ARELIA-7

            Zing ka harh chuan ka phone ka check a, ka call back a, vai hian min rawn chhang a, engtin nge ka number I neih tiin ka han thinrim viau na in Mi pakhat in a phone hman a dil thu leh, hmanhmawh tak a a kal leh thu a sawi a. Ka thinlung hian alo la thlah fel lo nge ni ang, hlauhthawnna leh beiseina beidawn thlak zet ka nei leh hman pek a, Alvin a ni thei a ngem, ka dah hnu chuan ka in ngaihtuah a, ka hlauthawng tak zet.

 

                  Ka call nawn leh a, alo be tu chu en gang mi nge khawi lai hmun ah nge tih ka zawh chuan Foreigner a ang a tih thu leh hmuihmul a neih thu te, a san zawng te a sawi a, Alvin an hmui hmul a nei ngai silo,khabe hmul kha chu tlem kha chu a nei ve thin a.

 

               A lo call na hmun ka zawh chuan Punjab tiin min chhang a, number kal sual a niang tiin ka in hnem a, ka thinlung chuan chu ka in hnemna chu pawm har a ti hle bawk si. In hnuai ah chuan phur lo zet in ka chhuk a, ka rit ve tawh nen chet vel pawh ka nu hian min awl nasa.

 

                     Tlai tin erawh ka pa nen Evening Walk neiin hun kan hmang thin a, ka hreawm hlau reng reng a hmangaih tak a min enkawl na hian a chang chuan kan nufa vanduai zia hi an ti zual te hian ka hre thin. Mahse, mahse  ka mawi loh lai ber leh ka chhiat lai ber pawh in ka tan an ding tlat a, min  en san chu sawi loh min kuangkuah a, min hnem thin tu ka nu leh pa , ka tan chuan an va han hlu ngawih ngawih tak em!

 

                       Breakfast kan ei lai chuan call ka dawn chu ka hrilh a, ka nu leh pa pawh keimah ang thovin beiseina an mit a rawn de zawk zawk chu ka hmuh hmaih hauh lo, ka Pa in “Alvin alo nih palh tak hlauh in  Police kan hriattir dawn em ni”a tih chuan ka nu nen ka pa chu kan en rual thawt a.

 

             Ka nu leh pa pawh in beiseina an la nei ve tih ka hriat chuan ka thla a muang mahse beidawnna bak a awm leh chuang hian ka ring silo, ruang an chhar an tih hlekin kan chhungkua kan vir kual a, tun ah thla8 lai a bo tawh, ka tan chuan beisei ngam a ni tawh lo mahse ka beidawn san phal bawk silo. Ka Fa lo piang tur hi Pa tello a khawvel rawn hmachhawn tur chuan ka phal lo, ka phal theilo.

 

            Minlo hnawl pawh nise, Pa a nei ve a ni tih tal hria se ka duh a sin, apa awm na min zawh hun ah engtin nge ka chhan tak ang? Pathian hian min hrem em ni? Mi tam tak pawh Inneih hma in an chesual ve tho a mahse ngati nge ka chung ah hetiang hi a thlen tir bik. Tawngtai ngaihna pawh hi ka hre tawhlo.

 

          Thla 4 chhung kha chuan zantin mai nilo, engtik lai pawn Pathian ka au va, ka tawngtai a, ka mut chhung tih loh chuan Pathian kha ka kova mahse awmzia a awm silo a, tawngtai pawh ka bansan a, ka bei hi a dawng tak zet a ni.

                   Ka nau neih a lo hnai ve zel a, Class pawh ka kal tawh lo, tlai tin hian Mazualteii, Harsh leh Lucy hian min rawn tlawh thin, ka khawhar an hlau ngawih ngawih a, an theih ang tawk chuan min hnem a, weekend ah min chhuah pui bawk a mahse ka nun chhungril ruak erawh tumah hian min hnem tak tak lova, he thinlung a hmun ruak awm hi tuman min chhun khah sak theilo.

