LENNY ACADIA -6

U Mapuii rilru lo that zia leh putilin zia hi zanin hian ka hre chiang leh zual  , a pasal in a thiamloh ni miahlo ah ti khan a tawngkhum a, kei ni ila ka chhuak duh hial ang chu mawle “Mama, nang nei tur a ka rilru ka siam fel zan khan nang chauh neih che ka tum reng reng hleinem, nang leh I chhungte I neih engkim hmangaih pui tur che a he in rawn lut hi ka nia, ka thiannu vanga hetiang thil kan chhungkua in kan tawk hi ka rilru a na takzet a,zah pawh ka zak, mahse nangni ni lovin A ni zawk kha ka thlah zawk ang”

Ka lak ah pawh ngaihdam min dil nasa chu chuan ka thinrim a ti reh hauhlo na in ka rilru na lutuk tur tam tak in min chhawk, Lenny erawh ngawi rengin a chhuak a, ka hmai ah ice in an dep a, damdawi min hnawih sak bawk a, Bawihbawihi rawn harh nen, ka inthiam lo takzet a rawn riah ve zan ah ber kher lehnghal. Zing kan tho a, hna ah chawlh ka dil tawp, hetian lek luk a kal chu a nuamlo miin thil an hre chak dawn si, chhungkua kan mualpho mai mai.

Zing kar ah mipa ho an chhuak dial a, zing ka thawh vel ah ka that leh that loh thu U Mapui’in minlo zawt nghal var a, Bawihbawihi chaw ei tur in kan ti viau na in, dawr lam thil ah zing kar ah min phei san a, vawiin chu kan nufa in kan in awm thei dawn a, kum la tling em lo mahse ka nu chaklo ve tawh nen, an pahnih mai a an han in awm thin hi chu ka nu ka ngaihtuah thin, Ervin te chhungkua in an rawn la ve reng thin tak na in, ka nu kut ah a awm tam zawk mah.

A chang chuan ka hna bansan ka duh rum rum chang a tam thin, ka fanu nu leh pa kar ah awm tawhlo nak laia, kei leh zel in nitin ka chhuahsan hi fuhlo ka ti thin, mahse ka nuta te hian min hmangaih in min duat em em mahsela an mahni kan belh reng theih loh hun ala awm dawn, chumi hun atan chuan tiin ka thawk hram hram a ni, ka unau ten mahni pual in sum an la lut vek a, kan chhungkaw business nen, ka hlawh hi ka submit ngailo khawlh tur hian min ti zawk thin.

Ka fanu hmingin Ka U te nupa leh Bena’n bank account an hawng bawk a, Ni e a hmasa ber a nih bak ah an farnu neih chhun fanu tan hian engpawh tih an in huam reng a lawm. Mi fing chhungkua tih tak ah ka pa te ho chhuah hlanin Pensy te chhungkua kan in ah an rawn kal a, a nu reng a lo chhun fuh a nih dawn hi, A pa leh a Pate te A Ni te ho an lo kal a, ngaihdam min dil tliar tliar a thinlung takin min  dil tih an mitmeng leh an tawngkam ah a hriat.

A nu tawngkam erawh pai daih harsa kan ti tlang a ni, ‘Kan fanu hi zawng a la a em a, Lenny nen an inzui rei tawh bawk nen, a ta hauh bur tlat a, Lenny midangin an lo hnaih hian a hre thei em em mai a, hepa a hmangaih lutuk hi chu a mualpho phah ta nih hi, a zia lo ngawt mai, nangni chhungkua in lo ni zawk hlauh a nilo se chuan kan mualpho khawp a.

A tawng dan hlawh hlawh leh a hawi her te reng min zah pah vak lo tih hi a hriat ngawih ngawih, Ka pa te ho an rawn lut ve nghal a, Bena’n Pensy hmel a hmu chiah chu a in hum ruh nghal vat a, Layla chu Bena ka hnawn ringawt a thinrim in sum theilo a che leh buan buan ang tih ka hlauh vangin. Ka Pa leh Mama erawh an la ngawi reng a, Pensy pa in ngaihdam ding chung meuh in a han dila, hreawm a tih zia chu a hriat ngwih ngawih.

