Arelia 2

 

ARELIA -2

                  “I va han lak tlak loh reuh e, dawt sawi I hneh hmel zit zet nen, I sual teh reng nen” ka tih chuan a rawn nui chhuak deuh hawk a “ Sual kan tehna hi a in anglo thei a nia” tih pah chuan a tlan leh nghal a. Dar2 leh chanve a la ri lo tih chuan kan in kawt ah ka Nu leh pa leh Harsh a chhungte an lo ding thap a, motor lak chhuah an lo tum mek tih ka hmuh chuan ka lung hi ka ka atang hian a rawn sawt chhuak mai dawn hian ka hria.

 

               Dim te hian ka chhuk a, ka bag chu ka sik neuh neuh a, Harsh lah a rawn paithla tawng tawng a, ava lo in hnem awm em em ve mawle heap hi. Ka nu in min rawn pan phei a, min beng sawk dawn emaw ka tih laiin, min rawn kuah a “Mate, Arelia, I tha em”a kei nge hlauthawng ka nu zawk pawh ka hrethiam tawhlo, a aw khur dar dar leh a kut leh ke khur dar dar te chuan ka rui zawng zawng hi min ti harh vek.

 

                   Harsh a pa a rawn phei a, Harsh thei leh theilo a din ngil tum ve em em hmai ah chuan a beng sawk a, ka lo ip chawih, “dawt hmangin I chhungte min bum a, Arelia dinhmun derthawng ah I dah a, eng ang mipa nge maw I nih le, responsibility pawh hrelo fapa maw ka lo neih a” a beng na bawk  a niang, kan gate chu a ngheng hawng deuh sawk a, amah pawh a tlu lut a, ka nu leh pa erawh an ngawi reng, chu chuan ka hlauhna a ti nep chuanglo, inchhung kan luh hun ah engtin nge min tih ang.

 

                    Kut chu min thlak hauh lovang mahse an rilru hreawm  tur zia leh anlo mangang dan tur kha tun ah hian ka hrethiam ve chiah, Harsh a pa chuan ka pa hnen ah “min hrethiam ula, zan in chu hetah hian riak mai teh se, ka duh aiin ka khawih na palh ang” a tih chuan ka pa pawh chuan a lu alo bu nghut a, Harsh rui pawh a harh vek tawhin a nia ka rin, Harsh a chhungte an haw hnu chuan Alvin chuan ka nu chu a rawn pan phei a, “Ka pi, englo a nia, ka cousin Lucy birthday a nia, class khat te kan lo ni ve bawk nen, an ni hawng tur hi khawlai ah kan hmu a kan sawm ve a, kan thiamloh a ni” a tih chuan Harsh nen chuan Alvin chu kan en deuh hru a.

 

                  “Him takin in rawn thlah a, kan lawm lutuk a nia, nangni pawh va haw tawh rawh u” tih pah chuan ka nu leh pa chuan in chhung ah min luhsan a, ngawi rengin hlauthawng zetin Harsh nen kan zui lut a, Alvin te kal tur pawh ka en liam ngam tawhlo hrim hrim, min chhan nan a dawt a sawi belh leh kha a tha zawk nge tha lo zawk pawh ka hrethiam lo.

 

                   Ka nu chuan min  hau a chak zet zet tih in chhung kan luh rual chuan ka hria, mahse ka pa in, “Harsh guest room ah khan mu la, Arelia nang pawh I room ah han mu chho rawh” a tih deuh hmuk avang chuan Harsh nen chuan in chung lam chu kan pan a, kan rui ala rehlo a ni chek ang chu in bual pawh in bual lovin ka mu a, ka mutui em em mai lehnghal zing dar 6 ah ka harh a, ka in bual nghal a, in hnuai a chhuk chu ka hreh ngawih ngawih, thih hreh hian ka hreh a ni ber mai.

