JIMMY LALMUANPUIA -1

 

            Naktuk ah hian in inchhung ah ngei ka lawi dawn a sin chu thu chu i hria nia lawm ni? Tinge i ngawih reng si? ka enge maw I  nih le? Min pui rawh....



           Hmeichhia pawh ini lo, mipa tur hmeichhia a piang i nih kha tih pah chuan min rawn hnek leh chawrh a, Lalmuanpui ka sawi vek dawn a nia tih pah chuan a room chu chhuahsan'in na tawkin a kawngkhar chu ka han khar vak a.

 

                       Inhnuai lama chhuk pah chuan Nute Lalmuanpuia hian min hnek leh tawh ania tum bur chung chung chuan Jimmy nu Nu Engi (nute tiin ka ko thin) bul ah chuan ka vui leh zawt zawt pek a, ka hnunga min rawn um tu Jimmy chuan nuteii theihai siam lai chu hmawm zauh zauh pahin "enge ka T-shirt lei thar min chuh tlat na ni, hmeichhia a nih chuan hmeichhe thawmhnaw te ha ve se", a rawn ti bawng bawng a.

 

                    Nuteii chuan "in puitling ve dawn tawh ti khan awm reng suh u in zahpui awm lutuk kha hei hi ei rawh u, bawiha u zawk I nihkha, dawh ve thin ta che, hmeichhia kut an thlak ngailo," a tih chuan... ei loh hmel fahran hian min rawn melh leh khera... ka thinrim lutuk chu...ka theihai ei lai chuan a hmaia vawm pah'in... ka tlan haw san ta daih a.

            Jimmy te chhungkua  te nen hian kan pian ve hma tang tawh a In thenawm tawh kan ni a , kan unau hi pathum kan ni a.mipa pakhat leh hmeichhe pahnih kan ni a, a naupag ber ka ni bawk,kan upa ber hmeichhia a ni a.

               Vanduaithlak tak mai'in kan milai, kan mipa neih chhun hian min boral san tawh a , diktak chuan kan rethei em em bik lova mipa awm chhun ni bawka... ka u chu anlo duat sual ve deuh bawk a, kum4 liam ta khan rui chungin chak takin bike a khalh a, a accident-a min boral san ta a ni, kan tuar em em a, a bik'in ka pa hian a tuar thiam lo lehzual.

              Kei hi Katherine Lalrinsangi ka ni a... tun'ah hian BA Political science ka zir mek a, ka u Ruthi erawh Horticulture department ah AHEO niin a thawk ve mek bawk a, ka unaunu nen'a kan mize in per san dan chu lei leh van hi a ni ringawt.

              Ka u chu nu zem mai zaidam bawk si, hmeichhe diktak hi a ni hliah hliah a, kei ve thung chu mipa tur hmeichhia a piang min tih hi haw hle thin mah ila chu chu ka nihna diktak a ni, ka pian leh ka hmel ka sam velah chuan ka nu vak lo tih hi mi chuan an awih kher lo ang.

 

           Ka che zia leh ka duhzawng hrelo tan chuan awih har tak ani ang mahse, ka che zia leh ka nunphung chu mipa nen danglamna tlem te chauh a awm thung. Ka thin chhiat zia lah tlang hriat.

   

        Kan thenawm, Jimmy te pawh kan unau ang thoin pahnih chauh mipa ve ve an ni a, an ni pawh mize in per san lutuk an ni, kei leh Jimmy hi mize in ang tak kan ni a, kan duhzawng a in an thin vang hian kan in tih buai phah fo reng a.

 

            Jimmy u David ve thung chu ka u ang chiah mize cool tak leh mi chim lim tak a ni a, mahse kum12 ka nih a ka hmuh bak kha ka hmu ta lo, phai ah lehkha zir in a awm char char a, a lo haw ve lai lah hian kan zin lai leh kan awm loh lai nen hian a in nang thei khawp a, ka ngaina lem lo bawk a pawi tihna pawh ka nei ngailo. Tun ah phei chuan Mumbai ah company pakhat ah hna sang tak chelh in a awm mek a ni.

 

 

            Pi leh pu ten khual khua a chhungkhat te aiin thenawm tha an hlu zawk an lo tih hi Jimmy te chhungkua nen'a kan boruak ah hian a chiang khawp mai, kan nu leh pa te pawn tu ve ve mah min en hrang ngailo, kan in pawh em em a.

