ARELIA-10

                                Ka pa chuan ka phone chu a la nghal a, a han chhiar chiang leh a Pu Davida chu zan tlai tawh e ti lo chuan a call nghal a, a naute nen an lo kal nghal tur thu a rawn sawi zawm ve zat bawk a. Ka nu chuan “he thil hi kan chhuai chhuah hma chuan Mateii te chungchang pawh engmah tihfel ka duhlo a nia” ka pa pawh chuan a lu a lo bu nghauh a.

 

                           Zing dar1 vel ah Pu David leh anau te pathum chu an rawn thleng ve nghal a, Harsh hnen a msg an thawn thu te chu ka sawi ve zung zung a. Min rawn text na number chu an la a, Pu David chuan min thlamuan pah chuan “He thil hi Alvin bo nen khan in zawmna a nei ngei ang, ka tiam ang che u, tun tum ah hian kan rek chhuak ngei ang, nangni pawh thlamuang takin awm ula, in duh a nih chuan guard pawh ka pe thei che u a nia”

 

                       Ka pa chuan lo chhang ve nghal zat in “Aaa chutiang em em chu a ngailo ang, ni e min chhui chhuah sak ngei ula kan ti tak zet, rilru thlamuang tak hian ka nupui leh ka fate aaa kei ngei pawh hi kan awm thei dawn hauh lo a. Khuanu’n zah a ngai anga, eng em kan chung ah a thleng lovang, harsatna kan tawk a nih erawh chuan kan rawn hrilh vat ang che u” tiin kan in thlahliam ta hlawm a.

 

                   Ka nu leh pa chuan ka room lam ah min rawn zui chho ve nghal a, “Nu, Alvin neih ka hrehna tam tak chu ka hrilh tawh che u a, ka sawi loh zing ah khan tuna thil thleng hi a tel a sin, amah ru bo tu te kha kan man chhuak a nih loh chuan thlamuang tak hian ka awm thei lovang, keini chhungkua hian nge hmelma nei, anmahni lam tih hi ka hrethiam theilo a ni, adopt ka nih hi miin hre mahse pawi tihna ka neilo mahse sawi chhuah kher hi ka duhlo a ni”

 

                Ka nu chuan min hrethiam tak chuan min kuah a ka chhip ah chuan a rawn fawp vang vang a. Ka pa chuan “hetian dinhmun lai hi kan thleng tawh a, Alvin hi I hrilh tawh reng reng em?” a rawn tih chuan ka pa pawh en chuang lo chuan ka lu ka thing mat mat a. “Naktuk lam ah khawvar ah hrilh la tha ka va ti em? chhungkua din hial te kan tum a nih chuan a hriat ve ngei hi a tul ka ti tlat, nakin zel ah mi ka atangin lo hre ta se, ngaihdan diklo te pawh a nei thei a”

 

                     Ka nu pawh chuan ka Pa ngaihdan chu a tawmpui tih hriat tak hian alo tui hnih ve nghal zat bawk a. Zan kan mengrei a, mut alo suak bak nen zing ah chuan lu na burin ka thova, ka pa pawh hna a chawl ta ringawt a, ka nu nen eirawng kan bawl lai chuan Alvin nu chuan min rawn call a, ka be peihlo hle mai, mahse ka la ta hram a “Arelia, in tho tawh maw?” a thawven ngai chuan ala thawveng reng tih hriat tak hian a rawn ti leh lawng lawng a.

 

                    “Aw tho tawh e, enge ni ta?” ka tih chuan vawiin ah chhuahna tur in nei em” a rawn ti zawm zat a, “neih pawh ka hre lem lo, ngatinge?” ka tih chuan a nui deuh hak hak a “chhun dar 11 vel ah in ah in lo awm thei a ngem le?” a tih chuan “Aww thei ang, tumah vawiin chu kan chhuak lovang, kan chhuak nih pawhin tlai bazar tur chauh in kan chhuak ang” ka tih chuan “Awle, a that hlauh chu, parcel alo thleng dawn a, nangmahni ngei in ah lo awm ula ka duh deuh mawle” a tih chuan keipawh chuan tha deuh chuan ka aw ve mai a.

 

                     Ka nu bul ah chuan “Alvin nu in Parcel a rawn thawn a, in a awm turin min rawn ti a” ka tih chuan min siai zeuh pah chuan “a mo chei nghal der tawh che ni maw?” ka nuih pawh a za ve lem lo, kha thil kha kan chhui chhuah hma chuan inneih lam chu ngaihtuah ka tum lo hrim hrim. Dar10 vel ah chuan chaw kan ei a, zing lam ah hi chuan tumah hian thil hi kan ei rual ngailo tluk a nia, Sunday zing tih lo ah chuan tukin chu kan kim ve thap mai.

 

                   Ka nu in Aldo a bual lai chuan door bell  a rawn ri a, ka pa chuan a hawng a, an ri chul a, a aw atang chuan Alvin nu a ni “Arelia khan parcel an rawn thawn a ti mai sia, nangmahni hi ni maw kan parcel dawn tur chu” room atang chuan ka chhuak nghal a, Alvin leh anu chu living room ah chuan anlo thu a, Alvin-an min hmuh chuan a rawn nui deuh sak a, ka beisei lo lutuk leh hamhaih lutuk chuan nuih let na chang pawh ka hrelo.