 

                    Harsh a riah na room ah ka va phei a, a ni pawh chu alo harh tawh a, a lo chhuk thla ngam biklo a niang, khum ah chuan a lo thu run a, Ac pawh On lo chuan alo thu thlan dup a, Kawngka ka hawng thawm ah chuan rang fahran hian min rawn melh a, a bul a chair ah chuan ka thu a, engmah sawi lo chuan kan ngawi deuh reng a, tawng tum a, a ka a an lai tak chuan Hector a rawn lut a, “U, a nu ten rawn chhuk rawh se an ti che u nia, an hau dawn chiang lutuk che u” a tih chuan  rum deuh in ka melh a, Harsh in bual chu ka nghak leh te te a mahni a chhuk ka ngam bik lo.

 

                  In hnuai kan chhuk chuan Harsh nu leh A u nupui chu an lo awm a, an melh no lo ve khawp mai, A nu chu a rawn tho a, a hnung ah chuang a beng zawt zawt a, “Party na ah kal rawh u, a pawilo mahse dawt hmangin In chhuak a, thudik min hrilh ni ulang nizan khan Police station pawh kan pan lo tur, min ti mualpho lutuk” Police station ah te anlo va kal a maw! Mahse a awm ve tho mai, dawt kan hrilh ngailo a, dar 10 leh a chanve a haw tur  a inti si dar 2 ah pawh in kan la thleng lo a chutah Harsh in a chhungte bul ah ka cousin lo zin tlawh tum angin a in sawi a, ka chhungte bul ah a cousin tlawh tum angin a sawi bawk si nen an hlauhthawn na pawh a awm hliah hliah.

 

                      A nu leh a u nupui chuan an hruai phei a, Breakfast kan ei lai te chuan ka nu leh pa chu ka melh zeuh zeuh  a engmah an sawi lo mahse an lawm thlawt lo tih ka hria, an ngawih reng hian an thinrim zia a hriat zawk, ka nu pawh a an deuh hlawih hlawih hi chuan ala thinrim tawk lo tihna nia, engmah a sawi tawh loh hi chuan a rilru a na tel a, a thinrim hian a tawp khawk a thleng tih ka hrethiam ve. Kan ei kham hma deuh chuan Ka pa chu a rawn tawng chhuak ta, “Arelia, thil I ei zawh ah I room ah I nu nen kawm che kan duh a nia”

 

                       Hector an “Pa hna I kal dawn lo mi” a tih chuan “vawiin chu ka chawl” a ti deuh hmuk a, Kan naupanlai atang tawhin ka nu leh pa hi fiamthu a an han in hnial tih loh hi chu thinrim tak tak a, an in hau hi tun thleng hian kan la hrelo a kan la hmu bawk hek lo, an lungawi lo viau a nih pawhin room ah an lut a, an va in hau thin ni ber hian ka hria, keini unau pawh, kan room ah ve ve min zilh thin, thiante leh midang awm laiin min zilh ngailo, kei min zilh dawnin Hector awm laiin min zilh ngailo a, Hector an zilh dawn pawhin ka awm ve laiin a zilh ngai hek lo. An room ah emaw keimahni room ve ve ah min ko a min zilh thin.

 

                 Room a zilh ngai meuh a kan awm tawh hi chuan an thin a rim hle tawh thin tihna a nia, thil phurawm tak a nilo. Kan thil eina vel ka seng fel lai chuan Hector ah a thianpa kan thenawm te in a len a lo dil a, ka nu mood off bawk nen, “nichin pawn ka sawi tawh  a theih loh” a ti deuh hmuk a, min kal pelh pah chuan “Nangmah vang vek” a han ti hram a, ka beng chak ania. Ka room ah kan in zui chho a, kei khum ah ka thu a, couch ah ka nu leh pa an thu a, zaidam tak mahse thinrim in sum lutuk tih hriat tak mai hian ka nu in “Nizan thil thlen dan sawi rawh le” a rawn tih chuan ka chil ka lem khawlh a.