 

 

              Kan tet lai tang tawhin Jimmy nen ngat phei chuan thil in ang kan neih loh chuan kan ti tau a, kan in thik zel vangin tu ve ve pawh thil in ang min lei sak zel thin, kan tet te tangin kan in kawm ngeih em em a mahse, kan in ngeih chuang thak lo a,kan awm tlan loh lah in kan in ngai si, Ui leh kel thlun pawlh min ti hial thin reng a ni.

 

                   School kan luh tan tirh atangin school khatah kan la lut dun char char a, mahse kei aia a kum 2 vel a a upat avang in kei aiin pawl khat in a pawl sang zel a, College ah pawh kan kal dun zel a,nu viau lo mahila, Jimmy nen hian tu nge ngaihzawng nei tam thei thei tih ah te kan in el a, Jimmy hi zawng a hmelthat leh a pa em hi chu thu hran a zei hrawt hrawt a nia, chuvang chuan ngaihzawng neih tam lam ah hi chuan ka tluk ve thei thlawt lo a ni, kei chu mipa ngai reng hi thla thum aia rei ka ngaizawng theilo, ka hne zel thin.

 

 

                Jimmy anglo tak a ka fair ve em em na chu tumah ka kawp ve ngailo, ka duh tawh loh chuan chiang tak in ka hrilh tlang hmiah zel. Kan mo nu hual min ti thin tu ka nuteii (Jimmy nu) chu ka nu nen ka en dan a dang lo... a bula ka pangchan dan lah a dang hek lo, fanu nei lo a nih vangin min duat em em a, ka nu leh pa pawh ka u boral hnu tang khan Jimmy hi an fapa ang maia en in an duat hle bawk.

 

 

                   "Kate hi chu kan mo nu tur a nih hi, a tet lai tanga kan hual lawk tawh a nia, han puitling deuh se," a tih chuan Kei lah chuan zak hauh lo hian a tu tan zawk nge min duh? ka han ti deuh ham ham a, ka nu chuan "I va han zamlo ham ham tak e aw kal rawh I nuteii te hi thingpui va lum rawh" min tih chuan ka tih thin dang ang bawk in Jimmy chu phut tak in ka han melh leh hram a, ani pawh chuan rang fahran chuan min zui phei ve leh mai bawk a.

 

 

              “I nupui tur hian thingpui a lum anga, nangin i lo sem ang” ka tih chuan "Thinawrh nang hi ka neih duh che i ring ami? Nang neih ai chuan len tar thak a,  a ngai ngaia let leh pawh ka duh zawk" a tih chuan “kha I U khenglawta (Jimmy nen a kan koh nawmnah dan) nupui ka han niang nga, awi ka ti duhdah ngawt ang che mawle” ka tih chuan  "kha thingpui a so nia" kan pahnih chuan thingpui leh kurtai chawi chung chuan kan phei a.

 

            "Ka duatte(thil mamawh leh duh kan neih apianga kan in tlawnna tawngkam) no hi ka sil sak vek ang che aw" ka ban te chu a rawn hmet kual vel a,   “Chhepawrh mamawh i neih leh vang mai mai nihkha”  ka tih chuan kan nu leh pa te chu anlo nui leh thaw tawh a.

 

       "Davida nu,  kan fanu hi engtik ah nge a puitlin ve ang le? A nundan hi han sawi sel em em tur chu ka hre silo mahse ka duhthu hi a sam thlawt lo a ni,hmeichhia ang hian han awm ve se aw" chu tawngkam tluka ka huat chu a awm lo, ka thinrim lutuk chu ka puak keh lo chauh a ni, enge hmeichhia anga ka awm lohna?

 

                    Ka hmeichhiat pui ka ngaizawng tawh ngai a mi? Thleng ka sil thiam a, thingpui lumah pawh ka u hmeichhe diktak intih ai hian min tir nasa zawk a ni lawm ni? Sunday ah pawnfen ka feng a, ka sam pawh ka zuah bawk, ka eng hi nge i duhthu sam lo lai chu sawi rawh, sawn ka pai dawn a mi? Eng tin nge awm se min tih sawi rawh(a au hian ka au a ni ber mai, ka tap pah bawk)nih chuan tinge tiang tur a min lo hrin?” Thinchhe hmingthang tih takah kan thingpui no chu thawh pah chuan ka vai thla thuai a.

