LENNY ACADIA 9

           Mi  kan sawm tam lem lo, kan chhungkhat tak tak ang kan nia, mihrang atang chuan Teteii leh Lateii an ni mai a, Tetei zawk best ah ka hmang a, Biakin ah pawh kan ti lemlo small wedding tak tak ang in kan tia, mahse a ni ang milar thil tih te chu tunge hre lo awm ang?

      “Chanchinbu ah lah A unau pa bialnu hlui nupui ah neiin a unaupa fa pawh a enkawl tel dawn” mi pasal nei tur te chu an hlim em em thin a ni ngai a, kei chu ka tihsual vang liau liau in ka nun hremhmun ah ka dah ta nih hi! Ervin khan engtin min ngai ang maw? A rilru a na tur ah te ka ngai a, hringnun piah lam ram hi zawng mahni rin dan hian kan kal pui mai mai chu a ni si a le!

     Layla pawn ruah a sur te hian a pa hmuh pawh a hmuh ngai loh kha  a hre chhuak thin a, “A nu apa khan vawt a ti ngem? A thlan ah khan tui te a lut awm sia, naktuk ah blanket dah ila” ruah sur zan apiang a ka fanu rilru a lian ber a ni thin. Man hlan zan ah kei leh Teteii, Lateii leh ka fanu kan riak khawm a, “Anu naktuk ah pawh a pa in a thlir reng ang che tiraw? A nu apa hi a hlim ve tho a ngem?

      Zawhna ngah tak ka fanu zawhna tam tak hi ka chhan theih loh ava tam em! Ka hriat reng chhanna pawh nise naupang mai bul ah chuan ka sawi thei thin lo, Teteiin min lo chhan khalh vat a “Layla apa chu Angel ho nen khan Inneihna ah an rawn tel ngei dawn a, an hlim viau ang”

      Inneihna hmun tur pawh biakin kan ti lemlo, hotel ah kan tia Media lam in min chim buai loh dantur ber kan ngaihtuah tlang a ni, kan inneih dan teh thut hian chhungte ho pawh a barakhaih hle kei ngei pawh ka bang chuang lo, ka mumang emaw tiin vawi tam ka in sik a, a tak ngei a ni si.

      Inneih hma a kan thu thlun zawng zawng te hian min ti a mai dawn in ka hria, kan inneih tuk ah Bhali ah kan kal anga, kar 2 kan awm anga kan hawn leh vel ah Lenny in ah kan nufa hovin kan awm ang, hna ka thawk chhunzawm tawh lovang. Ka nun chu hremhmun ang mai a ni dawn si.

       Chhungkaw pahnih in biak remna mai a ni lo, Ervin chhungte thutluk na a tel ve, chu chu Layla hi kan inkawl chhawk ang mahse chu chu Layla duhthlanna ah a in nghat thung, hlim tak anga inneih ni a ka han nui lui te chu ka mit ah hian min chik tu tan chuan hlimna a awm loh zia chu an hria ang, Lalpa eng thil nge maw ka chung a thleng ta mai hi le.

      Ka fanu leh apa ka phatsan avang a min hremna hi a na em mai, tiang chuan engtin nge rei ka dam theih ang ni? Ervin min ngaidam rawh aw ti mawlh mawlh chungin inneih na hmun tlansan in Ervin motor ah ka lut a, lawi that zan kan hmanna tur panin kan tlan zel a, kawng lak ah kan in be hauhlo, ka fanu in mittui tling piang a kan tlan liam tur min bye bye lai bak ka ngaihtuah theilo.

      “Kan thleng ta e” ka mit ka chhin daih vang in khawi lam pan in nge kan kal a, khawi hmun nge tih pawh ka hre mailo, ka hawi kual a, ka hma zawn a gate awm chu a rawn in hawng a, In lian tak a bul vel ah pangpar chi tin reng a awm a, Ui lian 2 a awm bawk, gate an rawn hawn na lam pan chuan kan tlan lut a, khawpui chhung a nilo tih ngaw dur khup chuan min hriat chhuah tir a.

