Arelia - 1

              “Tha ka nei thlawt lo a ni, min hrethiam la min lo kal san rih mai teh” a mit ka han en a, a chau tih hai rual a ni lo, mahse min mamawh ber laiin ka kalsan ang maw? Chu zawhna chu engtin nge zawh pawh ka in zawh theih zawk. Ka ngawi reng a egmah ka sawilo, a kut chu ka hum vang vang a, a ni erawh ka kal leh kal loh pawh  ngaihtuah tawh lo chuan a mit a chhing riai riai a.

 

                “Bawihi, tho tawh la, I Pa pawh a in peih tawh a nia” ka nu in ka room kawngka a rawn kik karh karh lai chuan ka phone bih pahin Blanket chuan ka lo in khuh hlun a, ka chhan mai loh avang chuan “Arelia, I harh em?” Ka nu hi chu a zaidam ve thin a nia, Nu te tak te zaidam zet hi a nia ( a nih na tak ah chuan thinchhe zet mai) Ka pa nen hi chuan an va han letling tak em!

 

                     Ka Pa hi pa lian ve tak 5”10 a nia, a zaidam in a tawng tlem em em a, Ka nu erawh Fit 5 chiah chiah a ni thung, engtin nge maw an in tawn ve re re ni, ka nu ka la zawt khawp ang, an kum pawh a inthlau kum8 laiin, ka Pa hian ka nu hi engtin nge a duh theih le ka ti thin. Hetia ka tih avang hian Ka nu hi inlo hmu chhe ngawt ange, ka Nu hi kan fak lawk teh ang, in hmuh dan a dang dawn tlat, ka nu hi Nu te tak te, thinchhe zet ni mahse, Nu hmeltha tak leh rilru tha zet, a tet aia rilru zau, hmangaihna ngah zet a nia, Ka pa chhungte zawng zawng a huih khawm dan atang hian kan tet lai phei kha chuan mak ka ti thin zawk a ni.

 

                      Mi dik tak mai, engkim a ni chiah chiah a thil duh mi, engkim la serious thei em em mai a ni a, engkim mai ka Pa nen  a opposite vek an ni chung a kum 22 lai an innei thei hi mak ka ti lo theilo a ni. Ka pa erawh Pa zaidam, ngaihsam zet, mi pawh hau zen zen lo, “its okay” ti zel thei a nih laiin ka nu erawh “enga tinge” ti thin mi a ni, Ka pa U leh nau fate thleng hian ka Nu hi an ngaina em em a, tu mai pawh hian an ngai em em mai, ka cousin te pawh hian an mamawh leh duh thlen nan ber ka Nu hi an hmang a, ka  nu zilhna pawh an ngaipawimawh in an zah tak zet.

 

                       Fa lak (adopt) ka nih hi kum 7 mi ka nih khan ka nu leh Pa hian min hrilh a, kha zan kha naupang te ni chung si khan ka hrethiam a, ka rilru kha ana em em a, ka nu leh Pa fa tak tak ka ni lo kha na ka ti takzet. Naupang te si khan, chaw ka ei tui lo a, zan ka mu lah ka thangharh reng a, ka mutui theilo. Kum 4 ka nih atang hian room hran ka nei a, ka damlo emaw, Ka pa a zin te emaw a nih loh chuan ka nu leh Pa bul ah hian ka mu ngailo.

 

                        Kum 7 ka nih hian ka nu leh pa hian fa an pai ve a, ka thik in ka rilru hi a na ngawih ngawih thin, min hmangaih ve tawh lo tur min duat ve tawh lo tur anga ka ngaihna hian minti na ni ber khan ka hria. Ka sual thin zia tun hnu hian min hrilh thin a, min lo hmangaih zia leh an dawhtheih zia hi ka hre thar reng mai a nih hi. Ka nu hi a nulat lai hian a chhul lam ah harsatna a nei a, Doctor te thurawn angin Pasal a nei a nih pawn kum 5 tal fa pai rih lo tur in an ti kha a nia, an inneih hma atanga hre lawk an nih vangin, an inneih hma hian Fa lak an lo tum hle a lo ni a, chutah hmeichhia an awt em em bawk nen. Ka nu leh pa hna avang hian Delhi lam ah an nulat tlangval lai atanga khawsa ve ve an nia.

