ARELIA – 8

                     Alvin chhungte leh Mazualteii bak in he thil hi an hre lo, ka ngaihtuah let a, Mazualteii tan chuan hrilh hman ngaihna a awm lo, nizan a ka hrilh a nia, chuan kan mu nghal a. Ka ring thei lo zawk, Alvin Nu a ni ngei ang le. Engtin nge a tih theih zawk, ti khawp khan kan buaipui a, ka fapa Pa a nih avang chauh pawhin engtin nge thu chiang hre miah silo leh keini chhung pawh min rawn miah lova a tih theih?

 

                    Ka tawt up up a, ka thinrim zia chu pui tak a ni mahse Station ah kan la awm avang chuan ka thinrimna pawh ka ti lang theilo, interrogation room atanga ka chhuak leh Ka Nu rawn lut tur chu kan in tawk a. Ka nu chu a hlauthawng tak zet tih a mitmeng leh a kut a hum tlat dan ah chuan ka hai lo “Mate, Aldo leh Hector chu In ah an awm aw”

 

                       Ka nu chu ka en vawng vawng a, Keimah vanga an buaina zawng zawng ka ngaihtuah hian hreawm ka ti tak zet a ni. Pu David bul ah chuan ka nu bula awm ve ka dil tlat a, a tawp ah chuan min rem tih sak a mahse engmah lo sawi ve lo tur chuan min ti a. In lam a haw mai pawh ka tum biklo, ka fapa pawh ka ngaituah thei lo.

 

                     “Marin, I fanu leh Alvin in kar ah hian inpa hian harsatna a siam ngai em?” ka nu chuan a lu a thing mat mat a, a kut khur der der chu hum sak ka han tum a, in khawih an phal silo. “In fanu in thlalak chungchang a sawi a In pa in Police hnen a thlen a tum khan engvang a phal lo tlat nge I nih min hrilh thei em?” Pu David te nen hian kan inti tha em em a, mahse a hna leh a mimal nun chu a dah hrang thiam tak zet tih vawiin hian ka hmu a ni.

 

                     “Ka hre biklo, ka hlauthawng lutuk a ni ber in ka hria” aw khur der der chuan ka nu chuan a chhang a “Engmah tihsual in neih loh chuan hlauh tur a awm hleinem, ka hnen ah pawh in rawn sawi thei a, mahse in sawi loh avang hian Alvin bo chungchang ah hian in chhungkua hi rinhlelh kai ber in nih phah a sin” a ti dam dap a.

 

                  Chhun dar12 vel ah chuan Ka pa ho chuan kan hawng a, kawng ah pawh chuan tumah kan in be lo, kan ngaihtuahna a hrang theuh in ka ring a ni, In kan lut a, ka fapa chu alo muhil a, a hmel ka en te hian ka thin hi a rim dawn tlat, ka hmangaih loh vang a nilo, Alvin ka tawng hi ka in chhir a ni mahse khawvel a thil hlu ber min pe a, engvangin nge ka thinrim na chu ka fapa chung a leihbuak tum nge maw ka nih le?

 

                    Ka nu leh pa chu an room ah chuan an lut nghal a, Mazualteii pawh haw ve a duh vang chuan Aldo chu ka la vat a, ka room lam ah ka chhoh pui a, kan nufa chuan khum ah chuan kan mu a, ka nu leh pa an rawn lut a, ka tho ve nghal zat bawk a. “Mate, engmah hlauhthawn tur a awm lo a, thil nihphung a nih vanga I Pa Davida pawn min zawt a nia, engmah rilru tihreawm na tur a awm lo a nia aw” Min hnem tu zawk ah chuan an la tang thei mawle, keimah vangin mualpho leh hreawm tam tak an tuar a.

 

                       Delhi chhuahsan rih lo tur a min tih avang chuan ka Pa New Zealand hna avanga a kal tum pawh a cancel a, a aiah a partner Deepak a kal dawn thung a. A thawhpui te pawn min hrethiam em em a, tihsual kan neih loh zia hre mahila, a finfiahna kan nei tlat silo a ni.

