LENNY ACADIA -5

A nu leh pa an lut hmasa, a rei vak lo an awm a, Nu Dingi an pa in a rawn kuah chhuak ka hmuh chuan ka khur hlawk hlawk thei, an unau kim leh an chhungkaw hovin an hmuh zawh a, hmu ve tur a min tih chuan luh mai ka han tum a, kawngka ka pel theilo reng reng, ka khur nasa lutuk ka khup te chu a sai hlawk hlawk a, ka thu mai tur chu Ervin Pa in min rawn kuah vat a, min luhpui a.

Nilo, ka Ervin nunna nei tawhlo ang mai a let bal a monitor an phawi rual rual a kal mai tur chu ka phallo, min hmu thei lovin, ka aw ri hre tawhlo mahse, he khawl lak thlak hi kei zawng ka phal ve lo a ni, tiang ri ngawt a awm tur pawh hi nise kan enkawl kham lo a ni, “Pa Ruat phawi tir rihlo mai ang u, a rawn tha chhuak leh maithei sin” beiseina tlem ka la neih ve ang chu tuman an nei lo nge an thutlukna sawh sawn tum reng an awm silo.

 A kut ah ka va vuan a, ka han fawp vang vang thin, pangti lum ngah em em thin kha rial ang maiin a dai diai ta si a, a chal ah ka fawp, a biang ah te ka han chul thin min hre awm ang pawn a awm tawh silo, mahse a pawilo he khawvel a ka hmuh phak a a la awm chhung chuan pawi tihna ka neilo, min kalsan theilo, kan nufa chauhin engtin nge min kalsan theih ang, mahni mawhphurhna la ngamlo khawp a mipa dawihzep a ni hleinem.

Zan dar 11:45 ah min kalsan ta, Ka nu leh pa erawh upa lam an nih tawh vangin an rawn kal theilo a, In lam ah Ka U Mama’n U Mapuii hruai turin min kalsan a, Bena nen kan unau in Ervin te in lam kan pan thung a, zing dar 5 vel ah ka nu leh pa an rawn phei a, dar 9 vel ah in lam ah chaw ei tur leh  inthlak turin kan hawng phei a, kawng lak ah pawh tumah kan in be lo.

 Ka room ah ka lut tlang nghal a, washroom ah tui vawt in ka in phuh seng seng a, “Ervin kan thawnthu chu ti hian a tawp ringawt ang maw? Ziah chhunzawm tur kan la ngah a sin, fa I nei dawn tih tal  kha lo hre hman ni lang chuan ka lung hi a dam deuh tur, Lalpa khawngaihin fa a neih tur thu tal hi chu lo hrilh mawlh ang che aw”

       Bathroom kawngka an rawn chum tak ah chuan ka harh chhuak hlawl a, ka ngaihtuah na ram ah ka lo cheng rei mah mah a ni ang, U Mapuii leh ka nu in hlauthawng tak a kawngka ka hawn rual a min lo en chu ka ngaipawimawh lo ni lovin sawi tur ka hriat loh vangin ka kalpel a, Ervin kawr min lei ngei mai, a dum ka ha a, kekawr dum leh pheikhawp dum, ka bag thlengin engkim a dum vek tak tak ka in bel a, inhnuai ah kan chhuk a.

Bena hian ka chhungte hnen ah nau ka pai tih a hrilh lo nih chuan keimah chuan tun dinhmun ah chuan hrilh tumna ka nei rih hauhlo, ka rilru in “Ervin, lo lungngai suh aw, kan fa hian maw tlakchham a nei ngailo ang, engkim ka pe ang, hlim takin ka siam ngei ang” ka ti mawlh mawlh a, chaw reng ei chakna ka nei lo mahse Ervin ka chan tawh a kan fa leh zel hi ka chan theilo, ka in tih chak a ngai ni tiin chaw ka’n ei lui tak tak mai chu ka chhungten an thil ei ban san meuhin min melh a engah mah ka ngailo.

