, zawhte pawh ka tluk lo chu ni hi, i mut pui bak ah i lo haw apiangin i bia a, a chhang thei daw hauhlo che tih I hrethiam chung pawn I be lui a, keiin ka biak che pawn min chhang duh silo hi hreawm ka ti sin”

                 Ka thutna bul a a rawn thu tur chiah chu ka tho nghal hmak a, ka ban rek ah min rawn vuan a, “Acadia, nakin a i inchhir leh na tur ti hauh suh ang che” ka melh reng a “ Ervin, ka in chhir lo ang tih ka tiam a che, ka awm awm in min awm tir rawh, thla 3 chhung khan min rawn tlawh lova ni enge maw zat min be lo bawk, I tello a awm dan leh nundan ka lo zir vek tawh a lawm”

                 “I zir chhuak em? I passed em?” min nuih deuh sak pah chuan ka kut chu a la chelh reng a, ka phelh tum chuan a kut chu nghet takin ka chelh a” Ka passed tawh ka tilo, mahse ka la zir mek, ka passed ngei bawk ang” ka kut a chelhna chu a hma aia na in a rawn hum a, keiin theih pa tawpin ka kut pahnih in phelh ka tum a, a ner deuh sawk ka hmu a , min thlah ve ta nge nge a, a kut chu a hup nghal hmak a thutna tang tho in, room ah a lut a.

              Eirawng ka bawl a, ngawi rengin TV a lo en a ka va hawi phei leh zeuh a, a lo muthlu leh lawp thin, ka ngaih chu a tha chiah lo, nizan ah a mu tha lo niang, ka u thiante ho nen an mu dun bawk sin en, chaw kan ei pawh chuan ngawi rengin kan ei a, tlai ah ka eirawng bawl laia a in bual khan kawr ban tluan a lo va ha a, khawlum ka tih tehreng nen, lum a ti ve lo nih dawn hi ka ti rilru mai a, a tuk inrinni a ni bawk a, ka u te haw tur lah chu an thiante an tlawh kual nen, dar 12 dawn ah anlo haw a, thutphah ah kan lo muhil ve ve a.

           “Duati lo kal rawh mu ang lem” ka u in ka chal a rawn fawh zauh pah a a tih chuan ka harh zawk a, an mutna tur ka siam sa bawk a, ka u thiante ka mangtha hnu chuan room lam ah ka phei a ka muhil leh mai dawn a ka mut a chhuak tawh hauh lo.

                               Dream blast ka khel mai mai a, ka u in rawn mut pahin “Duati engtik nge chawlh I neih ang, I u Bena pawn a ngai tawh che nia, karkhat tal cham in rawn haw phei la, bak ah hmuh phak lova I awm reng hi hreawm kan ti tlang a ni, bang daih la tha ang” a thu tak ang reng viau, “ka hna neilo min buaipui hlawm teh reng nen, ka nei fel chiah a bang rawh in tih leh si te chu a” a nui deuh suk a, phone a kheuh pah mawlh mawlh a.

                          “Nupui nei dawn ta ila, enge in ngaihdan?” ka tho deuh hluai a, phur fe hian “ U Mapuii mi” an in zui rei ve tawh an ni pahnih pawh hi, U mapuii te chhungkaw lam buai vangin an inneih tum hi vawi 3 lai an thulh tawh a, ka khawngaih ve thin, palai an tirh hnu ah  eng eng emaw buaina neuh neuh a lo awm leh a an thulh leh thin kha  a nia, “Mam, i ti tak tak em? Nei vat rawh, naupang nen a in awm te pawh ka chak ve tawh, ka thiante ho pawh an vah te nen an in awm a, ka chak ve thin”

           “ Thla leh hian palai ka tir leh anga, buaina neuh neuh kan nei leh nih chuan in tlah mai pawi ka ti tawhlo, ka tan a khuanu ruat a ni lo te pawh a niang” a ti chuai raih chu ka khawngaih viau a, “U Mam, i beidawng hma lutuk a nih kha,, a rem tawh  em em ang ka tiam a che”

                Zing chaw kan ei laiin “Ervin eng tik thleng nge i awm dawn” U lenny an a tih chuan amah pawh en lovin, “ka la chiang lo , ka thil tum ber a hlawhtlin vel ah ka rawn haw phei ang” ka U te pawh dar 11 vel ah hmanhmawh lemlo takin an haw phei ta hlawm a, nizan lam a ka u thu min hrilh chu ka inthlahrung angreng viau, a dik ka ti fu bawk.

