ARELIA -4

               Ka hlauthawng tut tut, Lucy lah a ngaih a sam nasa mai si, tunlai ah thalai beidawng tam tak mahni nunna pawh lak mai hreh lo an tam tawh bawk si, ka mawng hi hawlh ang mai a za sek a, ka thu hle hle thei tawhlo, “khawnge Alvin in luah na chu a hla em?”

 

                Min rawn melh deuh pawk a, “ Top floor ah khian a awm” ka thaw deuh hak a, building khat ah in awm a, kar khat chhung a dam nge dam lo pawh I hre lo chu eng ang unau nu nge maw I nih le? Ka rilru chuan a ti hlawih hlawih a, sawi erawh ka sawi chhuak lem hlei lo a, “I kal duh a mi” a tih chuan ka lai ve leh deuh bawk si.

 

              Min hrethiam a niang, “han chho chhin la, duh leh call hmasa la, kawngka a lo hawn duh leh loh tak ah” a tih chuan engmah pawh sawi tawh lem lo chuan ka bag ka ak a, ka chhuak nghal a, Lift pawh ka nghak hman tawh lo.  Lucy hi first floor ah a awm a, Alvin erawh 6^th (Top floor) ah a awm thung. Thaw hlawi hlawi chung chuan ka chho zel a.

 

               Ka phone ka phawrh a, ka call pah reng a, vawi 7 lai ka call hnu ah chuan a rawn pick ve hram a. Thatchhe zet, mu tho hlim tih hriat tak hian “Ummmmmmm” chu zawng chu chhanna ka hmuh chu a ni mai. Pawr tawk hian “Kawngka lo hawng rawh” a room kawngka bul ah chuan ka ding reng a, ka hah lutuk chu ka thaw hlawi hlawi mai.

 

                 Tui in ka tum a, ka bag ka han dap, Shit, Lucy in ah khan ka luh tirh a ka in kha ka bag ah ka khung leh tawh lo, ka dang lah chu a ro huam huam bawk si. Hmela teh hrep pawh chu a rawn la hawng lo ka ti, ka nghak ren rawn a, a mu leh daih a nih ka ring a, call leh ka tum lai tak chuan kawngka a rawn hawng a.

 

                Ka nam sawn dawrh a, Fridge ka hawng a, tui ka in nghalh khawlh khawlh. Ka hawi let leh chuan a mit alo nuai chat chat a, min hmu chu a lawm loh hmel ang reng, a tum deuh vuau lehnghal a. Boxer leh Baniyan nen ringawt chuan a ding to leh nghal, Chapal pawh a bun lo. Fridge ka khar hnu chuan “Enge I duh” I va fel ve, I rawn leng a te minti ve dawn emaw tih lai a.

 

                  “ Tui ka rawn in duh” ka tih chuan a khi deuh suk a, Bedroom, Hall, Kitchen, Bathroom a ni tawp a mahse mipa mahni a awm nan chuan a tawk khawp mai. Hall ah chuan Sofa leh TV a hung a, Kitchen pawh zau lutuk  a ni lo na in, 4 seater Dining Table leh Chair, Fridge a awm ve thlap reuh a. Sofa ah chuan a thu thla hnawk a.

 

                 A thau loh tawh tehreng nen, kar khat chhung lekin a tla dawk thei, a sam lah a buk si, a hmuihmul tlem a lo to bawk a “Chaw I ei ngai na nge a Mizo Arpa kawlh deuh I va ang ve” ka tih chuan a ri meuhin a rawn nui chhuak a, fiamthu a sawi pawh ka ni lo, ang ka ti ve hrim hrim. “LalIsua pawh ni 40 leh zan 40 chaw a ei loh kha” a ti awlsam et a.

 

                     “LalIsua pawh I nih loh kha a, Isua te chuan midang a ngaihtuah a, nang te chu” ka sawi zawm duh ta lem lo. A room ah ngawi rengin min phei san a, a pawi ka sawi ta emaw ka tia, hreawm ka ti ngang mai. A rawn let leh thuai a, Tshirt leh kekawr bul a rawn ha a, chapel a rawn bun chhuak ve tawh bawk a. Center Table a Ac remote chu a la a, a on nghal a.

