LENNY ACADIA 10

Ka mang lam ah pawh ka ngaihtuah ngailo a sin, ka fanu ka neih chhun liau liau hian min kalsan ve ang maw? Ka in thing nawk nawk a, hetian ngaihtuah thei ka nilo, a tha leh vat mai ang tiin keimah leh keimah ka in hnem mawlh mawlh a.

Ervin chhungte an rawn thleng ve bawk a tupawh  mai chu kan hlauthawn leh kan rilru a in ang tlang hlawm a ni ngei ang engmah kan in zawt lova, Cabin ruak a awm mail oh vangin ward pangnai ah kan awm a, an damdawi pek vang kha nge ni, zing lam dar 6 vel ah chuan a taksa pawh engmah a duk tawhlo a, na nei ang pawn a awm tawhlo.

Cabin ruak a awm mai lo bawk nen, in lam a in enkawl kan dil ta ringawt a mahse Doctor in test neuh neuh leh ama awm dawn a hmuh duh vangin a rem ti lova hreh deuh tak chungin kana wm a, a chhang chu damlo kan a hospital kal ni pawh hian hospital hi a ngaina lo em a, a awm duh tlat thin lo chuvang chu nia in lam a awm kan tih na chhan mahse doctor thu rawn ang chuan kan awm a.

Chhun lam ah Lenny hna kal ngei ngei ngai bawk nen, ka nu leh pa leh Ervin nu leh pa nen kana wm a, doctor hi Ervin nu nau fapa nih vangin bengchheng kan siam lo bawk nen, awm tam phallo viau mahse min hrethiam a mahse dan bawhchhiat reng kan duh loh vangin  pawn lam ah kan in awm chhawk hlawm a.

Vanneih thlak takin vawi khat mah nilengin na a tih thu a sawilo a, a taksa pawh a duk leh tawh lo, test result thenkhat a chhuak a, a then chu kar1 lai a ngai dawn an tia, Pathian zar ah tun ah rih chuan test result chhuak ho chu a la tha zel rih e, tlai lam ah Lenny a rawn  lang a, ka nu leh pa ten riah tum viau mahse Lenny an kan pahnih a kan riah tur thu a sawi chuan an hnial bik lem lo.

Ka nu te haw hnu ah chaw ei chhuak turin kan pathum in kan chhuak a, kan inthlakna a office kal pahin a rawn dah kha  a nia, ka fanu pawh hian a ngaina takzet mahse Pa tih erawh chuan a la ko lem lo, Lenny pawn a beisei lo nge engmah a sawi chhuak ngai lemlo bawk a. Chaw te chu a ei tha phian reuh lehnghal a.

“vawiin lam ah enge in lo an? A na chhuak le hem?” ka fanu melh pah chuan “Hei engtin mah a awm miahlo, nimin lam ah an school lam ah a chetsual leh sual loh ka zawt a, a chetsual loh thu min hrilh a, chuan test chhuak tawh zawng chu a la tha vek” ka kut a rawn vawn pahin “Acadia, hlauthawng suh aw, engtin mah a awm dawn lo a nia” tih pahin a thil ei lai a ei zawm nghal a.

Hospital ah ni 4 zet kan awm a, engmah na a nei tawh rih lo bawk nen Doctor kan dil leh vangin min discharged a, kan chhuah ni thlengin Lenny nu leh a farnu te an rawn lang miahlo, min duhloh zia chu ka hria mahse a lang a mawi ah tal ngati nge an rawn kal loh, kei min duhlo a nih pawn naupang pawisawi lo ngati nge heti tak a an huat ni?

Kei mi luhlul leh chapo ve tak chuan Lenny hnen ah khan an in a kar 2 khat tal awmka ti kha a nia, heti khawp a min lo duhlo tu te  nen a awm tlan reng zawng ka peih tawh biklo, ka fanu pawn nuam a tih loh zia a chezia zawng zawng ah ka hai hleinem, zan ah “Lenny i in lam ah in sawn mai ang u” a ni pawn engmah min zawt lo a lo duh zawk reng vang te pawh a ni nge a lu a bu ngauh ringawt a.

Lenny in lam ah kan insawn chhuak nghal a, kan thawmhnaw la turin a ni erawh an in lam ah a kal thung a, ka chhungte leh Ervin chhungte nen Kan chhungkaw in ah kan awm khawm a, hospital lam a min tlawh duh mang silo, Lenny hian a va sawm nge ka hrelo, A nu a rawn lang tlat in lam ah ka lo tang deuh tung a, ka nu te ho nen an in bia a, a lo kal theih loh chhuan lam ah a hritlan thu a sawi a, vawi khat mah min be lova, ka be bik heklo.