 

                  October 14 tlai ah ka Nu eirawng bawl ka pui a, a chawmhmeh then fai sa ka sil lai chuan ka tui bawm a rawn keh a, ka vawi khat na a lo ni bawk nen ka zam a, ka hlauthawng bawk, ka nu erawh alo paltlang hnu a nih avangin a chi ai miahlo, In ring lawk kan nih avangin muang chang silo hian kan thawmhnaw pack sa chu chi ai miah lovin a la khawm zung zung a, ka pa a call nghal bawk a.

 

                   Ka pum erawh ala na rih lo, Ka pa a rawn thleng a, hospital kan pan nghal a, kawng ah chuan ka Pum chu a rawn na ve riai riai tan a, mahse tawrh hreawm khawp erawh a ni lem lo, ka thian te pawh an lo hrilh avang chuan Hospital ah chuan an rawn kim thap hlawm a, Ka hmangaih, ka fa lo piang tur pa erawh chu tun thleng hian ala reh hmak si chu a nia.

 

               Ka na a zia deuh apiangin Alvin ka hre chhuak a, ka nau vei na nen, ka thinlung nan en, ava han hreawm thuah hnih tak em! Zan dar 11: 45 ah fapa ka nei ve ta, kum 21 ka pum hma in Nu dinhmun ka han luah ve chu a nia, Ka fapa an rawn pawm chu,ka in sum thei lo, ka kuah a, ka mittui a luang zawih zawih.

 

                 Darkar 7 zen zawn ka vei avang chuan ka chau ve deuh bawk nen, naute an lak hnu chuan ka mut chhuak lutuk chu ka muhil siai siai a, cabin a awm kan ni bawk nen, Ka nu in min riahpui a, nau  a rawn tah a hnute ka pek chhung tih loh chu ka muhil leh ngawih ngawih zel, ka mut that em vang te pawh a niang zing ah chuan ka harh kawk mai.

 

             Alvin nu in min rawn call a, rawn chhuk a tum thu a sawi a, ka hnial lem lo, a fapa neih chhun thisen hi hmuh ve a duh a, keiin ka lo dang thei hleinem. Neih pangngai a nei ka nih tho avangin Hospital ah pawh kan awm rei lo. Alvin nu pawh a tupa a han hmu chiah chu a in sum thei lo aw rawl chhuah hian a tap hawm hawm a, ka fapa hian mittui a ko chhuak dawn chauh chu a ni sia maw?

 

                    Ka fapa hming ah chuan ka lo sak sa tawh “Aldo” tih ngei mai chu a koh nan kan hmang a, Alvin nu in Lalpekhlua tiin a hming a sa ve bawk a, hun hi ava kal chak take m, Bawihte a pawh thla 5 a ni ve tawh reng mai, lawm a hre em em a, a nui duh si, Alvin nen an in zia hi Alvin hria apiang in an sawi thin, ka tan chuan lawm tur nge a nih a lawm loh tur tih pawh ka hrethiam lo a ni.

 

               Bawihtea ka bual lai chuan ka phone chu a rawn ri a, ka buai bawk nen chuan ka chhang lova, ka bual zawh ah ka call back mai ang ka tih lai chuan a rawn ri leh a, “Hector, ka phone kha lo chhang lawk mai teh, a pawimawh a niang” ka tih chuan phun nung nung chung chuan a chhang a, Game a khelh hi chuan tirh hi a har thin a nia, mahse Nau ka neih hnu ah erawh ka thu a awih em em a, min hnial zen zen tawhlo, chumai a nilo kan nufa bul ah hian a mu deuh chawt zel.

 

             Nau ka bual na ah chuan rawn tlan pheiin “U Alvin” a tawng te chu a bah deuh nuai a, hepa hian min bawl leh nge miin an/min rawn bawl zawk? Phone pawh chu kan ngaihsak lawk lo, nau ka hru hul a, ka nu in a thawmhnaw hak tur alo siam a, “U, ka ti tak tak a nia, U Alvin a nih hi” a rawn  tih chuan ka nu nen chuan phawk fe hian kan ding ngil awt a.

 

                  Phone chu ka chuh nghal a, nau chu ka nu ka pe sawk sawk a, “Hello” a reh vang vang a, Hector chu rum fe hian ka melh a, chutih lai tak chuan “Arelia” nilo, nilo, nilo, a ni theilo, ka beng chhe ri a ni em? a ni thei lo, chhan pawh ka chhang theilo khum ah chuan ka thu deuh hnawk a.