 

                “ I ril atam em” a tih chuan kei lah pek chuan “Tam e le, ka tlai thil ei hun a pel tawh a, tam tak ka ni” nuih za tih hriat deuh hian a hmui hnuai lam a pet a, “inthlahrun tih vel hi chu I nei ve vak lo nih hi a” ka in ngaihtuah thut a, ni dawn tak tam pawh niila, miin a vawi khat kal na ah te chuan tam love tih ve tur hi nia aw… Lai deuh chuan ka nui heu ringawt a.

 

                     Kitchen lam ah a phei a, “thil dang engmah ei tur ka nei miah lo, Spicy Noodles hi I ei ngam a ngem” a rawn tih chuan “Ngam rapthlak ka duh lutuk, King chili te hi ka ei nasa thei lutuk, ka thlak belh vel thin” engmah a sawi tawh lo, kitchen lam ah chuan a ri deuh rak rak a, minutes 15 vel hnu ah chuan, a chhuanna bel chawp chuan a rawn chawi a, Coke, bowl pahnih leh Chopstick a rawn chhawp a.

 

                   Ngawi rengin kan ei mial mial a, ka thil ei lai ka dak chhuak thut a “ nang hi I riltam hmel hle sia, engtin nge thil ei lo te a kar khat reng  I awm theih zawk a” min la chhang chuang lo, a thil ei lai chu a ei chhunzawm char char a, ka ei tan ve leh deuh hnu chuan coke a thli a, a in khawlh khawlh a, a thaw huai ri ka hriat chuan ka nuih a za lutuk chu ka nui phuh deuh thawt a.

 

                     “Ei zo vek rawh, U hmarchangam” min han ti kher a, rum fe chuan ka melh a “ala tam hi ei leh rawh ka ei seng teuh lo mai” ka tih chuan “a thak bawk sia, ka pum ruak bawk nen ei tam vak chi pawh ka ni lo” a tih lai tak chuan room lam a a phone chu a ri a, “ka tha lawm, ka hritlang mai mai nia, hei nichin tang khan ka dam hawk, thil pawh ka ei”  a tih chuan a chhungte an nih ka ring.

 

                      A rawn phei leh lai chuan kan thil ei na vel chu ka lo sil a, “ka ei seng lo ang iti maw ka ti, I paih a mi” nui miahlo a a rawn tih chuan “paih nang , ka ei zo, paih chu a uiawm sia, ka puar khawp mai” ka ti ve mai bawk a. “Sil duh suh, zan  ah Didi rawn kal mai ang” a tih pawh chuan ka sil lui ta tho a. Ka sil zawh chuan a awm na lam ah chuan ka va thu phei ve leh a “Tinge class I rawn kal ngai loh a?”

 

                        Min chhang tawh dawn lo emaw ka tih hnu chuan “kal rih loh kha ka tan leh tu tan pawh a tha zawk a lawm” ka thutna sik sawi hluai pah chuan “hmmmmmp I class kal loh kha tu tan mah a that na awm lo, I tan hlei hlei khan a tha lo aw, tak a chaw rawn ei la, Ka nu pawh lo la hawng lo a, ka pa hovin kan awm a, khawhar thlak lutuk” ka tih chuan “Taka I pu chu enge an” a rawn ti tha ve mai a.

 

                        “Aaaaaa, a zia vak lo, ka nu lo haw hun tur pawh hriat rih loh, Hector lah lungleng sia, an exam zawh hian ka pa in a dah chho ve mai dawn” ka  tih chuan a bu deuh nghut a, Ka pa ka call nghal a, “Pa I hawng tawh em? Alvin kha a dam tha lo a, amah chauhin a awm bawk sia, ka kan pah a, chuan chaw a rawn ei nghal ang” ka tih chhunzawm zat a.

 

                     Ka pa pawh chuan alo remti nasa, ka nu awm lo nen a khua har ve bawk sia, Hector lungleng chiau hiar ve deuh bawk nen, bak ah ka pa hi a lerh nilo in a rilru hi ala thalai a, tleirawl te, tlangval ho kawm te hi nuam a ti ve thin sia. “Mi te rawn ve ta che” a ti deuh hmuk a, “Ho e, hman ah pawh I lo ei tawh tho kha mawle, tuna tak a I inthlahrun der vel a” min chhang tawh chuang lo.

