LENNY ACADIA 7

      Ka fanu ka tih mut hnu ah thil tam tak ka ngaihtuah a, ngati nge khati teh thut a an rawn tih le? Mak ka ti ngawih ngawih  a ni, vawi khat pawh Ervin lo mipa dang hi ka la ngaihtuah chhin ngailo a bak ah ka fanu kalsan tur ang phei chuan vawi khat pawh ka la mang chhin ngailo a sin, Fa in tawm nei kan ni a, ka pa in kan thiam a ngai hle a nia tiin tupawh min fuih reng thin a, mahse an mahni lam chet dan a fuh loh chuan an tunu pawh nise an hmuh ka phal tawh lovang.

     Saturday ah pawh kan leng phei lo a, ni e, an tunu neih chhun an ngai ve em em ang tih ka ring mahse hlauthawnna ka neih ruk tlat min laksak mai dawn a ka hriatna hian a hma ang khan ka pawh thei tawhlo a ni. Dar2 vel ah min rawn call ta reng a lak loh ka tum zet na in ka la ta hram a, ka aw ah pawh ka la lungawi lo tih an hriat ka ring, “Acadia, vawiin in van rawn lang lo ve, Bawihteii dam tha lo em ni” Nu Dingin a rawn tih chuan “Dam tha e, kartluan in kan chhuak a, in a awm ve kan duh a” ka ti deuh hmak a.

     Ka chhan dan  kha a mawilo tih ka hria mahse kha zan a an thil rawn tih dan kha a mawi bik chuang hleinem, “Kan ngai em mai che u rawn phei rawh u, Reuben an a rawn hruai ang che u” ka thaw deuh hak a, enge maw an hriat ni, kha ti teh hrep khan min rawn ti a, tun a tak a engmah thleng lo ang mai a an awm chu ka ngaithei lo viau mai. “Nu Ding, duh lehLayla chu rawn hruai ula, zan ah in rawn dah leh dawnnia”

   

     Ka lawm loh zia hi hre ve se ka duh em a ni, “Acadia nangmah rawn tel ngei la kan duh a ni, thil sawi duh kan nei a” a aw ah chuan a  inthlahrung hle a ni tih ka hrethiam mahse kei mi luhlul ngang chu ka nem duai nghal thei tlat lo, “Hman zan khan in duh chu in sawi fel tawh emaw ka lo tia” zah lo tak hian vawi khat pawh ka be ngailo mahse fa te chhan nan leh ka dinhmun tang hi chuan mi pawn min dem ka ring biklo.

  

     Pa Ruata’n phone a chuh ni awm tak a ni “Acadia, i nu leh pa hmel hmuh leh pawh kan zak a ni, hman zan kan chet dan vang khan mahse thil awmzia kan hre tawh a, khawngaihin chaw chu rawn ei phei hram teh u” Pa berin min rawn ngen tak ah chuan hnial ka tum tawh biklo, ni e kha thu kha khawi tanga an hriat nge tih ka hre duh em a ni. Ka chhungte bul a ka sawi pawn engmah min hnialna an nei lemlo, Layla lah khan thawh hlim tang kan len dawn leh dawn loh min zawt sek kha nia.

      Kan phei tur thu ka sawi chuan a phur ngang mai, a thawmhnaw duh duh a lo la kual a lo inthlak vel thul, a thil thar neih ho, a pi leh pu te ho hmuh tir a duh leh tlat vangin kan bawr phei leh hle dawn nih hi, Reuben pawh an rawn thleng phei vat a, kawng lak ah a awm sa a nih hial ka ring a nu leh pa in min rawn call lai khan a rawn thlen phei hmat dan em em hi.

