ARELIA -6

              “Alvin I hrilh tawh em” ka nu in a rawn ti ban deuh charh a, chhan pawh ka chhang lo, ka lo ka thing ringawt a “Mate, I fa paina pa chuan hriat a phu ve sin” ka hria a lawm, mahse kan nufa hian min hnawlh ka hlau a, phatsan nih ka hlau a ni.

 

                   Ka nu chuan min chhuahsan a, Alvin chu engtin nge ka hrilh ang tih mawlh ka rilru ah a awm, ka rai ka va ti tawp dawn em ni? Ti tla turin min lo ti ta se, a nih loh pawhin min kalsan si se, ka lu chu ka thing nawk nawk a, nilo engtik ah mah Ka hmangaih leh min hmangaih em em tu Alvin hian kan nufa hian min phatsan hauh lovang .

 

                  Zan ah chuan Mazualteii ka call a, engkim mai chu ka hrilh ta vek a, ka chhungte an thinrim leh rim loh te chu min rawn zawt a, min ngaihtuah tak zet. Min lawmpui thu a sawi rual chuan Alvin hrilh nghal tur chuan min ti ve ta tho a, ka nu nen an ngaihdan pawh a lo in ang chiah a ni.

 

                Kan exam chawlh hun chhung a rei ti ila, kar 3 vel a nih avangin a Nu in haw tur a a chah vangin Krismas hmang tur a hawn a tum thu min hrilh a, a haw hma ngei a hrilh chu ka tum ve ta a. Mazualteii chuan a haw hma ni a hrilh tur leh min chhan dan te hrilh ve tur chuan min ti a.

               Kan in ah pawh a rawn leng reng reng a, lehkha zir ngai tawh lo bawk nen, ka nu leh pa in ka hrilh leh hrilh loh thu min zawt ve sek a, “naktuk ah ka hrilh ang mahse minlo hnawl ta se engtin nge ka awm ang?” ka tih chuan Ka Nu chuan “Mate, a hmangaih zia che kan hria a, a phatsan miah lo ang che, tun ah I hrilh lo a nih chuan amah pawh in a dem lutuk ang che, engpawh thleng dawn se, ka hrilh thin che ang khan I kova mawhphurhna awm chu hlau chung chung pawn I hmachhawn tur a ni”

 

             Mazualteii ka val call a, “naktuk ah hawn a tum a, zan in ah ka hrilh ang” tih thu chu ka va hrilh a.  Kan in biak zawh chuan dar 11 vel a ni ta in ka hria, Alvin chu ka call ve ta nge nge a, a lo pick rang kher mai, “Alvin” sawi ka va han hreh tak em! A ni pawh, chhungkaw din a mawhphurhna la turin ala naupang lutuk bak ah thawh chhuah pawh ala nei bik silo, ka hlauthawng tak zet.

 

               Ka hmel hmu lo  mahse, ka hlim leh hlim loh te, ka awm dan engkim ka aw atang hrethiam thin tu chuan ka that leh that loh min rawn zawt nghal thuai a, “Alvin” ka ngawi leh rih a, a tawp a tawp ah chuan ka mit chu ka chhing a “Ka rai” ka thaw hawk in ka hria.

 

                Engtin nge min rawn chhan dawn pawh ka hrelo, ka hlauthawng lutuk, ka thinphu dup dup rin zia te chu, thenawm khawveng pawn an hre phak hial hian a nia ka rin ni! A ngawi reng a engmah a sawi tawh lo, phone chu a dah zawm nghal a. Tlai dar 6 a flight a nih tho avangin chhun ah lo kal tho ka ring a ni.

 

                     Ka call let leh pawh chuan min chhang tawh lo, , min hmu turin alo kal a nih ka ring a, mahse  Dar12 thleng chuan alo la kal awm ka hrelo, in hnuai ah a awm a nih ringin ka room atang chuan ka chhuak a, in hnuai lam chu ka zuk bih a, alo thim thiap bawk si.