       A hnung ah ngawi rengin ka zui ve zel a, in a lo awm ho hnathawk ho nen a an inbiak dan atang chuan a vawi khat kalna a ni lo tih a chiang, zah takin an bia a, chibai min rawn buk diat diat a, in chung lam a a chho chu ka zui ve zel a, khum lo in chei te chuan ka tiril min fan, ka hlau a nilo mahse ka taksa awm dan hian tuna ka awmdan hi ka duhdan a nilo tih a va pho lang chiang si em!

       “In bual hmasa rawh, a chhung ah khan i hak tur pawh a awm nghal ang” ka en deuh ha a, min nuih suk pahin min chhuahsan leh nghal a, ka han in bual a, Ervin bak ka rilru ah hian a wm lo a chhan chu a mah bak hi ka nun ah mipa dang an lut ang tih ka ring pha ngailo a, luh tir ka tum ngai heklo mahse hei hi ka dinhmun chu a ni ta si a, Computer lian zet khum hma tak a awm chu khum a mu chung hian a lo en a, ka chhuah rualin a ni pawh inbual turin a lut zui ve nghal a.

      Ka inthlak sawk sawk a, a lo chhuah hma a mut ka duh mahse table a ei tur awm chuan ka mit a la, a chhan chu engmah tih tham in inneihna hmun ah khan ka ei lo miau a lawm, a rawn chhuah lai takin ka phone a rawn ri zuai a, ka ban vat a “Hello! Anu khawnge i awm? Ka fanu tap aw tuau chu ngaihtlak hreawm ka ti tak zet a ni.

Party na a ka kalsan dawn zan khan engtin mah a awm silo, kal ve chu a ngen chiang a mahse kan hrilh fiah hnu khan a tap hauhlo mahse tun ah chuan a tap ta tlat chu chuan keimah ah inthiamlohna lian tak min pek rualin ka thinglung hi chemte vih ang mai hian a na ngut ngut, ka aw ka thian a “Hey! Princess chu a tap a mi a?” ka tawng zawm leh hma in “Anu ka ngai tawh che sin”

Kei ngei pawh ka insum theilo, ka thutna ka hmer ngat ngat a, ka awm dan hria in phone min rawn chuh vat a “hey! Princess tinge i tah a? Princess an tap ngailo ka tihkha, i lo kal ve duh mi” naupang ti beidawng tur lek a a zawhna siam chu ka haw ngei mai, “Awle awle ka hrethiam e, tap tawhlo la, a pute kha phone han pet eh” tih pah chuan pawn lam ah a chhuak a, um zui pawh ka tum hek lo.

          Khum ah ka bawk thlawp a ka in hnit feih feih a, a rawn luh leh lai pawh ka hrelo, ka dar ah min rawn khawih chuan ka phu nasa ngei mai “Ka tihpalh lutuk, tih hlauh che ka tumlo, lo kal rawh thil ei ila?” Lenny pawh inneihna hmun ah khan thil a ei tha vak biklo tih ka hria, Wine leh bawngsa hem hmin leh salad chu khum bul ah a rawn chawi phei a, ngawi rengin kan ei dun mawlh mawlh a.

            Phone ka khawih a, couch ah ka thu a, Lenny erawh laptop ah hna lam thil nge ka hriat pui loh a khawih mawlh mawlh a,a chang leh phone a hmang deuh reng bawk a, engtin zan in hun hi kan hman zel dawn ka hrelo, zan lah chu rei ka ti tawh hle mai, tun ah dar 9 em pawh a la ri silo, a phone a rawn ri leh a pawn lam ah a chhuak a.