 

                  ka room lamah tap chung chuan ka tlan chho a, ka hnungah Jim an min rawn um zui ve bawk a, ka u boral hnu atang hian ka pa hian min duat zual em em a, ka pa hi fa enkawl hi a thiam em em hranlo ka nu zawk hi a strict thung, ka pa erawh a nem em em a, ka u duh zawng ang ka duh thin avang hian ka pa hian min duat zual a, ka u ai awhtu min tih vang a ni.

 

                  Ka awm ang ang a min en liam theih laiin ka nu erawh chuan tuna ka nihna aia tha  ni tur a min beisei na hi ka hrethiam thin lo mai a ni mahse hmeichhia angin awm ve se tih tawngkam nitin a ka hre thin hi ka ning hluah hluah.

 

              Ka u anga ka nu ve dem loh avang hian enge ka thiam lohna awm? Hmeichhe rilru ka pu ve tho a, ka duhzawng ka u anga a nu ve zem loh vanga hetia min ti reng hi ka ning. Chutia ka awm avang chuan tu mai pawh chuan ka nu chu an hau luai luai a,a khawngaihthlk zawk.

 

                 Ka khum ah ka bawk thlawp a ka tap leh ul ul tawh ka tih ngai loh dan pawh a ni lo a, a mak hran lo "ka duatte tap vak vak rawh kha aia ring khan a chhan chu, mipa chu an tap ve ul ul ngailo a, hmeichhia chauh ti khan an tap thin alawm"

 

               Hmeichia, Mipa he tawngkam hi ka hne, “hmelchhepa kal rawh min chhuah san rawh, haw rawh” tih pah chuan ka lukham chuan ka vawm pawp a, "ka duatte-i hi a tah laiin ka kal san tawh ngai a mi, lo kal teh", tih pah chuan hnunglam a tang chuan min rawn kuah a,ka tal vak vak a mahse kei aiin a lian a a chak zawk bawk ka hneh ngang lo.

 

 

               Ka dar ah a khabe rawn nghatin ka beng bul ah zawi te hian "a tawk tal tawh suh", ka tal peih tawhlo ka awm hle hle a, ka tap min thlem dan a ni miau a.... “Jim, enge ka dik lohna ka mizia leh pianphung a ni miau a ka sim thei hleinem” tap feih feih chung chuan ka han ti a.

 

          "Ka duatte, I thiam loh engmah a awmlo Nu Puii(ka nu an koh dan) pawh a thiamlo bik lo, hmeichhe fel tak ni tura a duh vang che nihkha, pasal tha tak i hmu lovang tih te a hlau a mahse maw pawi ti miah suh tuman an nei duh lo che nih chuan ka lo in ngaihtuah anga tawngtaiin Pathian te ka lo dawr anga hreh tak chung in ka nei mai ang che"

 

              “Hmela ngawi hmak rawh” tih pah chuan ka tal vak a a sam phir ve tak ah chuan ka kek hrep a "lam tang pawh hi i hrelo, ka kuk lawlh zawk dawn che mawni le"
A tho vut a in hnuaiah a chhuk thla daih a, min kal san dawn a maw ka lo ti hmana, mut tuma room kawngka kalh ka tum lai takin kawngka a rawn nam hawng a, “ka rawn riak dawn” tih leh ka khumah lawn a rual nghal a.

 

     In hnuaiah khan a nu te hnenah min riahpui tur thu leh lo va haw san mai tur'in alo zuk hrilh chu niin. Ka thian, ka unaupa ni tel bawk hian min kal san ngailo (kan tet lai atang tawha mu dun thin kan ni a,kan len hnu pawh hian enge maw changa riah dun kan la nei thin)in ngeihlo viau e ti lo hian chhungte leh midangin min hau emaw min tih buai chuan kan intan leh hlur zel.