 

                 Zan khat chu Lucy hian min rawn call a “Arelia, pawi ka ti lutuk” ka hamhaih zawk, engvang chuan nge maw pawi a tih le? “Enteh hmanni thil thleng kha vawiin ah ka hre ve chauh a, Alvin te in ah ka va kal a, Alvin nu in min hrilh a, ka hre ve chauh a, engtin nge an rinhlelh theih zawk che u a, mak ka ti takzet a ni” a rawn ti bai bai a.

 

                     “Ka hre tawh biklo, enteh Lucy, ka rilru diktak ka hrilh ang che, Alvin hi ka hmangaih a, ka fapa pa a ni bawk a mahse a lak ah hian engmah beiseina ka  nei tawh lo hrim hrim, bak ah a Nu min tih dan zawng zawng leh kan chhungkaw thil paltlang ka ngaihtuah hian hmangaih viau mahila, a lak ah hian ka rilru a kir tawp, amah hian harh chhuah a duh tawhlo ni ber hian ka hria” ka ti chuai raih a.

 

                “Ka hrethiam lutuk che, Alvin nu awm loh a ka kal chang phei chuan, Alvin pawh hi ka ti hrep zel, ka hrawk deuh vak hi chuan thil hriat nei ni awm tak hian a rawn meng leh kawk zel, engtiang chiahin nge an lo nghaisak ka hrelo a, a rilru a pangngai thei tawh lo hi mak ka ti ngawih ngawih hei tun ah thla 3 lai a ni dawn tawh a, a chang chuan a ti der emaw te ka tia mahse a muhil hian I hming bak hi a lam ngailo a sin”

 

                Chu thu ka han hre zet chu ka thinlung kawngkhar ka khar ka tih tawh chu a rawn nghing deuh lawih a, mahse ka inti pachang lui hram hram a ni, “ka hming a la lam maw?” keimah ngei pawh chuan awih harsa ka ti, kan in a a awm chhung khan min hria ang khan a awm ngai silo mahse a fapa nen kha chuan min en leh vung vung zel kha a nia.

 

                  Kan thiamlohna engmah finfiah tur an neih tak si lo ah chuan zin khawthawn te pawh phalsak kan ni ve leh ta, ka pa in “thla 4 lai rilru hreawm leh pik takin kan awm a, Hector hi han exam zo se kan zin dawn em ni?”a tih chuan Hector engvak mah la hrethiam ve lo ta chu a phur ber ber ah a tang a, a duhna hmun ber an thlan tir chuan Ka Pi leh Pu   (Ka pa nu leh pa awmna) hnen ah Shillong lam a kal a duhthu a sawi a, midang pawh chuan kan pawmpui a.

 

                    Kar2 vel cham tur chuan kan in buatsaih a, Guwahati airport kan tum a, ka patea te nupa in min lo hmuak a, Alvin pawh an hmuh vawikhat na a nia, an lawm in an atchilh khawp mai, ka cousin te hi mipa thiau 4 an nia an te ber pawh ka rual lo, an puitling vek tawh a, an te ber tih loh chu hnathawk in state dang ah an awm vek a, a te ber erawh tun ah NEHU ah assistant Professor in a awm a, naupang ber tih tak ah nu leh pa kianga awm a duh tlat a ni.

 

                      Ka pi leh pu chuan min lo lawm khawp mai a, Aldo erawh mi duhloh a pe na em em a, kan chhungkaw bik tih loh chuan tuman an la theilo, Ka pi chuan “kan hmu chak ve em em che a, I sual peih puih em mai” a han ti leh thin “Pi, lungngai suh, a hmuh ngai loh vang che u nih kha, kan awm rei deuh anga a duh ve mai ang che u” ka tih pawh chuan an kum te alo upa ve tawh bawk nen a lawm vak lo tih chu ka hria.