 

                  “In siam rawh, phei hma ila” ka tih chuan tih chuan “ ka chhuak peih vak hleinem” tih pah chuan a phone chu a khawih mial mial a, ka tho lawk a ”hmeichia ang mai, inla No vel lo khan lo kal mai mai the” tih pah chuan a ban ah chuan ka va kai a, min lo duh ru ve reng tih ka hriat vang nge chu ka hrelo, a lak ah hian ka confi tlat.

 

                 Room ah a lut a, Bike chahbi a rawn la chhuak a, Lift ah kan luch chuan Ground Floor a hmet a, keiin 1^st floor, “ngati nge” a rawn ti hu a “Ka tui bottle Lucy in ah ka theihngilh” a ner deuh suk a, Lucy in ah chuan kan in zui lut a, alo chhaih ka rin nen engtin mah a ti lo mawle, “I tho chhuak peih tawh maw” ti ringawt in a lo bia a, pakhat lah  a bu ngauh ringawt a.

 

                       In kan thlen chuan ka Pa leh Hector lehkha an lo inzirtir mek a, naktuk ah exam a zo dawn a, Mizoram lam ah ka nu bul ah a chho tur bawk nen, tun tum an exam chu nidang zawng aiin ama tawk ah a zir ve nasa, kan tihpui ngai lo te hian a lo zir ve mual mual zel. “In lo thleng thei maw? I khuasik em ni” Ka pa in a tih chuan “ka awm nuam lo satliah ve mai mai a lawm” tiin Alvin chuan alo chhang nghal vat a.

 

                        Ka room lam ah ka chhoh san a, ka in bual a, ka inthlak fel hnu ah in hnuai lam ah ka chhuk a, Ka pa alo awm lova, Hector nen Dota bawk an lo khel leh tawh a, “Juice in duh em” rang lutuk hian Hector an “keichu Ice cream”  Ice cream liana hi ni ringawt. “Yes keipawh Ice cream” a ni pawh chu  a, lei sa kan lo nei bawk silo, Ka pa wallet ka en a, pawisa ka la a, in hnuai ah ka chhuk nghal a.

 

                     Ka pa chu Alvin Bike chu a rawn khalh a, a rawn khi deuh sung a, mipa tak hi chu fa an neih tawh hnu pawh hian Tlangval lai nun hi an pel thei tak tak lo nih hi, Hector pian hma kha chuan Bullet kha chu a nei ve thin ngei a, mahse chhuah dawn vel ah kan leng tawh thin lo nen, ka nu in Car lei turin a ti tlat sia, ui chung chung khan a hralh ta mai kha a nia.

 

                         Bawngsa a rawn khai vu vu a, a lai ve deuh a niang, “Mikhual te kan nei dawn sia ka tia, ka va lei lawk a” Hmmmm arsa leh Vawksa pawh ala awm reng sia, a Bike khalh chak a nih chiah hi a. Kan in zui chho a, ka pa in , Bawng chek, Bawng ruhkawl  leh Arsa (Hector  sa ngainat ber) a siam nghal a, keiin Salad ka lo siam a, bai hi chu ei dawn hnai tak tak  a siam hi a tui duh bik ka tih vang hian bai erawh ka la siam lo.

 

                          Eirawng kan bawl peih fel hnu ah chaw ei ka siam a, Alvin chuan min lo puih chu a tum ve ngial a, Ka pa in “Nula an awm reng a lawm tih pui a ngai lo” a tih chuan Ka pa te bul ah chuan a let phei leh a, Nidang ah ka pa pawh hi min siam pui a, ka nu pawh a siam pui thin reng sia, tun a tak a min han siam pui tir phal lo vel chu ka ei lo ru deuh ngei mai.

 

                                 A chaw ei lohna a rei tawh mai bak ah ka Pa hi chu Sa siam hi chu a thiam ve thlawt a, Alvin pawh  a ei tha khawp mai, Hector Arsa erawh tuman kan zen pui lem hlei lo a, ani hi chu Arsa awm hi chuan a lungawi hliah hliah em, chaw ei a piang a hmeh a tum tlat erawh ka nu nen an in khak zing malh malh teh e, mahse ni khat dan ah tal hi chuan a ei ngei ngei, piece 2/1 bak erawh an pe ngailo.  Kei arsa hi chu chawhmeh  dang a awm hlawllo a nih loh chuan ka ei peih der lo.

