LENNY ACADIA -4

       “Hello, Bawihbawih, enge nit a?’ ka hlauhthawn zia chu ka aw ah pawh a lang chhuak a ni ngei ang “Hei a tha lutuk lo ngaihtuah suh, englo nia, U Lenny leh U Pensy lo riah an tum a, in lam ah khan lo chawl hahdam mai la, nizan I mu tawh bawk silo, ka Nu leh Pa in an ngaihtuah deuh che a”

     Min ngaihtuah na chu ka lawm lutuk mahse, a mah ka hmu lo nih chuan ka mutui dawn chuanglo rilru hah leh hreawm reng reng in ka awm dawn tho a, chuvang chuan taksa hah mahse rilru lam tal a hahdam chuan a tawk “Ka hah reng renglo, hei U Ben te  nen kan rawn phei dawn chiah a , min ngaihtuah suh u”

     Damdawiin kan thlen chuan Lenny leh Pensy pawh an lo awm a, Lenny ten en chuan cousin an nia, ngatinge Pensy a riah ve ngawt na tur chhan ni ang le? Mak ka ti riau mai, Ervin hian Pensy hi a sawi ngai miahlo U Mapuii te thian a ni maia, Ervin te nen an in hnim hnaihna tur awm ang ka hre hauhlo, damdawiin kan thlen chuan Bawihbawihi lo haw a lo tum mek a lo ni a.

     Ka U leh Tete nen kan lut a, Pensy chu a nei tu ber emaw tih tur in thil tul ken tur vel zing lam ah phone a an in chah tur thu a lo sawi mawlh mawlh a, a chhan ka hriat si loh hian ka nuih a za deuh tlat. Ervin bul ah ka thu thla nghal a, min lo nuih ver ver chuan ka hah a ti dam huai mai “Enge I lo an tawh a ? a sam chu ka chul sak pah heuh heuh a.

     Ka kut ah a rawn chelh ve thuai a “Ka tha lutuk tawh lawm, tinge I lo phei leh a, nizan I mu tawp silo a” min ngaihtuah hmel fe a a rawn tih chuan ka lo nuih sak a midang hriat phak loh tur hian a beng bul te ah “I bul ah ka mu tui zawk tih I hriat kha” a nui chhuak hak a. Ka u te lam ka va hawi phei chuan Lenny hian min lo melh run mai a, ka mit ka la sawn rang ngei mai.

     Ka U te nen hian an in kawmna rei tawh mahse kan in a chaw an rawn ei tum a piang hian ka chhuak tum leh in a ka awm loh lai a nih ziah vangin kan in be tam ngailo , ka ke a rah ni pawh khan ka zak lutuk khan a mah a ni ang tih ngaihna reng ka hrelo a bak ah melh pawh melh lo khan ka tlan chhuak daih kha nia.

     “Duati, hei Lenny te pahnih  an riah dawn tho chuan naktuk zan lam ah I riak mai dawn mi, zan in chu mu hahdam ve la?” chhan pawh ka chhan hma in Pensy zawk in “ni e, va chawl hahdam rawh hei keini kan awm lawm, rawn ngaihtuah lo la, a tul chuan kan rawn phone ang che, va haw rawh” Melh ngheng a keh buk dawrh ka chak tak zet.

     “In duh leh nangmahni kha hawng ula, in duh leh awm ula, ka riahna in dal lo a nia” an mahni pawh chu ka melh peih tawhlo, Ervin kut vel chu a kham ka hlauh vangin ka zut sak a, “I riah dawn tho tho chuan ka hnung vel hi puan khan minlo hruk sak dawn mi” inthlhrun hmel zet a a rawn tih chuan ka tho nghal hliai a towel ka ban nghal a.

     “Khawi keiman ka lo ti dawn mi Acadia” zak lo hi ka van han ti ngawih ngawih tak, a bialnu ka awm a, ka awm lai ngei in ka bialpa in a zawh pawh nilo, ka bialpa hnung a hruk sak ang maw? “ A ngailo ve “ ka ti bul deuh hmak a, Lenny lo nui suk ka hmuh chuan bathroom lam ah ka luhsan nghal a.