Kan chhungkua ah chuan ka ei hnem ber awm e, midang chuan tih tham an ei hlawm lo, a vui na lam ah kan chhung in kan phei a, thlanmual lam ah pawh zui tu a ngah khawp mai, ka mangtha phal hlawl lo a sin, ka damchhung in vawi khat pawh a hmel ka hmu leh tawhlo ang maw?a aw ri ka hre leh tawhlo ang maw? Ava han na take m. Ervin ka hmangaih reng ang che tiin ka thlahliam a ngai ta si.

Mahni a han awm hrang leh tur chuan chhungten an lo phallo nen, kumkhat em pawh ka la thawk lo na in, transfer min dil sak a, ka naupai nen ka dinhmun hrethiam in Aizawl lam ah min transfer ta hlauh a, Friday tlai piang in ka office bang Ervin te in ah ka peng kawi a, a room ah vawi khat tal ka lut ngei ngei thin.

   Ka naupai pawh a lian ve tawh tun ah thla 7 hmel a hmu ve taw a, ka chhungte mai bak ah Ervin chhungten min ngaihsak em em a, an Upa ber  te hian fapa 2 an nei a, an in dang tawh a keini lam ah a hmasa ber tur a lo ni bawk nen, ka nu leh pa pawh an phur in U Mama te nupa phei chu an phur zual tak zet, fa an nei theilo nge an in dang ka hrelo tun thleng hian an la pailo mahse tunlai ah naupai hmat duhlo tam tak an awm tawh a, an thutlukna piang kan zah sak.

Saturday piangin Ervin tlawh turin kan kal a, tah loh tum hi tun thleng hian ka la neilo, ka mamawh ngawih ngawih laiin min kalsan a, a duh reng vang nilo mahse ka thinlung hian a dem chang ni hi a tam thin a sin, fa hi nei dawn lo ilang chuan kha zan khan ka zui ve nghal ngei ang mahse kan fa tan hian ka dam a ngai ani tiin keimah leh keimah ka in fuih mawlh mawlh thin.

Damdaw tha chitin rengin min enkawl a, ka hlimna ber Ervin awm tawhlo mahse ka tan a engkim huam tu ka chhungte vang hian hringnun hlut zia ka hre thar leh thin, Pensy leh Lenny an rawn lang zauh zauh reng  a, an in zui rei ve tawh khawp in ka hria, Pensy ka ngaithei vaklo tih hi U Mapuii pawn a hrethiam a niang, an lo len tawh hi chuan a inthlahrung ngawih ngawih thin.

Keipawn ka khawngaih ve  tho, an thiante an rawn leng a keimah vanga inthlahrung tak a a awm hi ka duh ngailo mahse min biak dan leh a hawiher vel hi ka ngaithei thinlo, tawngkam ngeiawm tak, huat dawn a huat tak tak theih si loh, paidam mai har tak si a tawng chhuah a ching hi ka ngai thei thinlo a ni. Saturday zan ah chhungkua in kana wm kim thap a, ka Nu series duh em em mai kan nin ruk em em si chu kan thlir ho thap a, Doorbell ri ah chuan ka va tho va, Lenny te thian ho an rawn lut khawm a.

Ka naupai vang nge ka hrelo, mi awm khawm luih luih na zing a awm hi ka peih hlawl lo, an rawn lut fel deuh awrh tih ah room lam ah chhoh mai ka tum a, “Kan rawn len chhan ber a mut dawn si chuan kan haw mai dawn mi” Lenny an a rawn tih chuan ka ding chawt a, ka hawi thla nghal a, “Acadia rawn thu ve rih t ache” U mapuiin a rawn tih tak ah chuan ngawi rengin ka chhuk thla leh mai a.

“Raipuar pung tawh in rawn len chhan chu ka va ring chiah love aw” Ka fiamthu ve nghal zat a, an lo nui deuh hawk hlawm a “Naktuk zan hi ka b’day a nia, Acadia a chhuak thei awm silo a, he tah lawm in phal mai em” Ka nu leh pa rawn pah chuan Lenny chuan a han tia, kei min ngaipawimawh vang maw, mak ka ti lutuk chu ka ang deuh phuau a.