 

                               Ka pa hian a thian 3 te nen Company lian vak lo an din ve a mahse tun ah chuan India ram ah an hming pawh a lang phak ve tawh hial a ni, ka nu pawh hi ka Pa te Company ah a thawk ve a, mahse an inneih hnu hian kei min lo nei ve bawk sin nen  hna bansan in kei min enkawl chawt a, chumi pah chuan Mizoram lam ah a unau te nen Sumdawnna an bei ho bawk a, Naupang te e ti lo khan ka nu leh pa hian min enkawl puitling em a, ka rilru sukthlek pawh ka rualpui te ai chuan a changkang kan ti dawn nge a puitling zawk thin.

 

                         Ka rilru natna te kha puitling hnem angin min hnem a, thil awmzia min hrilhfiah a, ka Pa tawngkam kha tun thleng hian ka theihngilh thei lo “Mate, I nu nen hian fa lo nei thei pawh ni ila, Fa lak kan tum hrim hrim a, kan inneih hma atang a kan sawi a ni tawh a, Children Home ang te chu kan din thei hauh lo ang mahse Nu leh pa mamawh ngawih ngawih te tan a malsawmna nih theih ve a, tumaw ber tan a Nu leh pa nih a, dinhmun tha tak leh sang tak kan pe theilo nih pawn kan phak ang tawk a enkawl a hmangaih kha kan tum ber a ni a, Home ah kan lo kal a, naupang tam tak zing a kan mit la ber chu nangmah kha I ni, kan thinlung in kan hmangaih nghal em em che a sin, tun ah I nu in nau a han pai ve thei a , kan lawm em em a, mahse nangmah kan lak ni a kan lawmna ai khan  a nasa bik lo a sin”

 

                       Chhang ka han neih meuh kha chuan ka nu leh pa laka rilru natna hi tun thleng hian ka nei leh tawh lo, an ni hian min lo la lo se lang chuan ka dinhmun tur hi ngaihtuah pawh ka ngaihtuah phak lo, hmun dang a awm char char kan ni bawk nen, Mizoram a kan haw chang pawn tuman fa lak ka ni tih hi an hre ngailo, ka nu lam emaw ka pa lam ah emaw pawh min en hranna a awm ngailo. Ka nau hi Mipa a ni a, Hector Lalmuanpuia niin, kei hi Arelia Malsawmsangi ka ni thung.

 

                           Kum 17 ka nih hian College ka rap ve tan a, ka nau hi Ka pa lam ah kal in a pa lian fu mai a, kei hi (ka nu leh pa tak an nih loh thu hi ka sawi tawh lo ang) Ka nu lam ah kal in ka nu lian lem lo mahse ka nu ang em em chuan ka te chhe lo (hehe) 5’4 vel chu ka ni ve, ka nau nen hian kan in bak kaih zing ve khawp a, kan kum alo inthlau ve deuh bawk nen, ka thil tih engkim ah in rawlh a tum tlat te, mi hek a peih lutuk mai te hi ka mil thin lo, ka thiante lo leng se, a nghal em em a, tawng tam mang silo hian an zahna tur a khawsak a ching thin.

 

                                Ka College kal tan ni tur chu kei ai mahin ka nu leh pa an phur a, keiin eng vak ah mah ka ngailo a, zing pawh ka tho tlai reng a ni, inla college kal tur tawkin ka han in la enge maw ve khanglang a ni ber mai. Ka in phih fai hnu in, in hnuai lam ah ka chhuk a, Breakfast ka nu in alo buaipui mek a, Ka nau erawh  ka pa tlangval lai an sawi ang mai Computer hma ah thu in Game alo khel leh char char thung, ka nu in han hau se, ka pa hian alo tan ve khanglang thin bawk nen, keimah vang tak hi chuan an in hau ka hrelo mahse Hector vang erawh hi chuan ka nu leh pa hi vawi tam an in bak kaih ve thin. Ka pa mizia zawng zawng a rawn nei a ni ber, tawng tlem si, luhlul si hi a ni tawp.