      Teteii leh Lateiin vawiin kan inneih thlalak vel min rawn thawn chu ka en mai mai a, room kawngka a rawn in hawn rual a “Anu” Layla rawn tlan lut ka hmuh chuan ka mumang mai emaw ka ti dawn rum rum a lawm ka tho chhuak vat a, khum ah a rawn lawn zui ve nghal a, min kuah chial chial a “Anu tinge in kal rual khan min hruai ve nghal mai loh”

      “Tu nen nge in lo kal a” a sam ah ka chul sak a, ka mal chung ah ka pawm a, “Pute Bena nen, amah chu  a haw leh nghal daih dawn, a riak ve dawn lo” ka awm ah a bei a,min kuah hle hle a, Lenny a rawn lut zui ve nghal a “Wow! Princess chu nuam a va ti awm ve a Pch (pangchang) vel ni maw?” ka fanu pawn Lenny lam a hawi nghal a “Anu hi ka ngai a”

       A inthlahrung hmel chu hreawm ka ti zawk, tun ah chuan a pa a ni mai tawh dawn si a, a hrethiam a ngem ka hrelo, ka hrilhfiah ngamlo nge ka thiamlo , kan inneih hma in Lenny nen kan chungchang hi Layla ka sawi pui miahlo mahse Ka nu leh pa khan room ah kovin an ti ti pui ngei tih ka hria mahse amah te hian engmah min zawt bawk silo.

      “A pa-Pui khawnge i mut ve dawn” Lenny ka melh zawk a, min rawn melh ve nghal bawk a, nui suk pah hian “in bul a mut ve I phal em?” ka fanu in min rawn melh zawk a “Anu hi dil la” ka nui chhuak lo theilo, “khum a lian tho va kan pathum in mu ila ,nang a lai ah i mu nga” Layla a phur ngei mai, kan nufa in ka mu thin a, hei vang hi niang a lai a mut a chak thin, chuvang chuan a pi leh pu bil ah a mu fo thin , a chang leh Bena  te  nen kan pathumin kan mu mai thin.

         “Princess i ril a tam em? Ei tur I duh em?” Layla a ngaihsak dan hi chu a pian tirh atang daih tawh khan a ni, mamawh kan sawi ngailo vin a pa zawk ni awm ang tak khan engkim a rawn ngaihtuah sak a mahse a hnu ah a chhan te chu ka hre leh thova, kan nufa chunga that a chhuah chhan te chu mahse lawm loh phah na tur a ni chuanglo.

       “Pa-Pui in ui khu reilo te a bul ah ka awm thei ngem” kan in zirtir nasa bawk a, mi thil reng reng a nei tu te phal na lo chuan khawih tawp loh tur, duh zawng neih pawn mi rawn emaw dil hmasak phawt tur, mahni fa te mahnise thu hrilh hi chu a zawm tha ve thin mahse naupang na na na chu hriat reng loh chin an lo nei ve tho a, an sual vang a ni hauhlo a nia.

     “Thei teh reng mai” a sawi lai chuan a en kar a, a sawi zawh rual rual in a tlan chhuak nghal a, um zui ka tum zet a”Acadia ti ti lawk ang” ka thu thla leh ruai ruai a “min ngaidam rawh Layla kha kan rual a hruai tur a nia, ka lo ngaihtuah kimlo lutuk a ni” mak ka ti zawk engmah thiamlohna a neilo mipa tan chuan nupui neih zan a naupang nen a mut chu a chakawm loh viau ang nuthlawi mahni ila, ka ti lui ngam lo hrim hrim.

                      “Layla ka lo zuk awm pui a nga, hei hi lo en  rawh aw, e tak a chuan kan pathum a mut kha ka rawn lem lo na che in Layla hian a nu leh pa hi inneih zan ah an mu hrang tih a hriat chuan a than len zel hun ah mak a ti ang, bak ah ti hian ngai ah a neih anga amah paw a in adjust ve thuai ang” khum atanga thawh pah chuan pendrive min pe a. Engtak ni ang maw?

      Computer ah chuan ka va vit lut nghal a, hospital a Ervin mu ka hmuh chuan ka mit khap na chang pawh ka hre tawhlo ka tih hunlai zawng zawng khan a hun tawp video a cover na chang ka hriat loh vangin ka inthiamlo a, vawi khat tal a che lai te a tawng lai te, a aw te ngaihthla chak khan ka awm a, Lenny hian a lo nei reng si a maw?