 

                 Zan khat chu ka pa in “Arelia, khawnge I phone, hei Alvin-an a be duh che a nia” ka theihngilh tawh emaw ka tih laiin a hming an rawn lam ringawt pawh chuan ka lo la theihngilh loh zia tichiang tur hian ka thin chu a phu deuh dup dup a, Ka pa phone chu ka ban a “Hello” ka aw te chu a lai deuh rut hian ka hria, a reh vang vang a min chhang dawn tawh lo emaw ka tih hnu chuan “Arelia”

 

               Alvin, ka Alvin aw ngei kha a ni, kan chhungkaw chung a thil thleng avang khan vawi khat pawh hi a that leh that loh pawh ka zawt ngai tawh lova, a nu nen tlema kan lo in bakkaih ve deuh bawk nen khan a nu pawhin a tupa chanchin ka nu leh pa a rawn zawt te a nih loh chuan kei nen chuan kan in be tawh lo, Lucy hian a that leh that loh ka zawh kher ngai lo hian min rawn hrilh thin mahse, engahmah ngai lo ang hian ka awm tlat thin.

 

                     “Arelia” a rawn tih nawn leh chuan pawr fe hian “Enge I duh a” a nui hak a, hepa hi a harhchhuak ta em ni? Kan hun kal tawh ka chhui kir nghal ruak ruak a, kan in biak a, thinchhia min tih lutuk chang a, tihngaihna a hrelo, a nui huk thin te kha ka mitthla ah hian a rawn lang zut zut a “I lo la ngai reng a ni maw?” a nui tawh lo, a thutak khawp mai.

 

                     “Nang erawh I danglam tawh a lawm” ka ti deuh hmak a, min chhang mai lo, “sawi tur I hriat loh chuan ka dah dawn a nia” ka ti deuh hmak a, mahse ka thinlung chuan chu chu a ti tak tak lo, a laka ka la pangchan zia a ti lang mai chauh zawk a ni si a. “Arelia, min lo theihnghilh tawh a mi?” a rawn tih tak ah chuan thawk ka la deuh hak a.

 

                      “Ka theihngilh che hi I ring reng reng em ni, nangmah vanga mualpho, natna, hreawm ka tawrh zawng zawng te hi” a thiamloh a ni miahlo tih tu chu ka hria a lawm mahse ka hrelo ka hrelo, ka thinlung hi a vui tlat si a ni. “Min ngaidam rawh, nang leh I pum chhung a naute awm ka hriat avang chauh a la nung dam ve hram hram a, thihna kut vawtin min hmeh lai pawhin I hmel ka mitthla a, chuvang chuan ka la dam a sin”

 

                       Ka inthiamlo ve tep mahse ka hmangaih leh ka ngaih lutuk avang hian a thiam lohna ni miahlo ah pawh ka thinlung chhungril hi a vui tlat si, puhmawh na tur ka zawng ruai a, ka hmu chuang silo, a aw ri ka hriat khan ka thinlung zawng zawng hi a tuiral leh vek. Dam taka alo haw tih ka hriat khan ka lawm lutuk kha sawi ngaihna pawh a awmlo mahse dam reng chung si khan a thi tlat si khan chemte a vi hang mai hian ka thinlung hi a ti na em a ni.

 

                    “kan rawn hruai che a, kan hnen a kar1  I awm chung pawh khan min hrechhuak zo tawh chuang lo a nihkha, nangmah khan tumna I nei lo hrim hrim, I haw hnu ah pawh nitin ka rawn bia che a, video call nen lam, minlo hmangaih ve nilang chuan maw, ka tawrhna te hrethiam in I rawn that chhuah leh ka ring a sin, mahse beidawng lutukin min siam a” ka tap lo theilo.