 

                        Thawh hmat a ngaih avang in Ka pa leh Hector chu dar 9:30PM ah an mu nghal a,  Alvin nen TV kan en a, kan awm dan a lai ve ve bawk nen, en tur ber pawh hre lovin ka hmet kual reng a, a ning ta deuh nge ni Remote chu min chhuh lawp a, Sports channel a hmet chhuak a, keipawh chuan ngawi reng chuan ka en ve mai a.

 

                       “Arelia, ka lawm e aw” a rawn ti zawi sap chu ka va melh deuh ha a, mi pawh a en chuanglo, hmuhnawm tih hmel zet chuan TV chu a lo en ngar a, “engah chuan maw” amah en ran chung chuan ka ke chu Sofa ah ka hlang kang a, min la en chuang miahlo chuang hian “Engkim ah” ka tan pawh sawi zui vak tur avang.

 

                         Dar 10 leh chanve vel a pel tih ah chuan a hawng a, in hnuai thleng pawh ka thlah lo, balcony atang chuan ka thlir liam a, mut hma a ka in bual loh hi chuan ka mutui thei thin lo, ka in tleuh leh zuai a, mutna ka siam fel lai chuan ka whatsapp msg a rawn ri tet tet a, phur deuh chuan ka phone chu ka ban nghal a, in siam rem pah chuan ka han hawng nghal a.

 

                        Ka rin lawk ang ngeiin Alvin “Arelia” tih ringawt hi a rawn thawn a kei lah pawr ve thei re re ka ni bawk nen “Enge” ka va ti teh tlawng a, “I hming hi a nalh thlawt a ni, ka game khelh ah pawh Arelia tih a awm” Dota khel thin chuan an hre ngei ang, Ka pa min phuahsak chhan pawh tlangval lai tanga Dota khel hrat a nia, ka nu nen an inneih hma hian fanu kan neih chuan Arelia ka phuah ang a lo ti tawh reng kha a nia.

 

                             “Ka pa Dota khelh hrat vang a ka hming put a nih hi” ka va tih chuan nui per chuai chuai lai hi a rawn dah tuar a, ka ngei reuh khawp mai, ama bul ah chiah ka hming put chhan ka sawi a, min la nuih zat em em mai lehnghal a. “Kar khat chhung I inkhung bo na chhan chu min hrilh thei tawh em? Ka tih chuan a reh hmak mawle, kei thinchhe ngang chuan ka va chhu zui leh hram a “Min hrilh lo tawp rawh, ka hre chak pit pet lo”

 

                          Nui per chuai chuai bawk chu a rawn thawn leh a “hre chak pit pet la chu ka hrilh mai tur che nia aw” ava han chimawm reuh tak “hre chak lo, mahse ka hre duh” ka tih chuan “I hriat loh hi a tha zawk” sawi lo tawp rawh se, a bialnu pawh ka nilo a, ka hriat ve a tul love “Okay” tih chiah ka thawn avang chuan nuamlo a ti deuh nge ni “ka ti tak tak, I hriat hian I rilru tan pawh a hrisel lo” a rawn tih zawm leh a “Okay” tih bawk chuan ka chhang leh a.

 

              Min lo call ta nge nge a, ka pick ang nge pick lo ang tih ka in ngaihtuah fe hnu chuan a tawp ta daih a, “Bialnu titau peih deuh neih ka chak lo a nia” hepa han zah loh zia hi a bialnu pawh ka ni chai love, chhan pawh ka chhang lo, a rawn call leh a, ka pick ta nge nge a, “Tuna I titau hmel tak kha ka hmu chak, lo thawn teh a” ava han chimawm tak e aw “ka titau bawk lo e a, tihtauh na chhan tur pawh ka neilo” ka tih nghat chuan a nui ri deuh hawk a.

 

                        “Arelia, tunge I best friend” thutak fe a a rawn tih chuan “pahnih ka nei” ka ti ve mai a, a ngawi deuh vang vang a “Mazualteii leh Harsh” ka tih pawh chuan min chhang tawh dawn lo emaw tih tur hian a reh vung vung a.  “Hey, are you there?” ka tih chuan “Chiang e” ka nui deuh sak a. “Hmangaih nei ta la, I hmangaih ber leh I best friend thlan tur ni ta se, tunge I thlan ang”?