 

                  “Nizan dar 8 khan kan rawn thleng a, rawn surprise che u kan tum a, in lo chhuak daih ang tih kan hlau sia, Aldo nu hnen ah khan dawt kan sawi ta ringawt a nihkha, ngatinge office I kal na nge” a tih zawm zat a, tawng hi chu a va han tawng duh ve chiang tak, Lucy in nuthlawi nasa, zah pah neilo  a tih thin zawng zawng te hi a dik hluah hluah, ngati nge ka mil loh em em na chhan pawh hi a.

 

                    Ka nu chuan Aldo chu a rawn pawm chhuak a, a Pi chu a hmu vak ngailo nen a ban pawh chuan a duh mailo mahse Apa erawh ala hre ve aniang, a pa in a lak a tum chuan a ban ve nghal zat a, “ka tupa neih chhun hian min duhlo lutuk a, tiang te chu a dik dawn lo, awmkhawm vat ila a tha ang” fiamthu ti tak hian a tih zawm nghal a. Lehlam hawi pah chuan ka lo ner sak a.

 

                    Breakfast an ei tawh leh tawh loh ka nu in a zawh chuan an ei kham fel an rawn kal nghal thu chuan a chhang a, Hector, Alvin leh Aldo te erawh  balcony lam ah an awm thung a. Ka pa chuan “in lo kal hlauh chu a tih zia hle mai hei thil pawimawh tak sawi ho tur kan nei tlat mai” a tih chuan Alvin nu chuan a thutna chu  a siam tha a, ka nu leh pa lam chu a hawi a.

 

                Ka pa chuan Harsh message dawn atanga nizan thleng a kan chhungkaw thil tawn chu a sawi zung zung a, mit khap lek lo chuan ka pa chu a melh reng a. Ka pa chuan “Arelia pawh hian adopt a nih thu hi tumah a hrilh lo a, keini lah in kan sawi chhuak hek lo mahse he thil hre tu hi chu nangmahni chhungkaw hmelma nilovin kan chhungkua hian hmelma kan lo nei reng niin nizan khan ka ngaihtuah a.”

 

                              Ka nu chuan “Palai hmel hial te kan lo hmuh tak si ah chuan kan chhungkaw dinhmun diktak hi in hriat a tha kan  ti a, engmah zep neih kan tum lo mahse hemi avang hian kan fanu hi in en hran kan phal hauhlo a,kan fanu atan kan la tawh a, Hector kan fa hrin ngei nen pawh hian danglamna awmlo khawp in kan hmangaih a, kan ta, kan fanu liau liau a ni a, ka hrin loh avang hian a nu ka nihna a bo lova, hemi avanga nakin zel a harsatna a awm dawn a nih chuan tun ah hian I rilru tlang takin min hrilh ve nghal la kan duh tak zet a ni”

 

                      Alvin nu chu a bu nghauh ngauh a, “he thil hi ka hriatna a rei tawh a mahse ka fapa bul ah pawh ka sawi chhuak lo” ka pa ho chuan kan in melh haw hlawm a. “Fa lak a ni emaw, in hrin emaw pawh nise ka tan chuan engmah danglamna a awm lova, in hmangaih zia kei ngei pawhin ka hria a, ka hmuhpui bawk che u a, ka fapa hmangaih ber chu eng ang mi pawh nise keichuan hmangaih tak a pawm mai hi ka tih tur a ni”

 

                   Ka rin loh lutuk thu a rawn sawi chhuak chu  ka din ngai chuan ka ding reng a, Hector an “A u rawn kal ve rawh, U Alvin an a ti” a rawn tih chuan balcony lam ah chuan ka chhuak ve nghal a. Ka nu leh pa te nen a an in biak zawm dan erawh ka hre tawhlo. Aldo mut chhuak chu a te a te tawh a, Alvin chuan awih mut a lo tum ve ngial a mahse he nau hi chu a khirh lutuk a, ka nu emaw kei emaw nih loh chuan midang hian an awi mu mai mai thei lo.

 

                      A in bual zo hnute ka la pe bawk silo nen chuan, thutphah ah chuan ka thu a, hnute chu ka pe nghal a, Alvin chu kan bul ah a rawn thu thla a, a fapa hnute hne lai chu a thlir reng a chumi pah chuan a fapa kut tereuh te chu  a vuan a. Hector chu a thian ten an rawn koh avang chuan ka nu hnen ah len dilin pawn lam ah chuan a tlan chhuak zui nghal a.

 

              “Alvin hrilh tur che ka nei” amah pawh ka en lo, ka fapa kuah chung chuan ka hma zawn chu ka thlir ngar a. “Thu lawmawm lam a nih ka beisei” a rawn nui deuh hak a, kei erawh ka nuih aza ve lo. Alvin bo atang khan depression ka neih phah a, a hma a mi him ve thei tak ni thin kha ka ni tawhlo, panic attack te ka nei a, enge maw hlek ah hian hlauthawnna leh manganna hian min um zui nghal zel a, thil a eng zawng a thlir te hi ka harsat ngawih ngawih tawh, a tum chu ka tum ve a lawm mahse ka la fight char char a nih hi.