Ka pa in “Ka in chhung ah ka fanu hi tuman an pian tirh a ta tawh kut hmawr pawn kan la khawih ngailo, ka fanu hmel hmai pangngai pawh hmuh tlak loh khawp a ka in chhung ah kan awm lai ngei a khawih a nihna hi kan tuar dam theilo a ni, kan fanu hian chhan tu a nei tih hi hre rawh u” An bu nghauh nghauh hlawm a, ka chhungte thinlung nat zia an hmuh phei chuan midang zawng phei chu hreawm an ti tak zet.

“Nia, kan fanu thiamloh a ni tih kan pawm vek mahse hei Mapuii nen tet te tanga in kawm chho an nia, hetiang mizia a nih ngai loh zia te chu Mapuii a hrechiang tu a lo awm hlauh a, kan fanu hian mi thinlung hi a ti na khat khawp a sin, amah an ti hmasa a nih loh phei chuan” Ka in sum thei tawh bik lo,  “Ka Pi in rawn luh hlim atangin i fanu thiamloh ti reng chung siin kei min hem tel char char a, ka chung a tisual tu ngei hian vawi khat pawh ngaihdam min la dill ova, bak ah maw I fanu pawi hi vawi khat pawh ka sawi ngailo”

An pa ber a rawn in rawlh vat a, a kut veilam in an nu a kawm deuh sawk chu ka hmuh hmaih bik lo” Pensy an ti dik chiah a ni, nangma thil tihsual ah kan zak a mi chhungkaw pawi kan sawi a, an thinlung kan hliam a, ngati nge i la ngawih reng, ngaihdam dil nghal rawh” thupe aw fe a pa berin a tih chuan “Ka tihpalh a ni, min ngaidam rawh” sawi chhuah lah chu a awlsam mai bawk sia, thinlung takin a tilo tih chu mi a ber pawn an hria ang chu.

An nu rawn tawng leh zuau chu an Pate an a lo khap nghal zat a, “Kan thinlung hi a dam theilo a,FIR kan thehlut a lak let kan tum lo” Bena;n Layla pawm chung a a rawn tih chuan kan en deuh thap a, Ka pa in “tun ah chuan puitling ho kan han in bia ange, in chung lam ah min rawn zawm ula, Mama te unau erwh in hnuai ah khan lo awm rawh u”

Ka pa thu hi chu tuman kan hnial ngai lemlo, Layla riltam a lo rak ve sek nen, kitchen lam ah kan in pawm phei a, chaw ka siam lai te chuan alo te ve sek bawk nen, ka tal buai nuai, ka fanu tah tawh hi chuan ka nunphung zawng zawng hi a buai zo thin. In chung lam ah enge an han rel kan hrelo mahse an rawn chhuk leh chuan lawmthu an rawn sawi thla mawlh mawlh a, Bena ngaihdan a nih loh hmel tak zet.

Chaw ei laiin ka Pa in “Chhungkua meuh a rawn kal ta chu FIR pawh kha kan hnuk dawk ang, ka thinlung hi a dam reng reng lo, mahse miin ngaihdam min dil a nih chuan kan ngaidam mai tur a ni, ka thutlukna a nia, Duati pawh ka rawn lem lo che a tun tum chu min ngaidam mai niang chu” Pa ber rorel na a nih miau avang leh Ka nu nen a an thu tlukna chu a sual ngailo tih ka hriat vangin rilru na in thinrim hle mahila keipawn ka pawm mai a Benjamin ber mai hian pawm har a ti ni.