 

                          Chu zawhna ber kher chu chhan dan tur ka hrelo tak zet a ni, “Dinhmun a zir a ni mai a, thian tha te hi chu an hlu em a” ka tih chuan “hmangaih te an hlu nep zawk I tihna mi?” hepa te hi a nghal aiin a in la ril reuh zek lehnghal a. “Chutiang pawh ni chuanglo, mahse chutiang dinhmun a din chu ka duhlo” ka ti deuh nghat a, “Kan duh dan hian thil hi a thleng ngai silo a lawm”

 

                    Nun pangngai tak in, harsatna em em nei lovin tun thleng hian ka la awm ve a, duhthlanna harsa tak paltlang ngai pawn ka la awm hek lo, hei vang te pawh hi a ni mai thei, Hring nun harsat zia pawh ka hrethiam phalo hial zawk. Kei lah pek chu, ka lo muhil daih a, kan in biak laiin, zing ka thawh a phone ka check chuan “Muttui suk suk aw” tih hi a rawn thawn a lo nia.

 

                           Class pawh a rawn kal ve leh tawh a, a hmuihmul leh a sam pawh alo met fai veng reuh a, a hmeltha tak zet chumai bak ah amah ti fresh zual turin T-shirt var ala zui, class ah erawh kan thu tlang ngailo thung, kan in nuih a chu zawng chu a ni mai.

 

                      Ka pa in Hector Mizoram lam ah a dah chhoh dawn avang in Harsh min riahpui turin ka sawm a, Mazualteii erawh a Nu a dam chian loh avangin ka sawm ngam lo. Ka pa pawh thang rei a tum hran lo, ni 3 emaw ni 4 vel emaw a cham anga, ka pu dinhmun a zirin rawn chhuk thla thuai dawn tho a. Ka pa te kal ni chuan tlai ah Harsh te in ah chaw ei ka tum zet a nia.

 

               “I pa te an awm lo bawk a, chaw rawn ei la” msg chu ka hawng vat a Alvin lo niin. Ka nui deuh suk a, “Enge kan hmeh dawn” class lak lai lai chuan kan in text char char a “I duh duh ni mai, enge chaw ei chhuah te I duh zawk em?” ka nui ri ngam bawk silo. “I bawl ngei ka ei dawn te chuan ka lo in ngaihtuah dawnnia” min reply tawh lo.

 

                   Class kan bang a, Locker room a ka awm laiin a rawn lut a,”I inthlak phawt dawn nge, ti khan I rawn phei nghal dawn” tih pah chuan ka locker bul ah chuan a rawn ding a “min sawm tak tak mi, nangmah chuan mi bawl dawn”? amah pawh en lem lo chuan ka chhang a “Yes, I duh duh ka siam ang” A ve lutuk hian, a In a eirawng bawl tur pawn Vai nu a chhawr a, khawi lam ah ka ei duh chu a siam lo ang ka ti rilru a, ka sawi chhuak lem chuang lo.

 

                         Harsh bul ah chuan ka phei a, Alvin te in ah chaw ka ei anga, zan ah ka haw hun a rawn phei tur chuan ka chah a, a bialnu  thar nen an nih avang chuan phur zet hian a kutzungpui min hmuh va va a, a bialnu neih atang hian hei pawh hi mi pawh a ngaihsak tawh lo, mahse a awm ve tho mai. A pian a hnu lam a, a vawi khat neihna a nia, kei la nei ngailo erawh min hmusit viau thung.

 

                          Mazualteii hi chu mipa lam hi a ngaihsak ka hrelo, a Lesbian deuh emaw ni aw tih ruk chang ka nei thin, mipa chhelo ai hian hmeichhe chhelo hi a sawi tam zawk thin, mahse a in thuam dan emaw, a aw emaw ah chutiang engmah a awm pawh a ni lo, Mipa ngaihsak lo ve chi hrim hrim a nih ka ring tho bawk a.