 

               “Arelia, keimah Alvin” ka beng chhe ri em ni? A aw chu ka Alvina, keima Alvin a ngei, Aldo pa ngei a ni tih chu ka hai mawlh silo. “Alvin” ka tawng zawm thei lo, ka nu chuan min rawn pan nghal a,ka phone chu min lak sak a, “Alvin, I la dam maw? I ni tak tak em? khawnge I awm? I tha em?” ka nu pawh chuan zawhna chu ava han ngah tak em!

 

                  “Tuna I awm na ah khan lo awm reng rawh,lo kal sawn miah suh ang che aw” ka nu pawh chu tlem chuan a chi ai ka ti dawn nge, tih hmasak ber tur pawh chu a hrelo, min rawn kuah a, Aldo chu a rawn fawp a, a kut chu nuai lum tum ni awm fahran hian a han nuai deuh nawk nawk a.

 

                   Kei pawh chuan engmah zawh ngaihna pawh ka hrelo a, zawh na chang ka hre hek lo, ka nu chu in hnuai lam ah chuan a tlan thla ve nghal a. Aldo rawn tap chuan min ti harh a, ka thlak sawk sawk a, in hnuai lam ah chuan ka tlan thla ve nghal a. Ka nu chuan ka pa alo be mek hi a nia.

 

                   Harsh ka call a, min chhang theilo, zir zawm zel a tum tawh rih loh avangin company ah a in hlawh ve a, Mazualteii ka call nghal bawk a, a ni erawh MA a zawm thung, tlai ban ah a rawn pen tur thu a rawn sawi nghal a. Lucy erawh Mizoram lam ah a awm thung, Alvin khatia a bo atang khan an chhungkua hian hmelma an neih ringin hmun danga awm an phal tawh lo kha a nia.

 

                   Ka pa pawh chawhnu dar 1 leh chanve ah in a rawn thleng a, thil awmzia ka nu chuan a sawi zung zung a. Tun ah Haryana ah a awm a a tih lai mek chuan ka pa chuan “Alvin nu I hrilh taw hem” a rawn tia, ka nu chuan a chal chu dawm pahin “Kei hi, ka ham haih vek a, hrilh nachang pawh ka lo hrelo reng reng” tih leh phone ban a rual  nghal a. Hector a kut ah nau ka dah nghal a, Lucy ka call a thil awmzia ka sawi chuan a rawn tah nuih hi a ni mai.

 

                     Tlai dar4 vel ah ka pa leh Malviya Nagar bialtu DSP leh Harsh Pa chu Haryana lam pan chuan an tlan chhuak ve nghal a. Ka lawm lutuk hi awm ngaihna pawh ka hrelo, ka fapa pawh ka ngaihtuah thei meuhlo, Alvin nu te pawh naktuk lam a rawn chhuk an tum a, an fapa thi tawh a an ngaih chutia ala dam chu atan a a lawmawm dan tur hi ka suangtuah ve thiam riai riai in ka hria.

 

                     Mazualteii rawn pen chuan min kuah a, ka lawm lutuk avang chuan ka tap hawm hawm a, chaw ei ve nghal tur chuan ka chelh lui tlat a, Alvin chawhmeh duh leh ngainat zawng chu ka siam suah suah a, ka phur a,ka helhhawlh hle bawk, ka nu in nau a chang deuh chawt a. Ka pa te nen chanchin kan in hrilh tawn reng a.

 

                         Zing dar 2 vel ah In an rawn lut a. Alvin ka hmuh chuan zah pawh ka sawi theilo, ka kuah a, ka tap hawm hawm a, ka khur der der a, a cher a, a in zuah buk em em bawk a, a dawldang si, ni hmu ngailo ang mai hian a vun te chu a dang lap a, a taksa chaklo lutuk nen chuan a tha chu a khur der der reng a. Ka pa chuan engmah zawt rih lo tur chuan min ti a.

 

                  Chaw ei ngailo ang mai chuan chaw te chu a ei buan buan a, hmana Alvin mi che fel tak ni thin kha a ni tawh lo, a che te reng reng chu a ti deuh buan buan a, Police thurawn angin A nu leh pa rawn thlen hun a Psychiatrist pan pui kan tum a, a in bual a, a in meh fai chuan ka Alvin ngei kha ka hmu let leh ta.