 

                          Ka thusawi tur chu nghahhleh hmel zet hian min en kiau a, “Alvin, adopt ka nia, ka nu leh pa fa hrin hi ka nilo” mak ti awm pawhin a awm lo chu keimah zawk chuan mak ka ti zawk “I lo hre sa ve tho a mi a?” ka tih chuan a lu a thing nar nar a, “Tinge mak iva ti lo ve a” ka tih leh chuan “enge a pawina, ka tan danglamna a awm lo” an nufa thil thlir dan chu ka awt letling zawk, miin hre lo mahse ka nu leh pa fa tak ka ni lo tih ka inhriat na hian in kiltawihna min pe nasa thin mahse ka nu leh pa hmangaihna ka dawn ang hi tu fa mah hian an dawn bik ka ringlo.

 

                      Ka lam hawi chuan a rawn in siam rem nghal vat a, ka mit ah tak min en chung chuan “Arelia, I nu leh pa diktak hriat hi ka tan a pawimawh lo, eng ang chhungkua a mi pawh lo nila maw pawi tihna ka neilo, fa lak I ni emaw, sawn I ni emaw, engpawh lo ni la, ka tan chuan danglamna a awm lo, khawvel a ka hmangaih ber leh ka fapa nu I ni miau a engmah hian min then hran ka duhlo, ka thlen tir ngai hek lo ang”

 

                  Harsh message dawn leh nizan a ka thil dawn te chu ka hrilh a, ani pawh chuan mak a ti ve hle tih a hriat. “Pu David khan I bo na nen in zawmna a neih a ring a,ka pa thianpa a nihna ang in kan chhui chhuah hma chu inneih lam pawh sawn emaw, ti rih lo turin min chah a” A lu a bu nghauh ngauh a “Mazualteii hi I ringhlel ve em” a rawn ti ta thut a, ka ham haih zawk, ka nui chhuak deuh hak a “teuhlo lutuk, mahse Aldo birthday zan a, a thiannu ni a a sawi nen an in fawp ka hmuh kha chuan mak ka ti lutuk ringawt”

 

                      “Maw?” a rawn ti deuh thawt a, a au ring bawk nen Aldo pawh a phu zawk a “Awww, tun thleng hian engmah khami chanchin kha min hrilh lo, nitin deuh thaw chu minla be ziah a, mahse khanu nen an awm dan kha chu engmah a sawi chhuak ngailo, a sawi duhlo a nih chuan ka tia, hria ang pawh in ka awm bik lo”

 

                      Alvin nu chu balcony ah chuan a rawn chhuak a “A mut tawh chuan ka lo paw ve dawn a mi?” a inthlahrun hmel viau “A mu rei thei lutuk a, khum ah hian kan mut mai zel a” ka tih chuan “ka tu neih chhun leh hmuh hmasak ber a nia, a mut theih chen chen chu ka paw ve ang chu le, ka in fit a lawm” a kun zui nghal a, kan in hlan fel a, inchhung ah chuan kan in zui lut hlawm a.   

 

             Alvin nu chuan nau awih deuh darh darh pah chuan “Arelia msg dawn chungchang ah khan nangmahni lam nilovin keimahni lam kan ni tih ka chiang” Kan en hu hlawm a, Alvin chu a rawn tawng chhuak ve nghal a “Ka nu hmelma I nei a maw?” thinrim lam hmel a pu mah zawk “kei chuan hmelma angin engtik lai mahin ka en ngailo, vawiin ni thleng hian” A fapa bul a thut thlak pah chuan a ti zuai deuh raih a.

 

              “Anih si chuan enge a awmzia” dawhthei lo tih hriat zet hian a Nu chu a melh run a. “Chhungkua a in siam tum kan nia, Arelia te chhungkua pawh mihrang ah ka ngai lova, thil awmzia hi sawi tlang ve nghal law law ila a fuh ber” a rawn tih chuan Ka pa chuan “Eee khai, keini lam hriat chi loh a awm a nih chuan, kan mitmei veng reng reng suh, sawi turin kan phut kher lo che a nia”

 

               “Ni love, ka sawi hi a tha zawk, a tawi zawng hlir in kan sawi a nge, Alvin pa nen kan inneih hian Mo hmasa ber ka nih piah lam ah nau ka lo pai sa ve bawk nen, duat pawh min duat ve khawp mai, chuan Alvin pian hian an tu hmuh vawi khat na a nih angina tupawh mai chu an lawm tak zet a ni, Alvin patea hian nupui a nei ve a, ka thiamloh a niang tiin vawi tam keimah pawh ka in en let thin mahni thiam lohna hi chu hmuh alo harsa ve bawk a”

 

                   Za vak lo hian a nui deuh sak a, a chhunzawm leh a “A patea nupui nen hian kan in kar a tha thei meuhlo a, fa hmasa a lo nei a, an inneih atanga thla3 na vel ah an rawn hruai hawng a hmeichhe naupang kum3 mi bawr vel hi a ni, kei hmeichhe naupang lawm ta ngang chuan ka chhawn chhaih peih em em a, mi pawh a ngaina ve khawp mai, kei hi ka mizia hi mi thawveng lutuk leh thenrual pawl nasa mi ka nia, ka pasal neih hnu pawh hian ka thiante mipa hi ka kawm tam zawk a, in ah an rawn leng lut awl lo a, ka pasal chhungte lak ah inthlahrun chang pawh ka nghah ve khawp mai”