 

                       A nu dam that loh avangin Class pawh a rawn kal theilo a. Alvin bul ah chuan in a in thlak a in bual phawt ka duh thu ka sawi chuan a aw ve mai a, Bike chuan kan in lam ah kan in phur phei a, ka inthlak a, ka in bual chhung a alo ei tur snacks leh Juice ka chhawp a, in hnuai ka chhuk leh chuan “E khai mutna rawn pek che ka tum hman hial a lawm, eng em em nge I tih a”

 

         Rum deuh chuan ka melh a” ka in tleuh zuai a nihkha mawle” ka tih chuan phawk fe a min rawn melh pah hian “hmmm I in thleuh zuai pawh minutes 30 a nia, uluk tak a I inbual tur phei chu(h)?” Juice leh Snacks chu ka ban ve nghal a “Phei hma ila” a rawn tih chuan ka lu ka bu nghauh a, kan ei leh in na vel ka seng fel a, tukverh vel ka check a, kan in zui phei ta nghal a.

 

                  An building kan thlen chuan “Lucy I sawm ve dawn em?” ka tia, mi pawh en mang hlei lo in, “sawm dawn nang, nangmah lawm ka sawm che” tih pah chuan Lift ah chuan a lut nghal a, ka zui ve mai a, kan chhoh pah chuan “Unau in ni sia, ngati nge in khat ah in chen mai loh a?” min rawn en zeuh pah chuan “Nula/tlangval kan ni ve tawh a, privacy kan mamawh a, bak ah keimah hian mahni a awm hi nuam ka ti zawk”

 

                 In kan luh rual rual chuan Fridge a hawng a, tui chu  a in khawlh khawlh a, min rawn theh phei ve nghal a. “TV te kha duh leh lo en la, nih loh pawn room ah Computer awm a, kan in tleuh ve zuai a nge kei chu reilo te” a han ti deuh kher a, ka ner zui deuh sak a, Ka nu in min rawn call a, rei ngial kan in bia a, Alvin te in a chaw ka ei tur thu ka hrilh a, engmah phei chu a sawi zawm lem hlei lo a.

 

                       “Room lam ah hian lo phei ve daih rawh” a tih chuan ka bag chu ka khai a, a room lam ah chuan ka lut phei a, in ti fai tu a neih vang te pawh niang, Bedsheet var ngat alo phah a, mahse mipa ah pawh amah hi a fresh ve hrim hrim a. Khum ah chuan zawi muang hian ka thu thla a, ani compute a on a, computer hma ah chair a hung a, a thu a “eng hla nge I ngaihthlak duh”

 

                  “Ka hrelo, Ri bur bur lo chu ka ngaithla duh vek” ka tih chuan a nui deuh suk a, Kane Brown hla “Good as You” ngei mai chu a han play a. “Alvin, ka kawng a kham e, please in I khum ah hian ka mu zal lawk aw, eirawng bawl hma” ka tih chuan “mu rawh mu rawh, mahse muhil lo la” a nui leh deuh sak a.

 

                     Hepa ka duhna em em hi chu,ngeng leh luhlul zet ni si hi, nui huah huah chi ni silo hian a nui deuh sak sak reng hian thinlung hi a fan tak zet. Ka mit ka chhing vang vang a, ka mut na bul rawn hniam sut ah chuan ka phu deuh zawk a, ka meng deuh kawk bawk a.

 

                  Thawh ka tum uai a, “min hlau suh, ka ti na dawn lo che” a mit a chhing zui ve nghal a, keipawh chu tlem chuan ka tawlh sawn deuh a, a rawn tawlh ve zel a, mahse min khawih chuang lo, hla kan ngaithlak chhung chuan a meng tawh lo, kei erawh amah chu ka en reng a, a zai zo chiah a, ka tho nghal hluai a, Kitchen lam ah ka phei nghal a.

 

                 “Enge kan siam dawn” ka ti lawng lawng a, zawi fahran hian a rawn phei a, “Ka va bazar lawk ang” tih leh Helmet ban a rual a, “Ka lo kal ve dawn mi” ka tih chuan “Khua a lum em mai, ti khan lo awm hahdam rawh” tih pah chuan min chhuahsan zui nghal a.

 

                      Tih tur awm lo nen ka phone a game ka neih chhun leh ka khelh ve peih awm chhun “Mindi” chu ka khel a, rin ai takin a rei nge ni ka khawhar vang zawk pawh ka hrelo. Darkar1 dawn ah a rawn let a, a rawn in khai bawr lut khawp mai a. Safdarjung ah NE dawr ah al ova kal chu niin. Vawksa rep, maian etc Mizo chawhmeh hlir chu a rawn khai lut a.