Layla pawh a dam chho ve tan a, a result pakhat erawh kan la nghak thung, keimahni in a kan han awm chu ka fanu pawh a nun a hlim a ni tih a hriat, in chhung ah school ban ah inthlak hma in a tlan kual a, Lenny ui nen an in fiam a, sawtah kha chuan in kan lut chiah hi a ngawi reng a, room ah kan inthlak a, in hnuai a chhuk a duh ngailo, chaw pawh a ei tlem thin reng a ni, naupang pawh hian hmangaihtu leh hmangaihlo tu hi an hre ve em.

Result a rawn chhuak a, kan hlauthawn ang ngeiin a thisen lam a lo fel lo vet ho niin, result ka hriat zan a ka rilru na lutuk chu chhin khat pawh ka chhing eih lo, Apa lo pan thin Mumbai doctor kha an be pawp vat a, a rang lam a kal turin min ti nghal a, Lenny a hna vangin a kal thei si lo, Bena leh Bawihbawihin min hruai an in huam bawk a, kan pathum a kal turin kan in buatsaih a.

Lenny nen hian in pawhlohna chhan tur kan neilo Layla chungchang leh thil dang ah chuan nupa tangrual leh hlim tak kan ni ngei a lawm mahse kan pahnih in kar min daidang tu hi thiah mai a harsa a ni, in zawmna kha chu kan lo nei ngei tawh a lawm, mahse kha kan inzawmna hruai chat tawh kha a zawm hmasa tu nih kan tum lo ve  ve chu chuan kan nupa inkar bik hi a ti nghet thei lo a ni.

Kan kal hma zan ah inchung balcony ah kan nupa in kan thu a “Lenny engkim ah hian ka lawm lutuk a nia, min buaipui na zawng zawng leh kan nufa min ngaihsak na ah hian” min rawn en nghal hrawk a, “Acadia, ka nupui leh fanu ka ngaihsak na ah hian lawmthu I sawi a maw?” a nui deuh huk a “ka tih tur ve reng ka ti a ni”

“ I mawhphurhna ah min ngai a, ti hian I nun kan ti chhe vek a nia” ni e, Ervin khan ani nen a innei tur hian alo ti si a lawm, mitthi tur thil besei leh ngen ti hlawhtling lo nih chu tunge duh ang ni “Nun ti chhia a?” a ngaihna a hrelo tak zet tih ka hria , “aw i mawhphurhna leh Ervin lak a I thutiam vangin ti hian mahni duhzawng pawh nei thei lovin i han awm chu a ni sia, a chang chuan hreawm ka ti takzet thin”

Min rawn thut hnaih thuai a, ka kut ah a rawn hum a “Acadia, ka mawhphurhna a ka ngaih vang che a nei che ka nilo,ka hmuh hmasak ber ni che chu In in ah kan rawn leng a, Ervin kan luh hnu rei lo te ah a rawn lut a, kan unau a in khat a kan leng chu mak kan ti dun a, kan in nuihsak a, kei chu I u vang a rawn lang ka nia, Ervin erawh nangmah vang a ni thung”

In chung atang i rawn chhuk a, kekawr bul chhing te leh shirt i rawn ha a, sneaker i rawn bun bawk a, i sam i rawn thlah deuh hniang a, i bag ah rawng thleng khan ka la hria a sin, dark green te reuh te i rawn ak thla a” ka lo nui deuh sak a, “Chutiang em em chuan min lo en chiang a maw?” ka zawt lo theilo, keiin ka hre chhuak tawh bawk silo.

“Chuan dawr a in lut tur ka rap palh che a, i tlu te kha hreawm ka ti lutuk, in in ah ngaihdam dila ka rawn kal kha chu ka chhuanlam pakhat a ni, ka nau bialnu ka thianpa nau ka lo vei ve em em thin che kha nia” a mah pawh a lai ve tih ka hria ,  keipawn sawi vak tur ka hre lo hetiang rilru ka lak ah a pu tih reng ka lo hre ngailo, a ti lang ngai silo a, “Tun te hi ka mumang mai a ni ang tih ka hlau thin a sin, nang chuan Ervin bak” a ngawi ta daih a.

“Naktuk chu tluang takin zuk kal ula, keipawh ka hman vel ah ka rawn kal ve ang” ka bu nghauh ringawt a, in hnuai lam ah kan in zui thla nghal a, Layla lah a damloh na vang tih hrethiam mang hleilo in kan zin tur lah chu a phur em em a “Pa-Pui lo kal ve la , nuam dawn sin le aw” mut hmun ah te chuan a han ti vawng vawng a. “Kan hna hi a laklawh lutuk a ka tih zawh vel ah ka rawn kal nghal ang”

Ka fanu nuam tih em em a tetlai tang tawh a zantin a ngen ziah ka lo theihnghilh pawh a ka tih hma loh chu min ko char char thin chu chu, a mut dawn a a chal a fawh hi, a chal a fawh tawh chuan a titau te hi chawp leh chilh hian a reh nghal thin, Lenny hian kan inneih zan khan Layla duhzawng leh duhloh zawng te kha min zawt kim khawp a, hetiang mihring mahni fahrin te pawh ni miahlo ngaihsak hi an awm thei dawn em ni?