 

                         “Lucy hi Nu Mamuani fa bik maw?” Alvin nen chuan mak kan ti ngang mai, Alvin pawh hian alo hre reng reng lo a nih chu mawle. A nu chu a bu deuh nghat a, ka thianpa ka best ni bawk Roger nen phei chuan kan la in kawm nasa zual a, Fanu mal ka lo ni nen, ka Pa hian ka nulat lai khan dawr 2 min hawn sak a,kan lun ve khawp mai, chuan Ramhlun ah sawn in ding lai kan inneih gift ah min pe bawk a. Roger te chhung hi anu leh pa boral hnu khan an mahni hian hna an lo nei bik lo nen an lo harsa chho ve nen man mang lovin ka in chu ka luah tir a”

 

                     “Thian tha kan in puih ve theihna a nih hi tiin, ka dawr ah chuan Roger leh a  farnu nula senior ve tawh hi ka chhawr ve nghal bawk a,  dawr thil ah vawi tam thian kan nih bak ah kan in bia a, a nau nen emaw amah nen pawh kan in zui nasa, tlai khat ka hawng chu Alvin pa chhungte hi an lo awm khawm thap a,kei lah engmah hre lo leh thawveng em em chuan enge in tih teh thup a, ka ti chu Alvin pa rawn ding chhuak hian tlu tawp khawp in min beng a nih chu”

 

                       “A ngaihna hre lo lutuk chuan ka tho chhuak a, engmah pawh sawi zui tawhlo chuan Ui re chhuah in min chhuah tir a” a sawi zawng pawh chuan a thinrim in a rilru ala na hle tih a hmui hnuai lam a seh dan ah chuan a hriat. “Alvin kum3 mi lek ala nia, chhuahpui ka tum lah in min dang tlat a, an phal silo, khawvel hian uire pawh min ti se ka pasal hian thil awmzia pawh hrelo leh min zawt miahlo chuan hetiang hi a tih ka ringlo, finfiah hmasa lo chuan”

 

                 “Ka chhuah pah chuan, ka uire loh zia chu inla hria ang” tih pah chuan ka hak lain en chuan ka chhuak a, ka uire lo miau a, ka rilru kha na hle mahse ka dikna keimah ngeiin ka hriat chian em avang in ka inti huaisen lui hram hram a, Alvin hi vawi tam kan in chuh a, kan bihruk pui a, a tawp ah court in ka enkawl turin thu a ti tlu ta a”

 

                             Kan inthen atanga kum khat lek ah Alvin pa zawk hian nupui dang a nei a, nufel leh nu tha tak a nei erawh ka thinlung tak takin ka lawmpui a, mahse kan inkar a thu vai vir tu ber chu A pate nupui hi a ni tih ka hre chhuak a, Mamuani thu vai vir vel dan Alvin pa in a hriatchhuah meuh chuan a tlai tawh si, vawi tam ngaihdam min dil a, mahse a rem tawhlo, nupui nei a ni tawh, ka ngaihdam thu ka sawi a mahse let leh tura min tih pawn, thinlung kehsawm vek a ka chhuahsan na in ah khan let leh ka tum ngailo”

 

                      Alvin chuan a melh ngai a melh tlawk tlawk a chet pawh  a che eihlo, keini chhung pawh sawi tur reng kan hrelo, “khami hnu atang khan vawi khat mah Alvin hi min chuh pui leh tawh lo, mahse a rawn ngaihven reng tho a, a nupuiin fa alo pai ve bawk nen ahma ang em kha chuan a rawn ngaihsak tawhlo a, ka tan pawh a thawven thlak huai zawk, A pate te chhungkua nen an boruak a thalo chho tan a, mahse tun hnu hi chuan Alvin pawh an tu hmasa ber a ni nen a mamawh leh duh engkim hi chu I he lovin an tih sak thin”

 

                    “Lucy hian Alvin rawn let leh hnu khan Arelia hi fa lak  a nih thu min lo hrilh daih tawh a, a nu ang mai rilru hi a rawn tleirawl chhoh khan a pu tih ka hrethiam, min ngaina der ve em em a, Alvin te nen an lo in kawm ve bawk nen keipawh hian ka ngaina lutuk mahse a rilru hi a kawi ve em tih ka hriat avang hian ka pawh tha ngamlo a ni, ka inleng neih te pawh ka pasal hlui nu leh pa te bul ah a thlen a, thu vaivir kual ber tu hi Lucy hi a ni”

 

                   Ka ngaihtuah let neuh neuh a, zan khat Mazualteii nen an rawn riah tum hian ka nu te Harsh te in ah Hector hovin an leng a, in chung a kan awm laiin inhnuai ah tui la turin a chhuk a, a rei tak em avang khan Mazualteii khan kawngkhar hawngin a zuk ko va, ka nu te room atanga a rawn chhuah thu Mazualteii khan min hrilh tak mahse a rawn chhoh chuan ka nu te tukverh a in khar loh thu leh a khar that thu kha a sawi tak a sin.