     Bena leh Tetea pawh kana wm reilo mai ang tiin haw turin an in tin tuah uaih a, “Pensy nangpawh va haw zawk rawh hei Acadia a rawn thleng tho a engmah tih theih a awm chuanglo , boruak kan ti ip pik bak ah room a chet bawk sia, thut tlaivar ringawt chu” Lenny an a rawn tih chuan ka thawl huai a, kan in a an lo len thin lair eng khan Pensy hi chu ka kawm ngeih chi a ni lo tih a mizia leh tawng duhdan chapo zet ah ka hre mai .

    “Awi  a ngailo, ka fit lutuk lawm, min ngiahtuah a ka lawm, mahse ka in pe ve ta sa sa a tawp kan theng  ang chu le” chhan ka tum zuau lai chuan Ervin hian ka ngeih vak loh tih a hriat vang chuan “ E in ti lawmawm lutuk damdawi mum lian lo thleng tawh a midang ka mamawh vak tawh love, kan pahnih a hun thawl neih pawh kan thlahlel ve lawm va haw rawh u”

     A damlo berin a tih tak ah chuan han sawi vak ngaihna a hrelo niang a hmel a thim deuh khap a, “Bena  te rual khan hawng la, mipa tello a riah ngawt zawng a fel hlel em mai, kei  tal ka lo awm a nge” keimah chauh pawn buaina awmlo ang tih ka hrilh pawh chuan a hmel luhlul zet ah chuan haw a tum lo tih ka hmuh hmaih hauh lo.

     “Min thlah ve tal la, keimah chauh a min haw tir tum reng reng” a han inla no kual vel chu ka ei lo lutuk hi sawh ngheng hi ka chak tak zet, a chhelo thlawt a ni henu hi mahse inla no kual vel peih lutuk hi ka mil chi a ni lo, kei inla no lo chi ve tak ka lo ni bawk nen, U Mapuii te hian engtin nge an kawm peih zawk le aw ka ti thin.

    

     ‘ A nih ka va thlah lawk a nga, ka rawn phei leh vat ang” kawngka lam pan chuan a tho nulh a a chhuahsan daih zui, a hmel ah a lungawilo tih hriat zet hian Ervin pawh mangtha hauh lovin Lenny a um chhuak nawk nawk a, an chhuah fel hnu chuan ka nui chhuak hak a, “enge a?” min rawn en deuh ha a, a tawng dan leh a ban then dan vel chuan no fahran hian “engmah ni lo e, I bul a ka awm thei hi ka hlim a lawm”

     Ervin pawh a nuih a za ngei mai,  a taksa duk deuh thluah thluah ka hmuh chian hian ka rilru na ni, “Ervin min kalsan miah suh aw” chau  tih hriat fe hian a rawn thu chhuak a “hei min enteh, khawi ah mah ka kalsan dawn reng reng lo che, I hria em I tan chauh ka fight ka tih kha” a kut ka vawn sak vat a ka fawp vang vang a, kan boruak hi nuam si hreawm si an tih ang kha ni maiin ka hria mahse kan hma lam hun ngaihtuah ka duhlo kan tun dinhmun chiah ngaihtuah ka duh.

     Amah tih hlim tumin, Pensy kal dan leh thut dan a tawng no duai te chu ka han zir vel a, a nui ve nasa ngang mai, a haw tur kal tau bag lak pah a kawngka lam a pan dan ka han zir phei chu nuih pawh a nui ri thei tawhlo a dir char char a, chutih lai tak chuan Lenny a rawn lut hlawl , ka lai bawk si chu Ervin nuih a ti zual a, a za lo zet hian ka nui hui ringawt a.