      Ka zah thar ngawih ngawih a, ka ngaina bawk, hman ah khan ka ngaina tawh a, mahse kan inkar a thil thleng vang khan ka huat phah ni si lovin, kan in kar a hlat phah a, mahse tun ah chuan inthiam lohna tur ka nei tawh lo, nupa kan ni tawh a, Ervin ngei pawhin nei tur a min duh zia kha a hun hnunhnung ah khan alo sawi tawh ngei a lawm, ka taksa chu ka pe thei, mahse ka thinlung zawng zawng hi engtik ah mah ka pek theih ka ring ngailo, a beisei hek lo.

          Mumbai kan thleng a, hospital ah kan in dah lut nghal a, keiin ka awmpui a, Ervin te hian an zin chang a , han awm na mai tur in luah sa an nei a chu chu Ervin damlai a an neih tawh kha nia, mamawh an awm a piangin an luah tir ve mai thin, damlo zin ho hian awm nan tak an hmang a, Bawihbawihi leh Bena an in luah ah an in nghat thung a.

Ni thum kan awm hnu a Doctor thurawn ang in a thisen thlak vek tur a tia, kum 3 dan ah kan thlak thin ang, zep thu awmlo a pa natna ang kha alo nei ve reng a mahse kum3 dan a a thisen kan thlak zel thei nih chuan engmah a nunna tan hlauhthawn tur a awm loh thu min hrilh chuan ka thaw huai mai.

In lam ah kan han hrilh a, an ni pawh an thlamuang huai mai tih an tawng dan ah ka hre thei, mahse dim a ngai hle dawn a ni, a taksa ti pem lo tur leh thisen  chhuak lo turin min chah nasa khawp mai, a thisen an thlak dawn ni chuan ka nu leh pa leh Lenny an rawn chhuk thla ve nghal a, an tu hmuh hmasak ber a lo ni ve bawk nen, in lam a lo awm tur a kan tih pawn a awm mai mai thei tlat silo.

Pathian zar ah tluang takin kan tih tur kan ti fel thei ta, kan cham chhung zawng ka nu leh pa in min champui ve bawk a, kan haw hma niin, Lenny nen bazar turin kan chhuak a, ka rilru ah chuan a chhungte thil hawn sak pawh a lang ve reng, mahse hetiang dinhmun a kan din hnu ah pawh Lenny pa tih loh chuan tumah in vawi te khat mah min rawn be lova, enge kan an tih pawh min zawt hek lo.

Mihring chu that leh that in lawm kan nia, kan chung a that chhuah theilo tu laka that chhuah reng hi chu mifel famkim ka nih loh vangin ka thei biklo a ni , U Mama te chhungkaw thil tur leh Lateii leh Teteii thil tur ka leisak a , Ka pa thil tur Lenny an a thlan sak a, a bak han lei em em tur ka hrelo bawk nen, keima thil tur pawh ka lei lo, thawmhnaw hi chu ka ngah ve thawkhat a, han it leh mamawh em em ka neilo bawk a, ka tan engmah ka in lei lo.

    Ervin te in luah ah kan zavaiin kan in sawn phei a, a tuk zing dar 10 a haw tur kan nih vangin kan ni bawk a, eirawng bawl buai lovin pawn lam ah kan ei chhuak a, nu ka nih hnu ah hian vawi 1 chiah Lenny nen kan chetsual zan kha Beer ka in leh hmasa ber a nia, a bak ka in nawn leh tawhlo. Kan ei kham fel hnu ah Bawihbawihi leh Bena leng turin an chhuak a, Layla a chauh deuh vang nge dar 8 ah a muhil der tawh a, ka nu leh pa in min hrethiam takin kan nupa a chhuak harh ve turin min nawr zawk mah a.

In thleng kan va drop hnu ah kan nupa in kan chhuak harh ve a, Bena  te pahnih join ve ngawt dawn pawh niila, an kal duhna tur leh kana wm duhna tur a in ang lo lulai lutuk a, Mini-bar ah kan nupa in kan kal a, Red wine ka lam a, a niin whiskey a lam thung a, kan piah a thu te in fawp deuh ngawng ngawng ka hmuh fuh chuan ka lai tlat, nutling pui nih tawh hnu ah pawh hian tiang em em hian alo la laih theih a nih dawn hi.