 

 

                                 Nizan mai nilo, Friday lunch break a ka thil tawn atanga nizan thil thleng chu engkim ka sawi fai ta vek a, ka pa chuan a aw a rawn thian kharh kharh a “tleirawl in rawn ni chho ve tawh a, hlim tak leh nuam ti takin I nun hmang la kan duh, I nu nen hian chu chu kan duhthusam pawh a ni, I thil tih tur ah I tana pawi tur leh I chhiatna tur a nih loh chuan engahmah kan dal ngailo che, I duhthlanna te kan zahsak thin che, chutih rual chuan nangpawh in fanu I nih angin I nu leh Pa lak ah mawhphurhna I nei ve a chu chu, I nu leh pa te hlim leh thlamuang taka kan awm theih na turin I nun hi vawng la chu chu I lak ah kan beisei, engpawh ti dawn la, kei min hrilh hreh a nih pawhin I thil tih tum zawng zawng chu ka tilo mahse khawnge I kal dawn,  tih tal hi chu I nu tal hi hrilh ve tawh ang che”

 

                         Mi nu leh Pa angin kut in thlak te, in hau vak vak te hi an ti ngailo mahse min han zilh ve hi chuan a zahawm in a zahthlak ngawih ngawih thin, ka nu in a rawn chhunzawm ve leh a “dawt vawi1 in vawi 2  a hring a, midang chhan ngai tur khawp a mahni a dikna tan ngamlo nih te, dinhmun chhe lutuk a awm te hi tum loh tur, eng dinhmun ah pawh ding ila mahni nihna leh dikna leh diklohna sawi ngam tur a huaisenna neih hi a pawimawh tak zet, keini min bum emaw I intih lai khan nangmah ngei pawh I inbum a, I zahawmna pawh a tla hniam,  nizan thil thleng avang khang engkim a chhe ta duai a ni lo a, mahse dawt hmang a I chhuah avang kha chuan kan na takzet a, minti hlauthawng tak zet.”

 

                   Ka pa a rawn tawng ve leh a,”Wine te Beer te pawh in suh pawh ti che ila, I tem tawh a nidang ah pawh I la in leh ang, mahse mahni in veng theilo tur khawp leh mawl vek khawp a in loh tur” ka nu in a sik ru deuh sawk ka hmuh chuan ka nuih a za ang reng. Kei pawh in ngaihdam te ka han dil a, ka nu in “Punishment atan vawiin chu ka pui lo che anga, in zawng zawng tifai vek ang che” a tih chuan ka ner deuh sak a.

 

                      Monday class kan kal leh ni chuan Mazualteii kan thil tawn kan han hrilh chu a han ui mai mai khawp a, “aww ka tel ve loh tum ber kher in awiii ka va han tel chak” a ti deuh chhen a, Alvin hmuh leh erawh ka hreh ngang mai. Lucy chu rin ai takin a fel a, min lo hmuh chuan min rawn pan nghal a, kan chhungte tanga harsatna kan tawh leh tawh loh te min zawt a, thil pawi lutuk a thlen loh thu ka sawi chuan min kuah pah chuan ka ban ah a chul a, “tiang te chu a thleng ve thin a lawm, tun ah chuan in hming diktak in kan ko thei tawh ang che u” a tih chuan kan en deuh haw hlawm a.

 

               A kut rawn vai pah chuan “Angel and friends kan ti thin che u a, mi thianghlim hlawm hlak in ni ber a, khawvel nawmna pawh tem lo a in awm kha kan nuih a za thin” a tih chuan ka nui ve suk ringawt a, kan in zui ve deuh chawt ta hlawm a, anni thian 4 leh keini thian 3 chu kan in kawp ta ber anni 4 chu ruihtheih thil duh ve tak mai an nia keini lah tiang lam kan ni vak lo thung mahse kan in kawm thei ta phian a.

 

                 College week te alo hnai dawn a, kei leh Alvin leh Harsh chu House khat ah kan awm a, Lucy, Mazualteii leh an thian dang zawng house khat ah an awm a, Ka pa hi music ngaina em em mi a nih vang hian kan unau hian Guitar leh Keyboard hi chu kan thiam ve a, House band kan han din a, kei keyboardist ah min hmang a Alvin guitarist, Harsh lah tel ve phet a duh si engmah thiam a nei bawk silo, Drummer atan kan tih lahin a ngaihna a hre hlawl silo, a zaithiam bawk silo mahse phur tak maiin kan practice a piang hian min zui ve ziah thin.