 

                   “I siam thiam ang tiraw?” min nuih deuh sak pah a a rawn tih chuan “Chaw ei ah min sawm a, keimah min bawl tir dawn a maw?” ka bawl peih loh vang pawh nilo vin, ka fiam chak ve hrim hrim. “Ka siam I ei duh phawt te chuan ka hreh hleinem, I ei tui lo ang tih ka hlau a lawm” Chhuanlam hi chu a nei tha ve thei a nia.

 

                      “Chaw ka chhum thiam a, vawksa pawh ka siam thiam mahse bai kha chu tihngaihna thlawt ka hrelo” ka nuih sen sen a, “ka lo bawl ang” ka tih pawh chuan bai siam tur chuan min tia, a bak a man a ti ta vek a, “kan van bawl hma em em, chaw I ei hma thin a mi a” ka tih chuan “Bawl thuai thuai ila, In bual ila, chuan movie kan en dawn nia” Ka bu nghauh a.

 

                    Eirawng kan bawl fel hnu chuan, a room lam ah chuan kan phei a, Netflix ah Movie thar “Unbroken” chu kan en dun a, kei hi ka hre lo, ka nu leh pa leh midang pawh ni se, ka ngam tlak tak te pawh an khum a, han lawn ve mai zel hi ka hreh deuh tlat thin. Chair ah chuan ka thu a, “rawn thu thla ve daih rawh, a movie kha a rei dawn a nia, darkar 2 vel a nia, ti kha chuan I thu reng peih lo ang”

 

                       “Nileng pawn class ah kan thu thin a, darkar 2 lek thut te chu a har lo em mai” tih pah chuan coke chu ka ban nghal zat a. “Nileng chuan I thu lo deuh ang a, Minutes 40 bak I thu ngailo aw, chuan I tho a, washroom I kal a, I tei kual bawk a” a rawn tih chuan ka nui ve tawp. “I chhe zit zet” tih pah chuan khum ah chuan ka chhuk thla ve leh ta nge nge a.

 

                                 Movie kan en zawh meuh chuan dar 8 a rawn ri ta der mai, “I ril a tam tawh em” a tih rual a ka pum ri rawk rawk chu kan nui dun hawk a, rang zet in a in perh tho nawlh a, kitchen lam ah a phei a, keiin a hnung lam ah ka zui nghal a, “khua lum bawk sia, kitchen lam ah chaw ka ei peih vak lo, room ah in chawi mai ang” room lam ah chuan kan in chawi phei a.

 

 

              Kan chawmhmeh siam a thak dun bawk a, tui kan in in chhawk zak zak mai, kan si dun nasa ngang mai, kan ei kham chuan thleng sil ka tum a, a phal bik lo, aman a sil vek a, keiin ka lo rem fel thung a, Harsh an min rawn call a, hruai ka ngaih leh ngaih loh min rawn zawt a, Alvin en pah chuan “min thlah dawn nge, Harsh an min rawn hruai dawn?”

 

                   “Ka thlah ang che, ala hmanhmawh thlak loh” a ti deuh nghut a, Alvin an min thlah tur thu ka sawi chuan a nih pawh chuan In ka thlen hun a call mai turin min chah a, dar10 a pel tih chuan min thlah a, in ka thlen dawn hnai ah Harsh ka call a, kan in kawt ah min lo nghak a.

 

                   Farnu tak tak pawh nei se, kei min ngaihsak a, min duat leh min ven him tluk hian a farnu diktak pawh a tih ka ring bik lo, mi hi a ngaihsak tak zet. In a leng rih tur a ka sawm chuan, a tlai tawh em mai tiin a haw zui nghal a. In kan lut chiah a, “In in kar ah awm a awm em ni?” tiin min zawt zui nghal a.

 

                     “Awm love, ka thianpa a nia, nangpawn I hriat kha” ka han ti thla ringawt a, “Engmah ka hrelo, engkik lai atang khan nge I thianpa a lo nih a?” a nui miah lo, nidang ti ila, kan school kal ve thin lai te khan, miin minlo star emaw te khan min fiam a, a phul hlut thin, tun ah chuan a ni miahlo.

 

                  “Ka mut a chhuak, mu ang” ka tih pawh chuan “Mu lovang, in in kar ah hian thil a awm e, min chhang rawh” a rawn ti leh a “ka sawi tawh chu, engmah a awm lo”  ka ti ram deuh hmak a. “I unaupa ka ni a, I thian ka ni bawk a, bialnu ka neih ve pawn ka hrilh che a, Bialpa I nei a nih chuan hriat ve hi ka phu a lawm” ala ti hram mawle.