Kar khat zet an liam leh hnu ah office ah Lenny a rawn lang hlawl a, keimah min hmuh tum a nih pawh beisei lovin, kawngka a a rawn lut chu ka lo nuih ve mai a, min rawn pan a, “Acadia biak lawk che ka duh a” ka hna khawih laklawh nen mak ka ti bawk si  nen han chhan mai ngaihna pawh ka hrelo ‘Lunch eitur in ka lo nghak ang che” ka bu  ve mai a, dar 1 vel ah lunch ei tur a ka chhuak chu waiting room ah alo la awm a ka lo ngaihtuah chhuak tawh lo reng reng kha nia.

Min nuih sak a, kan office thlang a Purple restaurant ah chuan kan in zui lut a, ei tur kan order lai chuan “Acadia ka tihpalh tak zet a ni, min ngaidam hram rawh” ka hawi chhuak vat a, “engmah tihsual I nei hleinem, i thiamloh a awm lo, ka U tawngkam zawk kha pawi ka ti khawp mai”

“Ni lo, ka farnu chung a thleng nise I u tih ang tho khan ka ti ang, mahse hei hi hria la ka duh, Pensy nen hian kan in kawp tawh lo” chu thu min hrilh ringawt chu mak ka ti, ka lo ngai pawimawh lem lo, an nun a nia bak ah kei a lo ngaihven tur pawh an ni lo. “Pawi ka ti khawp mai, keimah vang a nih phei chuan pawi ka ti lutuk, mi inkar ti chhe tu nih ka duhlo takzet”

“Zan in ah ka rawn leng ang, I chhungte bul ah pawh ngaihdam dil ka ngai a ni, ka rawn kal hma theilo a, nimin ah ka zin ka rawn hawng chiah bawk sia” kan thil chah a rawn thleng a, ka riltam bawk a niang ka ei tui phian lehnghal a, “Awi a ho em mai, I duh phawt chuan rawn leng rawh mahse ngaihdam dil tih vel kha chu a ho lutuk, engah mah kan ngai tawh hleinem”

Chau viau thin mahila, ka fanu in kawngka a ka haw phur tak mai a min lo hmuak a au vel chul te hi thlir nuam ka ti ka hahna zawng zawng hi hnar a hlit phawi ang mai hian a bo duak thin, puitling awm than tih tak ah a fing reuh em em mai lehnghal a, a pa te lam a chhun tak zet a ni, U Mama te nupa U Mapuii pa damloh vangin zanriah ei kham lam a phei an tum thu an sawi a, nimin piah khan a zunthlum vangin anlo buai ve deuh ni awm tak a nia.

U Mapuiin “Layla hi kan hruai dawn mawni kan rei awm chuang silova” a tih chuan “Hruai lo mai rawh u, damlo kan na ah chuan a chiau hiar leh nga damlo tan pawh thawven loh thlak dawn lutuk, tun Sunday lo awm tur ah hian kan kal ho zawk dawnnia” ka tih chuan a ni pawh chuan aw ve mai a, dar 7 vel ah an phei a, an in tawk hman a ngem ka hrelo, an chhuah hnu lawk ah Lenny a rawn lut ve nghal a, ka fanu nen, ka pa nen chhuat lai ah toys nen kan lo let phung mai a.

“Lo leng rawh, teh hlawl che chuan” Ka nu in a tih chuan ka fanu nen kan hawi phei nghal a, “Rawn kal rawh, Ka U te nen khan in inhmu hman em” ka lo ti nghal chul a, Layla hlim rak vang chuan min chhanna pawh ka hre mumal thei lo, A pu nen an in chhaih nui tlawrh tlawrh a, “thingpui hang kan lo in dawn mek a, a sen nge i duh” a tih chuan “ A sen dal deuh” an ti deuh kher a.