 

                     Friday zan ah practice leh kan ngai si, Alvin chuan min hrethiam in ka tan chhuah a harsat a rin vangin kan in a practice a rem leh rem loh min zawt a, Ka nu ka call nghal a, kei ai mahin alo phur, ka thiante pawh dinner ei nghal turin a sawm a, ka han sawi chuan kan phur tlang ngei mai. College atang chuan kan phei hlawm a, Hector a nghal leh ang tih erawh ka hlau viau thung. Ka thiante zing ah min ti zak thin lutuk a hau vak hian awmzia nei thin silo, a mizia a ni ve pakhat a, tawng tam lo mahse luhlul leh nghal zet ka tih tawh kha.

 

            College bang kan in ah kan phei dial a, mi 5 kan nia a, Tony zai tur ber a ni a, a hla sak tur ah kan buai ta, kan duh a in ang lo vek, hla 5 lai kan zir tawh a,  hmeichhe awm chhun tiin min thlan tir ta a, ka hla duh tawp theih loh X Japan “Tears” tih ka thlan chuan mak min tih hmel hlawm ngei mai, kan han zir chawp leh kar 2 zet zawt chiah hunk an nei tawh a,  a hla ka han play a, anlo hre ngai mang hlawm lo chu niin chutah Japanese in chang 2 vel a lo awm bawk nen, lyrics nen a lam dan nen kan han bei tlang hlawm a mahse music lam a tui na ngang chuan vawi 2/3 an ngaihthlak chuan anlo ti thei mai zel a.

 

 

                  Ka nu leh pa tlangval lai a an hla ngaihtlak thin a ni bawk nen, kan han sa chu an lung te pawh a leng thar ve a ni ngei ang, balcony ah Juice in pahin an kut an in vuan a an in melh a, an  nui leh sak zel ka hmuh chuan, nuam hi ka tiin, thlang fuh ka inti leh zual khawp mai, Ka nu leh pa in ngeih leh in ngaina tak hmuh hi chuan Ka pa anga nupui fanau te ngaihsak thiam neih ve ka chak a, ka nu anga pasal te zah thiam leh duat thiam nih hi ka tum ve tlat thin.

 

 

                  Ka pa in dinner kan ei laiin “hmun dang dang a zir lovin in duh phawt chuan in perform hma chu hetah rawn zir ziah ta che u” a tih chuan ka thiante pawh chu an phur ngang mai, ka nu leh pa hi an zau ve a, kan in pawh nuam an ti ve khawp mai, Harsh tih loh chu NE mi vek kan ni avangin ei leh in ah pawh kan buai lem lo, PG a awm te, mahni a in luah te an ni nuk hlawm avangin ka nu eitur siam pawh tui an ti thei ngiang mahse ka nu hi Bai siam tak mai a nia, Ka pa hi Sa siam thiam a nit hung.

 

 

 

                          Kar khat lai mai kan zir hnu chuan keimahni tawk ah kan thiam ve tawh khawp mai, tu House mah han huphurh pawh kan nei tawh bik lo. Final rehearsal kan neih ni chuan Ka pa in mipa ho dinner atana an duh ber a zawt a Alvin lah chuan rang fahran hian “Ui sa” a rawn ti pek a kan nuih deuh huk ah chuan Harsh chu a ngaih a tha lo deuh a niang, enge kan sawi tih chu a hre chak khawp mai a, Ka pa in “Bawng sa an ei duh” a tih chuan ngaihtha deuh chuan a awm ve mai a.

 

                    Ka pa lah pek chuan Beer case hnih a rawn chawi lut a, ka nu pawhin engmah a sawi bik lo, ka nu nen kan in tur erawh Wine a rawn lei thung a, Hector erawh a thianpa Sanjay te in ah riak pahin game an khel dawn a, chuvang te pawh chu a niang, in chhung ah In tur a rawn ken luh ni. Ka nu nen hi chuan Wine hi chu occasion ah hian an in ve zeuh thin No 1 ang hi chu, ka pa hian beer hi a ruk hian an room ah a in ve leh zeuh thin bawk a, a ruk ka tih vang hian Ka nu in a hrelo tihna nilo vin naupang hmuh laiin a In ngailo ka tihna zawk a nia.