Rin har ka ti em ani, Ani b’day ah tinge kei ka tel ve chu tinge an ngaihpawimawh em em, khawngaih nih hi ka duhlo, ka dinhmun vang a miin min khawngaih hi ka lawm mahse khawngaihna hian keimah ah chakna min pe silo chuvang chuan  tha te te in min kawm se ka duh zawk, ka nu leh pa in an phal zia thu an sawi chuan ka lawm vak lo zawk, mi zing a awm hi ka peih lo tak zet mahni a awm emaw ka chhungte bul a ka awm hian ka hlim tawk viau a sin.

Office ka kal tawp ber ni a ni bawk a, Ervin te in ah ka peng hawng a, chaw ei turin min sawm nasa viau na in kan in ah B’day party a awm dawn thu ka sawi chuan min hnial ta bik lem lo a, motor khalh an phal tawh loh vangin Kan inhnuai luahtu nupui nei hlim hlawl driver ah kan la a, chu chuan min hruai kual zel mai , keimah vang liau liau a min rawn hman chilh tur te an nih vangin gift pek ve ngei ka duh.

Ervin kha chu a ngainat zawng leh duhzawng ka hria a, mahse Lenny hi chu ka u te  nen in zui viau mahse mimal tak a ka pawh  em em loh vang in han tihsak mai tur ka hrelo kher mai, a thawmhna hak tawk tur awm ang ka hrethiam bawk silo, ka leisual ta nih leh a thleng leh theih tho an tih vangin shirt leh Tshirt ka laksak ta ringawt a, ka pack tir thlap a.

In kan thlen in, in chung zawl ah  eirawng an lo bawl deuh mup mup a, room ruak thenrual kawm nan hrim hrim a kan siam room zau tak ah an lo lam bawk , hetiang ti deuh luai luai hi nia ka ngaih theih thin loh, mahse ning ang a lan chu ka duh miahlo, ka inthlak sawk sawk a, eirawng bawlna lam ah ka chho ve nghal zat a, chet ve an phal lo viau na in salad siam ho ka va pui a.

“Lo ti ve suh, room lam ah sawn rawn phei ve rawh “ Lenny an a rawn tih chuan  eirawng bawl na lam awm nuam ka tih thu ka sawi chuan a ner deuh suk a, a mei Pensy pawh a meng si hlap tih a mitmeng ah ka hai lo, Ervin kha chuan a bul ah emaw ka room ah keimah a savawm ka talh a nih loh chuan tu bul ah mah in a phal ngailo, engkim hi a mah min hriat chhuah tir tu a ni leh si.

Ka Pa in hunserh hman a rawt vang in inhnuai lam ah kan chhuk a , tui an lo ti bua nge step ah ka in rah sual a ka pe tek nawk nawk a,ban tha chak zet in min rawn man bet chawt a, ka hlauthawng lutuk bawk si, ka tha khur zawih zawih a, U Mapuii an rawn tlan chho nghal a, ka in sawh leh sawh loh min zawt nghal var a, ka insawh lo na in ka hlauthawng lutuk kha ka normal theilo zawk, Ka pa in hunserh a hman zawh chuan chaw ei an la peihlo vangin kei leh Ka nu leh pa nen kan 3 in kan lo ei hmasa a.

    Ka eikham ah ka room ah ka lut a, gift ka leisak pek tumin inchung ber ah ka chho a, ka hmu mai bawk silo, thlanglam pang bang kil thim lai a,Pensy in a lo kuah bet a, a nghawng vel ah a lo fawh sak lai chuan engine nge min mawlh pawh ka hrelo, ka dinna ngai ah ding in ka en reng ringawt a, Lenny an chhan let a tum lo chuan ka nuih a ti za angreng viau.