                                 Kan veng ah hian Mizo chhungkua hnathawk avanga awm ve an awm a, class 8 kan nih atang khan kan in thlah tawh lo, chuan kan in piah chiah ah hian Vai ti mai ila kan hrethiam mai ang, Punjabi chhungkua an awm a, fanu neilo,mipa hlang thah an ni a, Harsh nen hian Nursery tanga school khat a kal kan nia, a u te erawh in tun ah chuan nupui an nei tawh a, a Nu hian fanu a awt ve nen min duat em em bawk a mahse zep thu cheng lo Hector erawh a ngaina vak lo. Ka nu leh pa hian ka school luh tan tirh atangin tun college ka kal thleng pawh hian ka ni hmasa ber hi chu school/college thleng min hruai an duh thin a, tukin zing erawh Hector te school lam ah ka Nu kal a ngaih avangin ka Pa in kei, Harsh leh Mazualteii min thlah dawn thung.

 

                                Harsh leh Mazualteii chu an phur na ngiang mai, kan college duh ber Shaheed Bhagat Singh College ah kan lut ho thei dawn a, kan 3 an kan lut ho thei tur chu nuam ka ti a, ka phur mahse a bak chu han phur na em em pawh ka nei hran lo, Kan awmna veng tho a nih vangin a hnai, kan in luah atang tak hi chuan ke a kal dawn chuan darker chanve nih loh pawhin minutes 45 vel a ni ang. Ka pa pawh chawlh la in min thlah dawn a, kan first day te a ni bawk sin en tlai an han hlau leh khawp a, traffic jam tur hisap pahin dar 9:30AM a tan tur kha zing dar 7:30AM ah kan chhuak a.

 

                              Ka Pa hi a hna vang hian zing dar4 ah a tho ngei ngei thin a, kan naupan lai atang kan ti thang tawh nen, thawh hmat hi chu kan harsat vak lo, ka nu erawh zing thawh hi chu a ti hlei theilo, Ka pa hian ei siam thiam rual ka nih hnu phei chuan ka nu hi a duat ve em avang hian zing ah kai tho lo tur leh keiman ei siam mai tur in min ti thin,a chang chuan school bus a lo thlen hnu te hian a la thawh loh thin avang hian ka kalsan mai thin mahse ka nu hi chu zan lam mut a harsat thin avang hian keipawh thil engkim ti thiam ka nih hnu chuan zing lam ah hi chuan awl hram hram ka tum ve thin.

 

                             Kan chhuak hma bawk a traffic lam pawh a la zia ang reng a, kan thleng hma khawp mai, dar 8:30 ah College kan thleng ta, mi an lo zi nuk nuk a, kan pathum chuan ka pa kan vai liam hnu ah kan college ve tur lam ah chuan  kan in zui lut ve tham tham a, Kan subject a in ang vek bawk nen, kan 3 chuan kan inkawp leh nghal chawt a, kan class room tur zawng reng rengin a ni khat na chu class pawh kan attend kim theilo.

 

                                Thla thum lai a vei leh meuh chuan thalai tha za rual tih tak ah ngai ah kan neih mai a, Political Science la vek kan nia, kan ban hun a in ang thin bawk a, hne leh chauh chang chu awm thin mahse hlim takin kan la kal ve thei zel, kan class ah chuan NE (North East) mi kei leh Mazualteii nen 8 lai kan awm a, Mizo hmeichhe pakhat Lucy a awm ve bawk a mahse kan in kawm lutuk lem lo, Mizo tlangval pakhat Alvin nen an in kawp deuh chawt a, class bunk an hrat phian a, Beer/Zu rim nam rum rum a class attend chang lah an ngah.

 

             Tlar hnung ber an chuh thin a, keini thian pathum erawh a lai ah kan thu thin. Ka thiante bul ah pawh ka sawi ngailo, a chhan chu min hau nasa dawn lutuk bak ah Mazualteii ngat phei chuan hnung ri dawp khawp in min chum leh emaw a nia nga mahse Alvin ka hmuh hmasak ber ni atang khan ka vei em em a, ka mitthla ah hian a cham reng.