  

     Kawng lak ah Layla nen an ti ti phei bawrh bawrh a “Acadia hmanzan thil thleng kha Bawihbawihin min hrilh a, a pawi ka ti khawp mai, ka nu leh pa hi chu an lo upa ve tawh nen thil hi an ngaihtuah chiang thinlo a, min ngaidam hram rawh” Reuben in thiamlo hmel ka hmuh chuan keimah ka inthiamlo let ling zawk tlat, “A ho lutuk, engmah mah ka ngai tawh hleinem” ka ti tak na in ka la ngaih em vanga lungawilo ka ni reng sia.

     In kan lut chu Layla phur leh khawp mai, a tlankual leh chiam a, a pu nen an han in um leh rih, a thil thar ho min ah tir na bag ka ken luh chu min rawn chuh vat a, chhuat lai ah tak mai a han phawrh darh leh chiam a, engtin pawh awm se, ka chhungte leh Ervin chhungte hian an hau duhlo hi ka thinrim na a ni fo thin, tun hun tak hi enkawl harsat zual lai a lo ni nen, kan enkawl dan kawng ah kan tang rual lo lutuk tiin ka ang fo thin.

   

     Ngaithuahna at thlak deuh deuh hmang hian thu mawl pui pui hi an rawn sawi chhuak a”A pa rilru na ang, a rawn hmu ve reng awm si a” tih mai mai, rawn hmu ve se a thuawih loh na na na chuan a hau vet ho ang ka ti thin mahse keimah hian ka mal tan a, a buaithlak tak zet,lam tang a hr eve kur bawk sin en, fa enkawl hi tihna mai a lo ni lo.

  

     Bawihbawihi in chung lam ah naupang ho a hruai chho a, Reuben’an a zui chho bawk a, an upa ber te chhungkua an rawn phei bawk a, tun ah chuan puitling hlir kan awm khawm a, han tawng chhuah mai tur pawh ka hrelo, nidang ah te chuan mahni in ang maia ngaiin ka khawsa a tlangnel tak in mahse tun ah chuan ka thiamloh nge an thiam loh ka hrelo kan boruak a hma ang a ni tawhlo.

     Pa Ruata a rawn tawng chhuak a “Acadia, pawi kan ti lutuk tih bak hian sawi fiah ngaihna kan hrelo a ni hmanni kan rawn chet dan kha” kei pawn chhan ngaihna ka hre chuang lo, diktak chuan kha thil khan tun thleng hian min ka vaw na em a ni.

“Kan zep buai tawhlo ang tun ah chuan, khatia kan rawn chet na chhan kha chu kan hlauthawg a ni” mak ka ti tulh tulh, han zawh chian ngaihna pawh ka hre tawhlo a ni. Nu Dingi a rawn tawng chhuak vat a, “Bawihbawihi hmanni khan Mamuani hian leng ah a rawn sawm a, a va kal a, chu mi hma chuan Lenny te nen kan in kungkaih dan leh kan chhungkaw boruak hi hre law law la kan duh”

     Midang zawng chu an lo ngawi thapa a “Lenny pa saw Ervin pa te unau a naupang ber hi a nia, mi tha lutuk mai leh mi pawisawi ngailo Pa tawng zen zen lo a nia, Lenny nu sawn a boral san hlauh mai a, Lenny a tleirawl chhuah hian tuna a nupui nen sawn an innei a, Mamuani leh Hruaii saw Lenny pa nupui fa bik te an nia, an inneih khan kan nu leh pa an la dam reng si in Ziri (Lenny nu sawn a ngeih tlat lo mai a, kan hnen ah kan la ta a”

   

     

Lenny te nen an chhungkaw chanchin min hrilh daih chu mak ka ti takzet a ni, Ervin khan cousin an ni tih chu min  hrilh a mahse chhungkaw thu hla nih vang nge hetiang engmah min hrilh ngai silo tun a tak a hetia min hrilh hi ka tan chuan hriatthiam chi pawh a ni lo.