       “Kha in va lo hlim awm ve aw?” ka lai tak zet tih hian a sawi fiah lo, hnung lam tang khan min rawn hmu hman awm si a, sawi tur a vang tak zet a ni, “I haw ve nghal daih maw ka tia” Ervin zawk chu  a rawn tawng chhuak a, “Ka rawn riah pui dawn che ka tih tawh kha” thut main a chang pawh ka hre tawhlo, ka ding reng ringawt a , Ervin ah a kut ah min rawn huih tak ah chuan a lam pan in ka phei a, chutih lai tak chuan Dr rawn lutin kan duh chuan in lam ah keimahni Dr chah in min enkawl an phal thu an rawn sawi chuan kan hlim ngei mai.

        Ka hna lam ah chawl reng thei ka nih loh vangin lunglei lam ah kar khat zet ka awm hnu ah ka haw phei ve leh a, Ervin pawh buaipui ngai vak a ni tawhlo a that lam a pan chak thu pawh Dr in mak tiin a sawi a sawi a mahse in uluk tur erawhin a chah ngun viau, kum khat em pawh ka la awm lova, in sawn han dil pawh ka inthlahrung ang reng, ka Pate unau zing a upa ber hi tuna Minister hi a ni a, thil a ti thei a, a duh chuan min transfer thei, ngen mai te pawh ka duh Ervin vang hian ka hmuh phak loh a ni 1 lek a awm pawn ka ngaihtuah em vangin ka rilruu a hahdam theilo.

      Lunglei lam ah a rawn phei tur thu a rawn sawi zan ang a ka hlim leh ka thlamuan kha ka hrelo ang, Bawihbawihi leh an driver nen Friday zing chaw eikham ah an rawn phei a office ka ban in anlo la thleng lo dueh a, eirawng ka bawl lai takin an rawn phei a, a hmel dang lap pawh a zia chho ve tan, an driver leh Bawihbawihi room chhak lam ah khum 2 a awm tho avang in an mu a keini thlang lam ah ka awm thung.

         “Bawihbawihi an farnu neih chhun ania, an mahni dawr ah  hna hran neilo vin a awm chilh tawp a, awm ve reng duh mahse ni 4 a cham hnu ah driver nen an haw phei ve leh a, zan khat kan mu chu zing dar 2 vel ah a thaw ri deuh bawrh bawrh hian min ti harh hlawl a, light ka on nghal vat a, ka va hawi phei chuan a hmai leh chal vel tang chuan thlan fim a rawn bawl tek tek a, a hmui lah chu a lo duk chur bawk, ka chi ai tak zet a ni.

         Damdawiin a ka awmpui lai khan tiang ang em em a buaipui ngai hian a awm silo nen, tih vak ngaihna ka hrelo, ka ko vak vak ringawt a, ka thawm ah inching tlangval a rawn tlan thla a, kawngka a rawn kik a, kan han buaipui min chhang thei mai bawk silo, a nu te a han kova damdawiin hnai ber Faith Hospital ah kan tlan phei pui nghal a, a history an lo hre vak lo nen, an tan pawh han tih vak ngaihna awm lo chu nachhawkna in a jection a,oxygen an pe bawk a.

       Tetean ka chhungte ka hrilh tawh leh tawhlo min zawh chuan ka harh zawk a,  Nu Dingi ka call nghal a thil awm dan ka han sawi chuan an rawn tlan phei nghal tur thu an sawi a, ka chhungte chu khawvar lam ah ka hrilh ta ma a,  chhun dar 12 vel ah an rawn thleng phei hlawm a, an upa ber nupui nei tawh leh an farnu leh a nu leh pa an rawn phei a, Aizawl lam a phurh phei mai an duh nain a dinhmun ah tih chet sawn a ngam awm rihloh vangin cabin lam ah kan in sawn a.

          Kar khat zet engmah hrelova a awm hnu ah pawh a rawn harh chhuak thei lo, ka in ah an in nghat a, zan lam ah thalai hoving kan awmpui a, chhun lam ah a Nu leh pa in, kei erawh office ka thulh thei lo nen, ka zep lo ka hah tawngkhawng ngang mai, zing ka thawh hian ka uak ka uak zel thil ka ei tha lo nen ka pum lam chiang lo a niang tiin pum damdawi te ka han ei a, awmzia awm bawk silo, ka zan mu tlem nen ka lu hai deuh reng bawk si.