 

                                Mizoram ah kan chuang chhuak khat ang reng a, kum1dan ah te kan chuang chhuak thin a, bak ah kan awmna lai Saket ah hian ka kawm rualpui Mizo an lo tam em em lo bawk nen, Mizo mipa ka rualpui ang phei chu han star  hi ka nei ngai lem lo. Ka nu leh pa hian a theih hram chuan college tal ka rah hma chu mipa lam buaipui lo tur hian min hrilh ve thin a, ka duhzawng ka la tawn loh vang te pawh a niang, an thu ka zawm thei khawp mai.

 

                   Alvin hi mizo mipa ah chuan a lian pawl tak 5’9, Vun rawng ngo lam, ngo hluak si lo, Cher lam pang, cher chhe zawr ni silo, a taksa a in phut mawi tawk, a khabe hmul tlem a zuah a, chung te chuan a ti lang pa leh zual, a hnar ngul sang vah, mit khur thuk lam pang, a sam kawng lutuk silo, buk lutuk silo, a hawi her engkim confi lutuk leh ngeng zet mai te mahse tu pawi mah sawi chuang lem lo, a ngen zia ngaihtuah ah zaidam ru phian si te  chuan min hneh em em a, a zun ah hian ka uai thlawt a ni.

 

                               Ka in ngaihbel vang nge pawh ka hrelo, min en duh ve riau thin hian ka hre thin, thla4 lai kan kal tawh hnu ah pawh, vawi khat pawh kan la in be lo, ka lehkha zir thleng hian a ti buai, ka mitthla ah hian a mitmeng fiah kak leh fim tak mai, a khabe kual mawi tak leh a nuih zawng a, a vei nuih deuh sak thin te kha, Lalpa hetiang em em a Mipa ka thinlung min hneh tu hi an awm thei tawh lo ang, Break hlek a phone a khawih reng te hian, ka lo thik ve em em a, Lucy te hi ka thik dawn dawn thin.

 

                      Zan ah lehkha ka han zir dawn a, a hmel hlir ka mitthla ah cham reng a, Internal exam hnai tawh si nen, keimah hi ka in thunun thei lo hi ka mangang tawh zawk. Lehkha hi ka thiam  thei ve a,  kan school kal thin lai pawn class ah pakhatna emaw pahnihna emaw ka ni deuh char char thin, lehkha zir bak han tih tur em em kan nei ngailo bawk nen, lehkha ka zir nasa ve bawk em a ni, Room ah hi chuan ka in khung zantin ve tak na in, a zir lam erawh ka harsat viau thung.

 

                   Mazualteii dam that loh avangin Harsh nen kan pahnih te chauhin vawiin chu kan kal a, Lunch break alo nih chuan Canteen lam ah kan tiffin kengin kan phei a, NE mi tho, kan senior, SU a ni nghe nghe, chu mi chuan tlang mi hmel ka put ve vang nge ka hrelo a, ka tiffin ka phawrh chiah chu ka bul ah rawn thu in, enge ka pai tih min rawn zawt a, tha tak in ka sawi ve mai a, Vairam a khawsa leh seilian kan nih vangin ei leh in ah hian kan chhungkua hi kan buai lo ve a, In lam ah NE chawhmeh kan ei a, pawn lam ah Roti, Parata etc tih vel kan ei leh mai a.

 

                “NE mi i ni lo em ni?” ka tiffin ka phawrh pah a a rawn tih chuan “Ni e” tiin ka chhang ve mai a, “engvang a Mayang (Vai ho hi Mayang kan ti mai thin) ho chaw pai nge I nih, NE ei leh in I zahpui a mi?” a zawhna chu mak ka ti lutuk chuan chhan ngaihna ka hrelo ka ngawi deuh reng a, Harsh Punjabi thin a thawk leh ang tih ka hlau ru khawp mai, a ni hi hnam huaisen,ama mimal bik hi thinchhe zet leh hmeichhe thlavang hauh ti na zet a bikin keimah hi farnu ang a min en avang hian ka lak ah hi chuan a thikthu hi a pe chhe ve ngang ngang zel a nia.