Lenny rawn hawi phei in min hmuh chuan Pensy chu a nam per deuh dawrh a, ka harhchhuak thut a ka in sa seng thuai a, Lenny a muang changing a rawn phei a, ka u thiante ho awm khawm na ah ka thu khawmuang ve a, fiamthu duh zet mai  U Peka ti ti anlo ngaihtla a, an nui leh deuh ham ham a, kei erawh ka thil hmuh lam ngaihtuahin mi nuih rual chuan ka nui ve suk suk a, U Peka fiamthu ai mahin Pensy khan ka nuih a ti za tlat.

    Lenny rawn luh chuan gift ka pe nghal zat a, Pensy chu a kai tawh tak zet tih a hriat an zing ah amah ang em a rui tumah an awmlo, mi puitling leh mi lehkhathiam awm khawm an nia, an nawi ve bung bunglo Pensy angin, U Mapuii pawn a in, pawi ka ti lo mahse tumah rui nawi an awmlo in tih hlimna  tan leh in kawm hlim nan an in a ni mai. A inthiam ho ah hi chuan engmah sawi sel na ka nei hranlo kei ngei pawn ka lo in ve thin a lawm.

           Zan dar 11 vel ah an tin darh hlawm ,a boruak ti hut hut khan min ti nguai nghulh a, ka zawi tak zet office kal ngai tawhlo bawk nen, zing ah ka tho tlai ngei mai, ka chhugte pawn min rawn kaitho lemlo, dar 10 ah ka harh hlawl a, chaw an lo ei vek tawh a, ka nu leh pa dawr lam ah an awm a, hah in chau viau thin mahila, in lam a han awm deuh tawp chu a ninawm dawn hle mai.

Ka nau neih pawh a hnai telh telh a, ka nu in min chhuahsan tawh meuhlo kan in awm deuh chawt a, chawhnu dar 2 vel ah ka pum a rawn na riai riai a, a reh leh mai thin vang in ka nu pawh ka hrilh hran lo mahse a rawn nat tak tawlh tawlh a chuan ka nu ka ko min chhang mai silo, in hnuai te in ah alo zuk kal niin, ka call a, a rawn tlan chho nghal a.



Kan inhnuai pa an chhungte rawn zin tur hruai in a kal daih bawk si, a motor khalh thiam ber lah khalh thei dinhmun ah ka ding bawk silo.Bena kan call nghal a, engtik laiin nge a rawn thlen phei hman pawh ka hrelo, Tlai dar 3 vel ah damdawiin ah kan lut fel a, Ervin chhungte ka nu in alo hrilh bawk a dar 4 vel ah chuan Ervin chhungte leh ka chhungte lam an kim deuh thap tawh a, ka u te pahnih thawnhna hmun a nih vangin min ngaipawimawh thiam mai bak ah damlo dang an en dan reng reng pawh damlo tan pawh a dam nghal sawng sawng na tur khawp a ni.

Ka vei rei tawh tak zet zan dar 8 ah pawh ka la nei thei lo, keimah ka chauh tawh bak ah ka hlauthawng tak zet a ni, ka U Mapuiin min vil a, min fuih sauh sauh bawk a vanneih thlak takin dar 8 leh chanve an fanu duhawm tak Kg 4 lai mai ka han nei ta, ka lawm rual in ka lung a chhia, Ervin an han hmu ve se ka ti tak zet, U Mapuii pawh a lawm zia a hmel ah a hmuh theih, ka chhungte’n hmeichhia an it vek, ka nuta  te phei chuan sawi ri ngam chiah silo hian an it zia ka hrethiam ve.

Kei ngei pawhin hmeichhia ka awt ngawih ngawih a, kan duthusam a rawn piang bawk a, kan lawm na hi zual bik emaw tih mai tur mahse chutih rual in Ervin kan ngaih a zual a ni, Cabin kan hauh lawk a vangin kan insawn nghal a, Bena lawm lutuk mai kha hmuh a nuam tak zet, Nurse ho lah chuan ka pasal emaw anlo la ti zui, mittui nen kana wm pur mai tu mai pawn Ervin kan ngaituah lo thei silo.