Thil thleng avang khan ngaihdam min dil chhunzawm leh a, nui chung hian “A tisual tu ai mahin midang ho in in thiamlo lawm a ninawm tawh zawk” ka tih chuan a ni pawh a nui deuh sung a, ka pa nen sumdawnna lam thil an ti ti a, thildang ah fel viau mahse Layla buaithlak na ber chu a mut dawn a piang a a huaisual bak hi , tha te te a mut hi a nei ve ngailo, a tah fe hnu ah a mu chauh zel.

Ka U te nupa rawn haw thleng chuan a la leng ve reng a, ka u nen pawh an boruak a tha chho leh tawh a ni ngei ang, hlim takin an in kawm a, zan in lah chu a mu duh thak lo, ka nu leh pa nen an pathum in kan in awih chhawk zak zak a, a mu dawn siar siar a, a rawn tap leh thin, kei lo thinchhe ve bawk nen “Malsawmhlu ka ning lutuk em em a che” ka han ti deuh hrawk a, U mapuiin min rawn lak chhawk nghal zat a, Lenny haw  hnu ah pawh rei fe kan in awi leh tawh, dar 11 dawn ah a mu ve a hram e.

A zin lo nih chuan zantin a rawn leng a, ka fanu pawh hian a hmuh zin vang nge a ngaina ve khawp mai, karleh mai khi Layla Bday alo ni ve ta reng mai, buatsaih pawh kan inbuat saih nasa ve kan phak ang tawkin, mi kan sawm tam deuh vang leh in lam hnawk nuai kan peihlo vangin ka pate te picnic spot lam ah tih kan tum a, A bday hma niin ka fanu nen kan pahnih te chauh in Apa kan va tlawh a, ka fanu engmah hrethiam silo hian a pa thlan kan kal apiang a a pa thlan chung a mu thin te hi a pa a ngai ve hle ah ka ring thin.

Thuawih fahranin thlan ah a mu leh bam tawh mai, nisa in a em loh nan, nihliap ka khum tir a, a ngai pawimawh lemlo a pa thlan lung a han fawp vel te chu a lawmna leh ka tahna ti zual tu mai a ni si, “Ervin, la dam ve ni lang chuan helai ah hian I fanu nen hian kan lo kal a ngailo tur, chhungkua in hlim takin in lam ah vawiin ni hun  te hi kan hmang dun awm si a, naktuk hi i fanu kum1 na a lo ni ve leh reng tawh a sin” ka mittui chu ka fanu in min hmuh hlau takin ka hru hul zauh a.

In kan thlen chuan ka chau ngawih ngawih, ka lunglenna hian min hneh em a tin ni, ka chhungten ka dinhmun hrethiam takin Layla an lo la vat a, engmah ka buaipui ngai lovin Ka U te hovin an buai pui vek a, keimah a nu tak zawk chu ka awl lehling phian a, naupang an birthday ah an sual thin an tih hi tak tak nge mawni dawn ni! Layla tukchhuak a fuh hlawl lo, na a neih awm ka hre silo, a pangchang kual em em a, a ner reng bawk si, khua a ti var lo tak zet.

Mi 250 lai mai kan ni, ka fanu pian cham min lawmpui tu te, kan lawm tak zet, chawhnu lam ah erawh Layla pawh tlem chuan a tlei ve deuh tawh a, zan kan haw lam ah phei chuan a chau ve hnawk a niang, kawng ah a muhil phei barh barh reuh a, en nin har ka ti mahse apa ka ngaihna vang hian hlim tak pawhin ka fanu piancham ka hmang mawlh lo, ka ngai em a ni. “Ervin ka ngai em mai che”

Ervin boral tangin kum 3 lai a lo liam ve tawh, Layla pawh pre-school ah Bena’n kal tir a tih tlat vangin kum 3 a tling awrh a, kan han in admit ve chu a nia, a school kal hmasak ber ni tur chu mi chhungkaw IAS tling thar ai pawn kan lawm lo bik hauhlo, a thil thiam hmasak ber leh a thil tih hmasak ber a piang a Pu in lawm a duh zel mai si a.