 

                    “Min ngaidam rawh tih bak chu sawi tur ka neilo, naktuk ah flight ticket ka la anga, ka rawn chhuk nghal dawn, ka fapa pawh ka hmu chak tawh” kan boruak rit leh pik  churh tihreh a tum tih hriat tak hian ka fapa a tih lai te chuan a rawn nui deuh a. Shillong kan awm thu leh kar1 kan la cham tur thu ka sawi chuan “Ka nghak thei tawhlo, Shillong ah naktuk ah ka rawn chhuk dawn”

 

                 Mihring thu duh lutuk a nihna te, a tih tawh lam ti mai mai lo mi a  nih zia a rawn tilang thar leh chiang kher mai, en gang pawn dan tum ila, a rawn kal ngei dawn tih ka hria, mahse ahma ang tho khan tawhsual a tawk leh ang tih chu ka hlau tak zet. Kan in biak zawh vel ah chuan Lucy ka call nghal a thil awmdan chu ka hrilh a, Alvin pa te lo hrilh tur chuan ka ngen ta ringawt a.

 

                  Wednesday chawhnu dar 2 vel ah chuan doorbell chu  a rawn ri tleng tleng a, ka Nuteii chuan ava hawng a, thlalak vel ah a hmel a hmuh ve tawh avang chuan tunge a nih chu a hre nghal mai a. Ka sawi sa avang chuan mak pawh a ti hran lo, Alvin, Lucy leh Alvin pa leh a nupui chu an rawn lut a, keiin nau hnute ka lo pe mek a.

 

                 Hmana ka Alvin ngei kha a ni, a khabel hmul a zuah dan ngaiin ala zuah a mahse a lu erawh a zuah buk tawh lo, a met fai veng reuh a, T-shirt var a ha a, chu chuan Alvin diktak kha a ni tih a nem nghet tlat a ni, a chhan chu a Tshirt color duh ber avar a ni miau a. Ka nu leh pa leh ka pi leh pu chuan anlo chiau au nghal vat a, kei erawh ka melh ngai ka melh ngawt ngawt thung, biak ngaihna ka hre rihlo a ni.

 

                      Dam taka alo haw leh a nih chuan ti a sawi tur ka lo ngaihtuah zawng zawng te kha, thli thaw in hnahthel ro a chhem bo ang mai hian an bo duak a, Sahuai ni do an sawi ang mai chuan kun deuh chhur chuan ka melh ngai chu ka melh reng ringawt a, ka bul ah chuan a rawn thu thla ve a, min be mai bik lo, a fapa hnute hne lai chu a en ngawih ngawih a, a kuttang chu a khawih sak niap niap a.

 

                             Kan hnen a chaw ei ve tura ka pi leh Pu in an tih tlat avang chuan chaw ei tur chuan an in buatsaih a, Apa nupui te awm na khua a nih vangin zan lam ah erawh Apa nupui(Anu) te in lam a phei chu an tum a, Lucy chuan lak a han tum ngial a, Aldo erawh in a duh lo, a vawi khat hmuhna an nih vang chuan a ngaina lo mai nilo in ,a ban te tak te chuan alo vai sawn sak ve lawp lawp a, thinchhiat lam ah min chhun a, rak riai riai chung chuan an ban te chu a ben sak a, an ni lah thinrim a hnek in an lawm nasa mai si.

 

                       Zan riah kan ei kham a thleng te kan seng fel hnu chuan kan nufa mutna room ah chuan Lucy, kei leh Alvin chu kan in zui lut a, kan ngawi deuh vang vang a, khum ah chuan kan thu a, engmah sawi lo chuan a rawn tawlh hnai a min rawn kuah thut a, tal pawh ka tum biklo mahse kuah let erawh ka kuah let ve lo, “Arelia, ka hmu le hang che tih hi ka ring ngailo, ka khawih leh theih che pawh hi ka ring ngailo”

 

                    Mipa inti pa ve tak mahnise a hnuk a ulh a ni tih ka hria, Lucy lah a bang biklo, a lo in sut ve deuh fap fapa , kei erawh kum 2 dawn ka tah tawh vang nge ka hrelo, ka hul lutuk, ka hnuk reng a  ulh ve hauh lo mai. In ngaihtuah chhuak thut ni awm tak hian a inla hrang vut a. A aw a thian kharh kharh a, Lucy chu balcony lam chuan ava chhuak a, a phone chu a kheuh niap niap a.