      A  nat zual tak tak hma kha a ni tih ka hre thei mai, a hmel a la tha in a taksa pawh ala chhe lutuk lo, khum bul ah Lenny a thu ve bawk a “Lenny saw lam saw enteh” Ervin an lenny a biak lai te chuan ka bul a awm ve ang mai hian ka lo feel thei, Lenny chu camera lam a rawn hawi a, “Bro engthil nge a? Ngatan nge i tih a” Ervin a nui sak a, a hmel thatna hi a natna hian a lo hliah loh zia zanin hian ka hmu thar leh.

        “Thil pawimawh tawp ka sawi dawn a chu chu nakin ah i la mamawh ang evidence atan” a nui deuh sak a,  a nui hmel chuan ka mittui a ko chhuak a, ka in sut deuh hraih a, ka mit ka hru nghal thuai a, ka thu hnai sauh a “Kan rilru leh duhzawng te hi alo in ang hle mai, unau pianghmun nilo mahila, nang nen hi chuan in kawm tam lo viau mahila kan in hnaih ber a nih hi” Lenny a la ngawi reng tho.

              “I duh ang a piang ka duh emaw ka lo ti thin a, ka duh ang pawh I lo duh ve tho a” a nui deuh sak sak lai hmel te chu aw Ervin ka van ngai tak che em! Ka pause a ka han tap leh rih thin “I tap ngei dawn tih ka hria lawm, he thil i en hun chuan kum engzat tak vei hman tak ang maw? Tih pah in camera a rawn melh a , mak ti tak a ka en lai chuan “Acadia Lalnunsang nangmah kha nia ka tih” a bul a awm ve ang mai hian min bia a mawle!

        “khawvel a ka hmeichhe hmangaih ber leh ka neih chhun liau liau hi I lo duh ve tih ka hria lawm bro” Mak ka ti lutuk chu ka ang pham a “Fiamthu thawh hun pawh a nih loh hi, I nawi riau mai, damdawi an pek che hi I rui ni lo maw” Lenny chu a tho vut a, khawi lam nge a pan tih ka hmu thei ve lo. “Ka fiamthu loh zia hretu i ni lawm”

           “Ka hriat chhuah  tan tirh khan min chhuh daih dawn emaw tiin ka thinrim em em a, ka ngaichang reng che a mahse engmah I tilo tih ka hria, bakah ka hmangaih hian kei ai hian nang hi a thlang dawn lo reng reng che, kei aia hmangaih hi a nei ngailo miau a lawm, kei pawh chu ti tho chu”

       ‘Thla 3 pawh ka nei tawh lo, ka tan hian a thih thlengin kan mi mawlnu hi a rinawm bur dawn tih ka hre chiang lutuk, midang tan ka phal ngailo, keiin ka neih loh chuan tuman an nei ngai bik lovang ka ti thin, mahse ka awm loh hun ah nun khawhar lutuk in a hringnun a hmang anga, a rual a pen tur leh a mah hrethiam tur a tawng tawh lovang nang mah lo chu”

Chu thu a sawi lai chuan Lenny a thu thla nghal a, a bul chet ah chuan “Bro khatiang mai mai ngaithla tur khawp in hun ka nei tam lo nia” a ti deuh hmuk a “Ngaithla hram rawh enteh thil ka dil ngai lo che chu chu I hria, ka neih zawng zawng pawh ka pe phal che sin, kan unau ho zawng zawng ah chuan ka ngaina lo ber che a, mahse ka pawh ber che,ka ring bawk che”