Upa zawk zawk kan lo ni bik lova, ka vanneih a siam in ka fa neih hi a lang lo mai piah lam a ka ngeih zawk emaw tih tur in ka taksa a in phut chho a, ka nulat lai ai daihin miin ka nalh an tih thu an sawi ve fo thin, nuthlawi nih vang a min zuam em em lah bo lo, han nui liam ila, kan haw lo tih an hriat vangin a ai na mahin min han kah chhunzawm a, hua ila nuthlawi fiam dawllo nih kan hlawh  leh bawk  si, Nuthlawi nih hi thilsual ni si lo ah chuan thil hreawm tak a ni thin khawp mai.

Lenny nen kan in zui nasa viau ka mamawh tawhna ah ka tan  leh kan nufa tan awm loh  a nei  ngailo mahse kei chuan Layla pa unaupa ang leh ka U thian ang bakin ka en ngailo, mahse hmechhia leh mipa kawp nei lo ve ve han inzui tak ah chuan mi sawi sep kan kai hma nge nuthlawi ka nih vang zawk ni leh pek? Hreawm tih chang ka ngah thin mahse Lenny leh ka chhungte hian min fuih nasa thin.

Ka nun ah Ervin bak mipa tumah an la lut lo a, a der a ngaihzawng neih lah ka nei ngai heklo, ka tan a a hmasa ber a nih vang leh in duhloh vanga inthen nilo, thihna vanga inthen kan nih na ah hian kei phei chuan midang neih leh tumna ka nei tawh hauhlo, ka nu leh pa erawh hi chuan min tur ni chiah si lo hian min sawi pui zing tawh khawp mai, U Mama te pawh fapa an nei a kum 1 a ni ve tawh, awm khawm reng duh mahila fapa upa ber a nih bak ah kei an farnu nau pawm ka lo awm ve nen, ka nu leh pa in boruak thalo thleng thei a awm tiin indang turin an tia, borauk chhia erawh kan nei lem lo.

Ka motor chian loh vangin Lenny office bangin min rawn lam kual a ,Layla school thil mamawh kan lei kual na ah Pensy leh Leny farnu dawr ah an lo awm ve a, Pensy ka hmuh hi chuan ka thinlung hi a so deuh but thin “Zan in chu” tih pah hian a ban ah a rawn vuan nghal zat a, ka bialpa nilo mahse ka mipa kalpui a bialpa pawh ni hauhlo a rawn kuah nghal chat te chu a mah ka huat tawh nak laiin zak theilo ka tih na a zual ngei mai.

“Nia, ka lo tum dawn nia” Lenny chuan a chhang ve mai bawk a, ka fanu thil ka lamm kual lai chuan Lenny te unau an lo inbia a, Pensy ka lam pan a a lo kal chu tlanchhiat san ka duh takzet mahse thilsual ti pawh ka nil ova, ka tlanchhiat na chhan tur a awm lo tiin ka lo hmachhawn van a “In hmuh a khat hle mai tiraw?” min melh ralh pah a a tih chuan “Nia, i dam maw?’ ka han ti khaw mawi ve tak na in damlo mahse pawi tihna pawh ka neih hran ka ringlo.

“Taksa chu a dam a, rilru erawh a dam theilo nih hi, kan thil neih hlu tak, kan neih chhun liau liau midang in min laksak hi chuan dam tak tak hi a har lawm” teh duah thin hian, chhan mai ngaihna pawh ka hrelo, ka hrelo tak zet, min tawngkhum a ni tih chu ka hria mahse Lenny nen hian in ngaihzawnna thil a kan in kawm loh em vang hian in sawi fiah ka peih lo, ka ba bawk heklo.

Ka ngawih tak reng avang chuan a beidawng dawn emaw ka tih laiin “I nei chuang lovang tih hre rawh, a chhungte nen pawh nangmah vangin boruak tha reng an nei thei tawhlo, mi chhungkaw ti buai tu nih hi chu a fuhlo sin, bak ah an fapa neih chhun tan hian nuthlawi chu pawh an unau  pa ngawih ngawihin duhtawk a a khal hrep tawh chu an pawm theih I ring em ni?