 

                  Harsh chu a thutna tanga rawn thovin, “Unuaupa, harsatna I nei em ni?” zaidam tak mahse a lawm miahlo tih chu tu tan pawh hai rual a ni lo, a kut ah ka lo tham deuh sawk a, “Buaina ka neilo, NE mi I nih ve loh chuan lo ngawi mai la, I tan a tha zawk ang” a thinrim a in sum thei leh dawn loh tih amah pawhin a hria a ni ngei ang, ka tiffin, ka hawng tur chu a rawn khup nghal a, a keng a, kan table atang chuan min kai sawn a, thut na ruak lah chu kan hmu mai silo, mi lah chuan min en deuh thup lehnghal a, ka zak ve angreng, Mazualteii han tel ve selang chuan a zia tur hi nia, a ni thawveng, vei nei lo deuh.

 

             Thutna awl lo awm chhun ah chuan min thutpui rawk rawk a, Lucy leh Alvin leh an thian te pathum dang an lo thu a, Harsh lah hian ka star tih a hre der si lo, ka va han thu hreh ngawih ngawih tak e aw, tha deuh chuan thutna te chu an lo in siam tha mawlh mawlh hlawm a, ka ep chiah ah chuan Alvin chu a thu a, melh pawh ka melh ngamlo, ka kun reng a, Vai ho thil hre chak reng reng chuan kan buaina chu min han zawt a, engmah ka sawi lo, ka tiffin ka phawrh a, ka ei mial  mial a, Harsh chuan thil awmzia sawi pah chuan a tiffin chu a phawrh zui ve nghal a, midang an tawng sap sap lai chuan Alvin erawh a tawnglo.

 

                  Ka hawi chhuak dek dek a, na zet leh uluk zet hian min lo en a, ka thil ei ka va phuh chiang tak, Lucy ka bula thu in tui minlo pe vat a, a  nui suk lehnghal, ka ei tui teh nek lo e a, kan tiffin te chu min eipui ve tliar tliar hlawm a, kan hming min zawh lai te chuan Harsh chhan atan ka lo ti nge ka hming leh veng sawi na chang pawh chu ka hre chuang lo a, ka ngawi reng a, Harsh chuan “Arelia nih hi, kan veng, Saket ah kan thenawm ah an awm” a tih chuan ka harh zawk, mawl hi ka va han inti tak, hmeichhe confi tak ni ve thin kha tun ah chuan Ek mai ka ni.

 

           Eng hnam nge ka ni tih Mizotawng ngei a Lucy in min zawh chuan nui sang chung hian “Mizo” ka van han chhang bung thei tak, mahse chhan sei vak ngaihna ka hre chuang silo, “Tha lutuk, ka ring reng a ni mahse I vun kha a nalh mah mah” nui sak pah a min tih chuan Alvin chu ka va melh zawk a, a thil ei lai hmawm pah chuan a vei nuih leh sak a, “Zan in ah ka in luah ah birthday party kan nei dawn a, inlo tel ve thei a ngem?” ka rilru a lang hmasa ber chu Alvin hi a kal ve dawn em? Mahse ka sawi chhuak lo.

 

                    Harsh chuan lo chhangin “ kan en ang chu, Arelia a chhuah theih phawt chuan kei te chu chiang sa” kan zavai chuan kan nui vek a mahse Alvin erawh a nui tawh lo, thinrim hmel erawh a pu hran lem lo, Friday tlai a ni bawk a, last period kan nei lo bawk a "Mall ah  leng kual mai mai ang" ka tih chuan a peihlo ngang mai, Pawisa neilo a Mall kal hi a peih ve lo, kei erawh tupawh in min sawm se ka peih reng thung, nuam ka ti ve hrim hrim. 