Ervin Nu leh Ka nu in min riahpui an in chuh a, 2 riah na phal tho avangin an 2 in min riahpui a, an fapa nen innei lo mahila, an monu ang pawh nilo an fanu ang maia ngaiin engkimah min buaipui tak meuh ,anni lam ah hmeichhia anlo tlem ve bawk nen kan lawmna hi a in zat hial in ka ring, neih zan a nih vang nge ka hrelo, a mu tha duhlo em em a, a tap deuh reng mai a, ka nu te pahnih an khawngaihthlak tak zet, midangin min riahpui an tumin an phallo ve tum hrang bawk si.

Zing ah Bena leh ka pa an rawn thleng chho a, Ben’an a han pawm vel a suk pui bawk, a lawm vak vak bawk si, Nurse ho lah chuan an lawm em em mai lehnghal a, “pasal I nei fel tak zet” chimawm ta ngang chu “Ka mawng lam hi chuan farnu te hi a hre hrang ve sin” Nurse zak lutuk sen tawn tawn chu a kahwngaihthlak zawk. Karkhat zet kan awm hnu ah kan chhuak ve thei dawn ta.

Damdawiin kana wm chhung khan vawi 5 zet Lenny a rawn lang a, vawi 2 Pensy nen a bak chu a mahin a rawn lang a, kan awmna bill vel Ervin chhungten an lo pe vek a, an fapa tan tih theih an neih tawhlo thu leh hetia an tih hian an rilru a dam thu an sawi chuan kan hnial bik lem lo a, kan chhuah hnu ah pawh nitin deuhthaw in lam ah an rawn la lang zat.

Hnute pek chhung tak meuh meuh chauh a ni ka chan ni, tu mai pawh chuan pawm in chuh in an in hau uaih uaih reng hlawm a, ka tan chuan hei bak bak a awm thei tawh dawn chuang lo, nau hualna leh hming phuahna ni atan tun Saturday lo awm tur hi kan tia, kan inbuatsaih nasa, Ervin te chhung lam hmaih neih kan hlauh vangin sawm tur lam chu an mahni kut ah kan dah deuh tawp a.

Ervin nu leh pa hming sa tur a kan tih chuan anlo lawm em em mai a, Bena erawh in a kohna tur ka sa dawn a tih tlat vangin kan pawm tlang hlawm a “Layla Malsawmhlui” a mawi ka va han ti tak em! Thil pek pawh ka fanu hian a dawng nasa, Ervin ka ngaih a zual in ka mamawh tak zet vawiin ni ah hian, heng kan thil tawn te hi rawn hmu ve se, min va han lawmpui in a phur dawn nen, thil tullo tak mahnise ka ngaihtuah lo thei silo.

       Ka fanu pian atang phei chuan ka khawvel chu a rawn par thar leh hian ka hre thin, Lenny pawh a hma zawng aiin a rawn lang ngun khawp mai, ka fanu hi a cousin fanu a nih vangin ngaihsak pawh a rawn ngaihsak , mamawh kan neih leh neih loh min zawt chamchi a, Ervin nen khan an in pawh vak ka hrelo mahse a ni pawh hi a unaupa ang mai a mawhphurhna hlen chhuah duh mi a ni tih ka hria.

A pa thih cham ah chuan thlan ah kan chhungkua leh Ervin te chhungkua nen kan awm a, kum khat chhung hi avan lo reilo tak em! Min kalsanna mi ngaih chuan kum1 lai mahnise kan tan chuan nimin ang mai kha a la ni sin, ka fanu a lian telh telh a, Ervin ka ngaih a zual ting, khuarei hi ava han rei dawn tak em! Layla ka pai tih ka hriat khan Ervin dinhmun vangin ka lawmlo ka fanu chung ah hian ka lawm hlawllo pa tello a enkawl kha ka zuamlo mahse Ervin an min kalsan dawn a min hnut chhiah thil hlu tak khawvel sum leh pai in a lei phak loh ka fanu hi ka tan mai bak ah kan chhungkua, Ervin te chhungkaw tan hian a hlu tak zet.