‘Ka nu leh pa rilru na lutuk khan ro zawng zawng Ervin tan hian an dah vek a, a chhan chu Ervin khan a pi leh pu kha a ngaina em a, a dawm hlum thak a, an hun tawp hnai ah  khan vawi khat pawh an khum kha a kalsan lo, Lenny hi Ervin te chhungkaw zingah mipa lak a an  tu hmasa ber leh mipa awm chhun a nia, a chhan chu Lenny pa te keini aiin an innei hmasa zawk a”

“Khatia kan hnen a an awm hnu pawh khan Lenny pa chuan a rawn tlawh awl lova, mahse an ruang ni ah bak Ziri chu a rawn lang miah lo, ro chungchang ah fapa naupang ber mahnise Lenny pa kut a engmah dah lova Ervin kut a engkim a awm ta kha Lenny pa ngei pawn a ngai thiam lo a kan chhungkaw boruak a chhe ta vek a ni”

Ka tawng chhuak ve ta nge nge a “chu mi ah chuan Layla rawn lak in tum na kha ka la hrethiam reng reng lo” Pa Ruata a rawn in rawlh vat a “Ervin khan kan chhungkaw boruak chhia hi hreawm a ti em em thin a, siam that tumin ama tawk ah a bei ve thin, Lenny te chhungkua pawh a tlawh awl lo khatia a hun tawp dawn ah khan kan nupa bul ah chhungkua ro vanga in hmel mak hi a duh loh zia leh ro vang a an ni chhugnkua an  hlim a kan chhungkua kan in pawh leh dawn a nih phawt chuan tiin a ro zawng zawng Lenny hmingin a dah kir leh vek a”

“Lenny hi zawng a pa ang deuh pa tluang purh mai leh mi rilru tihnat hreh tak a nia, khatia ro a kut a Ervin an a dah pawh kha a pawm duhlo a mahse Ervin an a ngen tlat a vangin a pawm ta kha a nia, kan chhungkaw lo ngaihdan ah chuan hetia nangni nufa a rawn ngaihven em em che u hi Ervin vang ah kan lo ngai a mahse Bawihbawihi leng thudawn nen a in ang ta silo kha kan rilru a buai ta ni”

“Bawihbawihi thudawn chu enge” ka lo ti ve nghat a “Ziri khan ro i it vang a an fapa kuai bet tlat ang che leh a nei lo che nih chuan Layla enkawl i theih tawhloh thu angin a lo sawi a, kan chhungkaw chanchin hi I hre vek tur ah kan ngai a chhan chu Bawiha nen in in zui dan leh in inkawp rei zia kan hria a kan boruak zawng zawng hi Ervin pawn a hrilh ve tur che ah kan ngai a”

Ka rilru natna a zual takzet, ka mittui ka dang thei lo “Enteh u, in chhungkaw chungchang engmah ka hrelo a kei chuan ka nu leh pa ang ah ka ngai che u a Ervin awm tawhloh hnu pawn kan nufa in kan rawn riak a, ka nu leh pa , ka unau te angin ka ngai che u a mahse chutiang rilru pu tur ah chuan min lo ngai a maw?” ka mittui a tla zung zung a Nu Dingin min rawn pan phei vat a “Acadia, kan diklo tih bak sawi ngaihna kan hrelo mahse Layla Ervin thisen awm chhun hi kan hmangaih zia i hria a dawt thu reng kan lo ngaihtuah phak lo, a nat kan phallo a bak ah i la naupang a Lenny kher lo pawh midang tawn hun I la nei ngei anga, tah chuan Layla hi I tan phurrit a ni ang tih kan hlau a ni, kan fapa nen khan innei lo mah ula kan hmangaih lutuk che mahse thil lian tak kan ti sual a ni”

Pa Ruata meuh pawh a  mittui a tla a, an nupa in ka kut vuanin khur hlawk hlawk in ngaihdam min dil a, ni e, an rilru ang ka put chuan awm ka ti a ni, hetian zawng zawng hi lo hre lawk ni ilang chuan an dinhmun ka hrethiam tur a nia, “thil awmzia ka hre tawh a lungngai suh u,ro sum engmah ka awt lo, ka fanu ka neih chhung chu engmah ka mamawh lo hei hi ka hlimna ber a nia, ka fanu thlahthlam in engmah ka ti ngailo ang tih ka tiam a che u”