 

                        Ka nu chuan “Mateii pa enteh, ka ngaihtuah let a, I la hria em, tlai khat Sewan Bharti Adoption center atanga min lo call kha ? kha mi tlai khan Mateii kan lak a, documents pawimawh ho ka enfiah a ka phawrh bawk a, bak ah room ah khan phone ka hmang a, khata amah enkawl tu ber Pi Bharti damloh thu leh Arelia hmuh a duh thu a rawn sawi kha, kan fanu a ni tawh a, khawngaih in khami home nen a inzawmna neih tir ka duh tawhlo tiin ka lo chhang a, kan in biakna kha a hria a nih ngawt loh chuan kha bak kha engmah keima lam ah chuan han ngaihruat ngaihna ka hrelo”

 

                 Ka pa chuan “rinhleh  tur chu kan hre ta a, amaherawh chu kan rinhlelh avang hian  Lucy hi a ni ngei e tihna a ni lo a, Alvin leh Arelia pawh in fimkhur a tul hle a, mahse a hriat theih tur ang chuan In awm dan leh tawngkam ah lang lo se, bangbo lutuk a kan ar khawthim dai ngawt ai kha chuan a zia chu a zia hetia rinhlelh tur an awm tak ah chuan Pu Davida phone ila, hmalak dan tur sawi ho teh ang u”

 

                      Zan ah te chuan ka  ngaihtuah let char char a, Lucy khan Alvin nu a sawi dan zawng zawng te kha ka ngaihtuah let a, Alvin nu kha ka lo ngei ru ve em em zel a, mahse amah leh a nu vek hi maw buaina lo thlen tu chu, mihring hi ava han lo mak theih ngai ve le, tiang em em a rilru chhia hi a awm theih dawn em ni? Kha leh chen ka lo kawm ve tawh leh min ngaihsak em em tu kha a ni sia, rin har ka ti tak zet, a lehlam ah lah Nutling in khati khan thil a sawi a dawt muhlum chu a sawi hauh lo ang.

 

                   A uire thu leh, a uire na pa in a neih leh duhloh thu leh mipa tleirawl te te a kawp dan te kha min hrilh nasa mai si a, ka lawi na tur chhungkua teh hrep pawh chu a,, ngaihtuah thui peih tawhlo. Kan inneih lam tur pawh engmah sawi zawm a awm thei tawhlo a, kei lah hmangaih ber nei tur e ti lo chuan mahni in lum, nu leh pa leh unau ka han chhuahsan tur chu huphurh tak te a ka huphurh avang chuan engmah hma kan la chhunzawm theilo pawh chu ka lawm letling zawk in ka hria.

 

                  Number an chhui chhuah tawh thu Pu Davidan ka pa a rawn hrilh chuan kan phur tlang in kan thaw pawh ven thawkhat chuan a veng huai mai mahse, Delhi number a ni tlat a, Vaipa hming a awm a nih avang leh chu vaipa Sureh Kumar chuan a  hriat loh thu a sawi tlat mai bawk si, mahse misual te vanneih na hian tawp chin a nei ve ngei ani tih tichiang turin a tupa in a hming a SIm card a book thu chu a sawi ta.

 

                   An han chhui chiang zel a, kan lo rin lawk ang ngeiin Lucy thianpa thian ve leh chhawng alo ni a, ka thinrim lutuk hi awm ngaihna ka hrelo, Alvin te  nufa an hrilh chuan Mizoram lam a hma lo la tur chuan an in chah a, Alvin Nu te naupang ber hi Crime Branch a awmin a hotu pawl a ni bawk a. Alvin bo tum pawh khan a nu rawn buaipui tu ber a ni.  A farnu neih chhun uire chhuah a chhuah tir tu te chhungkua hia a tan chuan hmelma lian ber an ni tlat a, chutah Muanpuii fanu Lucy alo ni nen Alvin bo chungchang ah pawh in hnamhnawih na a neih a ring nghet bur.

 

                      Palai vawi 2 na an rawn kal leh chuan ka pa chuan “kan fanu te ang inlo nei ve duh chu kan lawm tak meuh a,mahse hei nangni lam pawh thil awmdan in hria anga, Alvin bo chungchang kha chhui mek a nia, a tawp kan thleng hnai tawh ni pawhin a lang a, engkim tawp fel se, a ni leh thla te chu kan ruat dawnnia” ti chuan Alvin palai te chu a thlah liam ta hlawm a.

 

                    Aldo pian hnu hian ka nu chhungte hian anla hmuh ve loh avang leh Krismas hman hrim hrim kan duh avangin Mizoram lam ah kan chuang chhuak a, Aizawl a cham khawmuan hi kan peihlo thin nen ka Putea chuan Lengpui Airport ah minlo hmuak a, Lunglei lam pan chuan kan tlan zui lehnghal a. Alvin nu pawhin zan khat tal riak tur a min ti lawm lawm chung a kan riak lo chua  a lungawi lo ve hle mahse, kan let leh lam a kan tlawh tur thu kan hrilh chuan a thinrim lutuk pawh a zia khawp mai.