 

                   Keini pahnih erawh khum ah chuan kan la thu reng a, ka kut chu a rawn hum a, a fawp leh vang vang thin. “Arelia I duh duh min zawt rawh” Ni e, zawh tur ka ngah tur zia pawh a hre ve bawk ang chu, a bo chen leh a dam loh chen hi damlo ve ilang a ni pawh hian zawhna a ngah ve dawn em a sin. “I duh duh sawi rawh” ka ti ringawt a, a chhan chu zawh tan dan tur leh zawh hmasak ber tur pawh ka hre lo a ni.

 

                   “Tun thleng hian ka chhungte bul ah pawh engmah ka la sawi lo, kha zan ka fa I pai a ni tih min rawn hrilh zan khan ka rin lawk chu ni tho mahse ka lawm zia kha hmeichhe kam tam pawh niila ka sawi chhuak thiam kher lovang, ka phone kha ka dah nghal a, helmet leh chahbi ka la a, in in lam pan a rawn kal ka tum nghal a. Lucy te in ah ka peng zuai a ka kalna tur min zawh pawhin ka phur lutuk tawh chuan ka chhang mumal lo tih chu ka hria”

 

                    A chawl deuh dat a, min en pah chuan a sawi chhunzawm leh a “Max hospital zawn ka thlen sawn hmeichhe pakhat hian min lo phar a, tlang mi a nih vangin ka ding ve mai a, kan piah lawk a, an Scooty a chhiat thu leh enpui tur chuan min sawm a. Enge ka hriat pawh ka hre biklo, nangmah hlir ka rilru a awm chung si khan ka ding ta tho va, an scooty bul ah chuan ka va kal a, a bul chiah ah chuan Van dum hi a ding bawk a”

 

                    A la feel vek aniang a in sehruh nasat dan ah chuan , a kut chu ka va hum nghal vat a, “A plug a mawm a nih ring in ka han check tur chu ka in ring hman lo, ka hmai an tuam a,ka hmai an tuamna ah khan enge an pawlh ka hrelo ka mit deuh sulh a, ka zawi nghal hnawk bawk , zan a rei deuh hlek tawh vangin mi veivak an tam lemlo, bak ah an scooty dahna kha a thim mai bak ah Van dum phen a nih vang khan miin min hmulo te pawh a ni thei, min lo hmu thei tho a mahse min tanpui duh lo a niang”

 

 

                    “Ka harh leh chuan Abandoned warehouse ah hian keimah in ka awm a, engtia rei nge ka harh loh pawh ka hrelo, min lo la phuar bet reng a, ka phone ka han dap dawn a ka ak lo tih ka hria, min man behna ah khan ka thlauh nge ni a, min laksak pawh ka hre tawh biklo, engtia rei nge ka lo mut pawh ka hrelo, Ka tui in tur min rawn pe tu chu Putar kum 78 vel hi a niin ka hria, ka awmna hmun ka zawh chuan min chhanglo a, dar zat leh ni zat ka zawh chuan chu hmun ah chuan ni 4 lai ka lo awm tawh tih ka hre thei”

 

                        “Chaw ei miahlo in ni 4 lai ka awm a, tinge min man ang le, heng lai daih daih ah vairam ah lehnghal sum duh vang em ni, ka bike kha chu an la ngei ang tih ka chiang mahse min that silo, min chhuah zalen chuang silo, ka chhungte number pawh min zawt ngai heklo, karkhat chhung ka ei tur tui bottle khat leh Bread slice 3 min pe a, mut an phal ngailo, an in duty chhawk a, ka lo mutthuk apiangin min chhuih tho nghal zel si.”