       “Ka awm loh hun ah Acadia hi lo enkawl la, lo nei ang che, I hmangaih tih ka hria nia, I phone a a thlalak aawm zo zai te, I laptop a I nau bialnu thlalak folder tawp i lo kawl ve teuh te kha ka hmu vek, hnunglam tang a um kha bansan la, ka awm loh hun ah chuan a rual in pen tum tawh rawh, chelh tu leh veng tu a mamawh a nia,  rual in lo kal ve taw hang che, ka chhungte ka hmangiah loh vang ni hauh lovin thih ka hreh na chhan ber chu Acadia hi a ni sin, he video hi in inneih zan ah entir ang che”

    Ka en tlawk tlawk a, ka mize tam tak a sawi bawk a, ka luhlul zia te mahse mittui ka ngah zia thlengin, a tawp ah camera lam a rawn hawi a “mittui tla purin i en leh dawn tih ka hria, he video i en hun chuan kei chu ruhro mai ka ni taw hang, Acadia, ka tello a hringnun mahni chauh a i hmang tur hi ka duhlo, ka u hian a hmangaih ang che ka hmangaih tluk zet che in”

       “Nang chuan hun i mamawh ngei ang, zan in ah paw hi rilru a la in peihlo ang, chu chu ka hre sa, nangmah I inhriat chian aia nasa hian ka hrechiang che sin, keimah vangin move on ang che, min theihngilh lo la, mahse I hringnun ke pen lai ti tawp tur khawp chuan kei mitthi tawh hi min hmang ngai suh ang che, ka tello in hlim tak in awmla, mahse min hrechhuak ve thin ang che”

      “Kei min hriat reng na hian natna a pek che ka duhlo mahse min theihnghilh turin ka phal hauh lo che nia, min theihnghilh chuan ka rawn hrang ang” a rawn fiamthu leh hram a, fanau malsawmna in dawn hun ah chuan thil pakhat ka ngen duh che u, ka hming inlo put tir ngei dawnnia, kei zawng fa ka nei ve thei silo a, chuan Bro khawngaihin Acadia hi rilru na in lo siam ngai suh ang che, I hmangaih tih ka hriat vang chauh in ka pe phal che nih hi mahse I ti na  dawn nih chuan hnaih lo zawk ang che”

    Video ka en zo chu bathroom ah ka tlan lut a tui ka on a, ka theihtawp hian ka tap a ka awm ka chum bawk a, Ervin tih bak sawi tur reng ka hrelo, bathroom kawngka an rawk kik tak ah chuan ka hmai ka phih sawk sawk a, tui ka off a ka fanu in min kohna chu aw lawi rutin ka chhang a, Lenny nen khum ah mu in animation an lo en a, ka va chhuah chuan chik deuh hian Lenny an min lo melh kar a.

            “Anu i van rei em em ve, Pa-Puia’n maw Bhali ah kal ve a phal sin, leave letter pawh min ziah sak vek tawh chuan principal a phone bawk a, a nu naktuk ah chuan enge ka hak ang, ka thawmhnaw kan in ah a awm vek bawk sia” Lenny a lo tawng chhunzawm nghal zat a, “princess a kal ve loh chuan a boring dawn em mai ,nangmah nen chauh chuan” ka fanu chuan nui kar kar pah hian “dik chiah a nu hi chu boring e,strict ropui si, Pa-Pui ka lawm e aw”

     Miin thil an tih sak a lawmthu sawi zel tur kan tih te, midang rilru a tina emaw mi a ti palh a nih chuan ngaihdam dil hreh lo tur hian ka zirtir nasa ka tih theih mang hleih loh hi ka fanu lak ah hian ka beisei nasa thin, mahse a phak ang tawk chuan a zawm ve chuan ka hria, zawm kim theih ni heklo tihsual hi chu naupang dang ang bawkin a ngah ve a nia.

              Kan mu tur chu Layla a phur ngang mai a tawng siam siam reng a, kei zawng a mood ah ka awm hlawllo, ka thil en khan ka ngaihtuah 98 percent hi chu a awh vek, Layla lah engmah hrethiam heklo Lenny thil a zawt ah 11 velh ah n mu hram, an pahnih a an mu dun lai ka hmuh chuan ka en reng a, mangchhe lutuk mai ka fanu chuan Lenny nghawng ah a ke a va kham thin, a vang zawng hian a mu a ni ber mai, a ngai theilo viau dawn emaw ka tih laiin a ni pawh chu ka fanu ang tho engmah hre lek loving a  mu vet ho.