 

                    Ka hlauhthawn ang ngeiin min phatsan ta ah ka ngai a, ka na ngawih ngawih, ka call leh thin a  la theilo mai ni lovin, a switch off ta hmak, ka lo hmangaih em em leh min hmangaih tu a ka ngaih ve in ti hian min phatsan leh si a maw? Mahni in khawngaihna leh in lainatna a rawn lian tual tual a,ka beidawng tak zet.

 

                           Kei hian engtin nge keimah chauh chuan ka enkawl theih ang, ka call tlut tlut a awmzia a awm bawk silo. Ka tlaivar chiang ngang mai, min hnawl ka rin tho rual khan ka thinlung lehlam ah chuan min hnem a, mawhphurhna la a, min phatsan loh tur thu a sawi te kha ka ring si a.

 

                        Chhin khat pawh ka chhing lo, zing ah ka nu leh pa ka room ah an rawn lut a, khum a ka lo thu an hmuh chuan, ka nu chuan “I mu miah na nge” tih pah chuan ka bul ah chuan a rawn thu thla ve nghal a, ka lo ip pik bawk nen, ka nu chu ka kuah a, ka tap hawm hawm a, ka pa rawn kal hnaiin ka lu ah chuan a rawn chul a.

 

                  Hun harsa tak ka paltlang lai pawh a min phatsan miahlo tu mai nilo, ka tan a ding tlat, he ka nu leh pa hi eng ang mihring nge maw an nih le? Ka pa chuan “Alvin chu I hrilh tawh em” a tih chuan ka call a pick duh tawh loh dan te, a switch off tlat thu  ka han sawi chuan ka nu leh Pa chu an ngawi reng a.

 

                 Ka pa chu a chhuak zui vut a, ka nu chuan a um zui nghal a, hreawm ka va han ti ngawih ngawih tak e aw, Ka pa kha ka lak ah a thinrim lo mahse Alvin lak ah a thinrim tih ka hrethiam mai, Ka pa hi pa zaidam tak mahnise a thinrim tawh hi chuan a mit a del vek thin.

 

                Ka nu chuan Ka pa chu kal lo tur chuan a dang nasa khawp mai a, ka room kawngkhar atang chuan In hnuai lam chu ka zuk bih dek dek a, Ka nu in ka pa ban a chelh pah chuan “In sum deuh the, thinrim lai a chet buan buan hian kawngro a su lo a nia, Alvin pawh ala naupang a, decision a siam mai theilo pawh a ni thei, hun kan pek a ngai a lawm”

 

              Ka pa chuan ka nu dar tawn tawn ah chuan a vuan a “Ka fanu pawh ala naupang lutuk, mahse mawhphurhna a la ngam, hmeichhia zawk a ni chung pawn, khawngaihin a naupanna kha chhuanlam ah hmang suh, Mipa a nih chhung chuan eng pawh thawk se, thawk lo se,kum engzat mi pawh ni rawh se a hma a mawhphurhna awm chu a la ngam tur a ni a sin, he thil ah hian ka fanu chauh hi a thiamlo bik reng reng lo”

 

                                     Ka nu hi a thinrim lo a ni bik lo, mahse ka pa heti a nih tawh si ah chuan a insum nasa hle tih ka hre mai “Ka hria, ka hria lawm. Arelia pawh kan hrilh tam tawk lo te pawh  a ni thei” a han ti chiah chu ka pa thinrim tawh bawk si nen chuan ka nu chu a nam sawn deuh dawrh a “Kan fanu hi mawhpuh tawh suh, kha mihring nep lutuk avang khan”

 

                            Ka hriat tirh ata Ka pa in ka nu a vin vawi khatna a ni, chupawh a thiamloh pakhat mah a awmlo, keimah vang, keimah vang vek a ni. A hreawm dan hi a thuah hnih ngawih ngawih tih bak hi sawi tur pawh ka hre tawhlo, ka khum ah ka let phei a, ka bawk thlawp a, ka lukham ah ka hmai ka phum a, aw rawl chhuah meuh a tah ka va han chak tak em.