 

                    “Min treat tal ang che” a tih chuan rum fahran a melh pahin “khawi a pawisa nge ka neih anga, in con tal ang” KFC ah kan lut a, a kal peih lo berin a chah hnem leh ber, kan pawisa neihin a daihlo, ava han zahthlak tak, Ka pa ka call nghal,kan laklawk lutuk thu ka hrilh chuan nui deuh huk pahin ka account ah pawisa a rawn transfer nghal a. “ I kal peihlo a ni lawm ni? Enge pawisa daihlo thleng thleng I chah leh si” ka tih chuan Tray chawi vut pah chuan “kal tak ro ro ah chuan kan ei tawk mai niang chu”

                  “Vawiin khan thil diklo a awm em ni? I zak viau em, I rilru na em, table danga kan thut thleng khan I tawng tawh silo a, naktuk ah ka hnek dawn a mi” a tih chuan ka nuih a za angreng nui sak pahin “chutiang pawh nilo, tukin tang Mazualteii kal loh vang niang ka mood off mai mai lawm” a ni pawh chuan min zawh chhunzawm tawh chuang lo, Ke in kan in zui hawng a, kan in hi Main road hnaih zawk a awm a nih vangin, kan in ah kan lut kawi leh hmasa a. Haw kawng tluan a zanin birthday party a sawi lo kha ka ngei ru viau, a sawi chhuak tu nih ka hreh ve khanglang bawk si.

 

           Ka nu in Juice leh Snacks min lo chhawp a, in thlak pawh in thlak lo chuan kan han ei leh nghal a, Tleirawl ei theih lai a ni bawk a, thil ei zo chiah a haw kan ni chung si khan ka Nu min chhawp ang ang chu kan ei zo leh vek a, kei hi ei ka theih teh reng nen, ka engah hian nge maw a kal tehreng ni, ka thau ve thei ngai hauhlo, Harsh lah chuti chiah, Mazualteii erawh keimahni letling chiah a ni thung, thil tlem te pawh ei se, engpawh hi a ngeih a niang, a thau mum kung reng mai a, Cher chhe lutuk chu ka ni lo na in, ka thil ei ngaihtuah chuan ka thau lo ve thlawt.

 

 

                    Harsh haw tur pawn a ka thlah chuan “Zan in chu kal ve ila, puitling te kan ni ve tawh a” ka nuih a za, college kan kal hi puitling hi a inti mai mai khawp a, mahse hnamdang hi chu keini tlang mi ai chuan puitlin chu an puitling zawk daih, “ka sawi ngam lo” ka tih chuan “hmmm nangpawh I kal ve chak tho tih ka hria nia aw’ tih pah chuan In ah a rawn lut leh a, a vawi khat nan dawt kan nu leh pa kan hrilh ta “Aunty ka cousin Dehradun atangin a rawn zin a, zan ah va kal lawk ka duh a, Arelia hi ka hruai thei a ngem?”

 

            Dawt sawi leh Party tih vel kan chin loh avang hian chhungte pawh hian min ring ve khawp mai a, “A pa kha dil ula, a phal te chuan a ni mai lawm” kan in melh a, khatiang em em a dawt chiang kha a sawi ka ring miahlo nia “In rei a ngem” ka Pa in a rawn tih chuan “rei lem lo ang” an phal dawn niin a lang ava nuam tak mahse dawt hmanga chhuak tur kan nih vang chuan hreawm chu ka ti ru deuh “Thlah in ngai a ngem” a rawn tih chiah chuan rang lutuk leh rual fahran hian “Ngai lo e” kan ti rual thawt a, Ka nu leh pa pawh an rawn hawi rual thawt mai lawm.

 

               Dinner dar8 ah kan ei a, eng kawr nge ka hak ang, mi party a kal tur chu an nalh dawn hlawm si mahse nalh deuh a ka chhuah chuan chhungten min rinhleh ka hlau ve tho bawk si, Dress hak ka duh ve ngei bawk si, a cousin in a kal mai mai tur Dress han hak chu, Harsh ka text nghal “enge ka hak dawn” ka rin ang ngeiin “ka hre bik lo, keipawh enge ka hak dawn ka hrelo” Ka va call nghal a “ I Tshirt hmanni a kan lei thar a dum kha ha la, I kekawr bul I u rawn thawn che kha ha la, Sneakers I duh ber bun tawp rawh” ka tih chuan “Yes, tha dawn lutuk, pheikhawk thar ka nei bawk a”