Keizawng ka mut a chhuak thei hlawl lo, ka tho them them a, Lenny Laptop ah pendrive ka vuah leh a, ka en tlaivar thak, dar 5 dawn ah Lenny a rawn harh a, min hmuh chuan mak a ti deuh tih a hmel ah ka hmu a”I la mu miah na nge?, vawiin zin tur kan ni bawk si, I chau lutuk ang, rei lo te va tlu zal ve rawh” ni e tlem tal ka mut a ngai a ni, muhil lo mahila taksa hahdam nan tiin ka mu a, ka rin loh takin ka lo mu tui viau a, dar 10 ah min rawn kai tho a.

       Airport pan a ngaih tawh thu an rawn sawi chuan ka tho rang ngang mai, ka fanu phur lutuk hian a nu rilru lah a hre der silo, damlo vak ila kal theilo ila ka ti ngawih ngawih a sin le! Ka fanu hlimna aia pawimawh enge awm chung phur fahran lo chuan ka in siam a, dar11 vel ah kan chhuak a, thawmhnaw vel zing kar ah a hak tur an lo va lam chu niin.

      Ka nu leh pa in pasal nei tura min tih zan tluk a ka thinlung na kha a wm leh ka ring tawh lo, Ka U Mama te chhung chaw an rawn ei bawk a, chaw ei kham ah ka pa in thu pawimawh sawi tur a awm vang a Bena pawh chhuak lo tur a a ti kha nia, “Bawihi hei ti hian i kum pawh a lo tam ve zel a, Layla pawh a lung fing ve tan tawh a, keini hian hmangaih hle mahila, pa dinhmun hi engtik ah mah kan luah zo dawn chuang lo, Pi leh pu, putea te Pitei te leh nu hmangaihna chu a dawng teh meuh, Layla tluk a hmangaihna dawng nasa hi an awm meuh lo ang”

Hnuai lam ka melh reng a, eng lam hawi nge a sawi ang tih hlauthawng dep dep in ka awm a “mahse Bawihi ngun takin ngaihtuah la, I nu leh I pa pawh hei kan kum alo tam ve tawh a, kan nun chawhnu lam kan lo hmang ve der tawh a, mihring ngaih ah chuan kal hmasa tur te pawh kan nia, sum leh pai ah chuan ka ngaihtuah lo che mahse I damchhung a hetia I awm ringawt tur hi chu Nu leh Pa thinlung atang chuan a har lutuk”

        Bena a lo tawng vat a “pasal nei turin in duh tihna mi? Peh hel kual vak lo ula” hei lah hi dawhtheihna nei lo em em bawk nen, ka pa lah chuan engah mah ngailo ang mai hian a sawi tum a sawi zawm mawlh mawlh a “Kan awm loh hun ah I nuta ten hmangaih eng ang che mahse mihring chin hriat a nil ova, nuta tel bel reng emaw a awm kha I tan inthlahrun na chen a la awm dawn a, chu lo reng ah In nufa ringawt a khawsa nit a ula, mizo hnam dan ah mipa tel lohna chhungkua chu khawtlang zah an kai tak tak thei thinlo”

Ka u te nupa hian an hre lawk a ni ngei ang, kei leh Bena ang em chuan mak an tih hmel ve tlat loh, “kan mi hriatchian leh kan rin ngam nangpawhin I ngainat sa em em Lenny hi nei la kan ti a ni” ka thawk a tawp mai dawn in ka hria, ka dang a ro hulh a, sawi mai tur pawh ka neilo ka ngawi reng a,, mak tak maiin Bena a tawng chhuak tlat lo. Ka nu leh ka u in alo tui hnih ve zat a, ka chhungten hrelo mahse ka phatsan tawh tho na in khawvel hmuh leh hriat a Ervin phatsan kha ka ngamlo a ni.