 

                         Ka pian hlim ah min hringtu ka nu leh pa ngeiin min hnawl a, min phatsan a, Ka nu leh Pa(tun a mi te) hian min lak hian thla 3 chauh ka nia, an sawi an sawi duh lo a mahse thil awmzia engkim min hrilh kha a nia, min lakna Home te sawi dan in January khawhvawh zual lai tak maiin, Home (ka lo awm na) gate ah ka birth certificate lukham chungin min lo kal san a nih chu.

 

                   A vawi hnih nan phatsan leh hnawl ka ni leh dawn a nih hi! Ka pum chu ka chul a,”Ka naute, kei chuan engti kawng mahin ka phatsan ve dawn lo che a nia aw, ka venghim reng ang che, eng dinhmun ah pawh ding ila, I tan ka awm zel dawn a nia” ka mittui chu fur ruahtui tla duh an sawi ang mai ban zai reng a rel theilo, a dir tluk tluk reng mai.

 

                       Thil awm dan Mazualteii ka va hrilh ve nghal a, a ni pawh Auto la in a rawn phei ve nghal a, kan awm na veng in ang mahse ke a han kal nan chuan hmanhmawh thil ah chuan tlem in alo hla ve deuh bawk nen. Ka pa rawn haw chuan, kan lo melh thap a, ka nu chu room lam ah a ko lut nghal a. Ka va han hlauthawng tak, engtin nge an va in tih ang le?

 

                          Mazualteii kut chu ka hum char char a, a ni pawh chuan ka kut chu min lo vawn sak ve nghal a. Ka pa chiah chu room atang chuan a rawn chhuak a, engmah ka zawt ngam lo. Mazualteii chuan “Pa Henry, Alvin chu I va be thei ta em?” ka pa chu ka bul ah a rawn thu thla a, min kuah a, ka chhip ah chuan a fawp vang vang a, ka ngaih erawh a that phah lo mai nilo in , ka hlauhthawnna a zual tak zet.

 

                      Ka nu pawh a rawn chhuak ve leh nghal a, ka pa bul ah chuan a thu a, ka pa dar chu a hmer ngawt ngawt a, mit khap lek lovin ka nu leh pa awm dan chu ka melh char char a, enge maw tak, engpawh nise sawi se ka duh ngawih ngawih. Mahse, zawt turin ka aw rawl reng a chhuak theilo.

                  Mazualteii phone a rawn ri a, balcony lam ah a chhuak thak a, chutih lai chuan ka pa chuan “Alvin chu ka va hmu lo, Mizoram lam ah a haw tawh a niang” a ti chuai raih a, awih harsa ka va ti em, a flight chhuah hun pawh ala ni silo, “Pa, tlai dar6 ah lawm a flight tun ah zing dar9 chauh a nia, engtin nge a haw anga? A bike I hmu em?”

 

                          “Hmu lo” ka tho vut a, ka phone ka la a, Lucy ka call nghal, henu hi a la mu nge a pick thei reng reng lo mai, vawi 7 zet ka call nawn hnu chuan tho phang aw tih hriat zet hian min rawn chhang a “Khawng Alvin?” ka va ti tawng a, a hriat loh thu leh khum atanga a la thawh chhuah loh thu a sawi a.

 

                     “Lucy, khawngaihin a awmna chin hriat tum teh, a nih loh pawhin, ka rai tih hi Alvin nu hrilh rawh” ka tap pah bawk a, Lucy pawh a harh kawk a niang chu “eng maw I sawi” ka thusawi a hrechiang lo pawh a nilo, mak a ti a ni tih a aw atang chuan ka hre thei.