           Ka Dr pan thin Dr Isaac ka pan chuan nang hi nau I pai a ni lo maw, I in check taw hem? Ka harhchhuak zawk thla hmasa pawh ka period awm ka hrelo tun thla ah pawh ka la period miahlo tih ka ngaihtuah chhuak zawk a, test na ka lei nghal a, in ah ka hawng a, ni se ka ti nge nilo se ka ti pawh ka hrethiam lo, rai ka hreh reng reng lo, hei leh chen kan in zui a kan chetsual zah pawh ka chhiar senglo mahse ka rai ngai silo tuna tak ah kan dinhmun khir ber lai a ni nen ka rilru a buai a ni.

      Tlai lam ah Hospital ah ka tlang nghal a chaw min rawn pek nghal mai thin vangin in ah zing kar ah ka haw chauh thin, Nu Dingin “Acadia, I chau tawngkhawng lutuk tawh zanin chu in lam ah va mu ve phawt teh, apa nen hian bak ah zanin chu riah ve kan duh tlat” a tih deuh tlat avang chuan in lam ah ka haw phei ta nge nge a, zan ah bathroom ah ka han in test a, ka en tha ngamlo a ni, ka fa paina ber pawh hrilh tlak a ni dawn silo, nau lo awm ni ta se, an chhungkaw rilru ti hah zual tu mai ka ni dawn si.

        Ka han meng de de a hlauthawng tak chungin, ka hlauthawn na leh ka phur na hi a in chen lek lek in nia ka rin ni, a ni thei lo, a sen kalh mai chu ka mit ka han nuai a , a test n ate chua ka han khawng karh karh a a rin lah a danglam chuang silo, engtin nge ka tih tak ang? In lam a mu e ti lo chuan ka tlaivar thak , ka awmdan tur engtin nge ka ngaihtuah ngamlo a ni. Ka fa lo piang tur hi engtin nge a awm ang, Miracle ka lo rin em em hi a awm tak tak a nih si loh chuan Ervin hian a rei ber ah thla hnih bak a nei tawh bawk silo.

           Zing kar ah Nu Dingin min rawn call a, tlem a a harh deuh vang leh a dinhmun ah Aizawl lam phei pui a ngam awm tawh thu Dr in a hrilh vangin helicopter an in phurh phei mai an tum thu a rawn sawi nghal a, ka aw liam vel mai mai ni ber in ka hria , hospital ka va thlen phei chuan an lo insiam tawh a thawmhnaw vel erawh Driver in motor in hawn mai se an tia, Kawmzawl thleng ka han thlah a, Ervin biang ah ka khawih zeuh ka khawih hria ang pawn a awm lo a men pawh a meng heklo.

            Aizawl lam ah kar 2 lai hospital ah an awm tawh a harchhuah leh biak tlak tak in a awm tawhlo hrim hrim, a hun tawp a ni takzet tawh tih Dr ten a chhungte an lo hrilh vang in keipawh min rawn chah a , mahse phei ka tum hauhlo, “Nangmah a la nghak che a ni ber mai, hmui phunin I hming  a lam reng a, I rawn phei thei a ngem, engmah zep kan tum tawhlo a hun tawp a ni tawh a rawn thlahliam la kan duh a ni”

        Ervin pa in a rawn tih te chuan “Ka U in thla 2 vel a la nei a tih kha, minlo nghak reng rawh se, ka lo phei a nih chuan a kal nghal mai dawn a sin, ti khan min lo nghak se, a nunna kan pawt rei a ni mai” Phei ka tum bo lo, min hmuh hun hun a a kal tur anga ka ngaihtuah hian ka phallo a ni, ka hmuh lai reng a min liamsan tur hi ka ngaingamlo ka hmuh phak lo ah awm mahse a la thaw ve hram hram tih ka hriat hian ka lawm zawk a ni..