 

                   Kan fapa chungchang min zawt miahlo, Guest room ah chuan a mu a, In a rawn thlen atangin a tawng lo ti ila, chaw tui a tih zia bak engmah a sawi lo a ni ber mai. A taksa nei let reng chung si hian a rilru leh a thinlung ka nei tawhlo em ni? Eng tiang taka hreawm nge alo tawrh ang le? Aldo hian a pu a chhun a,  a tho hma thei khawp a, zing dar4 ah hi chuan a rak ruai ruai tawh thin, ka pa office kal tur hian a rawn hmu ziah thin.

 

                 Ka pa a hna a chawlh theih loh avang chuan office chu a kal a, ka nu, Alvin leh Aldo nen chuan kan awm a, mi hi a en leh deuh vung vung thin, min biak erawh a tum hran lo, ka nu in a biak chhuan tha deuh hian a chhang mai zel a, Aldo pawh rawn ngaihven a tum miahlo mahse a en duh hle. TV a en nileng a ni mai, ka nu nen chuan Kitchen atang chuan kan thlir a, engmah kan sawi lo.

 

                 Zan dar 8 vel ah Alvin chhungte chu Mizoram atang chuan an rawn thleng a. Alvin nu in a fapa a hmu chu a kuah a, aw rawl tawp hian a tap hawm hawm a, Alvin pa pawh a mittui chu a hru deuh fap fap reng a. Ka pa chuan thil awm zia chu a hrilh zung zung a, ka nu nen chaw ei kan siam a, Lucy chuan Aldo a lo awmpui thung a. Zawhna zawt tam lo tur leh thil thlen dan phei chu engmah sawi pui rihlo tur chuan kan in chah mawlh mawlh hlawm a.

 

                    A nu leh pa chuan Hotel lam a hruai an duh a, ka fapa pa alo ni ve nen keini lam chuan rem kan ti lo a, a dam hma chu heta awm tur chuan kan ti ve tlat a, an in thlahrung lutuk tih chu kan hria mahse, keimah min veng thawng vet ho bawk si nen chuan an rem ti ve ta hram a. Psychiatrist chu an panpui ta ngei a, kan Doctor pan pawh chuan a rilru nasa takin hliamin a awm a, tun ah mai chuan a nun phung pangngai a nei let thei lo ang, hun a mamawh a ni, a taksa ah eng harsatna mah a awm lo a ti.

 

                A in thlakna paih ka tum chuan a kekawr ipte hnung a a thil ah chu ka phawrh a, ka han en chian chuan Ka pa thlalak alo ni reng a, mak ka tiin min thawng em em a, engtin nge ka pa thlalak hi a neih/a ah daih le? Thil ni thei tur awm ang ka chhut pawh chuan a ngaihna ka hrelo tak zet a ni. Ka pa hi a dahbo tu a ni mai a ngem? A nih si  chuan ka pa a hmuh khan engvang a danglam miahlo nge a nih?

 

               Ni lo, a ni theilo, eng ang ngaihtuahna nge maw ka put le? Ka pa ngei ka ring chhe lutuk chu keimah leh keimah pawh hi ka in thiam theilo, “Ka pa, min ngaidam rawh aw” ka rilru chuan a ti mawlh mawlh a, Hector hian a hma a, a nel tehreng nen, a tawng tam lo na in , a mizia a dan tak em avang hian a ngaina tawhlo mai nilo in a bula awm te chu  a duh tawh mang hlek lo.

 

                 Kar khat zen zawn a nu nen kan hnena an awm hnu chuan Mizoram lam a hawn an tum a “Arelia, Alvin dam takin a rawn let leh a, in pahnih chungchang pawh a rilru lam te han dam deuh se kan ngaihtuah dawnnia aw, tun ah rih chuan engmah hmalak ngaihna a awm rih silo” tiin Alvin nu chuan inthlahrung takin ka kut vuan chung chuan min hrilh malh malh a.