 

                “Ka rawn phei ang” tih leh phone dah chu a rual nghal a, darker chanve vel hnu ah a rawn thleng ve a, kei ka lo tap pur bawk si, ka nu chuan thil awmzia a hrilh zung zung a. Lucy chuan “Nizan khan a dar zat chiah ka hre tawhlo, ka in ah party kan nei a, 12 vel a nih loh pawhin 11:30 vel a ni maithei, ka in ah a rawn chhuk a, a bike chahbi leh helmet nen”

 

             “A kalna tur ka zawh chuan, thil pawimawh ah a tia, a chhuak zui nghal chu a ni mai a bak chu engmah ka hre tawhlo, ka thian te kha dar 4 vel ah an hawng a chuan ka mu zui ve nghal” min phatsan lo ang mahse khawnge a awm, nizan atanga a chhuak tawh engmah a chanchin kan hre silo.

                A number ah chuan kan in call chhawk zak zak hlawm a, a in ah te ka pa leh Lucy chu an va kal leh a, alo in kalh thiap bawk si, ka tha a khur der der a, kawng lak ah tawhsual a tawk em ni? Mahse zan rei tawh ah chuan jam a awm bawk silo, hospital hnai vai kan theih ang ang kan be kual a, tumah a Alvin ang tur admit emaw an awm silo.

 

            Lucy chuan Alvin nu a call nghal a, ama chhungte (Alvin pa) te lam a be nghal bawk a, Police Station lam a kal kan tum ta ringawt a, vawiin chawhnu ah Alvin nu leh Pa an lo chhuk ang tiin Lucy chuan a sawi a, kei erawh ka zawi vek, engmah ka ti thei tawhlo, ka melh ngai ka melh reng a, misual in an lo man em ni?

 

                Tlai dar 4 vel ah Lucy leh Ka nu leh pa Police station lam atang chuan an rawn let a, an hmel ah chuan hmasawnna engmah a awm lo tih hriat zet hian an rawn ngui hawng em em mai lehnghal. FIR chu an han thehlut ve a mahse darker 24 tal a ral phawt loh chuan hma han lak vak ngaihna  a awm bawk silo.

                 Ka pa in a hmelhriat DSP te chu theih anga chak a hma la tur chuan a han ngen a mahse accident na hnu hma reng reng kan in leh Alvin te in in kar ah chuan a awm lo. Zan dar 9 ah Alvin nu leh pa an rawn thleng a, kan in lam ah an rawn kal nghal a, ka nu leh pa te nen chuan ro an han rel zung zung a mahse hmalak dan tur erawh hriatthiam a har tak zet.

 

                Lucy leh Mazualteii chu ka bul ah, ka room ah an awm ve reng a, vawi khat pawh min kalsan lo, min hnem a, mahse min hnem tu te pawh chuan an thusawi chu an ring zo lo tih an mitmeng ah chuan a lang reng mai si,an mi hnem na  tawngkam te chuan min thlamuan zo lo. Zan ah pawh chuan Mazualteii leh Lucy chuan min awm pui chawt, a min riahpui bawk a, Ka tan hian an hlu tak zet a ni, theih ang angin hma an la a mahse engmah hmasawnna reng a awm thei bawk silo, tah tawp loh chu tih theih ka neilo a ni.

 

               Alvin nu leh pa pawh kar 2 aia rei mah an cham a, hmuh theih khawp in Alvin nu pawh a taksa a chhe thei. A Fapa neih chhun, a hmangaih leh a duat em em mai khuangcher bo a a han bo tawp mai chu tawrhthiam a har dawn em a sin. Tu nu leh pa mah hian mahni fate awmna chin hrelo a kar1 khat han awm chu an tawrh theih ka ring lo.