Layla pawh thla 10 hmel a hmu ve tawh, Ervin te in ah chaw kan ei phei zauh zauh a, anni lah in an lo ngai ve bawk nen, zan dar 9 ah te kan hawng a, naktuk hi ka B’day a lo ni ven reng mai, lawm tumna pawh ka nei lemlo nu nih tawh chuan han lawm vak kha a ho ka ti ta tlat, a hma a ka ngaihpawimawh thin nen. Bena leh Ka u Mama te nupa in plan fel tak anlo siam chu niin ka hre hauhlo.

Lenny te thian ho leh Pensy leh Lenny farnu Mamuani an lo sawm bawk a, ka thiante pahnih Teteii leh Lateii minlo sawm sak bawk a, Office bang in ka thlen chuan kawngka ah ka fanu leh Bena’n min lo hmuak a “Happy Birthday ti rawh le” tiin Layla chu a han bia a, Rose bouquet nen min lo hmuak tu te chu ka kuah lut nghal a, naupang chhia tak a kan in an lo chei vel chu ka nuih a za ang reng viau ka lawm viau rual in, in chhung ka pen lut chiah a “happy birthday” tiin an lo au rual that a.

Kei ai mahin ka fanu hian nuam a ti zawk mahin ka hria, a phur em em a, ka room lam a inthlak tur a ka chho chu min lo ngai ve deuh nge, men puai chungin alo in hnit deuh fap fap a, fa duatsual hi ka hlauh ber a nia, naupang control loh lutuk te mahse ka chhungte’n an hmangaihna aia an duatna a langsar thin hi kan in khak leh zauh zauh fo thin. Ka Pa phei chuan han hrawk ve deuh hlek ila, a lak nat pui em em a, hetiang ringawt chuan a fuh thei dawnlo.

B’day cake kan zai tur te chu Layla phur lutuk leh a kawr mawi tak mai, U Mapuii’n kan nufa tan a lo order kan han hak te chuan hrethiam ve fe hian kan kawr chu a kawk leh va va thin, kan hlimni alo thleng a, kan ngai zual a kan lungngaihni ah lah ka mamawhna leh kan tan a a hlut zia kan hrechhuak leh thin. Ka fanu hian a pa te lam a chhun lek lek min tih sak fo thin, a pa mitmeng leh hnar ngul te hi a chhun fuh takzet a ni.

Lawm a hlawhin hmeltha ti tu pawh a ngah ve thin, chhuahpui ni khua te hian a nuih duh em vang pakhat hian mi lawm a hlawh zual a, a sam color mawlh mai hian mi lawm a hlawh zual a pianpui ve reng Ash color lam pawl lek lek chu a vun rawng nen a in hmeh ka ti ve thlawt ka fanu mahnise ka mit ah hi chuan a tha ve chiang a ni, chaw kan ei kham meuh chuan a mut chhuak a chiau hiar tan viau mai.

Ka gift dawn ho pawh ka buai pui thei meuhlo, a mut chhuak hnute sual hi a hahthlak lam ve det thin, room ah rei fe kan in awih hnu a a mu fel ve hram a, A Ni Bawihbawihi’n puak a chuh deuh tlat vangin kan hlan chhawn na lam a a harh, an han in awi leh fe a, a tawp ah zawng a mu ve ta nge nge e, ka gift dawn zawng zawng a ka duh ber mai, Ervin nau in Ervin nen a kan thlalak a lo edit Layla a lai a awm lai ka han hmu chu ka in sum hman lo ka tap chhuak rawih a, min pe tu ka ti hrilh hai tak zet mahse ka in siam rem thuai a.

Lenny hian entin nge ka ke size a hriat a pheikhawk sang ka duh tih a hriat ka hre hauhlo, Maroon color sang tha zet sexy zet min pek chu ka lawm takzet, hmui phunin ka hawn pah chuan “ka lawm e” ka va ti sap a, min lo siai nghal zat ka hmuh chuan ka hrelo ka lai em em ringawt a, a bul a Pensy thu erawh a meng thip viau, Pensy hian min ngaina bik lo tih ka hria ka ngainat loh tluk zetin mahse ka be chhe ngai lemlo a ni pawh chu ti tho.