Riak tur a min tih tlat a vangin in lam ka phone a, kan riak leh ta nge nge, an upa ber U Sanglura te chhung an riak bawk a,naupang ho an in ngai viau a chhuata mut khawm an rawt tlat vangin chhuat ah kan mu dul a, naupang an mut reh hnu ah ka tho them them a, Ervin room ah ka va lut a, a rilru tha zia ka ngaihtuah hian ka ngaisang leh zual a, ka ngaizual a ni, hetiang em a hmangaihna ngah mihring hian kan nufa hian min la dampui se tiin a thawmhnaw la awm ang  ang chu ka han khawih kual a, mittui hian tawp ni a nei dawnlo a nih hi.

Kan boruak leh thil awm dan ka nu leh pa ka hrilh chuan mak an ti ve hle mai, Ervin te chhungkua nen pawh kan boruak a tha chho leh tawh  a mahse Lenny rawn len hnuhnun ber tum a ka tawngkam a vang khan thla 6 lai chu Lenny ka hmu tawhlo, kha thil ka hriat hnu lawk ah khan a rawn leng  a na takin ka lo tawngkhum a nih kha.

“Lenny kan nufa hian min ngaihtuah kan ngailo, Ervin thil tih rulh let nan a min ngaihsak na hian kan nufa nun hi hremhmun ang mai ah min chhuah sak tawh, Ervin thil lo tih tawh chu a tih tawh ania, in chhungkaw chungchang ah engmah sawi theih ka neilo, ka fanu hi a pa ka lo tiam tawh angin harsa leh hreawm in ka siam ngailo ang, a mamawh a pa hi ka pe thei dawnlo a pa tih loh chu a mamawh engkim ka tihsak ve thei khawngaihin Ervin thlarau i zah ve nih chuan kan nufa hnaih ah hian lo lang tawh suh”

Khawel a zim kan tih tawh naklaiin helai Mizoram ah pawh District khat ah kan awm a Lenny sumdawng milar a nih vangin a chanchin pawh mi hriat a hlawh hle  a miin kan chanchin an hrelo theilo mi kam tam lutuk thudik fum fe hre silo te vang hian, ka u Mama a hna lam ah mi te hriat hlawh tak a lo ni ve nen, he thil teh hrep vang hian chhungkua pawh a chhe zawngin kan lar a kan hmingchhe em em a, social media lam ah phei chuan ka thlalak nen lam an tarchhuak a min chuk rawn luai luai a nihkha.

Khaw hawi ngaihna hrelo lek in k awm a, hna lam ah nise miin ka ngaihbel vang ni hauhlo vin min en hrek hrek a vawi tam ban tumin ka rilru ka siam a mahse ka fanu vang chauh in ka thawk hram hram thin, thian hi ka kawm ve dum lova, thian ti a ka sawi ve ngam phanih Lateii leh Tetei hi zawng hun harsa ka tawh lai apiangin ka lam ah tangin ka kiang ah min dinpui tlat thin.

 Teteii te hi an khawsak a hiar ve viau, a pi leh pu, a nu leh pa leh a naute pathum nen a awm an nia, a pa hi Horticulture a peon pension a nia, a mah hi tun ah han pangngai ti ila,private school ah a in hlawh a, a naute pathum lehkha zir an la ni ve nen  amah hi an ei bel ber a ni ve a, theih ang angin han pui ve thin mahila, in hrang a tang chuan in puih reng te a lo harsa a, bak ah mi khawngaihna dil leh dawn hi a duh lo a ma thawhchhuah an gang ei a khawsak a duh tlat thin, harsatna pawh nei se min hrilh zen zen lo min hrilh tawh hi chuan a harsa in a hun tawn a khrih hle a ni thin.