 

               Thla a vei a, class erawh loh theih loh na vangin ka kal ve zel a, ka pum erawh ala hriat lem loh, ka final year (5^th Semester) alo ni ve bawk nen, han bansan tawp chu ka ui ve bawk si chubak ah ka nu leh pa hian an remti dawn lo hrim hrim. Nitin mai a, kan sulhnu chhui chu ka tan chuan ava han Na in ava han hreawm tak.

 

                 Kan college compound ah hian Banyan Tree upa tawh zet hi a awm a, tah chuan break apiang in kan thu dun thin, class kal tur min hruai a, ka hawng min thlah leh a, mahse tun ah chuan a awm tawh lo, ngati nge ka lo hrilh kher kher le? Mawhphurhna a la ngam lova min tlansan em ni?

 

                October a nau nei tur ka ni a, August kan chuan kai meuh chuan ka pum pawh a puar ve ak ak tawh, vai ah hian pasal neilo a nau pawm hi sawi tur an awm manglo, chuvang chuan mak an ti em em a, nitin min hmu chung hian min en duh ngawih ngawih.

 

                    Class kan bang In ka lut chu ka Nu leh Alvin nu hi Living room ah anlo thu a, Alvin Nu in min hmu chiah chu a rawn ding chhuak a min rawn pan a, min kuah vawng vawng a, a tap hawm hawm a, kei erawh ka mittui pawh a tla lo mai nilo in ka hrelo ka hnuk a ulh ve eih lo. Keimah hi ka chawmawlh vek ni ber hian ka hria.

 

                “Arelia, enteh, ka fapa Krismas rawn haw hnu hnun ber khan maw Nu, hmangaih ka nei a,Arelia a nia an chhungkua ang chhungkua hi din ve ka duh” a ti a sin, a mittui chu a hru leh zauh zauh a, ka nu in a dar ah a chelh a, “Ka Pi,(han koh mai dan tur ka hrelo a ni) I fapa kha ka hmangaih a, a fa hial ka pai a mahse a ni chuan mawhphurhna la ngamlo in ti hian a bo hmak a”

 

            Ka rilru diktak a ni miau a lawm, min lo hmangaih ve emaw ka tia, mahse ama fa a rila rah ngei pawh a pawm theilo a, kei minlo hmangaih lo a nih pawhin engvangin nge a fa tal hi a pawm theih loh, chutiang khawp a mipa lak tlak loh chu ka lo hmangaih a nia.

 

              Ka kut chu a rawn vuan a “Arelia, enteh, ka fapa hian engtik ah mah a phatsan hauh lovang che tih ka hria a ni, ama thisen a fa ngei phei chu a phatsan hauh lovang tih hi ka tiam ngam a che” a rawn ti chuai raih a “A nih si chuan tuna a awm dan hi engtin nge I sawi fiah dawn?”

 

                      Ka Nu chuan min rawn mitmei a mahse ka insum peih tawhlo, kha leh chen ka lo pai tawh ka thinlung a thu awm zawng zawng hi puan chhuah vek ka duh. “In hria em, ka hmangaih che min ti a, ka thianghlimna ka hlan a, a fa hial ka pai a, chuan ka hrilh zan ah khan engmah pawh min chhanglo, a reh hmak a, phone a dah zui nghal a, ti hian a reh ta char char a, chuti chung chuan min hmangaih thu In la sawi ngam zawk a maw?”

 

                    A au hian ka au hi a ni ringawt, ka nu chuan min rawn kuah a, mahse tah ka tum tawh lo, ka mittui pawh a hul vek tawh, kum naupang te in ti hian pa tello in nau ka pai a, ka hring ngei bawk ang, chu ah vai ram ah lehnghal, hmuhsit, mualpho zawng zawng ka paltlang vek a. Min ti na lutuk hi ka na thei tawhlo zawk ni ber hian ka hria.