Wine hi chu alo tui bawk nen, duh ai tam in hi a awl, kai lai hi hriat a har thin, ka kai deuh chhalh tawh mahse ka rilru erawh a harhfim a hma a thil thleng tawh kha nupa ni mahila a thlen nawn ka duh tawhlo bur, nupa nun kan hmang dawn a nih pawhin harhfim ngeiin kan hmang tawh tur a ni. Ka pasal hi ka ngaizawng thar ni mai hian ka hria, Ervin lo kha chu mipa dang han ngaihzawn leh han duh kha ka nei ngailo kha nia, mahse hmeichhia leh uite a chul nel peih peih an lo tih kha maw!

In kan haw hnu ah pawh Layla a nula chho viau, mahse school lam ah pawh an hotu te thlengin kan in chah nasa minlo en ngun sak hram tur in, rilru a chawl hlei theilo, Ka birthday tih reng reng ka lo hre tawhlo, zan dar 12 ah Lenny an min kaitho a, “Happy birthday” ka chal ah a rawn fawp sak a, ka ham haih zawk, ka harh chiang vak lo nen, ka birthday tih reng ka lo hre tawh lo a.

Ka bul set ah a rawn thut  avang in  ka tho chhuak ta nge nge a,  “Acadia, I lo piang ve vangin ka lawm e” min rawn kuah dawn emaw ka tih laiin ka nghawng a thil uai thla ka en chuan thi mawi lutuk mai, a man tam dan tur chu ka ngaihtuah thiamlo zawk, min awrhtir a, ka hawi chho a, ka tum reng vang nge ka hrelo, a hmui ah ka han fawp a, a ham haih tih ka hria, thawh tumin ka mutna tang ka in beng kang a, ka ban ah min lo chelh a a rawn ding zui ve nghal a.

              Ka kawng ah a rawn chelh a “I harhfim tiraw?” chu zawhna chuan minti ham haih khawp mai,  ka en deuh ha a, “Ka tih awm zia zawk chu” ka ngaihtuah chhuak a ka hrethiam hman ah khan ka harhfim loh vangin ka fawp ngheng tawh a nih kha, tun tum chu ka harhfim lutuk, “ka harh mah mah” ka tih chuan a nui suk a, min pawm kang nawlh a, “Acadia min hmangaih tur hian ka beisei ngailo che a, ka beisei ngai heklo ang che, min kalsan lo la, ka tan nupui tha tak ni reng ang che”

A nghawng ah ka kuah let nghal a “Lenny rei tak ka in nghah tir che a pawi ka ti, I tan a nupui tha tak nih leh nupui in a tih tur ang a piang engkim ka ti vek ang, ka hmangaih che em ka hrelo mahse ka ngaina che a ka duh che tih chu ka hria” ka hmui ah a rawn bawh thuah nghal a, keipawn rang takin ka lo chhang let nghal a, kan duhthawh telh telh a, bathroom lam ah kan in pawm lut a.

Layla hi kar hmasa tang khan room hran ah a riak ve tawh a, puitlin zir nan ka duh vangin a room enkawl thlengin a mah ka tih tir a, amah pawn nuam a ti zawk tih ka hria, a rual pui te zing ah pawh zahpui awm lo tak ani, chet fel leh mahni in enkawl kawng ah hian, Lenny zawk hian rem a ti chiah lo a mut hran zan pawn vawi thum ngawt a va bih a nih kha mahse atan a tha tur a ka hriat ang a ka tih ah erawh min dang ngai lem lo.

       Shower on na ka lo dek palh a kan huh vek, mahse kan thil tih lai tawpsan mai na tur khawp in min ti buai lo, harhfim ngeiin hlim takin a vawi khat na tan nupa kan nih angin bul kan tan tha ve ta, keimah ngei pawh ka hlim in ka nun a harh vang sawt, ni e, mitthi tawh ngai a kur reng mai zawng thinlai a zing a, kohkir theih tawh loh vang a hringnun kal lai chawl chuang silo, tih tawp tum ang mai a kum kha leh chen ka lo hmang kha ka in chhir hauhlo mahse tun ah chuan nun tharin bul kan tan ve ta.

Ka fanu Layla pawh dan ang taka a fanu a la lut turin kan ziak fel ta, Layla pawn Pa-Pui tih ngai lova a Pa a han ti ve tawh tur chu kei ngei pawh hi ka fanu hlim tluk zetin ka lawm, a chhan chu pa awt ngawih ngawih in a lo awm tawh thin a, tun ah Pa a nei ve dawn ta, dan ang tak a pafa an nihna kan lawm ni chuan chhungkua kan kim khawp mai, Lenny nu leh farnu te tih loh chu kan kim thlap.

         Mihring nun ah hian hun kal tawh kan tih danglam theih tawh loh vang a in dawm kun reng hian awmzia awmlo, hun kal tawh hian min uai bet lo se, kan hma lam hun kan hmuh lawk thiam loh vang a rilru hah a in dawm kun tur kan ni heklo, kan tun hun zel hi ni hlim tak a hman kan zir tur zawk chu.

.....THE END.......