 

                        Ka ngaithla ngam tawhlo, “Alvin sawi tawh suh a tawk tawh” ka tih pawh chuan “Nilo e, min dem tak a I awm hi ka duh ngailo hrim hrim a, dawt ka sawi hek lo a thil nihdan diktak hriat ve hi I phu a ni, ka awm rei tial tial a, ka rilru hi a buai churh a thil ka ngaihtuah theilo, ni khat ah darker 1 bak ka mut an phal bawk silo, min that mai tur te chuan ka han ngen thin, awm zia a awm bawk silo.”

 

                      Putar tui min rawn pe thin tu chuan min khawngaih ngang a niang, min phelh a zan lai ah ka tlan chhuak a, thian za ho zu in bul ah ka van tlan a, phone hman ka dil a, a tir chuan an phal mailo, kawng ka bo thu ka sawi chuan phone chu min hman tir ve hram a. I number kha ka lo la vawng a, ka call che a mahse I pick up silo, ka rawn ti nawn leh dawn a, min rawn um leh a, ka tlan zel a, tha ka nei hlawllo.”

 

                   “Alvin khawngaihin sawi tawh suh, ka ngaithla ngam tawh lo” ka beng te chu ka hup a, “Okay, Okay ka sawi tawh lovang, mahse ka rawn tlan chhuah nawn leh khan mak tih deuh ka nei a sin” a lam ah chuan ka in her vat a “Ka hmuh sual nge ka hrelo, ka thiante, I thiante, Ka chhungte, I chhungte ho kha ka mithhla ah hian an cham reng a, kha vang te pawh kha a ni maithei, Mazualteii ang deuh kha ka awmna warehouse ah khan ka hmu a mahse a sam a tawi vek bawk si an hmel erawh a in ang ka ti viau tukverh atanga bihthla kha ka nia, tukverh darthlalang a lo bal bawk nen khan ka hmuh sual a ni maithei”

 

                   Ka phu deuh zawk a, ka meng kawk a, “Arelia, ka hmuhsual a ni thei a chhan chu nang chauh nilo, Hector thleng mai khan ka mitthla ah hian an rawn lang zut zut thin a sin” a tawrhna leh a hreawmna zawng zawng ngaituah chuan a awm ka ti hliah hliah a, ka kuah a, a hnung ah ka chul a, “hlau tawh suh aw, tun ah chuan I him tawh, kan him tawh” min chhang bik chuang lo chuan a lu chu a bu nghauh ngauh a.

 

                     A nu leh pa in an rawn koh  tak ah chuan, Lucy nen chuan an in zui chhuak ve a, pawn thleng chuan kan thlah a, naktuk lam a an in a chaw ei tur chuan kan chhungin min sawm ve a. Ei ngei tur chuan min chah lawm lawm bawk a. Khum ah chuan ka mu a, a harsatna tawh zawng zawng ka ngaihtuah , kum khat dawn thil ei mumal lo leh mut pawh mu tha lovin a awm a, engtin nge ala dam si, a ni hi a la dam chiang lo anga, a thil tawn hi a hrethiam lo zawk em niang?

 

                           A rawn let hnu a a taksa pawr leh chhe zet erawh kha chu kan hmuh hmaih hauh silo. Ka ngaihtuah let neuh neuh a, Alvin min rawn call ni, kan va hruai ni khan Mazualteii chu a nu nen in check up in hospital an kal ngei tih ka hre bawk si. Alvin an va hruai na hmun lah kha Haryana a ni bawk si, lo va kal ve nise chuan kan in a a rawn thlen theih dan tur kha ka ngaihtuah thiam lo, ka thiantha ber a ni a, engti kawng mahin tiang chu a ti lovang, Kan naupan lai atanga in kawm tawh kan nia engtik lai mahin a sam a tawi ngai hek lo.