 

                  Alvin nu chu chaw ei ah an sawm ngial pawhin ka awm dan in a zir loh vang nge chu ka hrelo, an chelh lui thei ta lova, hotel lam ah a In sawn phei a, ka room ah ka tawm char char a, Ka pa rawn haw chuan in hnuai lam ah ka chhuk thla ve ta hram a.

 

                September kan chuangkai a, Internal exam tur ah ka in buatsaih ve a, ka rilu ah erawh a lut mawh thin, Alvin hmel bawk chu a rawn lang leh thin. Min phatsan tu hi ka hre reng lovang ti mahila, ka pum chhung a ka fa, Alvin thisen ngei mai chuan min theihnghilh tir thei silo.

 

                Kan chetsual hmasak ber tum a “Alvin, lo rai te ila engtin nge ni ang, hna ka la nei lo mai nilovin zirlai mai kan la ni sia” ka tih lai a”Ka chawm thau ngawt ang che” a tih tum a ka thinrim zia te kha ka mitthla ah a rawn langa, min phatsan nise ngati nge a Nu hnen ah a kir si loh? Mi kut tuar nise ruang chhar emaw zing ah tel ve tur a ni bawk si.

 

            Internal exam pawh kan tan chho ve leh tawh a, Paper IV kan tih dawn ni chuan Mazualteii, kei, Lucy leh Tony chu lunch kan ei ho va, kan ei hnu rei vak lo ah chuan Exam hall ah kan lut a Question2 na ka chhang tih ah chuan ka pum hi a rawn na riai riai a, kan thil ei a ni ang tiin tui ka han in deuh pawp a, a rei tial tial a, a na telh telh

 

                        Ka thlan fim in min rawn bual a, awm ngaihna ka hre ta reng reng lo, ka pen pawh ka hum tha thei tawh lo, a na tih hian a sawi fiah lo a ni ber, kei hi nau ka vei em ni, mahse thla leh chu pawh thla tawp lam a nei tur ka nia, tun ah September thla tir mai a la ni si, ka khur ru der der a, ka piah a thu Amandeep chuan ka that leh that loh min rawn zawt.

 

                        Chhan pawh ka chhang thei tawh lo, ka kun a, dawhkan ka bawh a, kan professor chu a rawn phei a, midang ka ti phawklek vek tawh, a then an rawn tho, min rawn kilh deuh luai a, thu turin a ti thin mahse ka thiante pahnih Lucy leh Mazualteii erawh an chhang zawm tawhlo.

 

                    Class room atang chuan min kuah chhuak a, Medical room ah min hruai a, Mazualteiin ka Nu a call nghal a, kan in atang a hla lutuk lem lo bawk nen, ka nu pawh hmanhmawh takin a rawn kal a, minutes20 vel ah a rawn thleng a, engmah pawh ka sawi thei tawh lo, ka dang a ro huam huam a, ka pum chu ka dawm ngawih ngawiha.

 

                     Ka thiante pahnih leh ka Nu chuan Max Hospital Saket ah chuan min tlan luh pui nghal a, ka neih hun ala nilo tih te chu ka nu chuan Doctor leh Nurse Duty te chu a han hrilh zung zung a, damdawi eng eng emaw min pe a, Ka pa in Cabin a awm tura min tih avang chuan cabin ah chuan kan awm a.

 

                        Ka luak nghek bawk a, test hrang hrang kan ti chhunzawm reng bawk a, darker 2 hnu a ka test result chuan min va han barakhaih chiang tak em!  Doctor chuan ka nu bul ah Tur ka taksa ah an hmuh thu a hrilh a nih chu. Nau ka pai hnu phei chuan ka nu hian min uluk em em a, pawn lam chaw ka ei zen zen lo, tiffin min pai tir a, naute leh ka tana tha tur bak chaw ka pai ngai lo.

 

                             Vawiin ah pawh ka tiffin pai bawk ka ei leh a, midang ta pawh engmah ka ei lo, ka tui pai a zawh avangin Canteen an Mineral Water ka lei a chu zawng chu a ni mai, “Ka naute a tha em?” ka ti nghal vat a, keimah lam ka in ngaihtuah thei tawhlo.