 

                  Fapa naupang ber a ni bawk a, a unau te an puitling vek tawh bawk a, Apa hi Army Major pension a nia, an harsa lovin an duat ve sia thil thar hi kei aiin a nei zing zawk, dar 8:30 vel ah min rawn lam phei a, a pa Bullet a rawn la chhuak a, A chhungte bul ah ka cousin lo kal tlawh tur angin a in sawi thung a, kei hak tur ah ka la buai thung, ka room ah ka nu a rawn lut a “ Mate, Harsh pawh a lo thleng tawh a nia, I inpeih dawn tawh em”?

                 Khum a ka thu min hmuh chuan “khu Harsh lah a in ti nalh ang reng sia, ti khan mi I kal dawn” a tih chuan ka phu deuh zuk a, “hak tur pawh ka hrelo” ka tih chuan nui sung pah hian “ A cousin hmu mai mai tur in ni lawm ni” tih pah chuan ka thawm hnaw bawm chu a han hawng a, kan bazar hnu hnun ber a min leisak, Jeans ka mal chanve khurh  awrh a chhing leh Top White color chu a rawn phawrh a, “heng te hi ha la, sandal kha bun la a ni mai a lawm” tih pah chuan khum ah chuan a rawn theh phei a, midang engtin nge an inthuam ang, enge an hak ang tih mawlh chu keiin ka lo ngaihtuah a, Ka nu leh pa hi thawmhnaw ah leh thil engkim ah hian an strict hran lo, thil pawi tak a thleng dawn te nih loh chuan engmah hi an sawisel lem lo.

 

                    In hnuai ka chhuk chuan Harsh chu a lo nui deuh ruh ruh a, Ka pa In “dar 10:30Pm vel ah chuan rawn haw hman tum ula, rei lutuk lo ula” a tih chuan ka aw liam ve mai a, bag chhing te ka ak a, kan in phur chhuak chu Balcony tang ka nu in minlo thlir reng a, dawt hmanga ka chhuah vawi1 na a nia, hreawm ka ti rilru khawp mai chutih rualin Alvin hmuh erawh ka chak tak zet.

 

            Lucy in luah kan thlen chuan mi an lo la awm mang lo, kan class kalpui 3, Harsh leh Kei kan ni mai a, a rukin Alvin ka zawng a, minutes 15 vel kan thut pawh a alo la lan ve theih loh vang chuan ka mood a uih tawh khawp mai, ka lo kal ta kher kher chu ka in chhir ru khawp mai, mahse Doorbell a rawn ri a, kawngka lam chu ka melh rang ngang mai, Baniyan dum leh kekawr bul grey ha in a rawn lut a, lukhum a rawn khum bawk a, Lalpa leh nidang zawng aiin ka hmu tha leh zual.

 

                  Kei hi ka tet lai atanga lam hi ngaina ka nia, dance class te pawh kal ve zak zak thin ka nia, music a rik tawh hi chuan ka thu mai mai thei thin lo, Harsh nen hian Drinks lam kan ti ve lem lo a, kan in tur Juice te a hran an han lei leh a, mahse mipa na na na chu Beer chu a han hum ve a, kei erawh In ve a phal lo thung, amah pawh in a in reng sia, mai mai hian a. Music nen kan ri ta dup dup mai, "Tequila shot ang u le" an han tia, enge a nih hre ve lo chuan ka ban ve ringawt a Alvin chuan min rawn nuih suk a, karei ka han lem chu ka hrawk hi a alh dawn in ka hria, ka uak tuarh a, an lo nui thaw hlawm a, rang zet in Nimbu Alvin an min rawn pe a ka seh nghal buan buan a.