 

                Kan hnen a an awm chhung khan a fapa hi vawi khat pawh a chawi lo, khawih pawh a khawih lo, mahse a thlek a thlek ve thin. Kei ngei pawh min be ngailo, kan biak erawh chuan fel tak hian min chhang thin. Ka rilru a na viau dawn thin na in ka ngaihtuah a kum2 dawn chhung khan eng harsat na nge a tawh kan hriat pui silo.

 

               An haw chhoh tak hnu chuan zan khat chu ka nu leh Pa bul ah Alvin kekawr a ka Pa thlalak awm chu ka sawi chhuak a “Khawi maw thlalak chu han la teh, ka lo en a nge” ka Pa in a tih chuan ka room ah chuan ka chho a, ka han la a, ka pa chu ka pe a, a han en vang vang a “hei chu kan client te nen meeting kan neihna hmun a nih hi, naktuk lam ah Police kan hriattir dawn a mi, kan chhungkaw tan pawh hian a himlo thei”

 

               Ka nu nen chuan kan hlauthawng khawp mai a, kan hlauthawng lutuk tih a han hmuh chuan “chutia hlauthawn tur chu a ni lo a mahse thil awmzia te kan hriat phah mai thei a sin” a tih pawh chuan kan hlauhna chu a nep chuang hauhlo, “Pa, hmelma  I nei em?” ka han ti tawng a. “Ka hriat theih chin ah sumdawnna leh mimal ang pawn mi pawi ka sawi ka hre hauh lo”

 

                 Alvin nu chuan nitin min rawn be thin a, Video call nen, Alvin pawh hma a sawn thu leh a taksa te pawh a that chhoh thu chu a rawn sawi thin a, hriat a nuam tak zet, a dam  a ni tih ka hriat na ringawt pawh hian ka thla ava han ti muang tak, ka fapa in Pa a han nei ve leh te chu ka lawm tak zet.

 

                  Ka nu leh pa in zir zawm leh ka duh chuan zir zawm leh tur chuan min ti nasa khawp mai a, mahse keimah hian ka chaklo vang nilovin, Nu dinhmun ka kova in nghat hi tlansan ka tum lo, ka theih ang tawk in ka fapa nen hun hman ka duh a ni. A chang chuan nu leh pa chawmhlawm a nau han pawm chu ka inthlahrung viau na a mahse tun ah rih chuan Aldo a la te bawk si nen tih theih ka nei rih silo.

 

                  Weekend apiang hian Mazualteii hian kan nufa in a hman a nih phawt chuan min rawn riah pui ziah thin a, zan khat a rawn riak chuan ka table drawer a Ka pa thlalak ka dah chu a rawn phawrh a “I pa chu I va ngaisang awm ve a, khawnge I nu thlalak ve” a rawn tih chuan a nui deuh uar uar bawk a. “Enteh Alvin rawn haw khan a thawmhnaw paih ka tum a, a kekawr ip te ah khan ka pa thlalak hi ka hmu a lawm”

 

                 “I pa I hrilh em?” a rawn ti ve nghal zat a, “Aw hrilh e, ka pa pawh  a hlauthawng deuh a niang, Police hnen ah hrilh a tum a, mahse ka nu nen kan dang tlat a” ka tih chuan “Tinge In dan a, in chhungkaw tan pawh a himlo thei a sin” min hlauhthawn pui ve lutuk. “Arelia, haw miahlo la maw, I pa hian in hnamhnawih na te hi alo nei reng a ni lo maw?”

 

                Ka phu deuh zawk a, mahse, Mazualteii pawh ka dem hran lo, kei ngei pawh khan ka pa khan in hnamhnawihna a neih ka ring ve tho kha a nia “Enteh a tantirh kha chuan keipawh khan ka ring ve tho a lawm, mahse ka pa va thlen khan A bike nen a awm tawhlo a lawm, kan in rawn kal a tum anga  chu chu amah hruai bo tu te hian an lo chang ta a niang”

 

                “Nia tiraw, Pa Henry  ka rinhleh ngawr ngawr vang ni miahlo in, Pawisa vanga ru bo nise, tinge A nu emaw nangmahni hnen ah pawisa an lo dil miahloh, amah dahbo tumna hrim hrim a ang ka ti tlat, an that bawk silo, ti hian rilru buai takin kum2 dawn hnu ah a rawn let leh a nia, chutah I phone number erawh ala hria a” a tih tak ah chuan ka thinlung sir leh lam ah hian Ka pa rinhlelhna chu a rawn awm leh a.