                 U Mama te nupa ka office bang ka in kawt a an lo thu ka hmuh chuan ka nghilh deuh dup, a boral ta em ni le? Chubak ka rilru ah awm tawhlo, “A la dam tiraw?” thil dang pawh engmah ka zawt lo, engvanga lo kal nge an ni tih pawh ka zawt heklo. U Mapuii an bu nghauh a ngawi rengin in chhung ah kan in zui lut nghal a, “Duati in siam rawh kan phei a ngai” U Maman thutphah a thut pah a a tih chuan ka chhang chuanglo, ka room ah inthlak turin ka kalsan  a, ka va let leh chuan an nupa hian kut in vuanin an lo thu a.

          “Duati i insiam tawh em? U mama bawk chuan a rawn ti leh a, “ala thaw inti ni lawmni? Ka rawn phei dawnlo, hna ka ngah chawl thei ka nilo, ka thih hma chu a thi hmasa dawn lo min tiam vek a lawm, inhlauthawng nih kha, Ervin hian vawi khat mah a thutiam ka lak ah hlen loh a nei ngailo.”

                   U Mapuiin ka u rawn ding tur a kut ah a chelh sak chu ka melh kar a, “Acadia, a kalsan dawn che tihna ni reng renglo, a ngai che a, hmuh che a chak, a hma a i rawn phei pawn a that chak em kha, i tan a fight thu a sawi reng a, a damnan lawm rawn phei la kan tih” hmeichhia zawng thu kan lo thiam deuh hlek zawk a lo nih dawn hi, a tawp ah zawng ka rilru a hneh ve ta nge nge niang, damlohna thil ah ka haw phei tur thu leh a zan a zan a kan chhuah tur thu kan Pu ka hrilh nghal a.

                Zing dar 5 ah hospital ah kan thleng a, ka chhungte pawh anlo awmkim thap a, naute ultrasound kan tihna hi engtik lai pawhin ka bag ah ka purse ah ka pai reng a, Ervin ka hrilh hun ah chuan a ni pawh a rawn tha chhuak thuai ang tih ka besei tlat a ni, fate hmangaihna hi chuan thihna pawh a ngam e an lo tih thin kha maw.

              Pawn lam a hmeichhe awmho mitsen rum ka hmuh chuan ka ngaih chu a tha mawlh lo, mahse tumah ka be lo, ICU ah min hruai lut nghal a, khawl leh hrui a taksa nen a in thlawn zawm nuk ka hmuh chuan ka rilru hi a na ngawih ngawih, ka rilru in Ervin I fa tan hian tang hram hram rawh aw, tun ah chuan keima tan chauh nilo I fa tan hian I beih tel a ngai tawh nia, kan nufa tan hian kha natna kha bei la, hneh rawh aw, ka rilru chuan a ti mawlh mawlh a.

                  A taksa ka dek a, lumna reng hi a awm tawhlo monitor ah erawh a nunna a la awm ve a ni tih erawh ka en chuan ka hria, Nunna chu a la nei mahse a nung tawhlo mi nung tiin chhiar mahse enge a hlutna? A natna a beih chhan ber te leh a hmangaih leh a mah hmangaihtu ten hmagnaih takin kan tlir reng tih pawh a hriat tawh si loh chuan enge a hlutna, nilove a hlu lutuk a law, tawngthei tawh lovin, min hmu thei tawhlo in, ka thusawi hre tawhlo mahse ka hmuh phak ah ala awm a, ka khawih theih in a la awm a, ka thusawi ngaithla turin a taksa ngei ka bul ah a la awm a lawm, ka tan chuan hei ringawt pawh hi a hlu tak zet asin.

             Tah chhuah hawm hawm ka van chak take m,mahse ka hrawk ah hian hnawhtu an awm nge a mah hian ka tah leh a phal tawhloh vang, ka tap chhuak thei reng reng lo, mahse ka mittui erawh lui luang an sawi ang maiin a luang kawi ngiai reng a hruk hul sen pawh a nilo. Rei tak awm an phalloh vangin pawn ah min hruai chhuak leh vat a,min hruai chhuah hma in, ka purse a kan fa, a ma thisen ngei mai chu ka phawrh a, a beng bul ah kun in “Ervin kan nufa tan hian I beih a ngai nia, i chak lo thianglo” tih pah chuan ultrasound thlalak chu a kut ah ka dah a.