He thu kher hi chu ka rin loh lutuk lam pang daih a ni thung, mak ka ti tak zet engvang a in zui ang tlat a min ngai nge maw an nih le? Chhan tuma ka an zuau laiin Lennu farnu a rawn phei tak ah chuan ka ngawi ta mai a, thudik tak a sawi a ni ngei ang, Lenny farnu hian min be tlat lo, nuamlo ka inti a, ka inthiam lo ngawih ngawih heivang hi nia thian mipa ka kawm duh thin loh , kan in kawm ve ila, nuthlawi ka nihna ah thiamloh chang ka ni leh zel si.

Ka thil lei tur ka lei fel hnu ah pawn lam ah Lenny pawh ko tawh chuang loving ka chhuak a, ka hnunglam ah min rawn umzui tih ka hria mahse a rual a haw ka tum tawhlo a, amah nen a in zawmna engmah neih ka duh tawh hauhlo, ka kal hlawk hlawk a, “Acadia, lo ding teh khawngaihin, enge diklo awm? Pensy khan enge a sawi?”

Ngai pawimawh miahlo anga lan ka tum hle na in ka in thup theilo thelh a ni, “Engmah a sawi lo ka hmanhmawh deuh a bak ah zan lam ah tih tur I nei bawk sia, la pen kual na tur ka nein en taxi in ka hawng mai ang” tih pah chuan taxi ah ka lut nghal hmak a,ka thinlung na lutuk chu awm ngaihna reng ka hrelo “an fapa neih chhun tan hian nuthlawi chu pawh an unau  pa ngawih ngawihin duhtawk a a khal hrep tawh chu an pawm theih I ring em ni?”

Kawng tluanin ka rilru ah a awm reng a, kan in kan thlen lai pawh ka hrelo, driver in “Helai hi em ni Mami” a rawn tih chuan ka harh kawk a “Aw, awi thildang daih ka lo ngaihtuah a, ka lawm lutuk e” tih pah chuan pawisa ka pe nghal a, ka fanu hian an uniform hlih hi a ui tlat thin, in ka thlen hma loh chuan alo ha ngar ngar thin, inti nalh fe a ka lam pan a gate a rawn pan ka hmuh chuan ka rilru natna leh ka ip pik lutuk te hi k fanu hlim hmel leh nui ri hian a chhem kiang leh thin.

Ka chhungte hi ka thlavang hauh tak mai an nih vang hian ka lo puitling ve tawh bawk nen an rilru ti na tur leh an thinrimna tur engmah sawi ka tum hauhlo, min min fiam na leh min sawina te hi keimah hian ka tuar mai thin, Ni e, ka nunhlui ah khan mite tan a hriat reng tlak loh mahse sawi nuam tak si ka hnutchhiah ngei a lawm mahse vawiin ni thleng hian Ervin nen a kan nun dan ah khan in chhirna ka la nei chhin ngailo.

Chaw eikham ah Layla nuam tih em em mai coloring ka tih pui laiin doorbell a rawn ri a, Lenny rawn lut ka hmuh chuan vawiin thil thleng ka hre chhuak a, hreawm ka ti a ni, keimah vanga an chhungkaw boruak chhia chu tawrh hreawm ka ti, ka fanu tan chocolate a rawn ken sak a, a tih loh dan ni hek lo, thil thlum lam ei tam tir ka phal lo viau na in naupang lawm zawng tak mai a lo ni bawk si nen, kan in khap hlei thei lo chu a ni sia,a coloring vel a lo hmuh nghal zat a.