 

                    “Dam takin a rawn hawng a, chu chu tun ah chuan a tawk rih mai, hun a mamawh a nakin ah chuan thil awmzia te pawh a rawn lang mai tur ah ka ngai” ka tih chuan “nia tiraw, amah han biak tlak deuh phawt se” tih pah chuan min kuah a ka biang  ah chuan a rawn fawp zeuh a, ka ham haih tep a lawm. “Nang hi bialpa I nei a ni maw, I inla romantic riau mai, nge in zir nan min hman I tum?” A ni pawh chu a nui chhuak ve deuh hak a.

 

              Henu rawn riah hi chuan thawh ka hai ziah mai, zan lam ah hian min men pui rei thei lutuk a, zing dar6 leh chanve vel ah chuan ka nu chuan kan room ah rawn lutin min sawi deuh nawk nawk a “Arelia, rawn tho nghal rawh, hmanhmawh rawh” ka phu deuh zawk, ka fapa lah chu tukin chu thawh a hai ve a, a lo la mutui sek sek hle mai.

 

               Ka nu hlauthawng lutuk hmel ka hmuh chuan ka harh kawk mai, thawh ve nghal pah chuan “Enge a” min kai a, in hnuai lam ah chuan min chhuk thlak pui a, Police constable leh DSP chu an lo thu a, ka pa bul ah chuan “Pu Henry, Alvin bo chungchang ah hian engmah sawi tur I nei lo tak zet maw? Thian tha kan nia, thil awmdan engkim min hrilh la, puih che ka duh a ni”

 

              “Ka pa chuan ka hrelo takzet a ni” a tih chuan “A nih ngatinge A rawn haw hlim a, a kekawr ipte a I thlalak awm kha engmah I rawn report miahloh na chhan ka hre thei a ngem?” Ka pa pawh chu a meng kawk a. Ka nu chu alo in rawlh vat a “Enteh Pu David, rawn report a tum reng a, mahse kan nufa hian kan dang tlat a ni, Alvin ber dam takin a rawn hawng a, kan hlauthawng a ni”

 

              “Engmah inti sual lo a nih chuan engmah hlauhthawn tur a awm hleinem, thu zawh fiah turin Station lam ah kan han hruai phawt a nge” Ka nu chu a khur dar dar a, ka pa chuan an chhuah pah chuan “Engmah lo hlauthawng su aw, engmah a thleng lovang” tiin min la hnem tawk tawk a, keimahni zawk hian hnem tur kan ni a sin le.

 

                  Zui ve kan tum pawh chuan an rem ti lo a, Harsh te chhungkua kan call a, thil awmzia kan hrilh nghal zung zung a, Harsh leh A pa chu station lam ah chuan an phei ve nghal a. Ka nu hlauthawng lutuk chu a kut ah chuan ka hum a “Mate, I pa hi engtia ringhlel thei nge an nih zawk? A bo zan atang a theih tawp a chhuah a, I hriat loh hian e zan tam Alvin zawng hian zan ah a chhuak thin a sin”

 

              Thu zawh fiah mai mai tur ang pawh nise, rinhlelh a nih na chuan ka nu thinlung a ti na tak zet a ni. Alvin nu ka call a, ka pa an rinhlelh avanga thu zawh fiah tura Station lam a an lak thu te chu ka hrilh a, Alvin biak ka duh tih ka sawi chuan “Arelia, Alvin pawh a tha sawt lutuk mahse thu thin thawng lutuk hre rihlo turin Doctor in min tia, khatiang lam a hriat leh chuan amah hi a khawlo vek ang”

 

               Ka thinrim lutuk chuan “I fapa bo avangin ka Pa in a tuar a tunah mualpho takin Police in an rawn la a, thil awmzia ka zawh pawh I phal lo a maw?” ka hrawk deuh tuar hi a ni mai. “min biak tir rawh, khawngaih in, Ka pa tih a nih leh nih loh fiah ka duh, a bak a lak ah hian engmah beisei ka nei lo”

 