 

                    Ka pa eirawng chu Mipa hovin an pui a, Kei leh ka nu in bai tur kan siam thung a, Chaw ei hma chuan kan han ti leh a, Kan hma zawn ah Ka nu leh pa an thu a, ka Nu in Wine no a dawm a, ka pa in Beer bottle a hum bawk a, mipa ho an lo in ve sek tawh bawk nen kan boruak pawh nidang zawng aiin a tha, ka pa in ka nu kut hum chungin a maimit chhing a, kan zai chu ngun  tak in a ngaithla vang vang a, kan zai zo chu a rawn meng a, ding meuhin a kut a han beng a, mi tih phur hi chu a thiam ve thlawt a ni.

 

             Dinner kan ei fel, thian te pawh an haw fel tawh a, hmun hnawk vel ka nu nen kan then lai chuan, ka nu chu ka bul a rawn thu in “Mate, thil min hrilh loh I nei tlat in ka hria” a nui deuh sang a, ka ham haih lutuk, ka han ngaihtuah pawn enge ka hrilh loh tur thil ka van hrelo tak, amah bawk chuan “Guitarist nen khan in combination a fuh riau in ka lo hria a” a nui tawh miah lo,ka lai lutuk chu ka no ken lai chu ka tuai ka tuai ringawt a, “enge maw chu a awm tiraw?” ka nui tawp, keima lam ah chuan a awm teh meuh mai mahse ama lam ah  a awm ve pawn ka hre bawk silo a enge ka sawi chuang ang.

 

 

             “Nu, I ngaih bel mai mai nihkha, chutiang a awm lo” ka tih chuan awih lo hmel fe hian “tak meuh maw, I duh chuan min sawi pui thei a nia ” a han ti leh hram a “tak zet, engmah chutiang a awm lo” ka tih chuan ka room ah ka chho nghal a, ka in bual a, ka sam huh hnuang chung chuan ka mu a, ka phone ka en chuan Alvin msg 5 lai a lo awm, hei leh chen kan in kawm ho ve tawh a, a vawi khat nan min rawn be ve a nih chu, ka hawng nghal a, “ Enge I tih, I chau em, chaw kha I va ei tlem ve, I mu tawh law a, min kawm duh lo ni maw? “ minute 3 dan tin ah chuan a rawn thawn a, ka nui deuh suk a.

 

 

               “La mu nang, in ka ti fel a, ka in bual leh a, khum ah ka lawn chiah” a seen rang ngang mai, min rawn call nghal, ka lai bawk si, ka pick a angem? Rei fe a ring hnu chuan ka pick ta hram a, “I va la har leh si ve, ka ti buai che mi a” a rawn ti thum deuh chhal a, “ awih awm loh e, ka pick nghal reng a lawm” ka tih chuan awih lo hmel fe a a thaw hawk chu ka hre thei a, “Dawt sawi hi I hrat ve sia, I thiam mang silo a” keipawh ka nui ve tawp mahse dawt sawi hrat lutuk anga min han chhuah chu ka lawm teh chiam lo.

 

 

      Ka ngawih tak reng avang chuan “daw thei nih chu I duh lo ve ngang ngang hle mai maw” a la ti duh leh chauh a, “Lucy birthday kan lo kal bak kha chu dawt ka sawi lo aw” ka ti pawr hlar mai a, a thawk dan ah a nui tih ka hre thei, kei pawh chu ri lo chuan ka nui ve suk tho a, kan ngawi deuh vang vang a “In chhungkua kha ka awt” a ti deuh tawl a, mak ka ti, rethei ni lo mahila, awh tur khawp a hausa kan ni silo a keini aiin an hausa fe ang tih chu ka hre thei, Delhi a mahni a apartment zirlai leh nghal in a luah thei a, chutah, Harley Davidson te a nei thei a, a sum hrawm lah a na tih kan in zui chhung rei lo te khan ka hre thei.