            “Duati, Ervin nen in inkawp dan hi, innei in ni chuang silo a hetiang lutuk hi chu nangmah I zahawm loh ka ti khawp mai, I nun a nia, zalenna  I nei, innei ula ka hnial reng reng lo mahse in awmdan hi chu, innei chuang silo hetia nupa ang maia khawsak hi chu a fuh ka ti lo khawp mai, mihring hun hriat a ni lo a, enge maw vangin lo inthen ta ula midangin engtin nge an pawm mai theih tawh ang che”

             Aizawl lam a kan khawsak dan ka U te leh thiante hian min hriatpui vek a, min zilh ve thin, thian hi ka kawm em em lo bawk a Ervin nen kan in kawp deuh chawt a, ka khawvel hi a zim ka tih chang a tam ve thin tho mahse Ervin kiang a ka awm hi chuan tumah ka ngai lo, ka bul ah awm lo mahse midang bul a awm hi ka peih lemlo, ka engkim a ka engkim hi a ni tawp, a mah ah hian ka in nghat lutuk mah mah tih ka hria, mahse kum6 lai ka zui tawh ka engkim ka pek tawhna mihring lak a ka in nghat chu ka tisual em ni?

                Ka U te haw hnu chuan thawmhnaw ka su zuai zuai a, in chung ah ka han in zar a Ervin erawh hna a thawk nge ka hrelo, zingkar tang khan laptop a vuan deuh chawt a, vawiin khawlum dan em em chu, dawr ah Ice cream leiin ka chhuak zui nghal a, ka hrilh hran lem lo, a duhzawng tak lei sak loh ka duh viau na in, amah ka khawngaihna leh hmangaihna hian duhsakna tinreng hian a hual tir si , a ngainat ber mai black current ka lei sak a, in ka thlen in ngawi rengin ka pe a, lak pahin min nuih deuh sak a.

            Kawr banbul leh kekawr ban bul nen ke lawngin a vei a vei a, ka va hawi phei a ban vel sen deuh thluah tluah chu mak ka ti viau, thosi ka nei ngai bawk silo, ka in sum theilo ka zawt ta nge nge a, “I ban leh I mal vel kha tinge? Thosi in a seh che mi a? A ngawi reng a min chhang chuanglo, pawr fe hian “Ervin ka biak che chu I hrelo mi” min rawn melh zawk a, thlang lam balcony chhuah pah chuan” a nih dawn hi mawle, thak ka ti reng a’

                  “Zanin  tangin thosilen khi zar tawh la tha ang” ka ti deuh hmuk a, a ruk tak chuan ka ngaihven lo theilo a ni, ngaihven anga lan ka duhlo na in ka insum thei chuang der silo a. “Nu berin I tih tlat te chuan” a nui deuh hawk a, ka huat tawk a tling leh em em a,Ka phone a rawn ri ral ral a, Pi-teii lo niin “Duati i va rawn leng duhlo em em ve mawle, kar hmasa lah ka rawn kal ang itia I rawn kal tawh mang silo, naupang ho pawn an ngai ve tawh che lawm, zanin chu chaw rawn ei phei rawh”

               Kal san ka hreh a ni, awmlo angin ngaih tum hram hram mahila a harsa ka ti, ka khawhar pawh hlau miahlo tu, ni tam tak min be duhlo tu khawhar tak a a awm tur hi ka ngai ngamlo leh bawk si “Pite hei mikhual ka nei a, a van rem awm love, nidang ah ka rawn ei mai dawn mi? mahse naktuk ah inkhawm ban ah erawh ka rawn phei ang”.

               In chhung a rawn luh pah chuan “kei chu i zawhte ang lek ah sawn min ngai rawh, I duh na na ah va kal rawh” a va han nghal thin tak e aw, “ ka zawhte pawh I tluk lo e a” a nui deuh hawk a, a ban sen ka tih kha rawn duk tial tial a, ka en chiang a ka hlauthawng telh telh. “Ervin thosi seh a ni theilo, kha a duk tawh nia’