               In chung zawl ah ka chho a , ka hnung ah min zui tu an awm tih reng ka hrelo, in chung zawl reh ruih ah chuan theihtawp in ka auva, tah hla chham tur ka hrelo ka awm ka chum a, ka au vak vak ringawt a, a chang leh ka sam te chu keh kawlh vek tum ang maiin ka han tham a, ka hnung lam tanga min rawn kuah tu chu tunge tihlam ka ngaihtuah tawhlo, chhuat ah ka thu thla hnawk a, lei char ka nem a, ka awm ka dawm thin a na lutuk hi e sawi chhuah dan pawh ka thiamlo a ni.

            “Duat, tap rawh tap vak vak rawh” Bena kan unau a ka ngeihlo ber maiin ka hnung lam tanga min rawn kuah a min rawn hnem chuan ka tah chhuak hi a zual ut ut ni ber hian ka hria, a ban ah theihtawp a na in ka hmer a, “Ben a na lutuk, a na lutuk” ka khur dar dar a, “Ka hria lawm, ka hria” Min khawngaih vang chuan Bena meuh pawh a mittui a tla ni tih a tawng ri chhuak ah chuan ka hai bik lo.

                     “Ben, min kalsan lovang tiraw? Enteh nau ka pai a, min kalsan thei a ni lo hrim hrim, ka rawn chhuah hma khan ka hrilh a mahse mi pawh a chhanglo, a fa hi a duh ve tak zet a nih chuan kan nufa hian min kalsan lovang tiraw Ben, min chhang teh” Ka unaupa hian sawi tur a hre hlawllo, ni e enge a sawi chuan a nga? A farnu in tun ah pasal nei lovin nau ka pai a, chutah ka nau paina pa hi min kalsan mai thei dinhmun ah a ding bawk si.

               “Keimah a awm lawk ka duh, in ngaihtuah fim ka ngai, khawngaihin” min ngaihtuah hel na in ka dinhmun hrethiam in min chhuk san a chhuk tur leh Ka nu rawn chho tur in tawk chu Bena’n a hruai thla lui a, “Lalpa I hneh ah hian thil ka tisual, Ervin nen hian kan tisual nasa takin kan tisual ka hria lawm ,mahse min hremdan hi a va han na bik ve le, kan tihsual vang khan fa nei thei lo tur ah kan in ngai thin a sin mahse hei tunah Ervin hi min lak sak I tum a, engtin nge ka tih ang, kan pahnih hian min la ve ve mai t ache, ngatinge naupang pawisawi lo hi tuar tir I tum”

                       Pathian lak a vui thei dinhmun ah ka dinglo tih ka hria mahse naute hian enge tihsual a neih, keini a nu leh pa thil sual tih man tel tir tur khawp Pathian em ni a nih? Ka naute hian taksa em pawh a la neih pum hma in a Pa in a kalsan ang maw? “Lalpa hmangaih Pathian I nih kha khawngaih takin kan chung ah hian zahngaihna lantir hram rawh”

              Kan pahnihin Ervin nen kan tihsual chu kan tuar mai ang,  naute hian a tuar tur nilo chu lo reng ah Ervin hian a thil tihsual siam that lehna chance siam sak rawh khawngaihin ,keipawh chance min pe a ni lawm ni? Ngatinge Ervin tan hian a fairlo bik em em na tur kei aiin a tisual lian zawk bik lo a sin.

       Ka tawngtaina hian mu leh mal reng a nei lo, a chang leh keimah leh keimah ka inbia , a chang leh Pathian nge ka biak tunge tih pawh ka hrelo hial zawk a sin, zing ni sa in min rawn en chuan ka tho kang hluai a, khua a thim reng ngailo a, zingtin ni a rwn chhuak thin ang hian keini pawh hi he zanthim ah hian kan awm reng lovang, kan tan khua a rawn var leh anga ni a rawn chhuak leh dawn a ni tiin keimah leh keimah ka in hnem a.