 

                 

                      Keini chhung leh Ka pi leh Pu, ka nuteii te chhungkua nen chuan Alvin te thlenna lam pan chuan tlai  dar3 vel ah chuan kan chhuak phei ve a, an in kan thlen chuan min lo lawm der thiam em em a, Aldo lak an han tum lah chuan ani a lo inti fing ve tawh nen tumah a duh silo, Apa tak ngial pawhin a la theilo, kan nufa chuan kan in pawm reng a, Alvin chuan kan kalna piang ah min zui a, a han lawm erawh chuan a nui ang duai duai a, a han la dawn chiah a a tap dawn ti tih zel bawk si.

 

                        Tlai chaw kan ei hma chuan Alvin pa chuan hunserh hman pahin thil awmdan a han sawi a, “Pu Henry te chhung chung ah hian ngaihdam dil kan ba nasa hle a ni, keimahni chhungkua avanga harsatna an tawh zawn zawng te (Police station a thu zawhfiah tur a kan kal kha a nia a saw) hming chhiatna an tawh zawng zawng te kha pawi kan ti takzet a, siam that theih a ni tawh silo, an mi ngaihdamna sang ber ka dil tak meuh a  ni.

 

                   Ni e, kha thil avang khan News paper phek tin kan luah tih theih tur khan a hunlai khan kan awm a, Ka pa mi naran alo ni bik lo nen,  a sumdawnna lam pawhin tlem chuan thla 2 chhung kha chu a tuar ve deuh reng a ni. Alvin a lo that chhuah leh tak ah chuan kan nufa leh Alvin awm dan tur te pawh zan in hian rel fel ila tiin thu a ti tawp zui nghal bawk a. Chaw kan han ei a, Alvin sual bawk nen chaw ei pui a harsa viau, ka nu nen chaw kan in ei chhawk ta ringawt a.

 

                       Ka nu chaw ei chhung chuan  Alvin chuan kan nufa chu min zui deuh chawt a, ka nu a ei kham ta maw tih ah Alvin nen chuan kan ei ve a, “Alvin nizan khan ka ngaihtuah a, enteh ka thiannu a nih avanga ka tan pawh ni miah lovin Mazualteii a ni thei tlat lo a chhan chu ka pa ten an rawn hruai ni che khan a nu check up in hospital ah an awm a” ka han tih chuan a chaw bar lai chu a tawp chat a “Engmah ngaihtuah vak vak tawh suh, dam tak in ka lo let leh a, ka sawi ang khan ka hmuhsual a ni ang ka tih tawh kha”

 

                   “Alvin ka rilru natna ber chu maw, I harh tha deuh tawh tih ka hria a, Lucy tang in , Police in kan chhungkua a rinhlelh thil thu a min lak khan thil awmzia sawi fiah la ka duh mahse I nu khan kan biak che a phal tlat lo kha chu na ka ti takzet, I hreawm tawrhna kha I sawi hma kha chuan ka hrethiam, tun ah pawh a hreawm dan tur hi a nihna angina ka hrethiam chuanglo mahse” ka sawi zawm mai thei tawhlo.

 

                  “Ka hrethiam a lawm, khavang reng khan kan in pawh ka chhuah san a lawm” ka chaw bar lai ka tawp chat, amah chu ka va en nghal a, “Lucy khan thil awmzia min hrilh a, ka rawn call leh che u khan tuman in la ngai tawh silo, hreawm ka tih zia hi sawi ngaihna ka hrelo tak zet a ni, ka nu nen kan in hau nasa a, chuan zan ah ka chhuak a, ka pa te in lam ah hian ka phei tawp a lawm, tun ah rih chuan let leh tumna pawh ka nei tawh rih lo”

 

                  Ava han hreawm teh nuai tak em ve le! Keimahni chhungkua avanga an nufa an han inthen leh an han in hmu thiamlo chu hreawm ti viau mahila, min tanpui a tum ve miah lo kha tun thleng hian ka thinlung hian Alvin nu kha a la dem tlat si  a. Kan ei kham chuan Aldo chuan minlo ngen leh nghal a, ka ban dawn lai tak chuan ka phone a rawn ri a, ka han chhang a “Hmelchhephak, in lo haw dawn tawh em?