Ervin chhungte haw an tum a, Bawihbawihin Layla a en ngawih ngawih ka hmuh chuan ka khawngaih thlawt, an hnen ah awm se an ti ve ngawih ngawih hian ka ring thin, chhuan lam siamin “Bawihbawih zan in chu minlo riahpui ve ta  che tunlai chu I vahnu hi a khirh lutuk a zan ka mu tha meuhlo” Ka tih chuan a aw  rang ngei mai, mut that loh a nei hauhlo mahse riak tur pangngai anga ka sawm chuana inthlahrung anga a duhlo kual leh dawn tih ka hriat sa vang a nia.

Thalai lam an la awm khawmuang thung a, Layla leh a Ni erawh kan room lam ah an awm tawh thung, mak ka tih chu mi pangngai ve viau a ka ngaih Pensy thil tih khawm a piang a kai  chhaks reng mai hi chu mak ka ti ve deuh zanin ah pawh thalai lam chuan an in deuh vek mahse tumah han kai deuh ik pawh an awmlo a mah leh bawk chu a dang leh bik, ka ei loh sa nak laiin ka huat tawk lek a awm dan lah hi a hre phian lehnghal a.

Ka Nu te pawh mut an tum hnai a, an tih ziah dan in mut hma Layla an han hmu leh hram a, Dar 10:30 vel ah an tin darh sang sang hlawm a Lenny te unau, Pensy, U Peka an la awm a, thil hnawk zual pui U Mapuii nen, mamuani nen  kan thian fai a, choka lam ah kan awm a, mipa ho leh Pensy balcony  lam ah an awm a, an in belh leh tih ka hre mai mahse tumah thawm benchheng emaw ti lung lung an awmlo bawk a U Mapuii pawn a khap lem lo.

Kai chhe chhaw hian Pensy a rawn phei a, ka thil sil lai min rawn kuai her lawp a, “Acadia, ka hrilh ang che, nuthlawi nih chuan inthlahrun ve tur, I huang chin I lo hre tawh dawnnia” tu mai pawh chuan a ngaihna kan hrelo tak zet, Mamuani a lo inrawlh vat a, “Pensy in vak vak suh ka tih kha I mak thei em em lutuk mai” a hmel ah chuan a lungawi zan lo tih ka hre mai mahse a ti lang vak hreh ve te pawh a niang.

Chhan pawh ka chhang chuanglo, U Mapuii common room lam ah a phei a, mipa ho an rawn phei nghal bawk a, “Lenny, haw rih phawt mai teh u, a hahthlak thin em mai” U Mapuii pawn a ti nghat a, thil ka sil zawm leh zat a, ngaipawimawh lo lutuk a ka awm chu a tuar theilo a ni chek ang chu Ka sam ah a rawn kek bu lawp a ka hmai ah a rawn beng nge a chum pawh ka hrelo “Acadia, Lenny hi ka bialpa a nih hi I hria em, ka ta a nih hi vawi khat pawh lo ngaih melh leh tawh suh, hman atang tawhin Ervin damlai tang tawh reng khan I zar buai tawh”

Kan ri deuh hluai bawk a, ka sam a chelh na a thalh mai duh bawk silo, a hnu ah chuan a thlah felt a hram a, ka rilru na lutuk leh zak bawk si ka mittui a luang zawih zawih a, ka rinloh lutukin U Mapuii’n Pensy a beng hawi sawk chu tu pawn mak kan ti, childhood friend kan tih inthenawm reng, kg atang a in thlah lova in zui chho ngar ngar an nia keiai mah chuan Mamuani chuan  mak a tih hmel zawk. Mahse Mamuani pawn Pensy a rawn dang nghal a, pawn lam ah an chhuah pui a.