                 “Ka hrethiam a lawm, mahse a dinhmun hi ngaihtuah ve teh, eng harsat na nge a lo paltlang pawh kan hrelo a, tlem in zia deuh se, hma kan la dawn tih kan sawi ho vek tawh kha” A aw chu a hriam hraih a, nek luih a duh loh zia pawh  a hriat mahse tlawm mai ka tum lo. “Kan dinhmun hi min ngaihtuah pui ve zawk rawh, Ka pa in mualpho na leh rinhlelhna zawng zawng Alvin vangin a phur tih hi hre ve rawh”

 

                      Phone lah chu a dah daih lehnghal a, anni pawh chuan an lo ringhlel ve em  ni? Harsh chuan Station lam atang chuan min rawn call a, keimah pawh thu zawh fiah tura min rawn hruai tur thu a sawi leh a, engmah tihsual nei lo mahila ka hlauthawng lutuk chu awm ngaihna ka hrelo tak zet.

 

               Min rawn lam lai chuan nau hnute ka lo pe a, ka nu erawh a mumal tawh hlawl lo, a thut ngai chuan a thu a, a melh ngai a melh reng a, ka pa thawhpui, a partner leh a best friend ni bawk Deepak pawh a rawn kal ve nghal a, “Police Motor a phurh phei ai chuan keimahni kan rawn phei mai ang” ka Pa thianpa in a tih chuan ka pa thlalak Alvin kekawr ipte a mi ka lak chu ka keng tel ve gnhal a.

 

             Mazualteii leh Ka nu in Aldo in ah an lo awm pui a, Pu David (DSP) chuan min lo welcome thuai a, ka Pa thlalak ka ken chu ka pe ve nghal a, interrogation room ah chuan min luh pui a, ka hma ah chuan Pu David chu a thu a, Ka  ngaina em em thin a, mahse tun tum zet zawng ka ngaina lo mai nilo in ka hlau tak zet.

 

                   “Arelia, engmah hlauh tur a awm lo a, tihsual in neih vang a ni hek lo, mahse dan angin thil kan zawh fiah che u a ngai sia,min hrethiam dawn nia aw” a aw chu a dam thlap a, “Pa David, ka pa hian engmah tihsual a neilo a nia” ka kut chu a khur dar dar a, “tihsual a nei kan ti reng reng lo, complaint a rawn luh avangin thu kan zawt fiah mai chauh a lawm, hlauthawng suh”

 

                   A tawngkam chu nem hle mahse a mit fiah kak ah chuan zawhna tam tak min zawh chhuah ngei a tum tih a lang reng mahse kei hian engmah pek tur ka hrelo a ni, Ka pa hian thiamlohna a neilo tih zawng a ni ka hriat awm chhun chu. “Arelia, engmah zep nei lovin sawi la, I pa hian Alvin nen in in kawp chungchang ah hian sawi a nei ngai em, a duhlohna emaw a lan tir ngai em?”

 

                  “Nei lo, min pawmpui vek” ka mit ah tak chuan a melh kar a “Nau I pai tih I hriat khan hrilh turin a nawr lui che em, a kal dawn khan I nu hian a dang a, mahse a kal lui tiraw? A rawn ti leh a “ Ka pa hian engtik lai mahin min nawr lui ngailo a, ni e, a fanu hi min tan em em a, a thin pawh a rim, ka call tlang theih tawh loh avang khan mahse ka pa hian a ti na ngai lo ang, chu chu ka hming ka chian tluk zet in ka chiang a ni”

 

              “Anih ngati nge thlalak I hmuh khan I pa in Police hnen ah thlen a duh khan I nu nen khan In dan beh tlat na chhan?” he zawhna chhan na hi keipawh hian ka nei biklo “Ka hrelo, kan hlauthawng a ni, kan chung ah thil thalo a thlen ve mai kan hlauh bak ah, Alvin chung ah ngei pawh a thleng nawn leh thei a sin”

 

                   “Ka pa in a rawn report si loh chuan anih thlalak chungchang hi engtin nge in hriat?” ka tih chuan “Kha kha chu ka chhang theilo che, thil awmzia leh thil thlen dan kan chhui chhuah hun ah chauh ka la hrilh ang che u”