A school thawh na ten inhriattir lawk pawh awm lem lovin a zing school kal tur in siam lai an rawn ban thut mai a, a tan pawh a hrilh hai thlak takzet, Lateii riah phei lai a lo ni hlauh a nilo se chuan a zep leh reng awm si a, ka mangan pui takzet, pawisa puk tir a dawr siam tur a ka tih pawn a duh tlat thin lo, a theih ang angin amah in a in dap chawp thin, ka ngaihsan rual in ka thin a tirim thin ka tan engtik lai pawn a awm a, kan puih ve a duhlo thin hi mahse mite anga mi hausa leh mi thiltithei te tanpui na dawn a vak kual chi a nih loh zia ka hriatchianna hian min ngaihsan tir thin.

Office ka thlen hnu ah Lateii’n min rawn call a thil awmzia min hrilh a, ka khawngaih kher mai, tlai lam ah an in ah ka pen haw tur thu ka sawi a, in ka va thlen chuan mi hlim thei tak ni thin kha a lo ngui ve nghiai a, a nu leh pa leh a pi leh pu pawh chuti tho chu an ni, an te ber in tun ah class  a zir mek a, a dawt chiah in12 Teteii nau chiah hian 3^rd semester BA  a kal mek thung, chutah a pa cancer tih an lo hre ve leh deuh chiah bawk nen ka khawngaih tih hian a sawi fiah phak lo.

Kan pathum in a room ah kan awm a, “Min puih theih chuan ka lawm ngawt ang” chu chiah chu a la tawng chhuak an in ka luh tangin “Tehreng mai engpawh I tan chuan ka in huam i pa enkawl na tur chu ka theihtawp in ka lo ngaihtuah ang, keiman ka tum ang ka chhungte bul ah pawh ka lo sawi bawk ang” ka kut ah a rawn vuan vat a, “Acadia, ka tan chuan engpawh in in huam tih ka hria lawm mahse, min hriat kha mahni pa te damlo enkawl na pawh neilo nih hi ka duhlo”

“Khawngaihin ka thawh theih tur ang hna min zawnpui rawh u khawngaihin, a tul chuan in pawisa chu ka puk ang, mahse tun ah chuan ka chhungte thlaphang lutuk tur venna tur tal eng hna emaw ber ka mamawh tak zet a n” a dinhmun ka hriatthiam pui takzet a ni mahse hna han kawh hmuh mai tur ka hre bawk silo a thlawna tanpuina a duh leh dawn hauhlo tih ka hrechiang si.

“Acadia I tan a a harsat dan tur chu ka hrethiam lutuk mahse tun ah tak hi chuan ka mamawh lutuk che” Lateii nen  kan in en hauh ringawt a, “Tete, lungngai suh, engpawh ka ti ang ka tih kha naktuk ah  I account ah pawisa ka rwn transfer ang, pek nih I duh leh lo nih pawn I duh hun hun ah I rem chan dan an gang in min rul dawn nia” a thaw deuh huai a mahse ka mit ah tak min rawn en a “Ka lawm lutuk ringawt mahse chu ai chuan hna min dilpui la ka duh a ni”

“lutuk ka lo zawng ang, mahse tun ah rih mai chuan han ngaihtuah chhuah mai tur ka hre rih tlat lo mahse lungngai lo la, kan hmu em em ang” ka tih chuan a ngawi deuh vang vang a, sawi harsa a tih hmel kher mai “Acadia englo nia” a ngawi leh deuh vang vang a “Tete, sawi rawh, sawi hreh reng reng suh” ka tih chuan “ Lenny te company ah hian min sawipui hreh viau em tukin chanchinbu ah khan ka hmu a, post ruak 3 a awm a Graduate chin tih a nia, tun ah hian nangni pawn in hria a Rs8000/- ka la a, ti hian ka pa pension nen kan ei deuh ngawr ngawr a nia”