 

                 Keini chhungkua min awt the daih chu mak ka ti tak zet, “ber kher a, keini chhungkua ber kher” ka tih chuan I nu anga mi huaisen, pasal fanau te care thiam si, mi in hawng tak leh I pa anga pa zaidam, nupui fanau te duat thiam leh ngaihsak, engkim a phur pui thiam te, a tam lutuk ka sawi seng lo, khatiang chhungkua ah kha chuan awm ilang chuan maw khawvel ah hian mamawh leh awh pawh hi ka neilo ang” a ti hul deuh hak a, an harsa lo tih ka hria a mahse eng ang chhungkua atanga rawn chhuak nge a ni tih lam chu ka ngaihtuah ngailo.

 

               Phone chu a dah deuh hmak a engmah pawh sawi lovin, ka call back dawn nge ni ang, nge a buai thut le, ka awm dan lai zet chu a, han call let em chu ka hreh ve deuh bawk si chutih lai chuan ka whatsapp tone a lo ri a, ka hawng nghal a, “Arelia, I hming hi a mawi ka ti” teh deuh tawp a, chhan ngaihna ka hriat loh avang chuan Smiley ka thawn ta ringawt a, “Lehkha I zir dawn na nge” a rawn tih zawm a, “ka chau em mai ka zir peihlo” ka tih chuan “ nia kan ti buai thin lutuk che u a in chau ngawt ang, I nu leh pa hnen ah khan lawmthu te minlo sawi sak la””

 

 

                  “Nangmahni ngeiin a hranpa liau liau in lawmthu sawina hun in la rawn hmang ang chu le” ka tih chuan zawngte hmai hup lai lem chu min rawn thawn a. “Alvin, Mizoram ah khawi veng ah nge in awm a” ka tih chuan “Aizawl Chanmari West ah ngati nge” a rawn tih ve nghal zat a “thian te awmna te chu hriat ve tur a lawm ka tih chuan” nui thaw lai lem rawn thawn pah chuan “ thian ah min ngai ve ta ni maw, min zawt har ka ti reng  a ni”

 

 

                             “Arelia, Harsh nen hian in ni lo tak tak maw?” ka nui chhuak huk, engtin nge kan nih a rin zawk reng reng ni, hetiang zawng a kan in en loh zia hi hrechiang se lang chuan min zawt ta hi a zak zawk hial ta ve ang mawle. “Ni mai mai lo, Zoremsiam” ka tih chuan hmaisen vek rawn thawn in “hmmmmm ti khan maw kan in tih dawn a, naktuk ah I chak lo khawp ang, ka mu dawn” tih leh out a rual nghal a, tlem chuan ka inthiam lo ve deuh mahse ka mut a chhuah ve deuh tho avang chuan reply tawh lo chuan ka out ve nghal a, ka muhil zui chu a ni mai.

 

 

                    Vawiin ni hi College week a indoor games tawp na ni tur leh kan perform ni tur a ni bawk nen ka helh hawlh a, ka phur rual in , ka huphurh bawk, ka nu Dress min lei thar, Skater dress  leh ka pheikhawk duh ber Converse var chu ka bun a, Indoor a nia, AC a awm dawn bawk nen Jeans jacket ka keng bawk a, black leather backpack ka ak chhuak bawk a, Harsh nen kan in phur chhuak a, ka nu in a tih thin dan ang bawkin balcony tangin min vai liam a, tun a kan in hi kum 2 kal ta a kan lei ve chauh kha a nia, a hma chuan Mi in luah a khawsa ve thin kan nia, Harsh te in hnuai ah hian kan awm thin, mahni pual a in han neih chu mite angin ropui tak nilo mahse a nuam ve khawp mai.

 

 

                 Kan band zai hun tur hi chawhnu lam mahnise, chawhma chhung  chu class room ruak ah kan lo practice a midang perform pawh kan en ve hman meuhlo, kan hun a in tan hma chuan ka huphurh lutuk chu, ka zung deuh sek lehnghal a, thianten zam lo tur a min tih pawh chuan awmzia a awmlo, keyboard ka han hmuh ringawt te chuan nidang a nuam ti tak a tum thin kha, ka tha a khur ti tih ringawt, Alvin chu ka bul ah rawn pheiin “Hming mawi te, zam reng reng suh, nang aia tha leh thiam an awmlo” tih pah chuan a in her leh vut a.