 

                 Keini pahnih hi zawng then hran theih kan ni lo. Ka room kawngkhar kik ri chuan min ti harh chiang hle mai, ka nghawnga min kuah bet tlat paha min khan bet tlat tu chu kan nam sawn ve dawn ngial pawn ka hneh ngang lo a beng bul ah ring tawk in “Lalmuanpui” kan ti mai chu a tho chiang teh e, “tho ang dar7 pel tawh” ka tih chuan a thinrim lutuk chuan khum atang in min tlawh thla nawk a, puan chu la in a sin tha leh tur chiah chu a puan sin tur chu ka la a, in hnuai ah ka tlan thlak pui daih, han mut leh chi rual ni hek lo a chapal chhar in step a ka tlan thla chu min rawn vawm zui hram a.

 

 

           Ka nu in inthiamlo hmel taka thingpui minlo siam te chu ka khawngaih leh hnu hnawh,kei chu ka thin a chhe em em a, ka thinrimna a ho ang bawkin ka lungawi leh hma a, ka lungawina pawh a ho reng a ni.

 

              "Jim chaw ei ve nghal mai rawh, che zung zung ula in tlai leh nge," ka u in ei rawngbawl pah chuan min lo tur ve sek bawk a, “awle Boss” ka va inthlak hmasa phawt ange tih pah chuan an in lam pan chuan a phei a, ka nu in "Kate nizan kha chu ka tihpalh lutuk,khatiang zawnga sawi kha ka ni lo a nia aw mahse nangpawh tiang em em kha chuan awm tawh suh lungphu i ti khawlo vek dawn", a tih chuan a nuih za za ah chuan ka tang leh pek a.

 

           “A nih i inthiamloh tak zet chuan pocket money a ngai tam deuh a nih chu’ ka han ti leh hram a." ka naute hi chu a thluak hi a vawrh ve a nia," tih pah chuan ka pa chuan min rawn nuih sung a.

 

                 "Ti tau ka thlem man ka bill ve dawn" kawngka rawn luh pah chuan Jim chuan a rawn ti lut ve bawk a, ka u chuan " thawh chhuah in neih hunah sum hlutna hi chu in hrethiam ve mai ang" a tih chuan kei lah pek chuan “chuti sum hlutna kan hriatthiam hma leh kan thawh chhuah ve hma chu min pe char char ula ni mai lawm” ka tih zawm zat a

        “ka duatte bike ka keng theilo a chhia a, min phurh ve ngei a ngai dawn tlat” ka thiam ang tawk chuan ka han melh no ve a mahse a no lo ve khawp ang. "I ninawm i rilru hi a chhe leh lutuk, Msi ka sawm phei dawn min lo ring ve lak lawh tawh.... Keng ve mai rawh i single apiang a ka tuar na chhan tur k hre lo, e nge i then zung zung zel,ka luck lutuk hmuh hrehawm iti viau te nih loh chuan"

 

               “ hahah! nia ka duat Msi te ang mai mai koh phar theih a i awm hi a mawilo, nang ang tlangval luck tan chuan” tih leh a helmet lak paha tlan chhuah ka rual nghal chaw pawh ei puar hmanlo chuan min rawn um nghal.

 

                A hnung ah kut kuangkuah in a helmet khum chung chuan ka lo thu fel than a... tih ngaihna a hre silo, tuna a bialnu inla inno lutuk hi ka hua, chuvanga ka bike pawh kha ti chhe lui ka ni, hria se chuan min khai duh ngei ang mawle.
               A pawi lutuk!  ti tau bur in min phur ve tawh sin le kan tlan dawn, ka bag ka check awiiii ka purse ka lak theinghilh ka chhuk chuan min tlansan leh daih dawn si, Ka duatte ding lawk,”ka purse” nui sang chung hian "Awle va la rawh lem" a rilru ka hria lawm min tlansan theihna chance tha lutuk a nei.

 

                 “Min lo nghak rawh aw ka neih zawng zawng in i duh duh ka lei ang che a nih loh chuan i wallet ka tawm che ni mai” ti chung chuan ka chhuk them them a, in ah ka tlan lut a ka purse lak pah chuan ka u chhuak tur chu ka dil belh leh hram a,a van mak em em minlo la nghak mawle, kawngka ka pel chiah chu rawn hawi pheiin a helmet chu kuai chho in min siai zawk chung in chak tawk in min tlansan daih, ka thinrim lutuk chu ka tap lo chauh.

 

              Ka chhungten min thlah hman tawh bik silo, kan kawt a ka u pangpar dahna pot chu kan chhuih leh hram a ka u chu a sa ngei mai, test kan nei a, kal lo thei ka ni bawk silo,ka bike kha lo ti chhe lui lo ila aw mahse a sawt tawh silo.