 

            Ka hnung a chul pahin “ I zia mai ang, in belh tawh lo la” a rawn tia, music nen kei ka lo lam tui leh fal bik sana reng ka lo bih tawh lo. Harsh lah alo kai ve ang reng tawh khawp mai a, amah chiah hi Vai awm chhun a nia,a bak chu tlangmi vek kan nia, an bawl pah a kei leh Lucy chu kan lam deuh char char hi a ni mai, Lucy-in lam pah a Beer min rawn pek chuan tui ti lo chung chung chuan In lak changkan nan tiin ka han lem lui ve zel a, a boruak nen, keini pahnih in ngai lo ta na na na chu kan rui ang reng khawp mai a, ka la lam tui em vang chuan ka rui tih pawh ka in hre lo zawk. Dar12 a rawn rik chuan “Happy Birhtday Lucy” tiin kan zai deuh thap thap a.

 

                      Chaw kan ei kham a, hmun kan tih fai meuh chuan ka lam nasa nen, ka thil in nen ka zawi ang reng fu mai. Sofa ah chuan ka thu hnawk a, a nghen chhan chu ka ngheng a ka mut a chhuak, ka lu a hai riai riai, ka rilru erawh a fim vek thung, Alvin chu ka bul ah a rawn thu thla a, “In lo kal ve tak tak pawh ka ring lova, inpa chu saw a rui tawh khawp mai” In pa a han ti chu mak ka ti, pawr lutuk hian “ka bialpa a nilo e aw, khanglang che chuan” ti pah chuan ka thu ngil awt a. Nui sang chung hian “ I bialpa pawh ka tih loh kha, In pa ka ti mai lawm”

 

                            Ka bag nghawr der der chu ka han khawih a, ka phone lo niin ka han phawrh chu miscall 50 chuang a lo awm mawle, ka meng kawk a, Sana ka en nghal a, dar 1 alo pel tawh, Lalpa engtin nge ka tih dawn, pai deuh tuang tuang chung chuan Harsh lam ah ka phei , a ni lah alo la tawng duh ngang mai, ka biak pawh chu a ngaihsak em em lo, ka chhungte mangan dan tur ka ngaihtuah a, music kan off fel tawh a, ring tak tak a an ti ti tih mai loh chu thawm a awm lo, balcony ah ka chhuak phei a, ka nu call ka tum lai chuan, ka phone chu min rawn pawh thlak sak a, “tunah I chhungte call ta la, enge I sawi ang” a Beer cane hum chu ka melh ran a, amah pawh ka melh lo, “ka hrelo, mahse min ngaihtuah dawn lutuk” ka hlauthawn zia chu a hrethiam ve nge ni tehreng.

 

                       “Kan lo thlah ang che u, In pa saw va ko rawh” nui sak chung a a tih chuan ka run em em a, “I mak lutuk kan pa  a ni lo, ka unaupa a nih saw” ka tih chuan “Wow, unaupa tha tak a nih saw” min nuih pah chuan in chhung lam ah a lut a, a hnung ah ka zui lut ve nghal a, “Harsh, hawng ang” ka tih chuan “Chup (ngawi rawh) ala nuam” tih pah chuan a nui vak vak a, midang lah chuan a ni rui chu an lo lawm an nuih leh chhawng, kan thawm a tha ngang mai.

 

                     “I duh leh awm rawh” tih pah chuan kawngka lam chu ka pan deuh vawk vawk a, a ngai ngam leh chiah lo a nia nge, pai deuh chawn chawn pah hian min rawn zui a, “Tony, va thlah lawk mai ang” Alvin-an a thianpa bula a tih chuan midang chuan min mangtha sap sap a, Bike khalh thei chi zia zang pawh a ni tawhlo, Tony chuan Harsh Bullet chu a khalh a, a hnung ah ngawi rengin a chuang a, kei leh Alvin chu Harley Davidson ah chuan kan in phur thung a.

 

            Kan party na hmun Malviya Nagar leh kan in awmna hi veng in thenawm chiah a nia, zan rei ah phei chuan tlan chak phei chuan minutes 20 pawh a ni lo, “ding teh ding teh” a hnung ah chuan ka sawih deuh nawk nawk a, kawng sir ah chuan a ding ve mai a, “ka chhungte bul ah enge ka sawi ang” ka tih chuan a rawn leh hawi a mit de sawr sawr a min rawn melh pah chuan “ ka hre bik lo” a ti hul hak a.