 

 

                   Ka nu in Camera min ken tir chu Harsh ka pe a, kan perform lai chu video a lo cover tur chuan ka chah a, kan hun alo thleng a, Alvin an hma a hruai a a hnung ah Tony kei ti chuan Stage ah kan in zui chhuak hlawm a, an tam na ngiang mai, Hall ah pawh kan leng lo, pawn ah kawngka bul ah te chuan an rawn in hnawh up up hlawm a, ka zam lutuk chu tah vak mai hi ka chak, kan tan hma chuan Alvin chu ka bul ah a rawn phei a “Tha takin I ti dawn tih ka hria a nia, nang aia tha leh thiam an awmlo” tih pah chuan ka chhip sam ah chuan a han tuai thuak a.

 

 

                  Kan zai zo chu thawm a tha ngang mai, Tony hi a zaithiam ve reng reng bawk a, keini te chu engmah kan ni lo, naktuk ah closing kan hmang anga, Result an puang nghal bawk dawn a ni, Mazualteii leh Harsh chuan min chhuang tih hriat tak hian “Arelia, kan chhuang tak zet che” tiin an lo au a, Harsh an chang a han tum bawk a, “best performance” ti a host in kan chhuk pah a a rawn puan te chuan ava han nuam ve tak e aw….. keini Junior 3 leh Senior 2 an nia, kan House lam pan a kan kal lai pawh chuan min lo chibai ve nak nak hlawm a.

 

 

                    Ka bag Locker a mi ka lak lai chuan Alvin chuan  min rawn zui ve niin “Nizan a ka hming pum a min koh kha ka la theihngilh miah lo a nia aw” a nui miahlo mahse a thinrim pawh chuan ka hre chuanglo, “ ka tihpalh lutuk a nia, min chhaih ve ziah a, kan ni bawk silo a, a ninawm ve lawm” ka bag phawrh pah a ka tih chuan, ka locker pawh ka kalh fel hma chuan min pawt her sawk a locker zawn ah chuan min nem bet a “ I tihpalh nge I ti lui” ka mit ah tak chuan min en kar a, ka en let ve ngam tawh lo, a hmui zawn chu ka melh reng ringawt a.

 

                    “Ka hmui chu I fawp chak viau a mi” a tih chuan ka phu deuh zawk a, a mit ah tak ka en kal a” I mumang a nih chu” tih pah chuan ka in her sawk a, Locker chu ka kalh deuh rawk rawk a, min pawt her leh a “Arelia, I hrelo der nge, I hrelo, nge engmah a ni ve lo zawk” eng chu sawi ni maw, ka hnar chu ka tum deuh hrut hrut a, “ I rui a mi” ka vei lam a thlek zeuh pah chuan a nui deuh hawk a, min rawn melh leh pah chuan “ Nangmah hi ka rui che”

 

                 Midang thawm kan hriat tak ah chuan ani pawh chuan min thlah ve mai a, a phone chu Locker atang chuan a phawrh a, Mazualteii rawn phei chuan mak tih hmel zet hian min melh a, engmah phei chu a sawi lem lo, kan in zui chhuak nghal a, “Arelia” ka hawi let a “A ngai leh lo” engmah pawh sawi lo chuan keipawh chu ka kal chhunzawm ve mai a.

 

                         “Awii Arelia, in bawn zia kha, mi zawng zawngin thiam an ti che u nia aw, in va han bawn tak, Harsh nen kha chuan midang pawh kan ngaihtuah hmanlo, nangmah hlir kan lo en che a, awiii nang chu talent te hi I ngah reuh sia a nuam awm e” a ti deuh hlut a, Harsh chu Bike a ken vangin Mazualteii nen auto kan chang a, kan hawng rual a, in ka thlen chuan ka chau ve angreng khawp mai, thutphah ah ka thu thla hnawk a, ka nu in vawiin kan hun hman dan min lo zawt nghal vat vat a, video a en chak tawh thu a lo sawi ve chhen a “an thiam lo ve em mai” Hector an game khelh pah a a rawn tih chuan, ka tui bottle ruak chuan a lu ah ka vawm fawk a, nui suk chung chuan a lu chu a tuai hauh hauh a.