 

           Demcember ni 24 chawhnu ah Ka Nu Puii (ka nu u) nen kan bazar lai chuan Alvin hian min rawn call a, ka buai deuh nen ka chhang mailo, min rawn text a haw kawng ah chuan phone chu ka phawrh a ka han en a “Arelia, kan hre chhuak tawh sin min ru bo tu kha” Ka phu deuh awrh, ka thiannu Mazualteii chu nilo hram se ka ti takzet, a chhan chu Alvin hian a ringhlel tlat a ni, khami ni khan amah ang a hmuh avang khan ka thiannu a nih vangin a sawi tha duhlo mahse a ringhlel a ni tih ka hre ve tho.

                   Call nghal rum rum ka duh viau a mahse, motor leh pawn lam thawm bengchheng nen in thlen hun a call chu ka ti ta zawk a, in kan luh rual rual chuan ka nu chuan “Mate, Alvin ru bo tu te kha an man tawh a sin” a lo ti ve nghal vat a, kan thil lei vel chu dining table ah chuan ka nghat nghal rawk rawk a, ka nu chu ka pan a, ka hre chak lutuk chu ka aw a lawi rut mai “Tu te nge?”

 

                  “Lucy” a ti tawi tak a, ka thiannu ngawih ngawih Mazualteii a nilo chu a misual ber ka hriat ai pawh chuan ka lawm zawk hian  ka hria. “engtin nge a tih theih, a unaupa a ni sia, Nu, in chiang chiah maw” ka tih leh chuan a lu a bu nghauh nghauh a. Room ah ka tlan chho a Alvin ka call nghal , a pick rang ngei mai “Alvin, Lucy a ni tak meuh em?” ka tih chuan a ni pawh chuan rin har a ti ve tih hriat zet hian ban deuh tak hian “aww ni e”

 

               “In rawn phei hun ah thu chiang chu kan sawi dawn nia, In masi boruak te ka ti chhe palh ang” keipawh chuan hriat chak viau mahila, a unau nu ang tak tak a alo neih ve in ti khawp a hreawm a tawrh tir kha chu a tan pawh ana dawn lutuk a, a sawi vak peih rihlo tih ka hrethiam mai, Krismas boruak pawh kan hmang nuam khawp mai. Aldo pawh in nuam a ti ve ngang mai, ka nu cousin te, Ka pu unau ti ila, aww ka nu te thlah ho chuan family picnic kan nei a, boruak a vawt lutuk lo Delhi lam ai chuan nuam tak a ni.

 

                    Aizawl kan phei chuan zan 3 vel Aizawl cham tum kan ni a, ka pa hian chhungte in vel a thlen hi a inthlahrun awm a tih vangin Hotel a book a mahse Alvin te nufa in an rem ti hlawl lo bawk nen chuan Alvin te in lam ah chuan kan phei ta nge nge a. Aizawl kan chhuah chhoh hmasak pawh khan an in tlawh na hun pawh ka neilo, an awmna lai te chu a nuam reuh thenawm te nen a in hnaih tawt lutuk in an awmlo a, Aizawl ho insak hi chu tukverh pawh hawn hleih theih loh hi a tam si a, nuam ka ti hlawl lo.

 

                  Chhawng 4 lai a nia, anni ground floor ah an awm a,a bak zawng midang an luah tir a, Aldo pawh a pa a hmu chu a rak ve ruai ruai a, mipa tih tak ah tawng hi a tum har khawp mai, Mama, Papa tih takngial pawh kum2 a pum tawh chung hian sawi pawh hi ala tumlo a nia, a tah chauh hian Ama a tia a bak chu ngawi reng hian a tla mual mual a, mi koh pawh hi a tum ngai lo, a tawng har tur chi te pawh a ni ve a niang.

 

                   Zanriah kan ei lai chuan Alvin nu chuan ti hian a sawi a “ Ka nau te leh Pu David te kha an in be zawm zel a, a hmawr bawk na chu Lucy a ni tih kan hre ta a, Lucy an dawp na vel pawh min ngaihthlak tir a” a tih chuan ka mak ti lutuk hi ka chaw lem te hi a sak vekin ka hria. Thleng kan seng zawh chuan ka nu ten nau an lo en bawk a, Alvin chuan a room ah min hruai a, thil awmzia chu ti hian a sawi zawm a “Arelia, ka awih theilo, tun thleng hian ka la ringlo, unau pianpui ka neih loh avangin ka unau nu tak tak ang ah ka ngai a sin”

 

                   A sawi zawng pawh chuan a thinrim leh rilru na lutuk chu a kut hi a hum ruh a, a kut ah chuan ka va vuan a, “Amak iti ve em, In in a kan lo kal tum a ka nu in Lucy hi ka patea fanu nilo vin a nupui fa bik a tih khan ka hre ve chiah a, chuti khawp chuan ka nu pawh hian an chhungkua, a nu a ni emaw, ka pa chhungte chanchin hi a chhe zawng hian vawiin ni thleng hian ala sawi lova, ka nu ka haw em em a, ka nu ka huat theihna tur khan thil kha a ti tam a sin”

 

                   Sawi mai tur ka hrelo, ka va kuah ringawt a, min kuah let ve chuang lo, a tawp ah chuan ka thiam ang tawk chuan ka han hnem ve a “Alvin, misual te vanneihna hian tawp chin a neilo a, ka nu in a sawi thin ang khan mihring hi dinhmun ngai reng ah kan ding bik lo a ti thin, rilru hreawm leh hah tak in, harsatna tam tak kan lo paltlang a mahse tun ah chuan kan tan ni a rawn eng ve tawh a, thil kal tawh chu theihnghilh ila, kan chhungkaw hmalam hun chauh ngaituah ang aw”

 

                      A biang tawn tawn a, chelh pah chuan ka han ti a, chutah zet chuan Alvin pawh chuan min rawn melh a, min kuah thlawp a, “Arelia, min nei duh tak meuh em? kan fapa vang mai mai a, inneih I ti a nih chuan chhungkaw hlim tak kan din thei dawn chuanglo” min ringlo pawh hi ka dem hauhlo, inneih an sawi atang khan ka hel nasa ve em a ni.