Sawi mai tur ka hre tawhlo, ka ngawi deuh reng a, kan inkar boruak zawng zawng leh ka tawngkhum dan pawh an hre vek a mahse Tetei hian hetiang ang reng hian min la ngen ngawl ngai silo, Lateiin min li kheuh vat a, “Enteh Acadia ka ti lui lo che nia, I tan a harsat dan tur ka hre vek, mahse enteh package an offer kha kan chhungkaw tan chuan a awh awm ve em a ni, Rs 20000/-  lai a nia,school dang ah chuan thawhna ka hmu leh mai anga mahse hlawh hi ”.

In thiamlo deuh hian “Awi ti buai lo mai rawh, ka va kal ve chhin phawt anga ka tlin loh leh Pathina ruat a nilo ni mai” Lenny hmuh leh biak hi ka duhlo bur mahse ka thiannu dinhmun ka en hian ka tih ngei a ngai ni, hun harsa ka tawh lai zawng zawngin a tlanchhe ngai lova, engvangin nge ka tlan chhiat bik ang? Ka thih phah dawn pawh va ni suh.

“Lungngai suh, ka tiam thei lo che a mahse ka lo bia ang” ka tih chuan a thaw deuh huai a “ka hrethiam lutuk nia I be thei ngang lo nih pawn mahse” a ngawih chhunzawm ta daih a Lateii a rawn in rawlh vat a, a tul nih te chuan kan pahnih pawn kan va hmu mai dawn lawm, i rilru lo ti hah lo la, I pa enkawl na tur chu kan lo sang chhuak ve ang” ka thiannu thlamuang leh hlim hmel ka hmuh chuan Lenny biak ka hreh na  a reh deuh huaiin ka hria.

Haw kawng ah Lateiin “Tetei hi chu ka va han khawngaih tak, nulat lai pawn nulat nawmna pawha chen ve miahlo a ti hian chhungte tan a i hmang ral thak a nia, mahse a nau te hi an fel hlauh a an la zir puitling em em ang, nuamsa deuh in a awm ve thuai ang” Lenny ka biak dan tur leh ka biak hun tur ka ngaihtuah ngut ngut a, Lateii thusawi tawp lam phei chu ka hre thei lo hial zawk.

In ka thleng anga ka fanu hlim hmel ka hmuh leh hun ah ka rilru a hahdam leh huai mai ang tih ngaihtuah chungin Lateiin peng tur a  min sawm pawh chhuanlam siam in in lam panin ka inkhalh hawng nghal a, in ka thlen in ka fanu hmel reng reng hmuh tur a awm lo kan nula te hnen ah a awmna ka zawhin ka nu leh pa nen U Mama te in lam ah an phei thu min hrilh chuan ka thaw deuh huai a, in ka thlen a a lo awm loh hi chuan ka hlauthawng thin.

Ka nu ka call nghal a in thlak pawh inthlak lovin, an rawn haw dawn tawh leh tawh loh ka zawh chuan ka nu in tawng ring ngamlo tih hriat deuh hian “vawiin ni hi i theihngilh tawh mi? Ni dawn tak , U Mama birthday a ni tak nizan lam ah pawh a lawm dan tur family group ah kan sawi ho a, tun tum chu chhungkua deuh tak tak leh thiantha zual U mama lam leh U Mapuii lam sawm ila kan ti kha nia, vawiin ka thil tawn teh hrep vangin ka theihnghilh chiang lutuk .

Ka nu hnen ah ka phei nghal tur thu leh ka theihnghilh thu sawi lo turin ka chah lawm lawm a, a nui deuh hak ka hriat chuan keipawh ka then ve sak a, ka in bual zuai a , Ervin kawr min lei sak Cotton Umbrella short frock a sen par ka ha a, flats ka bun a, thil lei kawi ka la duh nen, kan nulate an mahni a lo kal mai turin ka hrilh a pawisa an lo kal na tur ka pe a hmanhmawh bak lengin ka in khalh chhuak lehnghal a.