Ka thil lo tihsual vangin tang huai  thei ka ni lo, khawi ah mah a sawi chhuah ka ring hauhlo Lenny hian kan awmdan kha mahse ka huaisar ngam tlat lo a ni, ka hlauhthawn em em mai a Nu hrawn leh a farnu te leh Ervin te chhungkaw dihmun  ka chhungten hrethiam takin engkim an sawi ho a, Mama meuhin “Duati ka ring ngam a ni, ka thianpa hi Pensy pawh hlauthawng lo la, an inkar ah engmah a awm tawhlo tih ka finfiah vek, nangmah chauh kan ngaihtuah theilo a, Layla dinhmun kan ngaihtuah vang a nia”

Rei tak ka in ngaihtuah a, thla engzat a tam nge ka in ngaihtuah ka thiante lah in Layla vang tala nei tur a min ngen na chu enge kei nuthlawi hian duhthlang thei ang zia zang a Lenny te ang ka hnawl ang ni mahse hamngaihna tel miah lova nupa in siam hi enge hlut na? Mahse hmangaihna chu ka tan chuan a thi tawh ka hmangaih thih rual khan hmangaihna tel lo, rosum vang ringawt pawn an innei lawm tiin ka fanu vang chauh a neih rem ti kha ka ni reng a.

        Kar 2 zet kan cham hnu ah kan haw a, hmeichhe fel tak nilo mahila , pasal nei ve ta cheng a, pasal te in lam a vawi khat pawh riah loh kha fuh ka ti thei lo, mi lo ngaih ah pawh Lenny a thang tlawm dawn lutuk chu chu ka duh loh vangin ngen tak tein ka ngen a, “buaina a tam mai mai” a tih pawhin tawrh ka huam thu ka sawi mai a, “kar 2 khat tal awm ho ve ila, mahse Layla a awm ve ang”

Layla hian nuam a ti hauhlo ang tih ka hria, mahse ka fanu hi khawi ah mah ka dah hrang dawnlo, amah vang a nei ka nia, engvang mahin ka fanu hi ka hlat ah ka dah ngailo ang, kan thlen hnu ah Lenny te in ah kan lut a, tiang em em hi a nih ka ring phalo, Apa leh an te ber hmeichhia chiah in min bia a, U mapuii thiannu ve berk an in a tal tam ve ber pawn min biak a tum miahlo chu mak ka ti, ka fanu lah chhawn chhaih tu awm lo bawk nen a awm dan ah a ni pawh a inthlahrung a nuam a ti lo tak zet tih ka hria, zan kan mutna ah “Acadia ka sawi sa kha, hetiang hi kan nih dan a nia, hreawm tak a in nufa in awm ka duh hauhlo a nia”

Chhan ka tum lemlo ngawi rengin kan nufa in kan mu a, a thaw deuh hak a, kan inneih tangin kar3 na a ni tawh vawikhat pawh nupa nun kan la hmanglo, tiang zawng hian min en ngai heklo nge a ti lang lo pawh ka hrelo, Zing ah kan tho a, kan nufa in chaw min chhum kep ve thina chu zawng chu ni mai, ka fanu school kal ka hruai a nilengin ka nghak tawp, nidang ah chuan tupawn hruai se an haw san a ban dawn ah an lam leh mai thin.

In lam a awm ka peihlo takzet, chuvang chuan nilengin an school kawt ah ka nghak a, ka fanu lah chuan hrethiam hek lo nuam  a ti em em mai lehnghal a, Ni 5 kan awm tling ve tawh Lenny pa in min be zauh zauh tih loh chu tuman min be lem lo, in hau hrep ai hian awm ve lo ang mai a in  ngaihna hian mihring hi min ti tlawm vawng vawng ka ti thin.