 

                       “Harsh, vawi engzat nge ka sawi dawn?, kan in ngaizawng lo, ka hmuh vawi khat na tang khan ka duh lutuk mahse engmah ka sawi ngailo, I bul emaw, Mazualteii bul ah pawh, a chhan chu a zu in thin te vang hian min duh pui dawn lo tih ka hria a, ka star ve mai mai a lawm, amah hian min duh ve lo bawk a” tiin dawt ka sawi ta ngawt a.

 

                       “A duh ve lo che tih engtin nge I hriat?” hepa hi zan in chu zawhna a va han ngah tehreng em! “Min duh ni se chuan mipa a nia a sawi ang chu” a mit ah tak pawh ka en ngam lo. Ka lung a awi vak lo tih a hrethiam a niang, in thiamlo deuh hian “hei naute (ka thinrim apiang a min koh dan) thinrim suh, hlim takin awm la ka duh a chu aia ka dah pawimawh chu I him na hi a ni”

 

                        Ka bu ngauh a, room lam ka pan san nghal a, tlem chuan a in thiam lo ve deuh a niang, ka room ah chuan min rawn zui lut leh hram a, ka in bual zo ka va chhuak chu ka khum ah that chhe zet hian alo mu der der a. Melh pawh ka melh tha peih lo, ngati nge, ka thiante pahnih hian Alvin hi an ngainat miahloh? In zawm na kan neih hi an hlauh tlat le?

 

                   Zawh chian ka duh a ni, ka hriat miah loh thil hi hriat te pawh an lo nei thei mahse ka thian tha te an ni a, min hrilh ngei ang. A bul ah chuan ka zuk thu thla a “Harsh, Alvin hi misual a ni em?” phawk fe hian min rawn en a, a ngaihna a hriat loh hmel khawp mai.

 

                  A rawn thu chhuak a, “Misual a nih leh nih loh ka hrelo, mahse Zu te a in a,a bak chu han sawi selna pawh ka neilo mahse Mzi (Mazualteii a koh dan) hian a hre chiang a niang, ka bul ah a sawi tlat a” a tih chuan mak ka ti, ka thian nu ve ngawih ngawih hian min hrilh lo a maw?

 

                 “Enge a sawi a, enge a hriat chu?” ka tih chuan “nangpawh a hrilh che ni lawm ni?” ala rawn ti ta ang deuh deuh a. Mak ka ti tulh tulh “engmah min hrilh lo, zan ah Alvin lo kal laiin room ah min ko a, Ka nu leh pa ten an duh loh tur thu chauh a sawi a, Harsh, I u te pawn zu an in a misual an ni a mi?”

 

                    Chu zawhna ka zawt chu nuam lo ka ti deuh a, a mah pawh a inthiam loh hmel fu mai, mahse ka ti tak tak a lawm, mi hi Zu an in a, weed an zu emaw, damdawi lo khawih pawh nise, an sual bik em em na ka hrelo. Zu in miah lo rilru chhe deuh pawh ka hre ve tho a, midang khei ran, fel inti em em ai chuan miin misual a kan ngaih rilru  tha tak tak an tam, chumi avang chuan ruihtheih thil ti ho  ka support tihna chu a ni hauh lo.

 

                  A theih chhung chu tih loh ka tum a, enge maw a thian ho inkawm nan a, an lo in  a nih pawh in tupawh ka va hmu khawlo ngailo a mahse a theih chin chin ah chuan kei chuan tih loh ka duh a, zu ngawilvei emaw, Drug addict te hi chu ka hmusit lova, an tih chhan chu engpawh lo nise, harhfim, rilru fim tak leh huaisen takin khawvel an hmachhawn tur a ni tih hi ka ngaihdan erawh a ni thung.

 

                      “Broken family atanga seilian a nia. A nu phei chu a hlauhawm lutuk a, a fapa tan chuan a duh lo ang Mzi khan a ti che a, ka hlauthawng a lawm” a tih chuan ka hrethiam kuar kuar mai. Alvin nen kan in kawm ve hnu hian ka thian tha a nih angin Mazualteii pawn a chanchin te min lo chhui sak a ni ngei ang le.