Ka u hi zawngin a ngaina a, nghah pawh a ngah na ngiang mahse a thawmhnaw ngainat ber a nih vangin Monte Carlo T-shirt collar  awm  a grey ka leisak a, dawr atang a ka chhuak tur leh Lenny leh Pensy rawn in zui lut ve nen kan intawk a, tum loh deuh a kan in hmuh vang nge ka hrelo tu mai pawh chu kan lai tlang vek a, min en deuh vung vung vang chuan han biak mai ngaihna ka hrelo Pensy zawk chuan nidang ang lo takin min melh thip lo tlat.

Lenny ban a vawnna a thlah nghal zat a nidang ah kha chuan ka hmuh rual rual in a ban a vuan thin kha a ni sia, min nuih sang pah hian “I U gift tur I lei ve ni maw?” Nilo, he nu hi ka la ngaidam reng reng lo, ka u te hian kan boruak tawn tawh hre rengin an sawm a maw? Ka lungawi lo tak zet, Nuthlawi engmah pawisak neilo tiin min sawi zing bawk a, min sawi ang takin he nu bul ah hi chuan ka khawsa lo theilo. “I lo hre ve law?” ka tih chuan a ham haih tih a hmel ah a lang chhuak.

That a chhuah lui hram hram a ni tih chu mi a ber pawn an hria ang, “Aw nia hei min sawm ve sia, kut ruak a han kal ngawt te chu I U kan ngam lo mai dawn sin” Lenny chuan mi pawh a be chuang lo a, min la en reng tih erawh ka mitsir in ka hmu reng tho, ni e ka tawngkhum dan  kha ka ti mah mah tih ka hria, a rilru pawh a na hle ang,min be duhlo pawh ni se ka dem hauhlo. “Ka tlai dawn ka kalsan mai che u” tih pah chuan kawngka lam ah ka in her vut a “In lam ah kan in hmu dawnnia” hram thin a.

In ka thlen chuan Ka fanu leh anau in a pu hovin pawn ah min lo hmuak a,min hmuh rual in a rawn tlan a, ka fanu aia hmeltha hi ka mit ah chuan an awm leh tawh chuanglo ang, mi fakder na te pawh hi dawng lo mahila Ervin fanu hi hmeichhe naupang hmeltha a va ni chiang tak em! Ka Nu in a lo sawi nge ka hrelo a, ka U in min hmuh rual in an ti tau der  vel a “ Ka farnu neih chhun hian a U Birthday pawh a hre twhlo a nia, hman ah lem ka duhlo chung chung min lawm luih sak thin kha a nia” ka nuih a za ngang mai, U Mapuiin min fiam pahin ka U a han on zauh a “Keini chhungkua hi chu kan pawimawh vak tawh lo nih dawn hi tiraw?”

An pahnih chuan an han in melh vel a, Happy Birthday Mam, ka pha lo ka theihngilh chiang lutuk vawiinka thil tawn vang nia, mahse hei ka rawn lan vat hi” tih pah chuan ka han kuah a, min rawn kuah let pahin ka chal ah a rawn fawp zauh a, U Mapuiin min ngaihtuah fe hian “engthil nge thleng a vawiin lam ah” keima chungchang a nih loh thu leh ka thiannu hna an ban chungchang ka sawi chuan An pahnih chuan an thaw huai a.

Lenny leh Pensy rawn in zui luh chuan ka nu leh pa ka va melh vat a mahse engmah an hmel ah ka hmu theilo ka lak a thil tih kha ka la ngaidam lova, keimah vang khan ka Pa ngei pawh a thinrim hle kha nia, an lo ngaidam tawh a nih ka ring mahse a tuar tu hian ka la ngaidam thei tlat lo, Bena pawn a la ngaidam lo tih a hmel tum bur atang chuan ka hrethiam mahse ennawm chhuah hun a ni lova, bak ah a birthday nei tu te ber mikhual chu nghah nge kan lo hnar hawn ngawt ang?