 

           Kan in chhak kawn ah Taxi chang tur in kun ngul chung in lungte ka chhuih chho ngauh ngauh a, ka bula bike rawn ding in horn a rawn pe tuar chu ka phu nasa lutuk chu ka phone ken lai ka thlauh chawrh a, ka va hawi phei chu “Hmela” tih leh hnek ka rual nghal.

 

            "Hei khawlai a nih hi zia thup zia thup," nui thaw chung chuan min rawn melh a, “khawnge i kal dawn a” ka tih chuan  "Thinawrhi ka rawn hruai dawn Msi ai chuan T-shirt ka duh zawka hruai tur che in ka rawn let leh mawle" a ve lutuk hian a  “min kal san theih loh vang zawk a rawn let leh i nihkha” ka tih chuan a duhlo ngei mai "chiah maw" tih leh tlan a tum ta mai..... “Awi nilo, nilo ka fiamthu” tih leh a kawr hnung a chelh ka rual a rang lutuk in ka lawn nghal.

 

 

                 College kan thleng chu Msi hmuh ka hreh ngei mai, mahse a ho em mai ka hlau mai mai lo,ka thiannu Mami chuan min lo hui a, ka tlan phei nghal ka hnung ah Jim an min rawn um paha “tlai ah chuan min lei a ngai a nia aw... ka T-shirt kal thei i nihkha” tih pah chuan ka lu a rawn tuai a min kal san zui ve mai.

 

                 ka thiannu Mami hian Jima hi a star mai pawh nilo a at chilh lutuk Jima a hmuh duh vang hian kan in'ah pawh a rawn kal tam khawp mai, Mami chauh pawh a nilo hmeichhe tam tak hian hepa vang hian min biak that phah hlawm a nia aw.......

 

               Mami ka tihpui ve ngial pawn tinge mawni Jima hian a uk sak duh miahlo,Mami hi a chhelo a. luck pawh a luck a nia mahse hepa duhzawng hi a nilo niang chhuanlamah lah hian "nang a tihpui ngaihzawn ai chuan ka nghei mai ang", tih hi a sawi duh dan a nia, Mami lak ah pawh ka inthlahrung thin khawp mai.

 

                    Tlai banah chuan ka phakar zia a rawn lang leh ta, Jima te aiin kan bang hma dawna ka hawsan daih ang... a ni T-shirt mai mai ka lei sak awmlo em mai ti rilru chungin thiante pawh nghak lem lo in hmanhmawh deuh in hawi zuk zuk pah chuan gate a tlan chhuah ka tum chiah chu gate pawn bang phena lo ding chuan ka ban ah rawn chelhin "I van hmanhmawh bik ve" min melh rum kher mai.

 

               “Min haw san a maw ka tia, lo um che ka tum a” hniak phawi miahlo chuan ka tih zawm zat a "Lalrinsang ngawi hmak rawh i rilru hi chu ka hre chiang ve a lawm, min haw san i tum leh dawn tih kha ka lo hre ru leh khiau a,chuvang chuan class ah pawh awmlo in ka lo chang che nih hi".

 

               “Ehe alo ni maw! chuti khawpa ka rilru i hrechiang a nih chuan minlo nghak  lo law law la tha tur” kut kuangkuah chung chuan ka han melh rum vel a, "Lo chuang rawh Msi ka phur zawk mai tur nia, i thik leh hle nge" ahahha (ka hmui te ka hup vel )ka thik thin a maw? Min hmusit mah mah lo maw?

 

            " Rawn chuang mai mai teh tawngthei ropui si" MC kan thlen chuan a T-shirt lo hual lawk tawhna dawr ah chuan min kai lut nghal a, dawr neitu nu chuan min lo be suam suam a,  a duhzawng tak mai min han hmuh tir chu awi awi awi amah aiin ka duh leh zawk kan in chuh leh nghal mi zing pawh kan sawilo ka kawr hak lai chhung ah ka thun hmiah "rawn la nghal rawh ka zen hreh miahlo a nia"

 

 

               “I hreh ka ti mi, i ngam chuan rawn zen la ka rak vak ni mai” ka sawi zo hman tawk tihah chuan ka kut chu hnung kherh in "hnuai lam tang in nge chunglam tang in” tih pah chuan min rawh hrilh ru ti tih a. " hmela min thlah rawh”