Kan in hnuai  te nupa an chhungte chhiat tawh vanga an khaw lam a hawng an rawn let a, ka nu leh pa ral turin an kal a, Bena a tih dan ngai bawkin a leng chhuak leh a, kan nula te pahnih nen kan awm a, in lam chet nen nau buaipui nen pakhat ringawt zawng a buaithlak chin a tam tawh ka nu a lo chaklo ve tawh bawk nen. “Acadia, ngatinge vawiin kha? Ka awm iti nuam lo lutuk a” chhuanlam siam mai ngaihna ka hrelo hle mai mahse thudik erawh zawng ka sawi lo ang.

“Nia, keipawh ka inthiamlo lutuk, mahse pen kawi na tur dang ka nei leh bawk si nen, ka ti khawtlai ang che tih ka hlau lawm” Mi a nileng lo tan chuan dawt a ni tih chu a hriat a lawm, engkim hriat duh mihring ni miau hek Ervin anglo takin, za lo zet hian a nui hul hak a “Dawt hrilh tlak lek ah chuan ka lo in ngailo ve tawp a” Ni e, dawt ka hrilh ngailo miau a lawm mahse thudik erawh ka thup mai chauh a nia, “Enge zan in ah programme in nei emaw ka tia” thudang sawi pen kual pui ka tum a.

“I plan i thlak thut a, keipawh chutiang tho chu” han sawi zawm vak ngaihna ka hrelo kher mai, ka nu leh pa rawn chho vat vat se ka tih lai takin door bell rawn ri ah ka thawveng huai mai, ka thaw hawk a hmuh chuan lungawi lo tih hriat deuh si nuih za bawk si chu a nui chhuak thut a, kawngka ka va hawng a, Bawihbawihi leh a nu leh pa an lo ni reng a.

Layla in a ni te a hmuh chuan alo ri ve chul a, an rawn nui lut sang kha common room a Layla leh Lenny thu tlang an hmuh chuan Nu Dingi a nui chuai raih a, ka hmuh hmaih hauh lo mahse a chhan ka hre chuang lo, “Awi teh nawlh che u chuan,rawn kal ru lo thu ru” tih pah chuan common room lam ah kan in zui phei a, Ka nu leh pa awmna min zawh pah chuan Layla an be nghal sawk sawk a, thil thar a nei leh dawn tih hre tak mai hian a pi bag rawn ah puar deuh lung chu alo chuh nghal zat a.

           Ka nu leh pa ka call chho a, Ervin pa in “chhungkaw thil pawimawh ah kan rawn kal a” a tih tak ah chuan Lenny tan han awm ve reng na chi a nih loh vangin Layla biang a fawh sak zeuh pahin a mangtha a pawn thleng ka va thlah a, ka luh leh chuan anlo thu ngawi thap a, tun tum an rawn leng chu nidang kan boruak nen a in person lutuk a awmdan pawh ka thiamlo zawk. Mo thar tir an sawi ang mai ka lai tut a, kimki deuh hian Bawihbawihi bul ah ka thu thla a.

Ka Nu leh pa pawh an hrilh hai hle tih na hmel ah alang reng a chhan chu an hmel a hlimlo tih hi a hriat ngawih ngawih, Ka pa in “eng thil nge nit a thil thalo a thleng chu a ni em lo ang chu maw” a tih chuan Pa Ruata’n a aw a han thian kharh a “thil sawi nuamlo tak a nia mahse hei kan rawn kal thut na chhan pawh ka pehhel kual tawh lo mai teh ang, Layla hi kan lo kawl ve tawh a nge kan rawn ti” tu mai pawh chu kan phu suau ni ber hian ka hria, ka nu leh pa pawh an hamhaih Pa Ruata pawn sawi  a hreh zia a lang reng tho.