“Peka he nu hi va thlah rawh” Lenny an aw khur zawih zawih a a tih chuan ka mittui a la luang reng a, Ben’an min kuah nghal zat a, ka kut ka sil sawk sawk a ka room lam ah ka tlan chho nghal a, Bawihbawihi alo la mu lova, kan thawm a hre lo niang, a earphone vuah nen, washroom ah ka tlan lut nghal a, ka pian tirh ata ka hriat chin ah tumah hian kut min la thlak ngai lo, ka diklohna ah pawh ka chhungte tak ngial pawn kut min la thlak lo.

Ka na takzet a ni, ka na dawt mu hlum hlak leh nghal chutah Ervin hming ala lam ngam zawk a, ka tih ngaihna hrelo chuan shower in ka in phuh ngheng ringawt a, ka room ah Ka U te ho leh Lenny an lo awm a, ka chhuah leh chuan “Lenny a ho lutuk, a rui bawk nen, I thiam loh engmah a awm lo nia” tiin an lo hnem a, Lenny inthlahrung lutuk hmel chu hmuh hreawm zawk a ni, A rawn ding hluai a “Acadia khawngaih takin min ngaidam rawh aw, ka tih palh tak zet a ni”

“U Lenny, I thiamloh  a awm reng reng hleinem, a kai em a nih kha a harh chhuah hun ah a zak ve ngawt ang, engah mah ngai suh” ka han hnem tak ngial a ka thinlung erawh a dam hauhlo, ka mit veilam a na ut ut a min lo chum a lo nih dawn kha “Mapui hei a mit vel hi a duk a nia” Bena arawn tho hluai a, kawngka ah chak zet in a chhuak a”Mam va dang rawn a in sum leh hman lovang” ka tih chuan ka U Mama pawh a rilru a na thawkhat hle tih Bena umzui a tum loh dan ah a lang reng.

An farnu kehthei dawm a an dawm ve midang kut tuarin an hmuh lai ngei a ka awm chu an tan a na dawn lutuk, ka nat tluk zetin an na dawn, “Mam khawngaihin, va dang hram rawh kan mualpho lutuk pal hang” ka tih chuan zawi muangin a tho a, “Acadia pawi ka ti lutuk, lo sawm ve loh tawp tur a nia, khatiang khan a rui nawi ang tih ngaihna pawh ka hrelo, bak ah tet lai tangin kan in kawm tawh a chet deuh buan buan duh mi a ni na in khatiang em a nasa khan a khawsak ka la hre ngailo.

Kan thawm teh nuai a vang khan ka Nu leh pa pawh an harh a ka room ah an rawn chho a, ka Pa in ka mit duk chur a hmuh chuan “tunge” chu bak engmah a sawi lo, ka nu in min rawh kuah nghal a, ka no thin hle na in fanu ka neih tak hnu hian ka pachang tawh khawp a ka tap lai hi ka chhungte hian an hmu zen zenlo, ka nu leh pa ka hmuh chiah chuan ka rilru a na thar tak zet.

Mama leh Bena an rawn in zui lut a, chutih lai chuan thil thlen dan vel U Mapuiin ka nu leh pa a lo hrilh mawlh mawlh a, “Zing khua var se, FIR ka thehlut nghal ang, Lenny min hrethiam la, kan inthian thatna pawh a tawp e” Ka U mama meuhin a tih chuan hreawm ka ti tak zet, Lenny thiamloh engmah a awm silo, Ka Pa in “Mama i tawng fimkhur rawh, thu ka ngaihthlak dan ah Lenny thiamloh engmah a awmlo”

“I bialnu vang a ka farnu thinlung hliam leh a hmai duk hi ka damchhungin ka theihnghilh tawh dawn lo, nangpawn I hria, kan farnu neih chhun kan hmangaih zia chu, I bialnu vang mai mai a, ka farnu hmel a hliam awm hi ka pai dam thei lo ka che na dawn lutuk a chu chu in tuar thei dawnlo nih chuan Mapui nangpawh In atang hian chhuak mai rawh”