 

 

                 Ka au tuar tuar a “hepa hian min pawngsual a tum a nia” mi an lo hawi thup a, dawr nghaktu chuan “an in fiam mai mai nih hi, kal darh ru” a tih chuan kawngka bul a ding reng mi pahnih chu kan va hmu a, "Kate iti mah mah lo maw, a zahthlak thin em ,eng thil nge ni leh ta a"

 

             Ka u chuan ka ban bul a hmer pah chuan ka beng bul ah chuan a rawn sawi su su a, engah mah ka ngailo, kan buaina chu Jima chuan min hek ran chuan a hrilh a, ka u bula ding a bialpa a smart leh lutuk vang a kan nuih zat thin U Hriata chuan dawr nghaktu bul ah chuan " khatiang kha a awm tawhlo mi? " dawr neitu nu chuan "a pawi khawp mai he thil hi chu pathum bak a awm lo a heihi a awm chhun a ni tawh a"

 

                      kei lah ka tum bur si lehlam ka hawi ngul a ka u te pahnih in “I duh duh thlang rawh kan lei ang che” an tih pawn tawng pawh ka tawng duh lo ka ngawi ngal tawh si, "Naaaaa a nih in tawm mai ang ka ha hmasa anga chuan nangin i kawl mai dawn nia" hepa tak hi chu chimawm hle thin in, ka thin ti rim thin mahse min va han dawhthei tak em!

 

               Tum bur chung chuan a kawr ken lai chu ka phihthla sawk a ka bag ah ka khung a purse ka phawrh lai chuan Vanlalsmarta chuan khawi ka lo pek sak ang che u tih pah chuan a wallet chu a rawn phawrh a ka u in “a ngailo kha an nei ve reng lawm” a tih pawh chuan mark score that loh hi a hlau ve em, chu chu keini pahnih hian kan hrechiang bawk a, kan ti khawngaih thlak mah mah thin, ho em mai Dr a nia sum a ngah em mai. Ka u nen hian kum3 chu an in zui ve tawh.

 

                    
                 In kan thleng chu... ka kawr nge Jima kawr ni nge nilo ...kan intawm a ni tak, ka room ah keng chhoin ka ha nghalh a, tlai chaw kan ei lai chuan ka u in vawiin a kan chet dan zahpui awm tak chu ka nu te a hrilh mahse a mak a sin tuman min hau miahlo mawle, thleng ka sil zo Tv en a ka thu chu kawngka an rawn kik a Nuteii te chhungkua lo ni reng in...mi pakhat a tel ve tlat tunge niang le?

 

              Ka nu te nen chuan an han in bia a, an in chibai nak nak a, an ti ti tang chuan U Davida ni reng. Ka pa in "David i rawn haw dawn tih pawh kan lo hre lo reng reng a, i nu te pawh hi engmah pawh min hrilh lo"

               “Anni pawn an hresa bik lo rawn surprise che u ka chak ve lawm", tih pah chuan "kha Katherine kha law? Ava lian tawh ve" ka nu chuan "kate rawn chibai ta che" amah pawh en mang lo chuan ka chibai a.

 

                  "Lalrinsang engvang in nge awm hmun ah te i hak a? In cheina tlak a nih hi" tih leh min hlihsak tum chuan min rawn pan phei a kei lah chuan zamlo fe hian “inlo kal dawn tih ka hriat vang in ka lo in chei nih hi” ka han ti hram a, "han thlak nghal rawh naktuk ah ka ha dawn," a tih chuam ka u chuan "awi ka thi thei ngial dawn, khawngaih in pangngai deuh khan awm ve teh u, awm tlan a pianga in hau reng zel mai".

 

                      “Dik chiah...ka thil a piang hi min chhuh suh” ka la ti zawk zamah lehnghal a, U David lah in "Bawiha hmeichhe kawr te hak i tum i zaklo mi" a tih chuan ka va melh zuk zuk a Amen Hallelujah te ka lo tia "ka kawr zawk a nihkha amah zawk hi mipa kawr hak ching a nih hi" ka nuteii chuan in ninawm lutuk puitling ti ti na in dal, room ah chho ru" a tih chuan Room ah chuan kan in zui chho ve nghal a.