Midang zai ngai lo chuan”engvang in” chu chiah chu ka sawi thei, ka fanu hi ka tello hian vawi khat mah  ala riak hrang ngailo a, chhun ah te chuan a bikin Saturday leh Sunday ah chuan an la phei deuh ziah a, engmah kan sawi ngailo, Ervin fa an tunu a nia, an tunu neih chhun an ngai ve ngawih ngawih a, kan nufa ngei pawn riah tum te kan nei tho mahse ngati teh thut nge ka hre thiam theilo mak tka tihna aiin ka rilru a na ni, ka pasal in ang hialin ka ngai a zep lo ah chuan ka nu leh pa ang maiin ka en a, ti teh thut chu mak ka ti tak zet a ni.

“Acadia, nangpawh ila naupang a, pasal nei leh te pawh I duh anga Layla hi I tan a hnawk dawn a sin” Nu Dinging  rawn tih chuan ka nu in min rawn melh vat bawk a, mak ka ti ka awihlo zawk, mipa kawp ka neih loh zia chu an hrechiang ve hle ah ka lo ngai a, Ka nu alo inrawlh vat a” Dingi, kan fanu hi kan hrechianglo a, a ruk a mipa dang a lo nei a nih chuan ka sawi theilo mahse kan hriat chin ah hian tumah mipa hi a kawmlo ve khawp a sin, pasal neih chu sawi loh amah beisei tu neih ve chhun pawh a fanu vang piah lam ah Ervin vang khan tumah neih a tum tawhloh thu a lo sawi khum thin tih hi ka hriatpui ve sin”

Kan ngawi deuh thap a “Minlo hrethiam ula, ka fanu hi khawi ah mah a kalsawn dawnlo, pa lovin ka chawi lian a, chutah a nu ka la dam reng lai hian midang kut ah ka hlan ang maw? Minlo hrechiang lo a nih pawn tun ah chuan ka rilru diktak in hre tawh a, chhungkua ang maiin ka ngai che u a, innei miahlo vin min boral san a, chuti chung chuan Layla nen kan rawn riak thin keipawn ka ngaina tak zet che u a mahse ka tello a Layla enkawl duhna thinglung in pu hi chu mak ka ti tak zet a ni”

K insum thei tawh bik lo a ni,ka zah loh vang ni hauh lovin ka rilru diktak a ni, pasal chu sawi loh ngaihzawng neih san pawh hi ka lo suangtuah ngailo hrim hrim , chutih laia pasal nei duh thut thut leh ka fanu hnawksak ang mai a ka ngai ang a min chhuah chu ka la na takzet a ni, ni e ka la na lutuk ringawt, ka fanu hi tu kut ah mah ka dah dawn lova ka dah ngai heklo ang,  ka kalsan ngai hek lovang.

“kan hrethiam lutuk, kan fapa tan a I rinawmna leh I fanu tan a i inpekna hi kan hmuh hmaih hauhlo, nangma hmakhua kan ngaih vang zawk a nia, bak ah kan tunu hi Pahrawn hrawn tur chuan kan ngai ngamlo a ni” Nu Dingin a rawh tih chuan ka sa phat mai “Tu in nge pasal ka nei dawn ti a, tu in nge Layla hian pahrawn a hrawn dawn tih sawi, chu mihring chu tun ah ngei hian ka hma ah hian rawn ko rawh u” ka aw ki a sang tak zet ka fanu chuan min en deuh ha a, a hlau tih a hriat ngawih ngawih mahse a nu hi ka insum thei tawhlo a ni. 

Ka fanu chhan nan chuan engpawh ka huam a, ka fanu min then hran tum  tu chu thih thleng a beih pawh ka huam, ka fanu ka thisen a nih bak ah khawvel a ka hmangaih ber leh ka hmangaih awm chhun Ervin fa hi midang kut ah ka dah ang maw? Mumang mai mai a tan pawh ka mang chhing duh reng reng hlei nem ka fanu men deuh puai ka hmuh chuan ka inthlahrung khawp mai, ka pawm nawlh a room ah ka luh chhoh pui nghal a, ka chhoh pah chuan “Pasal nei tur anga min sawi tu chu naktuk zing ka thawh hun ah kan in ah ngei hian hmuh ka duh”