       Room ah chiah kan tawng hi a ni ringawt, in chhung kan awm tawh chuan chengkawl ang mai kan ngawi reng a, chaw ei kham vel ah an mahni room ah theuh an lut a, Lenny Pa leh a nu in TV an en a, anni pawh an in be lum lam lem chuanglo, a hma tang a an awm dan nge kan awm ve vang ka hrelo, zan kan mu a dar 12 vel ah Layla a rawn tap ta vak mai, a tet lai tang a tahbelh lo ve tak kei lo ang takin chutia a han tap vak ah chuan ka harh chiang ngang mai.

Lenny pawh chuti tho chu,kan sawi vak vak a rawn harh a, chhuak em em hian a rawn tap a, ka han pawm kang tur chu a sa vul a, zun alo cheh bawk, a kekawr huh ang  ang chuan ka pawm a, “Duati tap tawh suh , i enge na sawi rawh” a tap nasa bawk a a aw pawh a lawi rut mai, “a na vek anu a na” Lenny an tui a la vat a, a chal ah towel in a rawn dep nghal thuai a , Naupang hrisel tak ani ve thin a sin le, a hritlan awm ka hre bawk silo mahse chuti teh thu a a han awm chu ka hlauthawng a, ka chi ai bawk.

Naupang nachhawkna fahran pawh kan lo kawl lova, hospital pan pui mai ang tiin Lenny an min rawn a, ti khawp a a tap chung khan Lenny Pa chiah a rawn tho a, min rawn thutpui ve kha a nia, hmeichhia zawk hmangaihna ngah an lo tih hi chu tih mai mai alo nih hi, hmeichhia hi kan lo sual in kan rilru a lo chhe fe zawk.

Hmanhmawh takin motor a la chhuak a, a zun cheh na ka thlak a, a taksa ka dehna lai a piang na tiin a tap vawn vawn bawk si, vawiin an school kal na ah a chesual a nih ka ring amah lah chuan a sawi bawk silo, kei mut thawmhnaw chhing te nen , thlak pawh ka inthlak hman tawh lo, inhnuai lam ah kan tlan thla a, ka pa in min rawn zui ve bawk a, kawng kan kal laiin Bena ka phone a ka nu te lo hrilh a damdawiin lo kal nghal turin ka chah a, Bawihbawihi ka phone nghal bawk a, ka hrilh lo nih chuan kan boruak a chhe zual mai mai dawn si a.

     Hospital kan thleng a, emergency ward ah kan tlan lut nghal a, a tap a bang theilo, min thlah duh bawk silo, ka mut kekawr chhing lutuk fahran pawh ka ngaihtuah chhuak zo tawhlo, ka pa khan engtk laiin nge alo chu hman ka hriat si loh towel a rawn la a min rawn pe a, ka in khuh nghal vat a, chapal reng ka bun lo, Lenny pawh a chapal khing chiah a bun hman, tiang em em hian a chi ai ve ang tih ngaih na ka hrelo, a taksa na lai an han zawh lahin sawi tur a hre bawk silo.

Ka chhungte an rawn thleng ve nghal bawk a, ka nu mangang lutuk hmel kha kei ai mahin a phili bawk nen, Doctor leh Nurse ten min khak nghe nghe mahse a vawi khat damloh na nih vangin kan phili lo theilo, doctor a rawn thleng a, a taksa vel a han keu chu mak ka ti zawk a lo duk vek a, in ah khan en chian na chang pawh kan hrelo amah a tap nasa bawk si nen, a ban vel te a nghawng te a lo duk vek niin.

Ka thu thla hnawk a ka ngaihtuah na a lut hmasa ber chu apa natna ang kha a nei ve em ni dawn? Ka tha a khur hlawk hlawk a, an jection hnu reilo te ah a mu nghal ti tih mai a, khawvar lam ah test an neih tur thu min hrilh a, min admit nghal a ni mai, cabin lam a kan chho tur te chu kal pawh ka kal hlei theilo, Bena’n min rawn vuan vat a, Lenny leh ka pa in duati an nawr na lam ah hmanhmawh thei ang berin an zui nghal dawr dawr a.