              Min hnem tu tur ber leh chakna min pe thin tu ber hian ka rilru a na ni tih pawh a hrelo a, hnem ngaii  ka awm tih pawh  a hrelo a nia, amah vangin hnem ngaiin kan nufa in kan rum kawk kawk a, tunge min hnem tawh chuang ang, Nisa tak mai chu thei leh thei lo hian ka melh a, “Ni –a lo ngawi reng rawh khawvel mi zawng zawng tan I enna i chhuah ah kan chung a khawdur hi I rawn vai kiang ve ngei ang tih ka hria lawm.

        Ka nu leh U Mapuii in chung lam ah arawn chhoh tak vang chuan ka chhuk ve ta hram a, damdawiin lam ah kan awm nileng thak a, Bena hian alo ngeihlo viau emaw ka ti kha nia mahse a hna kalsanin Ervin kiang hnai ah nileng thakin khawvar hlim atangin a la awm a, Ervin vang ka tihrual in a bul ber ah chuan keimah vang  ani, a farnu rilru na vawng vawng min kalsan a tum hauhlo.

              Ka nu leh pa leh Bena te nen, kan awm ve a, U Mama leh U Mapuii erawh hna an chawl ngawt thei silo mahse tlai lam ah erawh an rawn lang ve hlawl a, dar 6 rik dawn ah ka nu leh pa leh U Mapuii an hawng a, kan unau thumin kan la awm, ka nuta te min hmangaihna hi a hlu ka ti thar tak zet, an farnu in ka mamawh ngawih ngawih laiin vawi khat pawh min kalsan lova ka ding lam leh ka vei lam ah dingin ka ban phak ah an awm reng a, unau in hmangaihna hi chu alo hlu em a ni.

             Hospital bul hnai a restarant ah a la awm ho kan in hnawh puar a, kan uanau thum bak ah Lenny leh Ervin te cousin in min rawn zawm ve a, tih tham ka ei meuhlo tumah ei tui kana wm hauhlo na in, keichu ka lem thei hlawl lo ni ber hian ka hria “Duati ei luih tum rawh, kana wm dan chin tur hriat a ni lova, nangmah I in tih chak a ngai a nia” kan inzui dan hi chu keima lam a ka chhungte mai bak ah anmahni lam hian an hriat vek avangin min ngaihsak em em hei hian ka rilru na tamtak min chhawk reng a ni.

                        Zan dar 8 vel ah kan let chho leh a, in chhung ah awm an phal loh vangin pawn lam ah kana wm a, a nu leh pa leh a unau pianpui te tak tak ICU bul hnai ah awm an phal sak a, An Upa ber I Rinte a rawn chhuakin “Acadia va thu lut ve rawh” kan in kawp zia hre mahse kei ai chuan a chhungte an pawimawh tih hrethiam lo rual ka ni biklo a, pawn a hetia lo awm ve hi ka duhtawk viau, ICU chhung ah luh an phal a ni mang bawk silo.

                     “A ngai hranlo  hei helai ah hian boruak a thawveng zawk a, tah hian nuam ka ti lawm”  ka dar ah a rawn beng thak thak a “Meizial ka zu ve duh a bak ah ka nu in a hmu duh che a” hnial pawh ka tum tawh lemlo, ngawireng chuan ka lut phei ve mai a. A nu chuan a bul a thu turin min lo huih vat a, an mitsen rum te chu hmuh hreawm ka ti takzet a ni.

                “He thil hi nangma dah a mi” Ka ultrasound tiha thlalak Ervin ka ken tir kha Nurse ten an lo pe a ni ngei ang, ka mittui khap per sak pahin ka bu nghauh ringawt a, min rawn kuah thlawp a insum tih hriat tak mai hian a rawn tap nghawr dat dat a, keipawh ka bang biklo, Nurse a rawn chhuak a “A tawp nan rawn hmu ta che u”