 

                     Naute a that thu leh keimah pawh ka that thu a sawi chuan ka thaw huai mai, mahse test dang ho erawh naktuk ah chauh result a chhuah tur thu a sawi a. Lucy leh Mazualteii pawh chuan mak an ti ngei mai, ka nu bul ah pawh ka tiffin pai chiah ka ei thu chu an hrilh ve mawlh mawlh a.

 

                              “Lalpa, ka naute min venhim sak avangin ka lawm e” ka mittui chu a rawn luang ngiai ngiai a, ka nu min kuah nghal vat, Ka pa leh Hector pawh dar 6 vel ah an rawn thleng ve a, ka nu in thil awmzia a hrilh chuan ka pa chu a lungawi hlawllo tih a hmel ah a hriat a ni.

 

                       College ah complaint thehluh a tum thu a sawi chuan ka Nu nen chuan kan dang bet thei ta hram a, Canteen chaw emaw, thian te chaw emaw chu ei ni ila puhmawh tur pawh an awm thei mahse keima tiffin pai ngei ka ei a, tui lah ka pai ngei, ka pum a nawm loh tan deuh hnu ah chauh khan ka tui lei kha In ka ni si a.

 

                    Zan2 vel bak riah a ngailo ang an tih vang chuan ka nu in min awm pui a, “Nu, enteh amak ka ti e, Alvin hian mawhphurhna la ngam lovin, a inti hlum anga, chuan a thlarau hian hreawm a ti leh si anga ka naute hi khawvel eng hmuh tir ve a phallo a niang a” Ka nu chuan phawk fe hian min rawn en a.

 

                 A lehkhabu chhiar lai chu dahin a thutna tang chuan a rawn tho a, ka khum ah chuan a rawn thu kai a, “Alvin hi khawi hmun ah pawh awm se, chutiang rilru chu a pu ngailo ang, Mate, ala dam hi ka ring tlat a sin” min veng thawng tak  a a rawn tih chuan “Nu, dam mahse ka tan chuan awmzia awm lo, kan nufa tan hian a thi tawh, min phatsan a lawm, kha mihring dawihzep lutuk kha”

 

                         Ka sawi zawm thei tawhlo, ka thinrim lutuk hi ka puakkeh mai dawn hian ka hria a ni. Ka nu chuan duat tak in ka sam ah min chul a, ka chal chu a rawn fawp zeuh a, kan boruak thlak tum chuan thil dang a rawn sawi zawm a “Mate, a hming tur te I ngaihtuah tawh em?

 

                 “Mipa a nih chuan Aldo ti ila, hmeichhia a nih chuan Aly ti ila, enge I ngaih dan?” ka tih chuan “Wow ava mawi dawn ve a, keichu hmeichhia nise ka ti, hmeichhia hi ka la duh tawp thei meuhlo” a rawn nui chhuak deuh hawk a, keipawh chu ka nui ve suk suk a.

 

                    Zan 2 kan riah hnu chuan zing ah ka pa leh Hector chuan min rawn hruai a, exam erawh ka pe tluan ve thei dawn ta lo mahse min hrethiam a, bak ah ka lo thiam thei ve tho bawk nen, chawl hahdam turin kan principal chuan min rawn ti a, ka lawm tak zet. Class kal chak loh nen a nuam  a sin aw.

 

                      Zan khat chu ka mu hil siar siar tawh tih hian number hriat loh atang hian min rawn call a, pick ka tum chiah a, a reh leh daih a, ka mut lo chhuak ve tawh nen ka mut san leh a, zan ti ila zing dar2 leh chanve vek ah number ringawt hian min rawn call leh a, ka lo mutui deuh nge ni chu number atang chuan vawi 3 lai miscall a lo awm nia mawle.