 

              “Alvin, neih che hi ka duhlo a nilo, hmeichhe tan chuan mahni in chhung chu kan hausa emaw rethei emaw damchhung a kalsan tur han nih meuh chuan pasal neih hi a chakawm loh a sin, ka nu leh pa min hmangaihna te,min duatna te hi ka la thlahlel ngawih ngawih a, ka hmangaih che a, ka engkim ka hlan che a, nangpawhin I hria, nangmah neih che a chhungkaw din hi ka duhlo a nilo, ka rilru la puitlin tawk lohna hian Pasal nei a chhungkua han din meuh tur chuan ka zuam lo mai chauh a ni”

 

                “Ka hrethiam a lawm, mahse mihring nihphung a ni miau a, I puitlin zia chu ka tello pawhin kan fapa I enkawl a” a sawi zawh hma chuan “Nilo, ka nu leh pa hi awmlo ta se, ka enkawl puitling lovang, ka nu leh pa hi ka tan chuan ka engkim an ni a sin” ka tih chuan “Ka hria a lawm, mahse engkawng ah pawh ka ring tawk che a lawm, I puitling lo ni a I inhriatna te khan I rilru puitlin zia a ti lang zawk a sin”

 

                  Kan awm lai ngei chuan Lucy nu chu rawn kal in ngaihdam a rawn dil nasa mai a, Jail a tang a nih chuan a nun a chhe vek ang, min khawngaih hram rawh u tiin tap chungin a ngen lawm lawm a, mahse Alvin hian a ngaidam theilo ka tih chuan ka tisual maithei mahse a thinlung erawh a dam lo a ni, Alvin chuan engpawh nise a tih chhan hi hriat ve ka duh a ka phu bawk,amah ka hmu phawt ang a tih avang chuan  kan pahnih chuan hmu tur chuan kan kal a.

 

 

                         A mak ka tih chu kan hmel a hmuh te chuan zam hmel reng leh inthiamlo hmel reng hi a pulo, ka hmuh sual nge ruih a nei zawk. Ngawi reng chuan ka en tlawk tlawk a, a ni pawh chuan mit khap lek lo chuan min en a, a hma zawn ah chuan kan pahnih chuan kan thu a, Alvin unau nu angin kei ngei pawh hian ka lo ngai a, ka ngaina a, ka pawh tak zet, Alvin nu lak a ka lungawilohna thleng khan ka thlen ve a, engkim ah min hnem a, min thlamuan thin tu kha a ni sia. Mihring hi a inthlak nasat theih ka ti dawn nge a lo in thup theih ka ti zawk dawn pawh ka hrethiam lo.

 

              A thinrim zia chu a mitmeng ah chuan lang mahse, a unau ang a a lo en ve in a chung a hetiang thil rapthlak lutuk a ti thei chu a chhan zawh chhuah ngei a tum avang chuan mit meng sen ram chung  chuan zaidam tak mahse nelawm na awm miah lo hian “Lucy, ngati nge?” sawi duh tam tak chu a nei ang, mahse keipawh ka unau anga ka lo ngaih ve in ti hian min ti ta se ka sawi tum te chu a bo vek vek tho ang.

 

                 Za lo deuh chuan a rawn nui hul hak a, “A chhan chu I hre duh tak meuh maw?” Alvin chuan tawngka chuan a chhang tawh lo mahse a mitmeng chuan a chhanna chu a hre duh tih hriat zet hian a khap deuh sak a. “Kan rawn tleirawl chho kha, ka ngainat dan che hi unau nu in unau pa a ngainat dan a nilo, keimah leh keimah kha ka inten a, ka in haw hluah hluah a, vawi tam ka ngaihtuahna hi dahbo ka tum mahse ka theilo, class 10 kan exam dawn khan ka nu leh pa in hau thawm ah kei hi ka nu fa bik ka ni tih ka hria a”

 

                     Zamna reng reng awm lo chuan Alvin chu a melh kiau va, “ka rilru kha ana miahlo, ka lawm zawk a sin, a chhan chu Alvin ka hmangaih che a, unau tak tak emaw kan nih ka tih avang khan unaupa te lo hmangaih tlat kha ka in ten a, mahse I ni lo tih ka hriat khan ka lawm zia chu sawi ngaihna a awmlo mahse nang chuan ka en ang che hian engtik lai mahin min en ve ngailo, unau kan ni lo tih hi vawi tam hrilh che ka duh thin mahse min hlat phah ka hlau si”

 