 

                Mazualteii chu a rawn tawng lang lang a, “Aww ti ila, karleh lam hian kan rawn haw ve tawh ang, min ngai leh tawh a ni maw?” ka tih chuan nui ar ar chung hian “Awii a teuhlo lutuk, Sas thar ka nei a, ka hrilh chak tawh tawp che” Aldo lo rak ve chhen bawk nen chuan kan han in paw leh rih a. “I la awm em? ka chhas thar nei chu I thik a mi?” A rawn tih chuan ka nui deuh hak a.

 

                      “Nu leh nula chu kan in ang thei tawhlo, mahse ka lawmpui khawp mai che, ka hmu ve chak teh mai nia aw, kan lo haw vel ah in pahnih in chaw in rawn ei ang” ka tih zawm nghal zat a. Kan haw hma chu Alvin pawh cham ve a tum tak na in Apa in rem a tih loh mai bak ah keimahni pawh hian kan la hlauthawng a chuvang chuan haw chho rih tur chuan kan ti lui tlat a.

 

                  Kei kha chua BA kha ka zo hman a, Alvin erawh a zo hman ta silo, BA tal zo rih tur leh hna te nei ve se chuan chhungkaw din lam pawh ngaihtuah that leh chu kan nu  leh pa te chuan tha an ti tlang ve ve a, Alvin erawh a ngaihdan a ni chiah lo, mahse ama bul ah pawh ka tia, “Alvin enteh, in harsa lo tih ka hria mahse nangmah ngeiin thawh chhuah I neih loh chuan I pa emaw I nu emaw sum hmanga chhungkua enkawl I tum a nih chuan engtik ah mah ka pawm thei dawn hauh lo che a nia, eng hna pawh thawk rawh pawi ka ti lo mahse nangmah ngeiin chhungkaw enkawlna tur sum chu I thawk chhuak tur a ni” ka tih tak ah chuan lungsi vak lo chung chuan min hnial ta bik lova.

 

                  Kan college lo ka ve na Principal an lo be tawh a, final year a nih avang leh thil dang vang nilova vanduai vang a nih vang chuan semester 2 (5^th leh 6^th Sem) chu kal zawm leh an lo dil a, Kan principal pawh in lo khawngaih in a phal sak a, mahse ka hrelo, ka hlauthawng a ni, kei ang bawkin Apa chuan a hlauthawng tak zet a. Ka nu leh pa pawh chuan Apa rilru chu hrethiam in kum khat chhung chu kan in a awm tur chuan an ti ta a.

 

                Mi ngaih ah chuan thil mawi a ni hauh lo, mahse kan dinhmun avang chuan thil mawi leh mawi lo zawng thei pawh kan ni tawhlo. Kan hnen a awm tur a nih avang chuan ani pawh Mizoram lam ah chuan phur takin a haw ve a, keini pawh Delhi lam kan pan ve tawh a, kan thlen atanga ni 5 na ah chuan Mazualteii chu chaw ei ah ka sawm a. A chhas thar lo hruai ngei tur a ka tih chuan a nui deuh ruh ruh a. “Ka zak deuh a, ka thianpa thiannu kan rawn sawm tel ve dawn a nia” a tih chuan ka nuih a za ngang mai.

 

                   A vawi khat neihna a ni bawk a, kan lak ah pawh ala zak chu a nia, henu hi chu a cute thei chiang a lawm. Tlai ah ka nu nen eirawng kan bawl lai chuan Mazualteii te thian pathum chu an lo lut a, min han in hmelhriat tir hnu chuan Living room ah chuan kan thu a, Hector leh Aldo an lo in awm thung a. A thiannu chu mizo ve tho tun ah First Year zir tan ve hi a lo nia, an pa erawh Mizo a nilo, eng hnam nge tih erawh amah a awm ve vang chuan ka zawt ngam lo thung.