 

 

                        Ka nu phone hman lai chuan in chung ah ka chho a, ka in bual a, bathroom kawngkhar chu a rawn sawi dawt dawt a, Hector bak a ni leh lo ang, ka hawng duh lawk lo lehnghal, ka hawn chuan “I fing thei thlawt lo mi, ka laklawh, manner hre lo lutuk” tih pah chuan ka kal pel a, “hmanhmawh rawh anu in a ti, an zin thut dawn Mizoram ah” ka hlauthawng ve deuh mahse hepa hi min tihder a hrat lutuk a ka awih chiahlo, ka nu in “Hector, I u chu rawn ko rawh” a tih vang chuan ka lu pawh hru hul tha lo chuan ka chhuk thla hlawk hlawk a.

 

                         “Mate, I pa te an la meeting a enteh Flight ticket han book teh zan in chhuak  a awm loh pawn naktuk zing a chhuak tur” ka nu hi chu a chi ai hma ve hrim hrim a, ka kuah a sofa ah ka nem thu a,” Nu in beng dai phawt teh, enge thil awmzia” ka tih chuan “I pu (ka nu pa) stroke alo ni awm e, tlai a a in bual kha bathroom ah a lo tlu a, a rei tak deuh avang leh koh pawh a mi a chhan loh avangin bathroom kawngka an ti chhia a, engmah a hre tawhlo” A kut leh ke chu a khur der der a “Hector, Apa call rawh, vat” tih pahin ka phone chu ka theh phei a “ alo haw mek, alo thleng tep”

 

 

                Tui in tur  ka va thli a, Hector pawh chu ka nu bul ah chuan a thu ve ran a, tui chu ka in tir a, a in zawh chuan “Ticket chu” a rawn ti tham tiak a, ka nu hi fanu naupang ber a nih bak ah ka Pu hian a duat em em tih piahlam a nia, nitin in be reng an ni bawk nen, ka nu dinhmun pawh ka hrethiam. Ticket ka en lai mekin ka Pa a rawn thleng a, ka nu bul ah a rawn thu ve nghal a, a dar ah ka nu chu a kuah bet a, a ban bul ah chuan a chul sak heuh heuh a”Lungngai mah ta che, engkim a tha leh vek mai ang, Mate, I nu nen kan ticket tur chu han en teh”

 

 

                 “Pa zanin dar 10 leh zing dar3 a awm” ka tih chuan “dar 10 kha la ma rawh tih pah chuan a card chu min rawn pe nghal a, ka book fel hnu chuan, ka pa chuan ka pi te a han call a, tlem chuan a zia deuh a mahse engmah nikhua ala hrelo a ni awm e, ka pa in chutiang kilh kelh chuan ka nu chu a hrilh lo, a zia deuh tih chauhin a sawi a, Ka pa in “Hector te an exam hnai bawk si nen, I nu nen kan chho phawt anga, a tul tak leh kan rawh hrilh che u anga, in rawn chho ve mai dawnnia”

 

              Ka nu mi ngaihtuah reng reng chuan “an pahnih chauh te chuan ava buaithlak dawn tak, tunge ei siam anga, tunge riahpui ang” a tih chuan “Nu, puitling ka nih ve tawh hi min ngaihtuah suh, Hector pawh ka lo buaipui ang” ka tih chuan ka pa pawh chuan “Harsh rawn riak phei se, Mazualteii pawh ko phei mai ula” a tih chuan ka nu pawh chuan a aw ve mai a, eirawng ka bawl sawk sawk a, ka nu chu phut chi pawh a nilo, a shock lutuk a, a zawi vek engmah ti thei pawh a nilo, eirawng ka bawk zawh ah a thuamhnaw ken tur ka siam sak leh nghal a.