                    Alvin mak ti lutuk chuan thawk a han la deuh hak a “Unau anga min ngaih a, ka bula I rawn riah chang te hian kei chuan ka unaupa ang nilo in I zan mut hlan te hian ka kuah che a, I hmui hi vawi engzat nge ka fawh pawh hi ka hre senglo, I unau nu anga min en a ka bula hlim tak a I awm hian ka hlim a a bak kal pawh hi ka duh mahse ka ngam chuang silo, I bialnu nen In inthen chhan pawh kha keimah vang a nihkha, nang nen hian unau diktak kan nilo a, chhungte hriat lova in kawp angin ka sawi a, chuvang chuan a kalsan che a nih kha”

 

                  A rawn nui chhuak hak a, keini erawh mak kan ti lutuk chu kan nuih hi a za hlawl lo a ni. Kei phei chuan a ngaihna ka hrelo. “Ka ta tur I nilo a nih ro ro chuan tuman an nei bik lovang che tih hi ka thupui a ni thin, ka ngaihzawng neih pawh I hre ngailo ang, Delhi kan awm lai a ka kawp ve zuai kha chu nangmah thlah ka tum lutuk vang a nia, ka Nu ka call a, pawisa ka mamawh thu ka hrilh a, Nuai1 min rawn thawn a”

 

                   Ka lo inrawlh ve lo theilo, “Lucy kan in kawp tirh te khan engmah I sawi ngailo, I awm dan ah khan I tilang ngai bawk silo, engtin nge I tih theih zawk, nau ka pai tih I hriat hnu kha chuan ngati nge I rawn let tir mai loh, kan hreawm tawrhna zawng zawng te kha” ka sawi zawm thei tawhlo, ka khur ngawt ngawt, alo hmangaih hle a nih pawhin a fapa vang chauh pawh khan engvang nge a rawn chhuah tir loh, a hmangaih a nih chuan taksa, rilru hreawm lutuk khan engtin nge a siam theih.

 

                   “In pahnih a hlim tak a in awm hmuh dun tluka ka tan a na kha a awm lo a sin, In hrethiam lo ang, in hrethiam ngailo ang” a rawn vin deuh tuar a, “Rei tak khung che kha ka tum a ni bik lo, vau deuh che a, Arelia kalsan tur a vai ho hmanga vo che kha ka tum ber a ni, mahse Arelia hian min rawn call a, Nau a pai thu min hrilh khan ka rilu ka thlak a, thah che chu ka tum lo, mahse Arelia theihngilh hmak la, kum tam hnu ah chuan Arelia pawhin midang neiin a awm anga tiin ka lo suangtuah a”

 

           A sawi zawm leh hma chuan Alvin chu a rawn tho thut , na zet hian a beng her sawk a “Ka ngaidam theilo che a ni, Dan ang takin hremna I hmuh tur chu hmu ang che” a chhuak nghal vut a, Alvin putea chuan keipawh chu min hruai chhuak ve nghal a. Kan haw kawng ah pawh chuan engmah kan sawi dun tawhlo. In kan thlen pawh chuan chhungten chanchin min lo zawh pawh chuan kan chhang hlei theilo.

 

                  Alvin chu ka khawngaih letling zawk, a rin em em, a unau nu, ka best friend a tih ve hial thin kha tiang khawp a nasa hian a bum thei a nia, kan mi rin em em ten min phatsan hian a na a ni, Alvin chu a room ah a lut nghal a, a nu in zui luh  a tum chuan ka lo danga, thil awm dan leh thlen dan chu ka sawi fai ta vek a, Alvin nu rilru na leh mak ti lutuk chu nu tawng duh tak ni thin khan sawi tur reng a hrelo.

 

                    Keini pawh Delhi lam ah kan chhuk thla ve leh tawh a, Palai vawi3 nan an rawn kal leh a, April 12 a in neih chu kan ti tlu ta a, Alvin pawh a Nu dawr pakhat a enkawl a, ka pa in kan inneih hun ah an company Branch thar tur Mizoram a hawn a tum bawk a, tah chuan kan nupa a kan thawh ve tur thu a sawi a, kan chhungkaw in enkawl dan tur ka ngaituah a, ka rilru a buai a, mahse Nu leh Pa hi chuan fate hi eng dinhmun ah pawh ding ila, min hmangaihna hi a tawp lo a, an theih ang tawkin engkim min la tihsak zel chu a ni si a.

 

                    April ni 12 a rawn in her chhuah chuan Biakin ah chuan Pathian leh Kohhran ho te hma ah damchhung atan a nuam emaw a hreawm ah pawh nise tiin Pastor chuan inneih thu tiam min chham tir a, min lawmpui tu pawh kan phu loh kan hmu a, keiin Mazualteii Best ah ka hmang a, Alvin erawh in a thianpa kan college kal lai a lo kawm ve ber Tony chu thian ah a hmang thung a.

 

                   Inneih zan chuan room ah kan awm lai chuan Mazualteii chu inthlahrung tak chuan Alvin an a rinhleh thu ka hrilh chuan a thinrim lutuk chu a tho lawk a, Alvin hnung ah chuan a chum pawp pawp a, kan nui nasa hle. Ka nu leh pa leh ka nau, kan in chhung ka han kalsan chu hreawm tihna chin leh khawharna awm mahse Ka hmangaih ber leh Ka fapa Aldo pa nen chhungkua kan han din chuan phurna leh hlimna tak tak min pe si.

 

THE END