Ka pa in hunserh a hmang a, Pensy chu ka mitmei ru reng a mahse zanin chu mak tih tur khawp in lem khat pawh a lem lo a nih hmel a pangngai em mai, fel ber ang zia zangin a tawng siam siam a, ka nu leh pa bul ah te a rawn thu a, ka fanu a rawn hnaih tur chiah chu Layla ka ko vat a,ka u fapa nen balcony lam ah ka chhuah pui daih a.

Chaw ei laiin Ka u fapa Marcus a huai bak deuh vangin keini nufa nen kan pathum in balcony lam ah kan ei a, chaw ka hrai pah a, Layla te reuh pawh hian a nau a nih zia hi a hre ve tlat a hau ngai lova , duat tak hian a dawh mai mai thin, tun ah pawh a thiam ang ang in chaw a han hrai ve a, a nau a awm loh chuan pangchang tak a ni thin mahse a nau a dawm thiam em em thung, a pa hi a va han chhun fuh tak em ka fanu hian.

Chaw eikham ah thalai ho in chung lam ah an chho a, nu leh pa leh chhangchhe ho inhnuai lam ah kan wm khawm a, naupang pahnih rorel dan ang angin kan awm hi ni ringawt an thusawi kan ngaithla a, kan hlim dar dar khawp mai, Marcus hi U Mapuii te lam tangin an tu hmuh hmasak ber a ni bawk a keini lam tang mipa awm chhun a ni bawk a, duat rawn a hlawh ve hle Layla ang chiah in.

Chhungkaw tam tak ah chuan thil tih khawm emaw ah naupang in an duhzawng leh thil sawi duh an neihin naupang chu saw lam ah lo va awm ru tih emaw nakin ah tiin naupang thusawi duh an khap fo mai a, hei hi Layla pian khan Ka U sawi tam ber a ni thin, naupang an nih vangin ngatinge kan kiang ah awm ve kan phal loh, keni ang bawk in sawi duh an nei a, an sawi hun kha fuhlo viau angin ngai mahila an rilru ah a awm hun lai a nih vangin leh thil an hriat reng thin loh vangin an sawi duh sawi tir a ngun tak a ngaihthlak sak tur.

Thil min dil emaw a nih a, a remchan loh chuan nakin ah kan sawi that pui leh tur thu hrilh in keimahni in an thusawi kan vawng reng tur a ni tiin min chah nasa thin zawm pawh kan zawm tha viau in ka hria,inleng awm laia naupang awm ve phal loh te hi ka U huat zawng tak a nia, keipawn ka hua, naupang an nih vanga an hnawksak na a awm lo mahse thu pawimawh tak an hriat kan duh loh thil kan sawi a ngai nih chuan tha tak a puitling chauh n rorel ngai a nih thu kan hrilh thin.

     U Mama a rawn chhuk a, inchung lam ah chhoh ve ka duh leh duhloh min zawt a, naupang bul a awm ka duh zawk thu ka sawi chuan U Mapuiin “kan Awm a lawm han chho rawh han inti hlim ve rawh, inti nu hnuang reng suh” a tih chuan midang ho pawh chuan min kah rawn hlawm a, thil ka hrechhuak Tetei hna tur thil kha tun aia sawi na remchang a awmlo nge U Mama ka sawi tir zawk dawn?

     In thianthat na leh sum leh pai hmanga advantage lak tum hi ka U huat ber a nia, ka thiannu dinhmun hi hrilh in hrethiam ve hle pawh nise he thil hi chu min sawi sak duh ka ring si lo, keimah pawn tlawm thlak ka ti tak zet a chhan chu ti khawp khan ka tawngkhum a tun ah ka mamawh leh si, mihring hi tumah in ti chhe thei kan awmlo, in mamawh hun hi kan lo nei zel si.